Ha Mashimbu Wano Akusula Twatamba Kusakula Masepa Jetu ni Mana

1. Ha mashimbu aka tuli?

TULI “ha miaka yikalu” chinji. Kukatuka ha mwa wa 1914 muze “matangwa a kusula” aputukile, yuma hano hashi yiyiputuka kupihia chinji kuhiana miaka yakunyima. (2 Timoteu 3:1-5) Nawa mutuhasa kupwa ni ushindakenyo ngwetu hashi muhanunga ni kupiha, mumu Mbimbiliya yinambe ngwo “yingulungulu ni akwa kwonga kumakapiha kuhiana, nikupiangula akwo, nikupianguka ene.”​—2 Timoteu 3:13.

2. Yiheho yamutapu uka yize atu anji akuzanga chinji?

² Hakutwala ku kusakula yiheho, atu anji musono kakutala hanji kulinga yuma ya upupilo hanji ya utanji hanji ya tufuta-futa ni ya wanga. Chakutalilaho, Internet, katalilo wa televisão, yiheho, mikanda ni marevista kanji-kanji kakusolola ngwe upupilo ni utanji yili yuma yipema. Nawa yitanga yize te yapwa yipi, haliapwila atu kanayitayiza ku yihela yimwe. Alioze chino kuchishi kulumbunuka ngwo Yehova kakutayiza yitanga yacho.​—Tanga A-Roma 1:28-32.

3. Yika atu anji akunyonga hali atu waze akukaula shimbi ja Zambi?

³ Kusekulu yitangu, atu nawa te kakutala yuma ya upupilo ni ya utanji mu yiheho. Alioze tumbaji twa Yesu te keshi kuyilinga, mumu ayo te kakukaula shimbi ja Zambi. Chino ‘chakomwesene’ chinji atu waze te atwama mukachi ko. Yika yalingiwile ko? Atu te kakuseha akwa-Kristu ni kwaahungumiona. (1 Petulu 4:4) Ni musono nawa, atu anji kakunyonga ngwo atu waze akutwama nikulita ni shimbi ja Zambi kahepuka. Ha chino Mbimbiliya yinatutoweza ngwo, waze eswe akukaula chilweza cha Kristu Yesu “kumakamona yihungumiona.”​—2 Timoteu 3:12.

4. Mumu liaka kutwatambile kuzanga hano hashi?

⁴ Nyi tunazange kulinga upale wa Zambi, kutwatambile “Kuzanga hano hashi, chipwe yuma yize yili hano hashi.” (Tanga 1 Yoano 2:15, 16.) Satana “zambi ya mwakono,” kanasongwela yuma ya hano hashi. Aye kanazachisa uwayilo wa mahuza, mianangana a hano hashi, ululikiso wa mingoso ni sango ja hano hashi hanga apiangule atu. (2 A-Korindu 4:4; 1 Yoano 5:19) Etu kutwazangile hanga atupiangule ku yitanga ya hano hashi, kashika twatamba kwehuka masepa api. Mbimbiliya yinatutoweza pundu ngwo: “Kanda nulionga, usepa upi kuwakupihisa ndako jipema.”​—1 A-Korindu 15:33.

5, 6. Aya waze kutwatambile kulikatano, nawa mumu liaka?

⁵ Mba tununge ni usepa upema ni Yehova, kutwatambile kusakula masepa waze akulinga yuma yipi. Wano kali atu waze akwamba ngwo kakuwayila Yehova alioze masakula kwehuka shimbi jenyi. Atu jacho nyi malinga shili ni kuhona kulikonekena, twatamba kwehuka kulikatano.​—A-Roma 16:17, 18.

⁶ Kanji-kanji atu kakuzanga kuvwisa masepa jo kuwaha ni kwatayiza. Kashika nyi mutulikata ni atu waze keshi kwononokena Zambi, mahasa kutupiangula hanga tulinge yuma yize o akulinga. Chakutalilaho, nyi mutulikata chinji ni atu waze akulinga utanji, mutuhasa kupwa ngwe ayo. Yino hinalingiwa kuli amwe mandumbu ni mapangi jetu. Nawa waze keshi kulikonekena kakwaasosolola mu chikungulwila. (1 A-Korindu 5:11-13) Nyi kalikonekenene, o mahasa kupwa ni yitanga ngwe anasoneka kuli Petulu.​—Tanga 2 Petulu 2:20-22.

