Kulinunga Chingunu ha Kwiwuluka Kufwa cha Yesu

1, 2. Ha mwaka 2018, chiwanyino chika muchikatuchinga hamuwika, nawa mumu liaka? (Tala chizulie ha uputukilo.)

HA TANGWA 31, lia Março ha mwaka 2018, atu hashi heswe makaya ha chimwe kukunguluka chize chakulingiwa kamuwika ha mwaka. Ha kutoka cha tangwa Yela ja Yehova ni atu akwo nawa anji makalikungulula hanga ewuluke chitapo chize Yesu ahanyine hali yetu. Hita mwaka, Chiwanyino cha Kwiwuluka Kufwa cha Yesu chakununga atu mujila yalipwila, kuhiana kukunguluka cheswacho hano hashi.

² Yehova ni Yesu kakuwahilila chinji muze akumona tununu twa atu hita ola maya ha kukunguluka chacho chilemu, chize chakulingiwa hashi heswe. Mbimbiliya yinasolola “mbunga yinene, yize niumwe mahasa kwaalula, aku mavungu eswe, ni ku minyachi yeswe, ni kuli atu eswe, ni ku malimi eswe” kanakololoka ngwo: “Ulamwino wa kuli Zambi yetu, yoze watwama ha ngunja, ni kuli mwe Mwana-panga.” (Usolwelo 7:9, 10) Cho kuwaha, ha kumona hita mwaka tununu twa atu kanewuluka kufwa cha Yesu, hanga ahalise Yehova ni Yesu ha yuma yinene yize akutulingila!

 3. Yihula yika mutukumbulula ha mutwe uno?

³ Mu mutwe uno, muwanamo makumbululo a yihula yino yiwana: (1) Kuchi mutulilulieka ha Chiwanyino cha Kwiwuluka Kufwa cha Yesu, nawa yika mutuzukako hakupwaho? (2) Mu mutapu uka Chiwanyino cha Kwiwuluka Kufwa cha Yesu chakutukwasa hanga tulinunge? (3) Kuchi hita umwe wakuli yetu mahasa kukwasa kulinunga chetu hanga chikole? (4) Chiwanyino chakasula cha Kwiwuluka Kufwa cha Yesu, shimbu lika muchikalingiwa? Nyi muchikalingiwa, mba shimbu lika?

 4. Mumu liaka chili chilemu kuli yetu kupwa ha Chiwanyino cha Kwiwuluka Kufwa cha Yesu?

⁴ Mumu liaka chili chilemu kuli yetu kupwa ha Chiwanyino cha Kwiwuluka Kufwa cha Yesu? Chikuma chitangu chili ngwo kulikungulula chapwa jila yize twakuwayilamo Yehova. Kashika mutuhasa kupwa ni shindakenyo ngwetu Yehova ni Yesu kakumona tachi jize twakusa hanga tuye ha kukunguluka chino chilemu ha mwaka. Tunazange hanga Yehova ni Yesu amone ngwo mutukapwa ha Chiwanyino chacho, alioze mutukahona wika kupwaho nyi mukulingiwa chimwe chize muchitukinda. Nyi yitanga yetu muyisolola ngwo kukunguluka chetu chikwete ulemu ku mwono wetu, mutuhana uhashi kuli Yehova hanga afunge jina lietu mu ‘mukanda wenyi wa kwiwuluka.’ Mukanda wacho kakuuvuluka nawa ngwo “mukanda wa mwono.” Mwemuze muli majina ja waze eswe Yehova anazange kuhana mwono wa mutolo.—Malakia 3:16; Usolwelo 20:15.

