MUTWE WAKULILONGESA 34
‘Endenu mu Umwenemwene’
“Uwahililo wahiana uno chishi nawo shina kwivwa hali ana jami ngwo, Kanende mu umwenemwene.”—3 YOA. 4.
MWASO 111 Yuma Yize Yakutuvwisa Kuwaha
CHIKUMA CHILEMUa
1. Kuchi twakwivwa ha kulweza mandumbu jetu chize twanyingikine umwenemwene?
“KUCHI wanyingikine umwenemwene?” Kwamba pundu, kota hiunakumbulula chihula chino ha yisuho yinji. Chino chili chihula chitangu chize twakuhula mandumbu hanji mapangi jetu nyi tunazange kwanyingika kanawa. Twakuwahilila ha kwivwa chize mandumbu jetu anyingikine Yehova ni kumuzanga, nawa twakuwahilila ha kwalweza mumu liaka twakuzanga kupwa Yela ja Yehova. (Roma 1:11) Chikwo nawa, twakupwa ni shindakenyo ngwetu, tunazange kununga ni ‘kwenda mu umwenemwene,’ hanji ngwetu kununga ni kulinga yuma yize muyitwaha yiwape ni utayizo wa Yehova.—3 Yoa. 4.
2. Yika mutulilongesa ha mutwe uno?
2 Ha mutwe uno, mutumonaho yikuma yimwe yize yakututwala kuzanga umwenemwene. Nawa mutulilongesa chize mutuhasa kununga ni kusolola zango lietu ha chawana chino chilemu. Kwamba umwenemwene, kuhengwola chikuma chino muchitukwasa kwokesa zango lietu ha chize Yehova atukokele mu umwenemwene. (Yoa. 6:44) Nawa muchitukwasa kukolesa zango lietu lia kwambujola umwenemwene kuli akwetu.
MUMU LIKA TWAKUZANGA “UMWENEMWENE?”
3. Chikuma chika chilemu chakututwala kuzanga umwenemwene?
3 Kuli yuma yinji yize yakututwala kuzanga umwenemwene. Chuma chilemu, twakuzanga Yehova Zambi, mumu iye mwe Chishina cha umwenemwene. Kupalikila mu Mbimbiliya, twakunyingika Yehova hi wika ko ngwe Sakatanga wa Ndundo-Jeswe yoze watangile malilu ni hashi, alioze ngwe Tata wa zango yoze wakutufunga. (1 Petu. 5:7) Tunanyingika ngwetu, Zambi yetu kali “mukwa keke, mukwa vumbi, makoke kutenuka, wakulumbama ni utu wa zango ni umwenemwene.” (Kutuhu. 34:6) Yehova kakuzanga ululi. (Iza. 61:8) Kakwivwa chinyengo muze akutumona tunapalika mu yipikalo, nawa kanazange chinji kuhwisa lamba lietu lieswe ha shimbu lialita. (Jere. 29:11) Tunatwaminyina shimbu liacho lipema! Chino chili chimwe cha ku yikuma yize yakututwala kuzanga Yehova.
Umwenemwene wa mu Mbimbiliya Wapwa ngwe . . . Ankora
Chizechene ankora yakukwasa ulungu uhone kuhungumuka, kutalatala chetu chize chinakatuka mu Mbimbiliya chakutukwasa tumane ngu, muze tunapalika mu yipikalo. Chikwo nawa, umwenemwene wa mu Mbimbiliya wakututwala tulweze akwetu kutalatala chetu cha kulutwe lia matangwa (Tala maparagrafu 4-7)
4-5. Mumu liaka postolo Paulu atesele kutalatala chetu ni ankora?
4 Chikuma chikwo chika twakuzangila umwenemwene? Umwenemwene wakutunehena yiwape yinji. Tutalenu chimwe chilweza. Umwenemwene wa mu Mbimbiliya, unachingi kutalatala chetu cha kulutwe lia matangwa. Mba asolole ulemu wa kutalatala chacho, postolo Paulu yasoneka ngwenyi: “Chino tuli nacho ngwe ankora ya mbunge, kuyajikiza, kuyakola nawa.” (Hepre. 6:19 Ngwe chizechene ankora yakukwasa ulungu hanga uchine kuhungumuka, kutalatala chetu chinakatuka mu Mbimbiliya muchihasa kutukwasa tumane ngu, muze tunapalika mu yeseko.