7. Aya twatamba kusakula hanga apwe masepa jetu?

⁷ Chipwe ngwe twakuzanga atu eswe, nihindu kutwatambile kulikata chinji ni atu waze keshi kwononokena Zambi. Chili kuhona mana nyi umwe Chela cha Yehova yoze uli twamishi matwama mu zuwo limuwika ni mutu yoze keshi kuvumbika ni kukaula shimbi ja Yehova. Chizechene nawa, te muchipiha chinji nyi umwe Chela cha Yehova mafupa kulimbata ni mutu yoze keshi kuwayila Yehova. Chili chipema chinji kupwa ni utayizo wa Zambi kuhiana kupwa ni utayizo wa atu waze keshi ku muzanga. Twatamba kulikata chinji ni atu waze akulinga upale wa Zambi. Yesu ngwenyi: “Mumu mweswawo malinga upale wa Zambi, mwenawo mwanakwetu, ni pangiami, ni mama.”​—Marku 3:35.

8. Kuchi masepa api apiangwile A-Izalele ashakulu?

⁸ Usepa upi wakuneha lamba. Tutalenu chilweza, cha yuma yize yapwile kuli A-Izalele. muze te kanda achinjila mu Chifuchi cha Chilakenyo, Yehova yatoweza hakutwala kuli atu waze te atungamo. Aye yamba ngwenyi: ‘Kanda ukafukama kuli tuzambi two chipwe kwalingila, ka, kanda ukalinga nikulita ni yitanga yo alioze ukaapuzule liakulu. Ukapalwole yipinji tuponya two. Nukavumbike Yehova Zambi yenu.’ (Kutuhuka 23:24, 25) Alioze A-Izalele anji kakwononokena usongwelo wa Zambi nawa o kakashishikile kuli iye. (Samu 106:35-39) Yika yapwile kuli ayo? Yehova yalituna vungu lia A-Izalele ni kusakula chikungulwila cha akwa-Kristu hanga apwe atu jenyi.​—Mateu 23:38; Yilinga 2:1-4.

9. Mumu liaka sango ja hano hashi mujihasa kupwa jipi?

⁹ Sango jinji ja hano hashi, ngwe katalilo wa televisão, Internet, ni mikanda, muyihasa kupihisa usepa wetu ni Yehova. Yuma yeswayi keshi kuyilinga hanga yikwase akwa-Kristu afuliele chinji muli Yehova ni ku yilakenyo yenyi. Alioze yakukolweza atu hanga ajikijile ku yuma ya hano hashi ha Satana. Etu twatamba kukanyama hanga tuchine kutala, kutanga, hanji kupanjika chuma cheswacho muchihasa kutulingisa hanga tupwe ni “usolo wa hano hashi”​—Titu 2:12.

10. Yika muyikalingiwa ku sango ja hano hashi?

¹⁰ Kwasala hakepe, hashi ha Satana ni sango jaho jipi ayinongese. Mbimbiliya yinambe ngwenyi: “Ya hashi muyipalika, ni usolo wayo: alioze yoze malinga upale wa Zambi matwama ndo ku miaka ya mutolo.” (1 Yoano 2:17) Chizechene nawa, Mukwa-kwimba masamu yamba ngwenyi: “Mumu akwa kutanga yipi kumakaapatula.” Aye yawejela nawa ngwenyi: “Alioze yimbovu kumakahinga chifuchi, kumakawahilila mu kulumbama cha sambukila. Ha mashimbu angahi? “Akwa ululi kumakazuka chifuchi; kumakatwamamo ku miaka ya mutolo.”​—Samu 37:9, 11, 29.