 5. Ha jimwe poso shimbu kanda twiwuluka kufwa cha Yesu, kuchi muhasa ‘kulieseka yena mwene nyi uli mu ufulielo’?

⁵ Ha jimwe poso shimbu kanda tulinga Chiwanyino cha Kwiwuluka Kufwa cha Yesu, mutuhasa kusa amwe mashimbu hanga tulembe ni kunyonga kanawa ha chize uli usepa wetu ni Yehova. (Tanga 2 A-Korindu 13:5.) Postolo Paulu kalwezele akwa-Kristu ngwenyi: “Liesekenu yenwene nyi nuli mu ufulielo.” Kuchi mutuhasa kuchilinga? Mutuhasa kuchilinga ha kulihula ngwetu: ‘Shina nakufuliela pundu ngwami, uno uli ululikiso uze Yehova asakwile hanga ulinge upale wenyi? Kutala nakusa tachi hanga ngwambujole ni kulongesa atu sango lipema? Shina yitanga yami yakusolola ngwo tuli ha matangwa akusula nawa kuyula cha Satana kwasala hakehe chihwe? Ufulielo wami kuli Yehova ni Yesu unachikola ngwe chize wapwile ku uputukilo? (Mateu 24:14; 2 Timoteu 3:1; A-Hepreu 3:14) Kunyonga ha makumbululo a yihula yino muchitukwasa hanga ‘tunyingike’ kanawa chize ufulielo wetu uli.

 6. (a) Uhashi uka tukwete mba tuzuke mwono wa mutolo? (b) Kuchi umwe mukulwana akulilulieka ha Kwiwuluka Kufwa cha Yesu hita mwaka, nawa kuchi mutuyuka nyi twachilinga?

⁶ Jila yimwe yize muhasa kululiekelamo Kwiwuluka Kufwa cha Yesu, yili kutanga ni kupukuna ha yikuma yize yinalumbununa ulemu wa kukunguluka chacho. (Tanga Yoano 3:16; 17:3.) Mba tuzuke mwono wa mutolo, tukwete uhashi umuwika, wa kunyingika kanawa Yehova ni kufuliela muli Mwanenyi, Yesu. Mba tulilulieke ha kwiwuluka Kufwa cha Yesu, mutuhasa kulilongesa yikuma yize muyitukwasa kukundama kuli ayo. Yino ye akulinga umwe ndumbu yoze wazata ngwe mukulwana wamu chikungulwila ha miaka yinji. Hakupalika cha miaka iye kakusakula mitwe ya Kaposhi wa Kutalila yize yakulumbununa Chiwanyino cha Kwiwuluka Kufwa cha Yesu ni zango lize atusolwele kuli Yehova ni Yesu. Ha jimwe poso kulutwe lia Kwiwuluka Kufwa cha Yesu, iye kakutanga nawa yikuma yacho ni kunyonga kanawa ha ulemu wa kukunguluka chacho. Ha mashimbu amwe, ha yikuma yacho kakuwezelaho yikwo. Iye nawa kakutanga ni kupukuna ha yisoneko yize yakwiza ha Kwiwuluka Kufwa cha Yesu. Mukulwana yono ngwenyi, kulinga chino chakumukwasa kunyingika yuma yaha hita mwaka. Chahiana ulemu, yize akulilongesa yakumukwasa kuzanga chinji Yehova ni Yesu. Ni yetu nyi mutulinga chocho, mutuzanga chinji Yehova ni Yesu. Nawa mutusakwilila chinji ha yize ayo alingile, ni kuyuka ha kupwa ha Chiwanyino cha Kwiwuluka Kufwa cha Yesu.

 7. (a) Ha yika Yesu alembele ha ufuku utangu wa Chiwanyino cha Mwene cha Ufuku? (b) Yika yinasolola ngwo Yehova kakumbulwile kulemba cha Yesu?

⁷ Ha ufuku utangu wa Chiwanyino cha Mwene cha Ufuku, Yesu kalingile chimwe kulemba chalipwila. Iye yalemba hakutwala ku kulinunga chingunu chize iye ni Tato akwete. Yesu nawa yalemba ngwenyi tumbaji twenyi eswe no te mapwa ni kulinunga chacho. (Tanga Yoano 17:20, 21.) Yehova kakumbulwile kulemba chize Mwanenyi wa zango alingile. Kukushi nawa kukunguluka chikwo chize chakununga Yela ja Yehova kuhiana Chiwanyino cha Kwiwuluka Kufwa cha Yesu. Ha tangwa liacho, hashi heswe tununu twa atu amu yifuchi ni yikowa yalisa kakukunguluka hamuwika ni kusolola ngwo kafuliela muli Yehova ni muli Mwanenyi. Ku yihela yimwe, chakupwa chikalu atu aku minyachi yalisa kupwa hamuwika hanga awayile Zambi, nyi machilinga, akwo kakuchimona ngwo hi chipema ko. Alioze Yehova ni Yesu keshi kunyonga chocho. Kuli ayo, kulinunga chetu ha Kwiwuluka Kufwa cha Yesu, chapwa chipema.

