Nunga ni Kukola ku Ufulielo

Ha longeso lino lia Mbimbiliya, walilongesa yuma yinji hakutwala kuli Yehova. Yuma yize walilongesa yakukwasa kumuzanga chinji. Chikwo nawa, kota walihana kuli Yehova ni kukupapachisa. Nyi ka, kota unanyongo kulinga chuma chacho ni kawashi. Alioze, kukola ku ufulielo kuchishi kusulila ha upapachiso. Muhasa kununga ni kukundama kuli Yehova ndo ku miaka ya mutolo. Kuchi muhasa kuchilinga?

1. Mumu liaka watamba kununga ni kukolesa usepa we ni Yehova?

Twatamba kusa tachi jinji hanga tununge ni kukolesa usepa wetu ni Yehova. Mumu liaka? Mumu ‘kuchina hanji mutusesumuka’ kuli iye. (A-Hepreu 2:1) Yuma yika muyihasa kutukwasa kununga ni kuwayila Yehova ni ushishiko? Mutuhasa kulihulikila ha mulimo wa kwambujola hanji majila akwo akulingilamo Yehova ni mbunge yeswe. (Tanga A-Fwilipu 3:16.) Kuwayila Yehova chili chuma chilemu ku mwono!—Samu 84:10.

2. Yika watamba kununga ni kulinga?

Chipwe ngwe longeso lietu lia Mbimbiliya kulinayi ni kuheta ku songo, hindu mwono we ngwe mukwa-Kristu muununga. Mbimbiliya yinambe ngwo twatamba kuzala “mutu mwaha.” (A-Efwesu 4:23, 24) Muze mununga ni kulilongesa Liji lia Zambi ni kuya ku kukunguluka, munyingika yuma yaha hakutwala ku yitanga ya Yehova. Fupa jila ya kwimbulwilamo utu wa Yehova ku mwono we. Nunga ni kwalumuna yuma yize muyifupiwa ku mwono we hanga uvwise Yehova kuwaha.

3. Kuchi Yehova mahasa kukukwasa kukola ku ufulielo?

Mbimbiliya yinambe ngwo: “Zambi . . . kumakanupwisa angunu, makanujikijisa, makanutakamisa.” (1 Petulu 5:10) Tulieswe twakupalika mu yeseko. Alioze Yehova kakutwaha yize twakufupiwa hanga tukumbe yeseko yacho. (Samu 139:23, 24) Iye kanalakenya kukukwasa kupwa ni zango ni tachi hanga umulingile ni ushishiko.—Tanga A-Fwilipu 2:13.

NYINGIKA NAWA

4. Nunga ni kuhanjika ni Sepa lie mupema

Kulemba ni kutanga Mbimbiliya yakukwasa kupwa sepa lia Yehova. Kuchi yuma yino muyihasa kukukwasa kukundama chinji kuli iye?

Tanga Samu 62:8, mba nushimutwine chihula chino:

• Kutala yuma yika watamba kwalumuna hakutwala ku yilemba ye hanga ukolese usepa we ni Yehova?

Tanga Samu 1:2, mba nushimutwine chihula chino:

• Kutala yuma yika watamba kwalumuna hakutwala ku kutanga che cha Mbimbiliya hanga ukolese usepa we ni Yehova?

Yuma yika watamba kulinga mba uyuke chinji ha longeso lie lia wika? Nyi unazange kumona chize muhasa kuchilinga, tala CHINEMA, mba nushimutwine yihula yinahateho.

CHINEMA: Wahisa Longeso Lie Lia Wika (5:22)

• Yuma yika wamona ha chinema yize muhasa kukaula?

• Yikuma yika yize unazange kulilongesa?

5. Tesa majila akwo akulingilamo Yehova

Kutesa kulinga yuma ya ku ufulielo muchikukwasa kununga ni kukola ku ufulielo. Tala CHINEMA, mba nushimutwine chihula chinahateho.

CHINEMA: Mwono Upema Chinji (3:31)

• Kulita ni chinema, kuchi Cameron anakayuka ha kutesa kulinga yuma ya ku ufulielo?

Amwe keshi kuhasa kwalukila ku chihela cheka hanga ambujole. Kashika, mutuhasa kutesa yuma kulita ni uhashi wetu. Tanga Yishima 21:5, mba nushimutwine yuma yize muhasa kulinga . . .

• mu chikungulwila.

• mu mulimo wa kwambujola.

Kuchi chiyulo chili ha chisoneko twatanga muchihasa kukukwasa kulinga yize watesele?

Yuma yize muhasa kutesa kulinga

• Kululieka mulali we wa kulemba.

• Kutanga Mbimbiliya yeswe.

• Kunyingika mandumbu eswe a mu chikungulwila chenu.

• Kuputuka kusongwela limwe longeso lia Mbimbiliya.

• Kukalakala ngwe pionelu wa shimbu likehe hanji wa shimbu lieswe.

• Nyi uli ndumbu wa lunga, sako tachi hanga upwe kavumbi.

YIZE WALILONGESA

Nunga ni kukolesa usepa we ni Yehova ni kutesa kulinga yuma ya ku ufulielo. Nyi walinga chocho, muwahilila ku mwono ku miaka yeswe!

Kuhitulula

• Mumu liaka watamba kupwa ni shindakenyo ngwe, Yehova makukwasa kununga ni kumulingila ni ushishiko?

• Kuchi muhasa kukolesa usepa we ni Yehova?

• Kuchi kutesa kulinga yuma ya ku ufulielo muchihasa kukukwasa kukola ku ufulielo?

HENGWOLA NAWA

Yuma yika Yehova akulemesa chinji, shina kumulingila chuma chilemu ha chisuho chimuwika nyi kununga ni kumuwayila ni ushishiko ku mwono wetu weswe?

Pwako ni Ushishiko Ngwe wa Apalahama (9:20)

Ha mashimbu amwe, chipwe kavumbi ka Yehova washishika mahasa kuhona uwahililo. Tala chize muhasa kupwa nawa ni uwahililo.

Pwako ni Uwahililo ha Kulilongesa ni Kupukuna (5:25)

Kuchi muhasa kutesa yuma ya ku ufulielo ni kuyimanununa?

“Tesa Yuma ya ku Ufulielo Yize Muyihalisa Sakatanga we” (Kaposhi wa Kutalila 15 wa Julho, 2004)

Mumu liaka kukola ku ufulielo chili chilemu? Chikwo nawa, kuchi muhasa kukolesa ufulielo we?

“Kolesa Ufulielo we—‘Tangwa lia Yehova Linakundama’” (Kaposhi wa Kutalila 15 wa Maio, 2009)