11. Kuchi Zambi akutukwasa hanga tununge ni kushishika kuli iye?

¹¹ Kulisa ni hashi ha Satana, ululikiso wa Yehova wakutukwasa hanga tupwe ni yitanga yize muyikatwaha mwono wa mutolo. Yesu kalembele kuli Yehova ngwenyi: “Uno we mwono wa mutolo, hanga akanyingike yena mwe Zambi wamwenemwene umuwika, ni Yesu Kristu yoze yena watumine.” (Yoano 17:3) Yehova kakuzachisa ululikiso wenyi hanga atwehe yuma yize yakutukwasa kumunyingika. Chakutalilaho, etu tukwete mutapu weka ni weka wa marevista, mikanda, yizulie ya yinema, ni site yize yakutukwasa kununga ni kuwayila Zambi. Ululikiso wenyi wakululieka nawa kukunguluka chize twakulinga mashimbu eswe mu yikungulwila kuhiana 110,000 hashi heswe. Yize twakulilongesa ku kukunguluka chacho ni ku kukunguluka chinene yeswe yakukatuka mu Mbimbiliya yakukolesa ufulielo wetu muli Yehova ni ku yilakenyo yenyi.​—A-Hepreu 10:24, 25.

12. Lumbununa chiyulo cha mu Mbimbiliya chakulimbachila wika “muli mwe Mwene.”

¹² Akwa-Kristu waze anazange kumbata katamba kukanyama chinji hakutwala kuli yoze anasakula kulinga nenyi usendo. Liji lia Zambi linatutoweza ngwenyi: “Kanda nulilema kanga yimuwika ni waze kafulielele, mumu kutaa chika chiliko hakachi ka ululi ni ungulungulu? Kulifutula chika chiliko hakachi ka pangu ni milima?” (2 A-Korindu 6:14) Mbimbiliya yinambe kuli tuvumbi twa Zambi hanga alimbachile wika “muli mwe Mwene.” (1 A-Korindu 7:39) Muze mulimbata ni mutu wacho, yoze wakuzanga chinji Yehova, ena muupwa ni umwe chikwashi yoze makukwasa hanga ununge ni kushishika kuli Zambi.

13. Shimbi yika hakutwala ku ulo yize Zambi ahanyine kuli A-Izalele?

¹³ Yehova kananyingika yize yipema hali yetu, nawa shimbi yenyi yakulimbachila wika “muli mwe Mwene” hi yaha ko. Chakutalilaho, tutalenu yuma yize Yehova ambile kuli A-Izalele hakutwala kuli atu waze te keshi kumuwayila. Kupalikila muli Mose, Yehova yaatoweza ngwenyi: “Kanda nulimbata no, kanda nukahangisa malo ana jenu a mapwo kuli ana jo a malunga, chipwe ana a malunga kanda alimbachila ana jo a mapwo. Mumu o makahambulwisa ana jenu a malunga kungukaula yami, hanga akavumbike tuzambi tweka, chocho utenu wa Yehova muukanukasumukina, Yehova makanwonwona nikawashi.”​—Shimbi Yamuchiali 7:3, 4.

14, 15. Yika yalingiwile kuli Solomone muze alengulwile shimbi ja Yehova?

¹⁴ Ha amwe mashimbu muze Solomone te hapwa mwanangana mu Izalele, iye kalembele ni kwita mana, nawa Yehova kakumbulwile kulemba chenyi. Kashika Solomone apwile ni lufuma munji nawa ayulile ni mana eswe vungu lia Izalele. ha chino, mwazovu wa ku Shipa wakomokene ha mana ja Solomone ni kwamba ngwenyi: “Mana je ni unene we yahiana lufuma yoze nevwile. (1 Mianangana 10:7) Alioze, chilweza cha Solomone chinatulongesa nawa yuma yize muyihasa kulingiwa kuli mutu yoze unalengulula shimbi ja Zambi ni kulimbata ni mutu yoze keshi kuwayila Yehova.​—Chilumbununyi 4:13.

¹⁵ Chipwe ngwe Yehova kamuwahishile, alioze Solomone kehukile shimbi jize Yehova amwehele. Solomone “wazangile mapwo anji eka ni eka” waze te keshi kuwayila Yehova, iye wapwile ni mapwo 700 ni konkubina 300. Yika yize yalingiwile kuli iye? Muze Solomone apwile mukulwana mapwo jenyi “apiangwile mbunge yenyi ku tuzambi tukwo, . . . Solomone walingile chipi kumeso ja Yehova.” (1 Mianangana 11:1-6) Usepa upi muuhasa kutupiangula ni kwecha kuwayila Yehova. Nyi chino chalingiwile kuli Solomone muchihasa nawa kulingiwa kuli mweswawo wa kuli yetu. Kashika kutwatambile kupwa ni manyonga akulimbata ni mutu yoze keshi kuzanga Yehova!