 8. Sango jika Yehova ahanyine kuli Ezekiele?

⁸ Yetu kutushi kukomoka ha kulinunga chino tukwete, mumu tuli atu ja Yehova. Yehova kambile kulinunga chino ha sango jize ahanyine kuli Ezekiele. Iye yalweza Ezekiele hanga ande mitondo yaali, umwe “hali Yunda,” ukwo “hali Yosefwe” ni kuyisa hamuwika yikapwe mutondo umuwika. (Tanga Ezekiele 37:15-17.) Mu Kaposhi wa Kutalila wa Julho 2016 ha chikuma “Yihula ya Waze Akutanga Mikanda Yetu” kanalumbununa ngwo: “Kupalikila muli profeta Ezekiele, Yehova kambile ngwenyi atu jenyi te mafuna mu Chifuchi cha Chilakenyo ni kupwa nawa vungu limuwika lialinunga. Uprofeto yiwamba nawa ngwo, waze akuwayila Yehova ku matangwa akusula no te malinunga ni kupwa atu amuwika.”

 9. Hita mwaka, ha Kwiwuluka kufwa cha Yesu, kuchi twakumona kulinunga chize hanambe mu uprofeto wa Ezekiele?

⁹ Kukatuka ha mwaka 1919, Yehova chitangu hakehe-hakehe yalulieka ni kukwasa akwa-Kristu akuwayisa hanga alinunge. Ayo kapwile ngwe mutondo “hali Yunda.” Hachino waze ali ni kutalatala cha kutwama hano hashi ku miaka yeswe yaputuka kulichinga ni akwa-Kristu akuwayisa. Wano ali ni kutalatala cha kutwama hano hashi kali ngwe mutondo “hali Yosefwe.” Yehova hanalakenya kuchinga mitondo yino hanga ‘ayinunge hamuwika’ ku kwoko lienyi. (Ezekiele 37:19) Iye hanachingi akwa-Kristu akuwayisa ni “mapanga akwo” hanga apwe “chendo chimuwika.” (Yoano 10:16; Zekaria 8:23) Musono, yizavu yino yaali yalinunga hamuwika ni kuwayila Yehova. Nawa ayo kakwete Mwanangana umuwika, Yesu Kristu, yoze anavuluka mu uprofeto wa Ezekiele ngwo “kavumbi kami Ndawichi.” (Ezekiele 37:24, 25) Hita mwaka, muze twakulikungulula hamuwika hanga twiwuluke kufwa cha Yesu, twakumona kulinunga chetu ha yizavu yino yaali atongwola mu uprofeto wa Ezekiele. Mba yika hita umwe wakuli yetu atamba kulinga hanga afunge ni kukolesa kulinunga cha atu ja Zambi?

10. Yika muyitukwasa hanga tukolese kulinunga chetu?

¹⁰ Jila yika yitangu yize muyitukwasa kukoleselamo kulinunga chetu? Yili ha kusa tachi hanga tupwe akwa-kulikehesa. Muze Yesu apwile hano hashi, kalwezele tumbaji twenyi ngwenyi, ayo katamba kupwa akwa-kulikehesa. (Mateu 23:12) Atu waze keshi kuwayila Yehova kakulimona ngwe kali alemu chinji kuhiana akwo. Alioze yetu nyi twalikehesa, mutuvumbika mandumbu waze akwete yiteli mu chikungulwila ni kwononokena usongwelo wo. Nyi twalinga chocho, mba mutupwa ni kulivwashana mu chikungulwila. Chahiana ulemu, nyi mutupwa akwa-kulikehesa, mutuvwisa Zambi kuwaha, mumu iye ‘kakulimika ni akwa-kulisuta, alioze kakuhana vumbi kuli akwa-kulikehesa.’—1 Petulu 5:5.