5 Ha maliji wano, Paulu te kanahanjika ha kutalatala cha kuya mu malilu chize akwa-Kristu akuwayisa akuzanga. Alioze, maliji jenyi kanatale nawa hali akwa-Kristu waze makatwama ni mwono wa mutolo hano hashi. (Yoa. 3:16) Chochene, kunyingika kutalatala cha mwono wa mutolo chakutukwasa chinji ku mwono wetu.
6-7. Kuchi Yvonne ayukile ha kunyingika umwenemwene hakutwala kulutwe lia matangwa?
6 Tutalenu chilweza cha pangi Yvonne. Iye kakalolelele mu umwenemwene, kashika ku wanuke te kakwivwa woma unji wa kufwa. Keshi kuvulama maliji amwe waze atangile, anambe ngwo: “Tangwa limwe mutukeza kafwa.” Yamba ngwenyi: “Maliji wano kanguhele mwongo yinguputuka kukasumuka ufuku weswe ni kunyonga hakutwala kulutwe. Yingunyingika ngwami, pundu lume mwono kuuli ni yuma yinji. Mba mumu liaka nguli hano? Ami chazangile kufwa!”
7 Kulutwe muze te hapwa mukweze, Yvonne yaputuka kulilongesa Mbimbiliya ni Yela ja Yehova. Yamba ngwenyi: “Yinguputuka kufuliela ngwami, kumana munguhasa kupwa ni kutalatala cha kutwama mu Paraisu hano hashi.” Kuchi kunyingika umwenemwene chakwashile pangi yetu Yvonne? Iye yawezela ngwenyi: “Yami chishi kukasumuka nawa ha ufuku mumu lia woma wa kufwa hanji kunyonga kulutwe lia matangwa.” Chochene, Yvonne kakuzanga umwenemwene wa mu Mbimbiliya, nawa kakuzanga kwambulwila akwo kutalatala chenyi cha kulutwe lia matangwa.—1 Timo. 4:16.
Umwenemwene wa mu Mbimbiliya Wapwa ngwe . . . Upite
Kuwayila Yehova haliapwila ni kutalatala tuli nacho chakumuwayila ku miaka yeswe mu Wanangana wenyi chapwa ngwe upite. Kashika, chili chilemu kwecha yuma yeswayo mutuhasa hanga tupwe ni upite wacho (Tala maparagrafu 8-11)
8-9. (a) Kulita ni chishima chize Yesu atele, kuchi umwe lunga alemesene upite uze awanyine? (b) Ulemu uka umwenemwene uli nawo kuli yena?
8 Umwenemwene wa mu Mbimbiliya unachingi nawa sango jipema hakutwala ku Wanangana wa Zambi. Yesu katesele umwenemwene hakutwala ku Wanangana wa Zambi ni upite wa kuhengeka. Ha Mateu 13:44, Yesu yamba ngwenyi: “Cheka nawa Wanangana wa malilu walifwa ni upite wa kuhengeka mu munda; uze umwe mutu yauwana; yausweka; ni ha kuwaha chenyi maya, malanjisa chize cheswe ali nacho, malanda munda uze.” Lunga yono te keshi kufupa upite. Alioze, muze auwanyine kasele tachi hanga apwe nawo. Kwamba pundu, iye kalanjishile yuma yeswe yize apwile nayo. Mumu liaka? Mumu kanyingikine ngwenyi, upite wacho wapwile ni ulemu unji, nawa te wahiana chuma cheswacho apwile nacho.
9 Chenacho wakwivwa hakutwala ku umwenemwene? Chochene! Tunanyingika ngwetu, kukushi nichimwe chuma chize chili ni ulemu hano hashi, kuhiana uwahililo uze tuli nawo wakulingila Yehova musono, ni kutalatala chetu cha kutwama ni mwono wa mutolo mu Wanangana wa Zambi. Uhashi uze tukwete wa kupwa ni usepa upema ni Yehova, unahiane yuma yeswayo mutwecha hanga tumulingile. Chuma chize twakuzanga chinji chili “kumuvwisa kuwaha.”—Kolo. 1:10.
10-11. Yika yakwashile Michael kwalumuna mwono wenyi?