16. Utowezo uka Mbimbiliya yinahane kuli mandumbu waze analimbate ni atu waze keshi kuwayila Yehova?

¹⁶ Kuchi mba mutwamba nyi mutu umwe mapwa chela cha Yehova alioze kalimbata ni mutu yoze hi chela cha Yehova ko? Mbimbiliya yinambe ngwenyi: “Chizechene, yenu mapwo zeyelenu kuli akwenu-malunga; hanga chipwe kachi amwe keshi kwononoka ku lie liji lia Zambi, akaazuke ni liji liakuhi ku kwenda cha akwo-mapwo.” (1 Petulu 3:1) Chochene, shimbi yino yinatale nawa kuli umwe lunga yoze mukwo-pwo keshi kuwayila Yehova. Liji lia Zambi linambe zwalala: Kwapwa lunga mupema, ni kukaula shimbi ja Zambi. Ha chino mutu yoze walimbata nyi mamona ngwenyi walumuna yitanga ye ku upeme, chino muchimukwasa hanga azange kuwayila Yehova. Yino yakulingiwa kuli akwa-kulimbata anji.

17, 18. Yika yakwashile Noa mba amulamwine ku Sanga Linene lia Meya, nawa yika yakwashile akwa-Kristu aku sekulu yitangu kulilamwina ku unongeso wa Yerusaleme?

¹⁷ Usepa upi muhasa kutupiangula kuli Yehova, alioze usepa upema muhasa kutukwasa hanga tufuliele chinji muli iye. Noa kali chilweza chipema kuli yetu. Aye katwamine ha mashimbu waze “Ungulungulu wa atu hashi, ngwenyi, wahiana.” Nawa “manyonga ja mu mbunge jo, chipi wika matangwa eswe.” (Uputukilo 6:5) Atu kapwile ni kulinga yuma yipi kashika Yehova akwachile chiyulo chakunongesa hashi liacho. Alioze Noa kapwile ni yitanga yipema. Mbimbiliya yinamuvuluka ngwo “mukwa ululi” yoze “waliendelele ni Zambi.”​—Uputukilo 6:7-9.

¹⁸ Noa kakalingile usepa ni atu waze te keshi kuzanga Zambi. Iye ni asoko jenyi kalihanyine ku mulimo wa kutunga ulungu, nawa kapwile “mukwa kwambujola ululi.” (2 Petulu 2:5) Noa, pwo lienyi, ni ana jenyi, ni mapwo ja ana jenyi kapwile ni usepa upema kuli umwe ni mukwo. Ayo kanungine ni kulinga yuma yize te muyihalisa Zambi, ha chino o yaalamwina ku Sanga Linene lia Meya. Yetu eswe musono twakatukile kuli ayo, kashika twatamba kusakwila ngwetu Noa ni asoko jenyi kwononokene shimbi ja Yehova ni kwehuka kulikata ni masepa api. Chizechene nawa, akwa-Kristu aku sekulu yitangu kakapwile ni kulikata ni atu waze te keshi kuzanga Yehova. O kwononokene Zambi mba yaalamwina muze anongesele Yerusaleme ha mwaka 70 M.J.​—Luka 21:20-22

19. Yika muyitukwasa hanga tushishike kuli Yehova?

¹⁹ Chizechene ngwe Noa ni usoko wenyi, akwa-Kristu ku sekulu yitanga no, te keshi kulikata ni atu waze te keshi kuzanga Yehova. Tuli ni tununu twa mandumbu ashishika waze mutuhasa kusakula hanga apwe masepa jetu. Ayo matukwasa hanga ‘tujikize mu ufulielo’ mashimbu wano akalu chinji. (1 A-Korindu 16:13; Yishima 13:20) Achinyonga kama chize muchikawaha chinji ha kulilamwina ku songo lia hano hashi hapi ni kutwama mu chifuchi cha Yehova! Kashika chili chilemu chinji kwehuka usendo weswe upi!