11. Kuchi kunyonga kanawa ha mbolo ni vinyu ya Chiwanyino cha Kwiwuluka Kufwa cha Yesu chakukolesa kulinunga chetu?

¹¹ Jila yika yamuchiali yize mutuhasa kukoleselamo kulinunga chetu? Yili kunyonga kanawa ha ulumbunwiso wa mbolo ni vinyu. Chino twatamba kuchilinga shimbu chiwanyino cha Kwiwuluka Kufwa cha Yesu kanda chichilingiwa, nawa kanji-kanji mutuhasa kuchilinga ha ufuku uze muchilingiwa. (1 A-Korindu 11:23-25) Mbolo yize kuyishi futunwiso yinalumbunuka mujimba ungunu wa Yesu uze ahanyine ngwe chitapo. Vinyu yichila yinalumbunuka manyinga jenyi. Alioze twatamba kulinga yuma yinji hi wika ko kunyingika ulumbunwiso wa mbolo ni vinyu. Twatamba kunyingika ngwetu, chitapo cha ukuule wa Yesu chinachingi yikuma yinene-yinene yaali ya zango. Yehova kahanyine Mwanenyi hali yetu, nawa Yesu ni zango lieswe yahana mwono wenyi hali yetu. Muze mutunyonga ha zango lio, chino muchitukwasa hanga twaazange chinji. Nawa zango lize yetweswe tuli nalio kuli Yehova mulikolesa kulinunga chetu.

12. Ha chishima cha mwanangana ni ndungo jenyi, kuchi Yesu asolwele zwalala ngwenyi, Yehova kanazange tukonekene akwetu?

¹² Jila yika yamuchitatu yize mutuhasa kukoleselamo kulinunga chetu? Yili ya kukonekena akwetu ni mbunge yeswe. Nyi twachilinga, mutusolola pundu ngwetu Yehova mahasa kukonekena shili yetu hamukunda wa chitapo cha Yesu. Yesu katele chishima cha umwe mwanangana ni ndungo jenyi, hanga asolole ulemu wa kukonekena akwetu. Tunakwite hanga utange Mateu 18:23-34 ni kulihula ngwenyi: ‘Shina nguli ni mbunge ya kukaula malongeso a Yesu? Kutala nguli chihumikiji nawa nakulivwashana ni mandumbu jami? Shina hi ngunakonekena waze angutukile?’ Chili umwenemwene ngwo shili yimwe yapwa yinene kuhiana yikwo. Nawa muchihasa kupwa chikalu kukonekena akwetu ha shili yimwe mumu tuli yihenge. Alioze chishima cha Yesu muchitulongesa yize Yehova anazange hanga tulinge. (Tanga Mateu 18:35.) Chikuma chino Yesu kachilumbunwine zwalala ngwenyi, Yehova kechi kukonekena shili yetu nyi kutwakonekenene mandumbu jetu, muze ayo malikonyeka ni mbunge yeswe. Kashika twatamba kunyonga kanawa ha chikuma chino. Mba tufunge ni kukolesa kulinunga chetu, twatamba kukonekena akwetu ngwe chize Yesu atulongesele.

13. Kuchi mutukolesa kulinunga chetu muze mutupwa ni sambukila ni akwetu?

¹³ Muze mutukonekena akwetu, twakufunga sambukila hamwe ni mandumbu jetu. Postolo Paulu yamba ngwenyi twatamba kusa tachi hanga tupwe ni kulinunga mukachi ketu hamwe ni sambukila. (A-Efwesu 4:3) Kashika ha mashimbu a Kwiwuluka Kufwa cha Yesu chipi-chipi ha tangwa liacho, nyonga kanawa ha chize wakutwama ni akwenu. Lihule ngwe: ‘Shina akwetu kangunyingika ngwo kuchishi kufungila toto atu waze akungutuka? Kutala akwetu kakungumona ngwo nakusa tachi hanga ngunehe sambukila ni kukolesa kulinunga chetu?’ Twatamba kunyonga chinji ha yihula yino mumu yili yilemu.

