• Yize Mutulilongesa Hali Mwanakwo ya Yesu
    Kaposhi wa Kutalila (Wakulilongesa)—2022 | Janeiro

    • NUNGA NI KULIKEHESA CHIZECHENE NGWE TIANGU

      Tiangu kanalingi mulimo wa kusonga mapaya, muze Yesu hahinduka kanahanjika nenyi.

      Muze Yesu asolokele kuli Tiangu, ni kulikehesa cheswe iye yatayiza ngwo Yesu mwe Mesaya, chocho yapwa kambaji wenyi washishika (Tala maparagrafu 5-7)

       5. Yika Tiangu alingile muze Yesu asolokele kuli iye?

      5 Ha mashimbu aka Tiangu apwile kambaji ka Yesu washishika? Muze Yesu amuhindwishile, iye yasoloka “kuli Tiangu; mba kulutwe nawa kuli apostolo eswe.” (1 Kori. 15:7) Hanyima lia chino, Tiangu yapwa umwe wa kuli tumbaji twa Yesu. Iye kapwile hamuwika ni apostolo ku Yerusaleme muze atambwile spiritu yisandu. (Yili. 1:13, 14) Ha kupalika cha mashimbu, Tiangu yawahilila ha kupwa umwe wa kuli mandumbu a mu Chizavu cha Tusongo. (Yili. 15:6, 13-22; Ngala. 2:9) Muze miaka 62 M.J., te kanda yikundama, Zambi yatuma Tiangu kusonekena akwa-Kristu akuwayisa umwe mukanda. Ni yetu musono, mutuhasa kulilongesa yuma yinji ha mukanda wacho, chipwe ngwe tuli ni kutalatala cha kupwa ni mwono wa mutolo mu malilu hanji hano hashi. (Tia. 1:1) Josefo, umwe Judeu yoze wakuhengwola sango ja shakulu, kasonekene ngwenyi, Sasendote wa Lutwe Ananiya wa kanuke mwe watumine kushiha Tiangu. Tiangu kanungine ni kushishika kuli Yehova ndo ku kufwa chenyi.