Yika Wanangana wa Zambi Muukalinga?

Ha mutwe wapalika, twashimutwinangaho chilayi chize Yesu ambile. Chilayi chacho chinasolola zwalala ngwo, Wanangana wa Zambi unayulu mu malilu, nawa ngwo Yesu Kristu mwe Mwanangana.

Mbimbiliya yinambe ngwo muze Yesu amuhele wata iye yahuma Satana ni andemoniu jenyi mu malilu. Haliapwila, Satana ni andemoniu jenyi e anayulu hano hashi, kashika hashi hanalingiwa chinji yuma yipi kukatuka ha mwaka 1914.—Usolwelo 12:7, 9.

Chipwe ngwe hano hashi yuma yinapihi, nihindu Yesu, Mwanangana mu Wanangana wa Zambi kanalingi yimwe hanga akwase atu hashi heswe. Mumu lia mulimo wakulongesa hashi heswe uze Yesu ambile, atu anji kanalilongesa Mbimbiliya ni kukaula yize analilongesa ku mwono wo. (Izaia 2:2-4) Atu anji kanalilongesa chize mapwa ni uwahililo mu usoko, kupwa ni nyonga lialita hakutwala ku mulimo ni mbongo. Atu jacho kanalilongesa chize mayuka haliapwila ni kululieka mwono wo hanga akatwame ni sambukila hano hashi mu Wanangana wa Zambi.

Chipwe ngwe Yesu kanayulu mu malilu, hashi machiyulaho kuli atu. Alioze, Zambi hanalweze Yesu ngwenyi: “Yula yena hakachi ka akwa kole je.” (Samu 110:2) Kwasala hakehe, Yesu manongesa akwa-kole eswe ni kuneha uhwimino kuli waze akwononokena Zambi.

Ha mashimbu jacho, Wanangana wa Zambi mukalinga yuma yino:

• Kunongesa uwayilo wa mahuza. Mayingeleja eswe waze akulongesa mahuza hakutwala kuli Zambi ni kumwesa atu lamba makaanongesa. Mbimbiliya yinatese uwayilo wa mahuza ngwe umwe pwo chikoi. Kunongesa cha uwayilo wa mahuza muchikaneha yinyengo kuli atu anji.—Usolwelo 17:15, 16.

• Kunongesa kuyula cha atu. Wanangana wa Zambi, muukafwenya mawanangana eswe ja atu.—Usolwelo 19:15, 17, 18.

• Kwonona atu api. Yika muyikalingiwa kuli waze akulinga yuma yipi nawa keshi kwononokena Zambi? Mbimbiliya yinambe ngwo: “Yingulungulu kumakaateta mu chifuchi.”—Yishima 2:22.

• Kushiha Satana ni andemoniu jenyi. Satana ni andemoniu jenyi makaasa mu jondo muze kechi “kapiangula nawa mavungu.”—Usolwelo 20:3, 10.

Yuma yika yipema yize makazuka waze akwononokena Wanangana wa Zambi?

Amu anayula mu malilu ngwe Mwanangana, Yesu makalinga yuma yize manguvulu ja atu keshi kuhasa kulinga. Iye makayula hamuwika ni atu 144,000 waze hanasakula hano hashi hanga akayule mu malilu. (Usolwelo 5:9, 10; 14:1, 3) Yesu makasa tachi hanga upale wa Zambi ulingiwe hano hashi. Mba yika Wanangana wa Zambi muukalingila atu hano hashi?

• Muukahwisa misongo ni kufwa. “Niumwe watungako mamba ngwenyi, Ngunayiji,” ni ‘kufwa kuchichi kapwa ko nawa.’ —Izaia 33:24; Usolwelo 21:4.

• Muukaneha sambukila ni kutwama kawape. “Ana je eswe mapwa ni uhwimino wunji,” nawa ‘mutu mweswe matwama mushi lia mutondo wenyi wa uva hanji mushi lia mutondo wenyi wa mukuyu; niumwe maavwisa woma’ wakuhi.—Izaia 54:13; Mika 4:4.

• Muukahana milimo yipema kuli atu. “Waze natongwele makawahilila ni milimo ya moko jo. Kechi kahondangana mokomoko.”—Izaia 65:22, 23.

• Muukalulieka hashi heswe. “Puya ni chifuchi chumu muyikawaha; kango muyikawahilila ni kutemuna yitemo ngwe kawalangaza.”—Izaia 35:1.

• Muukalongesa atu yize malinga hanga azuke mwono wa mutolo. “Uno we mwono wa mutolo, hanga akanyingike yena mwe Zambi wamwenemwene umuwika, ni Yesu Kristu yoze yena watumine.”—Yoano 17:3.

Zambi kanazange hanga uzuke yiwape yacho. (Izaia 48:18) Mutwe muusulaho, musolola yize watamba kulinga mba ukazuke yiwape yino ya kulutwe lia matangwa.