10 Anji a kuli yetu twahichikile yuma yinji hanga tupwe ni utayizo wa Yehova. Amwe kechele milimo yipema, akwo kechele kupwa pichi. Eka kalumwine yitanga yo yipi muze alilongesele hakutwala kuli Yehova. Chenacho alingile Michael. Iye kakakolelele mu umwenemwene. Muze apwile mukweze, yatambula fumbu lia kulinga yiheho ya kulambana. Yamba ngwenyi: “Yami te nakulichichimieka mumu lia tachi jize napwile najo. Ha yisuho yimwe te nakulivwa ngwe niumwe mangukumba wakuhi.” Alioze muze aputukile kulilongesa Mbimbiliya, Michael yanyingika nyonga lia Yehova hakutwala ku ndombo. (Samu 11:5) Hakutwala kuli lunga ni pwo waze alilongesele nenyi, Michael yamba ngwenyi: “O kakangulwezele nilimwe tangwa ngwo, natamba kwecha yiheho ya kulilamba; kanungine wika ni kungulongesa umwenemwene wa mu Mbimbiliya.”
11 Muze Michael anungine ni kulilongesa hakutwala kuli Yehova, zango lienyi muli iye yilioka. Chuma chamukwachile chinji ku mbunge chili kunyingika chize Yehova akusolwela tuvumbi twenyi keke. Hakupalika cha mashimbu, Michael yanyingika ngwenyi, katamba kukwata chiyulo chize muchalumuna mwono wenyi. Yamba ngwenyi: “Nanyingikine ngwami kwecha karate te muchipwa chuma chikalu kulinga. Alioze nanyingikine nawa ngwami, nyi nachilinga munguvwisa Yehova kuwaha, nawa napwile ni shindakenyo ngwami kumulingila chinahiane chuma cheswacho mungwecha.” Michael kanyingikine ngwenyi, umwenemwene uze awanyine wapwile ulemu chinji, chocho yasa tachi hanga alumune mwono wenyi.—Tia. 1:25.
Umwenemwene wa mu Mbimbiliya Wapwa ngwe . . . Ndeya
Ndeya yipema yakutukwasa kuya ku chihela cheswacho mu milima. Chizechene nawa, Mbimbiliya yakutusolwela jila yize twatamba kwenda mu chifuchi chino cha milima (Tala maparagrafu 12-13)
12-13. Kuchi umwenemwene wa mu Mbimbiliya wakwashile Mayli?
12 Mba yisolole ulemu wa umwenemwene, Mbimbiliya yakutesa umwenemwene ni ndeya yize yakutemuna mu mulima. (Samu 119:105; Efwe. 5:8) Mayli wa ku Azerbaijão, kakusakwilila ha ukwaso uze atambwile mu Liji lia Zambi. Yisemi jenyi kapwile mu mayingeleja alisa. Tato kapwile Musulumanu, naye wa mu yingeleja ya A-Yunda. Yamba ngwenyi: “Chipwe ngwe napwile ni kutayiza ngwo, Zambi kwatwama, alioze napwile ni yihula yinji. Napwile ni kulihula ngwami: ‘Mumu liaka Zambi atangile atu? Nawa mumu liaka mutu atamba kumona lamba ku mwono wenyi weswe, kusulaho mamona lamba mu chitende cha kahia?’ Amu atu apwile ni kwamba ngwo, yuma yeswe yakulingiwa yili upale wa Zambi, kashika yinguputuka kulihula ngwami: ‘Shina Zambi mwe wakuneha lamba? Nawa kakuwahilila muze anamona atu mapinda?’”
13 Mayli kanungine ni kufupa makumbululo a yihula yenyi. Hakupalika cha mashimbu, yatayiza longeso lia Mbimbiliya, chocho yawana umwenemwene. Yamba ngwenyi: “Makumbululo a mu Mbimbiliya waze nawanyine kalumwine nyonga liami hakutwala ku mwono, nawa kangunehenene sambukila ya ku mbunge.” Ngwe Mayli, yetu eswe twakuhalisa Yehova, yoze “hananutambika tukakatuke ku milima twize ku pangu lienyi lia kukomwesa.”—1 Petu. 2:9.
14. Kuchi mutuhasa kuzanga chinji umwenemwene? (Tala nawa muchete, “Yuma Yikwo Yize Mutuhasa Kutesa ni Umwenemwene.”)
14 Yino yili wika yimwe ya ku yilweza yize yisolola ulemu wa umwenemwene. Kwamba pundu, yena muhasa kunyonga ha yilweza yikwo yinji. Muhasa kutesa kulinga chino mu longeso lie lia wika hanga uwane yikuma yikwo yize yakukutwala mba uzange umwenemwene. Nyi wazanga umwenemwene, muwana majila waze makukwasa kusolola ngwo unauzange chinji kuhiana.
