MWONO WA AKWA-KRISTU
Yehova Kakutukwasa Muze Tuli ha Mashimbu Akalu
Ha matangwa wano akusula, twakupalika mu yuma yikalu. Ha mashimbu amwe, twakulivwa ngwe yeseko yimwe yili yikalu kuyikumba. Alioze, nyi twanunga ni kukundama kuli Yehova, iye matukwasa kunyongonona chipwe muze tunapalika mu yuma yikalu chinji. (Iza 43:2, 4) Kuchi mutuhasa kukundama kuli Yehova muze tunapalika mu yeseko?
Kulemba. Muze twakulemba kuli Yehova ni mbunge yetu yeswe, iye kakutwaha sambukila ya ku mbunge ni tachi hanga tununge ni kunyongonona.—Fwp 4: 6, 7; 1Te 5: 17.
Kukunguluka. Musono twakufupiwa chinji kulia cha ku ufulielo ni kupwa hamuwika ni mandumbu jetu ha kukunguluka. (Hep 10:24, 25) Muze twakulilulieka hanga tuye ku kukunguluka ni kuhana makumbululo, twakuyuka chinji ni ukwaso wa Yehova kupalikila mu spiritu yenyi yisandu.—Uso 2:29.
Mulimo wa kwambujola. Muchipwa chashi kulihulikila ha yuma yipema nyi mutulihana chinji mu mulimo wa kwambujola. Chikwo nawa, mulimo wa kwambujola wakutukwasa kukolesa usepa wetu ni Yehova ni mandumbu jetu.—1Ko 3:5-10.
SOLOLA CHINEMA, YEHOVA KANGUTAKAMISHINE, MBA NUKUMBULULE YIHULA YINO:
Yika yakwashile Malu kukundama kuli Yehova muze apwile ha mashimbu akalu?
Chizechene ngwe Malu, kuchi maliji a Samu 34:18 mahasa kututakamisa ha mashimbu akalu?
Kuchi chilweza cha Malu chinasolola ngwo Yehova kakutwaha “kuhiana cha tachi” muze tuli ha mashimbu akalu?—2Ko 4:7