Umwe Pwo Ka-Yunda Kanalumbununa Mumu liaka Aalumwine Ufulielo Wenyi

Hanjika hakutwala ha chize wakolele

Nasemukine ha mwaka 1979 mu Estados Unidos. Muze napwile ni miaka yitatu, yisemi jami yalilakula. Mama kangulongesele kulita ni malongeso ja A-Yunda ni kungutwala ku ieshivas, yimwe shikola ya A-Yunda. Muze napwile ni miaka shimbiali, twatwamine mwaka umuwika mu Izalele, nikulilongesa shikola mu yimwe mbonge akuvuluka ngwo kibutz. Hanyima, yami ni mama twayile kutwama mu chifuchi cha México.

Chipwe ngwe kwakapwile sunangonga yakulembelamo mu chihela muze twapwile, nihindu nanungine ni kutemuna vela ha tangwa lia sambata, nawa ni kulemba kupalikila mu sidur, mukanda wetu wa yilemba ni kutanga Torá. Kanji-kanji ku shikola napwile ni kulweza akwetu ngwo, uwayilo wa A-Yunda we wamwenemwene wika. Yami te kanda nguchitanga kama mikanda ya mu usendo waha, chekwamba kukatuka ha mukanda wa Mateu ndo wa Usolwelo, yize yakuhanjika hakutwala ku mulimo ni malongeso a Yesu Kristu. Kwamba pundu, mama kangukanjishile kuyitanga, mumu kevwile woma ngwo muyihasa kungupiangula.

Mumu liaka wakwachile chiyulo cha kutanga mikanda ya mu Usendo Waha?

Ha kukumbanyisa miaka kumi ni shimbiali, hingufuna ku Estados Unidos hanga nguhwisa shikola yami. Ku shikola umwe yangulweza ngwo, mwono wami uli wamoko-moko nyi chanyingikine Yesu.

Hingukumbulula ngwami, “Atu waze akufuliela Yesu kanatoko.”

Yanguhula ngwo, “Shina hiunatanga kama Usendo Waha?”

Hingumulweza ngwo, “Ka, kanda.”

Mba iye yamba ngwenyi “shina chinalite kuhanjika ha yuma yize kuwanyingikine kanawa?”

Chihula chino changukwachile ku mbunge, mumu nanyingikine ngwami chili uhepuke kuhanjika ha yuma yize chanyingikine. Ha kunyonga chinji ha chikuma chino, hingumbata Mbimbiliya Yenyi ku zuwo ni kuputuka kutanga mikanda ya mu Usendo Waha.

Shina wazangile yize watangile mu mikanda ya mu Usendo Waha?

Nakomokene kumona ngwo, waze asonekene mikanda ya mu Usendo Waha kali A-Yunda. Ha kununga kuyitanga, hingunyingika ngwami, kumanyi Yesu kapwile Ka-Yunda mupema chinji nawa mukwa-kulikehesa yoze wakuzanga kukwasa atu, hi kwapinjisa ko. Nayile nawa mu utulikilo wa mikanda ni kufupa mikanda yize yinahanjika hali iye. Alioze, niyimwe mikanda yanguhele shindakenyo ngwo Yesu kali Mesaya. Mikanda yikwo yasolwele Yesu ngwe Zambi—Chuma chize chakangulumbunukine. Hanyima lia yino yeswe, Kuli iya Yesu apwile ni kulemba—shina kuli iye mwene? Chikwo nawa, Yesu kafwile. Alioze Mbimbiliya yakwamba hakutwala kuli Zambi ngwo, yenu ‘nushi kufwa.’a

Kuchi wawanyine makumbululo a yihula yino?

Umwenemwene kushi kulimika wene, nawa nasele tachi hanga nguuwane. Kashika nalembele ni kuliumba kuli Zambi ni mbunge yami yeswe—chapwile chisuho chitangu nalembele chakuhona kuzachisa sidur. Muze ngunachilemba, Yela ja Yehova yangungongwela ku chikolo. Kanguhele kamwe kamukanda kaze te mangukwasa nako kunyingika kanawa Mbimbiliya. Kamukanda kacho ni malongeso akwo yanguhele shindakenyo ngwo yize Yela ja Yehova akufuliela yakukatuka mu Mbimbiliya. Chakutalilaho, ayo kakumona Yesu ngwe “mwana wa Zambi”b, hi ngwe Zambi ko, nawa ngwe “uputukilo wa kutanga cha Zambi.”c

Ha kupalika cha mashimbu, hinguhiluka ku México ni kununga ni kulilongesa ni Yela ja Yehova hakutwala ku uprofeto unatale hali Mesaya. Nakomokene ha kunyingika ngwo kuli uprofeto unji unatale hali Yesu! Chipwe chocho, napwile ni yihula. Te nakulihula ngwami: “Shina uprofeto uno kuwamanunukine hali mutu mukwo?” nawa “Shina Yesu kakapwile ni kulionga hanji kulisolola hanga atu anyonge ngwe iye mwe Mesaya?”

Yika yakuhele shindakenyo?

Yela ja Yehova kangulongesele uprofeto uze wamanunukine hali Yesu wika. Chakutalilaho, miaka 700 kunyima, profeta Mika yamba ngwenyi, Mesaya makasemukina mu Mbeteleme, yimwe mbonge yikehe ya mu Yunda.d Iya mahasa kutesa hanji kusakula kuze makasemukina? Profeta Izaia kasonekene ngwenyi, Mesaya makamushiha ngwe umwe chingulungulu, alioze makamufunda ni pichi.e Uprofeto uno weswe wamanunukine muli Yesu.

Kuli yami, uchela wakasula unatale ha munyachi wa Yesu. Mbimbiliya yakwamba ngwo Mesaya makatuka ku munyachi wa Mwanangana Ndawichi.f Amu A-Yunda a shakulu apwile ni kutulika majina ja munyachi wo, nyi te Yesu kakapwile wa mu munyachi wa Ndawichi, Akwa-kole jenyi hanji te makolojoka kuli atu eswe ngwo, iye hi mwana wa Ndawichi ko! Alioze kakahashile kuchilinga mumu Yesu kakatukile mu munyachi wa Ndawichi. Kashika atu anji amusanyikine ngwo “Mwana wa Ndawichi.”g

Ha kupalika cha miaka 37 hanyima lia kufwa cha Yesu, ha mwaka 70 M.J. chizavu cha maswalale cha Roma yanongesa Yerusaleme, chikwo nawa, kota mikanda haze apwile ni kutulikilaho majina ja minyachi kayinongesa. Kashika, mba asolole munyachi wa Yesu iye te katamba kusoloka kunyima lia miaka 70 M.J.

Kuchi chino chakwachile ku mwono we?

Ha mukanda wa Shimbi Yamuchiali 18:18, 19, Zambi kalakenyene ngwo, Makasolwela umwe profeta ngwe Mose. Zambi kambile nawa ngwenyi “mweswawo kechi kapanjika maliji jami iye makahanjika mu jina liami, kumungukamuhulacho.” Kulilongesa chami cha Mbimbiliya changukwashile kupwa ni shindakenyo ngwami, Yesu Ka-Nazare mwe profeta wacho.