14. Kuchi mutuhasa kusolola ngwetu ‘twakulihumikiza umwe kuli mukwo mu zango’?

¹⁴ Jila yika yamuchiwana yize mutuhasa kukoleselamo kulinunga chetu? Yili kwimbulula Yehova ha kusolola zango. (1 Yoano 4:8) Kutuchi kuhasa kwamba ngwetu, “Munguhasa kuzanga mandumbu jami, alioze kuchishi kweevwila kuwaha.” Nyi mutunyonga chocho, kutushi kukaula chiyulo cha Paulu, chakwamba ngwo ‘lihumikizenu umwe kuli mukwo mu zango.’ (A-Efwesu 4:2) Twamona ngwetu Paulu kakambile wika ngwenyi, twatamba “kulihumikiza umwe kuli mukwo” alioze ngwenyi twatamba kuchilinga “mu zango.” Maliji wano kanalise. Mumu mu yikungulwila yetu muli atu amitapu yeka ni yeka, nawa Yehova hanaakoka eswe kuli iye. (Yoano 6:44) Kashika iye kali ni yitela yipema ya kwaazangila. Nyi mandumbu jetu kanatela zango lia Zambi, mba kuchi mutuhasa kwamba ngwetu katelele zango lietu? Twatamba kwivwa usona wa kwaazanga ngwe chize Yehova akutuzanga tulieswe.—1 Yoano 4:20, 21.

15. Kuchi tunanyingika ngwetu, mukukapwa chiwanyino chakasula cha Kwiwuluka Kufwa cha Yesu?

¹⁵ Tangwa limwe, mutukalinga Chiwanyino chakasula cha Kwiwuluka Kufwa cha Yesu. Kuchi tunachinyingika? Paulu kalwezele akwa-Kristu akuwayisa ngwenyi, muze ayo akwiwuluka kufwa cha Yesu hita mwaka, ayo kakununga ni kwambujola “kufwa cha Mwene ndo kwiza chenyi.” (1 A-Korindu 11:26) Nawa Yesu kahanjikile ‘hakwiza’ chenyi mu uprofeto wenyi hakutwala ku matangwa akusula. Muze ahanjikile hakutwala ku luyinda munene yoze kwasala hakehe hanga eze, iye yamba ngwenyi: “Chilayi cha mwe Mwana mutu kumuchikasoloka mwilu: mba hohene mavungu eswe a hashi kumakalila mbimbi, kumakamona mwe Mwana mutu kaneza ha malelwa a mwilu ni tachi ni uhenya unene. Kumakatuma angelo jenyi ni liji linene lia chitavwi, o makakungulula waze hanaatongola kuli iye ku fuji jiwana, ku songo limwe lia malilu ndo ku songo likwo.” (Mateu 24:29-31) Yesu “makakungulula waze hanaatongola” muze makambata akwa-Kristu eswe akuwayisa waze achili hano hashi ni kwaatwala mu malilu. Yino muyikalingiwa muze luyinda munene haputuka kulu, shimbu jita ya Armagedone kanda yichiputuka. Ha jita yacho, Yesu ni akwa-kuyula-ni-akwo 144,000, muze eswe hakumbana, makasa jita ni mianangana a hano hashi ni kwaakumba. (Usolwelo 17:12-14) Chiwanyino cha Kwiwuluka Kufwa cha Yesu chize mutukalinga shimbu Yesu kanda ‘achiza’ ni kukungulula akwa-Kristu akuwayisa, che muchikapwa chakasula.

16. Mumu liaka watamba kusa tachi hanga ukapwe ha Chiwanyino cha Kwiwuluka Kufwa cha Yesu, ha mwaka uno?

¹⁶ Sako tachi hanga ukaye ha Chiwanyino cha Kwiwuluka Kufwa cha Yesu ha tangwa 31 lia Março 2018. Nawa eta kuli Yehova hanga akukwase ufunge kulinunga chize tukwete mukachi ketu. (Tanga Samu 133:1.) Tangwa limwe, mutukalinga Chiwanyino chakasula cha Kwiwuluka Kufwa cha Yesu. Amu kanda tuchihetako, tusololenu ngwetu kulinunga chingunu chize tukwete hita mwaka ha Chiwanyino cha Kwiwuluka Kufwa cha Yesu, chikwete ulemu unji ku mwono wetu.