CHIZE MUTUSOLOLA NGWETU TWAKUZANGA UMWENEMWENE
15. Mu jila yika mutuhasa kusolwelamo zango lietu ha umwenemwene?
15 Mutusolola ngwetu, twakuzanga umwenemwene, ha kutanga Mbimbiliya hita tangwa ni mikanda yize yakulumbununa Mbimbiliya. Chikwo nawa, chipwe ngwe tuli ni miaka yinji mu umwenemwene, nihindu kuli yuma yinji yize mutuhasa kulilongesa. Kaposhi wa Kutalila mutangu, kambile ngwenyi: “Umwenemwene uli ngwe chitemo chili mukachi lia katanda munji. Mutu yoze mazanga kuhela chitemo chacho, katamba kusa tachi ha kusanda mu mingonga mba achiwane. Nawa muze machiwana keshi kuwahilila wika ni chimuwika chize awana. Alioze manunga ni kufupa nawa yitemo yikwo yinji. Chizechene nawa, ni yetu kutwatambile kuwahilila wika muze mutunyingika umwenemwene umwe.” Tunanyingika ngwetu, kulilongesa chili mulimo unene, alioze chili chilemu kuchilinga.
16. Jila yika yalita yize wakuzachisa hanga ulilongese? (Yishima 2:4-6)
16 Hi yetu eswe ko twakuzanga kutanga ni kulilongesa. Alioze Yehova kanatukolweza tununge ni ‘kuhengwola’ umwenemwene hanga tuunyingike kanawa. (Tanga Yishima 2:4-6.) Muze twakusa tachi jacho, twakuyuka chinji. Corey yamba hakutwala ku kutanga chenyi cha Mbimbiliya ngwenyi, ha hita chisuho, muze akutanga Mbimbiliya kakulihulikila ha versu yimuwika. Mwene yamba ngwenyi: “Nakutanga hita maliji a mushi lia lifwo, yisoneko yikwob yize yakusoloka ha versu yacho ni kuhengwola nawa yikuma yikwo. . . . Jila yino yakungukwasa kulilongesa yuma yinji!” Chipwe ngwe mutuzachisa jila yino hanji yikwo, nihindu mutusolola ngwetu twakuzanga umwenemwene ha kusa mashimbu ni tachi hanga tulilongesewo.—Samu 1:1-3.
17. Kutwama kulita ni umwenemwene yika chinalumbunuka? (Tiangu 1:25)
17 Kwamba pundu, kutwatambile wika kulilongesa umwenemwene, twatamba nawa kukaula yize twakulilongesa hanji kuyisa mu yitanga. Nyi twachilinga, mba umwenemwene muutunehena uwahililo. (Tanga Tiangu 1:25.) Kuchi mutuhasa kupwa ni shindakenyo ngwetu, twakutwama kulita ni yize twakulilongesa? Ndumbu umwe kanatulweze ngwenyi, mutuhasa kuchilinga ha kulihengwola hanga tutale nyi twakukaula yize tunalilongesa nyi kuli yimwe yize twatamba kululieka. Postolo Paulu yamba ngwenyi: “Kuze hitunahete, twendenu nikulita ni cheseko chenacho.”—Fwili. 3:16.
18. Mumu liaka twakusa tachi hanga tununge ni ‘kwenda mu umwenemwene’?
18 Nyonga ha yiwape yize yakwiza ha kununga ni ‘kwenda mu umwenemwene’! Kutushi kuyuka wika ha kwalumuna yitanga ya ku mwono wetu, alioze twakuvwisa nawa Yehova kuwaha ni mandumbu jetu a mu ufulielo. (Yishi. 27:11; 3 Yoa. 4) Yino ye yakututwala mba tuzange chinji umwenemwene ni kununga ni kutwama kulita ni umwenemwene.
MWASO 144 Shishikenu ha Fweto!
a Kanji-kanji twakuvuluka umwenemwene yuma yize twafuliela ni chize twakumbata “mwono wetu.” Chipwe ngwe tuli aha mu umwenemwene hanji twaunyingikine kulu, mutuhasa kuyuka chinji nyi twanyingika yize twakuzangila umwenemwene. Nyi twachilinga, muchitukwasa hanga tununge ni kupwa ni utayizo wa Yehova.
b Referências cruzadas.