Kwasa Chikungulwila Chenu Hanga Chipwe Chalinunga

Muze twakupwa hamwe ni mandumbu jetu, twakulivwa ngwe chize evwile Mwanangana Ndawichi yoze wambile ngwenyi: “Cho kuwaha, muze mandumbu matwama hamuwika ni mbunge yimuwika.” (Samu 133:1) Kulinunga kuchishi kulingiwa chamulingiwila. Tulieswe twatamba kukwasa.

1. Yuma yika yakusoloka mukachi ka atu ja Zambi?

Nyi muoya ha chimwe kukunguluka ku chihela cheka, hanji kuchi kwivwa limi lize anahanjikako, chipwe chocho kuchi kulivwa ukawe. Mumu liaka? Mumu twakuzachisa mikanda yimuwika ha kulilongesa Mbimbiliya chipwe ngwe twatwama ku yihela yalisa. Twakusa tachi hanga tulisolwele zango umwe ni mukwo. Chipwe ngwe twatwama ku yihela yalisa, tulieswe ‘twakutongola jina lia Yehova nikumulingila ni mbunge yimuwika.’—Zefania 3:9.

2. Yuma yika muhasa kulinga hanga ukwase kulinunga mu chikungulwila?

“Lizangenu ni mbunge yeswe.” (1 Petulu 1:22) Kuchi muhasa kukaula chiyulo achi? Kanda ulihulikila ha uhenge wa akwenu, alioze lihulikile ha yitanga yo yipema. Kanda upalikisa wika mashimbu ni atu waze alifwa ni yena, akuzanga yuma yimuwika ngwe yena. Alioze eseka kulikata ni mandumbu akwo waze alisa ni yena. Twatamba nawa kusa tachi hanga twehuke katonde yoze hanji tukwete.—Tanga 1 Petulu 2:17.a

3. Yika watamba kulinga nyi muhona kulivwashana ni ndumbwe?

Chipwe ngwe twapwa alinunga, alioze tuli yihenge. Ha mashimbu amwe mutuhasa kuvwisa akwetu sonyi hanji kwalemeka ku mbunge. Alioze Liji lia Zambi linatulweze ngwo: “Lihumikizenu . . . nikulikonekena umwe ni mukwo.” Linanungu nawa ngwo: “Chizechene ngwe Kristu hananukonekena, chocho ni yenu nawa likonekenenu.” (Tanga A-Kolosu 3:13.) Etu twakuvulumuna kuli Yehova ha yisuho yinji, chipwe chocho kakutukonekena. Kashika, iye kakushimbwila hanga ni yetu tukonekene akwetu.—Tanga Mateu 5:23, 24b

NYINGIKA NAWA

4. Kukumba katonde

Tunafupu kuzanga mandumbu jetu eswe. Kashika, twatamba kusa tachi mba tulivwashane ni mandumbu waze alisa ni yetu. Mba yika muyihasa kutukwasa? Tanga Yilinga 10:34, 35, mba nushimutwine yihula yino:

• Yehova mahasa kutayiza mutu mweswawo apwe Chela chenyi. Kuchi muhasa kumwimbulula hakutwala ku chize wakumona atu waze alisa ni yena?

• Majila aka atu akusolwelamo katonde kuze watwama waze unazange kwehuka?

Tanga 2 A-Korindu 6:11-13, mba nushimutwine chihula chino:

• Kuchi muhasa kulilongesa kuzanga mandumbu eswe?

5. Kukonekena ni mbunge yeswe ni kufupa sambukila

Yehova kakutukonekena ni mbunge yeswe chipwe ngwe iye keshi kufupiwa ukonekeno wa mutu niumwe. Tanga Samu 86:5, mba nushimutwine yihula yino:

• Kuchi Yehova akukonekena?

• Mumu liaka wakusakwilila ha ukonekeno wenyi?

• Yuma yika muyihasa kutukinda kulivwashana ni akwetu?

Kuchi mutuhasa kwimbulula Yehova ni kununga kupwa alinunga ni mandumbu jetu? Tanga Yishima 19:11, mba nushimutwine chihula chino:

• Nyi umwe mutu makuvwisa uli hanji makulemeka ku mbunge, yika muhasa kulinga hanga nulivwashane?

Ha mashimbu amwe mutuhasa kulemeka akwetu ku mbunge. Nyi chino muchilingiwa, yika twatamba kulinga? Tala CHINEMA, mba nushimutwine chihula chinahateho.

CHINEMA: Sambukila Yakuneha Yiwape (6:01)

• Kulita ni chinema, yika ndumbwetu alingile hanga apwe ni sambukila ni akwo?

6. Fupa yuma yipema hali mandumbu je

Nyi twakundama kuli mandumbu jetu, mutunyingika upeme ni ulelu wo. Mba kuchi mutuhasa kulihulikila ha upeme wa akwetu? Tala CHINEMA, mba nushimutwine chihula chinahateho.

CHINEMA: Pwako ni Nyonga Lipema Hali Mandumbu je! (5:10)

• Yuma yika muyihasa kutukwasa kumona yitanga yipema ya mandumbu jetu?

Yehova kakulihulika ha yitanga yetu yipema. Tanga 2 Sango ja Mianangana 16:9, mba nushimutwine chihula chino:

• Kuchi wakwivwa ha kunyingika ngwe, Yehova kakulihulikila ha yitanga yetu yipema??

YIZE WALILONGESA

Muhasa kukwasa chikungulwila hanga chipwe chalinunga ha kupwa mukwa-kukonekena ni kuzanga mandumbu je.

Kuhitulula

• Kuchi muhasa kukumba katonde?

• Yuma yika watamba kulinga nyi muhona kulivwashana ni umwe ndumbu?

• Mumu liaka unazange kwimbulula chilweza cha Yehova ha kukonekena akwenu?

HENGWOLA NAWA

Nyingika chize yishima ya Yesu muyihasa kutukwasa kuhona kupatwila akwetu.

Chiza Mukambo (6:56)

Shina twatamba kwita ukonekeno chipwe mutumona ngwetu kutwalingile nichimwe chuma chipi?

“Kwita Ukonekeno—Jila Yipema Yakunehenamo Sambukila” (Kaposhi wa Wakutalila 1 wa Novembro, 2002)

Tala chize atu amwe ahashile kutwama kanawa ni akwo ­chakuhona kusolola katonde.

Kanda Tupatwila Akwetu Kulita ni Yize Tunamono (5:06)

Nyingika chize muhasa kulivwashana ni mutu mweswawo shimbu kapinda wacho kanda achiputuka kupinjisa kulinunga cha chikungulwila.

“Hwisenu Yipikalo Yenu ni Zango” (Kaposhi wa Kutalila wa Maio 2016)