LONGESO 59
Muhasa Kukumba Yihungumiona
Akwa-Kristu mahasa kupalika mu yihungumiona ha shimbu lieswalio. Shina chino chatamba kutuvwisa woma?
1. Mumu liaka twakushimbwila yihungumiona?
Mbimbiliya yakusolola pundu ngwo: “Waze eswe mazanga kwenda ni ululi muli Kristu Yesu kumakamona yihungumiona.” (2 Timoteu 3:12) Yesu kamuhungumionene mumu te keshi kulinga yuma ya hashi ha Satana. Chipwe yetu kutushi kulinga yuma ya hashi. Kashika kutushi kukomoka muze akutuhungumiona kuli manguvulu hanji kuli akwa-mayingeleja.—Yoano 15:18, 19.
2. Kuchi mutuhasa kulilulieka shimbu kanda tuchipalika mu yihungumiona?
Tunafupiwa kukolesa ufulielo wetu kuli Yehova haliapwila. Sako mashimbu hita tangwa hanga ulembe ni kutanga Mbimbiliya. Pwako ni kukunguluka mashimbu eswe. Yuma yacho muyikwaha tachi jize mufupiwa muze makuhungumiona, chipwe ngwe yihungumiona yacho muyikatuka kuli asoko. Postolo Paulu yoze wapalikile mu yihungumiona yinji yasoneka ngwenyi: “Mwene iye Chikwashi chami; chichi kevwa woma.”—A-Hepreu 13:6.
Mutuhasa kupwa ni hamu ha kwambujola mashimbu eswe. Kwambujola chakutukwasa kufuliela muli Yehova ni kukumba woma wa atu. (Yishima 29:25) Nyi wapwa ni hamu lia kwambujola haliapwila, mulilulieka hanga ukanunge ni kwambujola chipwe muze nguvulu makanjisa mulimo wetu wa kwambujola.—1 A-Tesalonika 2:2.
3. Kuchi twakuyuka ha kununga ni kushishika kuli Yehova chipwe muze matuhungumiona?
Tunanyingika ngwetu, kutushi kuzanga yihungumiona, alioze muze twakukumba yihungumiona twakukolesa ufulielo wetu. Twakukundama kuli Yehova mumu twakumona ukwaso wenyi muze tunahongo chinji. (Tanga Tiangu 1:2-4.) Yehova kakunenganyana muze twakumona lamba, alioze kakuwahilila muze twakukumba. Mbimbiliya yakwamba ngwo: “Nyi ha kulinga yipema munwivwa lamba, munulihumikiza nacho, chino chinapemena kuli Zambi.” (1 Petulu 2:20) Chiwape chize Yehova makahana kuli waze akunyongonona chili chiwape cha mwono wa mutolo mu chifuchi muze kumuchikapwa nawa akwa-kulimika ni uwayilo wamwenemwene.—Mateu 24:13.
NYINGIKA NAWA
Nyingika ngwe, muhasa kushishika kuli Yehova chipwe muze atu makuhungumiona. Chikwo nawa, muhasa kuzuka yiwape yinji.
4. Muhasa kukumba chipwe ngwe asoko je makuhungumiona
Yesu kanyingikine kanawa ngwenyi, asoko jetu te mahasa kutuhungumiona mumu lia kuwayila Yehova. Tanga Mateu 10:34-36, mba nushimutwine chihula chino:
Yuma yika muyihasa kulingiwa nyi umwe mu usoko we mazanga kulingila Yehova?
Nyi unazange kumona chimwe chilweza, tala CHINEMA, mba nushimutwine chihula chinahateho.
Yika mulinga nyi sepa lie makulweza hanga weche kulingila Yehova?
Tanga Samu 27:10 ni Marku 10:29, 30. Muze munutanga hita chisoneko, shimutwinenu chihula chino:
Kuchi chilakenyo chino muchihasa kukukwasa nyi masepa hanji asoko je malimika ni yena?
5. Nunga ni kuwayila Yehova chipwe muze makuhungumiona
Chakufupiwa kupwa ni hamu mba tununge ni kulingila Yehova muze akwetu mazanga kutukwika kuchilinga. Tala CHINEMA, mba nushimutwine chihula chinahateho.
Kuchi yilweza ha chinema chino, muyihasa kukolesa ufulielo we?
Tanga Yilinga 5:27-29 ni A-Hepreu 10:24, 25. Muze munutanga hita chisoneko, shimutwinenu chihula chino:
Mumu liaka chili chilemu kununga ni kuwayila Yehova chipwe muze makanjisa kukunguluka hanji mulimo wetu wa kwambujola?
6. Yehova makukwasa kukumba yihungumiona
Yela ja Yehova a ku minyachi ni miaka yalisa kakununga ni kushishika kuli Yehova, chipwe muze akwahungumiona. Nyi unazange kunyingika yize yakwakwasa, tala CHINEMA, mba nushimutwine chihula chinahateho.
Kulita ni chinema, yika yakwashile Yela ja Yehova wano kunyongonona?
Tanga A-Roma 8:35, 37-39 ni A-Fwilipu 4:13. Muze munutanga hita chisoneko, shimutwinenu chihula chino:
Kuchi yisoneko yino yinasolola ngwo muhasa kunyongonona mu yihungumiona?
Tanga Mateu 5:10-12, mba nushimutwine chihula chino:
Mumu liaka muhasa kuwahilila chipwe ngwe makuhungumiona?
Tununu a tununu twa Yela ja Yehova kakuhasa kukumba yihungumiona. Kashika chipwe yena muhasa!
ATU AMWE KAKWAMBA NGWO: “Ami kota chichi kuhasa kukumba yihungumiona.”
Chisoneko chika muchihasa kukutakamisa muze mufupiwa utakamiso?
YIZE WALILONGESA
Yehova kakukulemesa ha tachi jize wakusa hanga umuwayile chipwe muze makuhungumiona. Ni ukwaso wenyi, muhasa kunyongonona!
Kuhitulula
Mumu liaka akwa-Kristu atamba kushimbwila ngwo maahungumiona?
Kuchi muhasa kulilulieka shimbu kanda uchipalika mu yihungumiona?
Yuma yika muyihasa kukwaha shindakenyo ngwe muhasa kununga ni kuwayila Yehova chipwe ngwe makuhungumiona?
HENGWOLA NAWA
Panjika chize umwe ndumbu mukweze malumbununa chize Yehova amukwashile kunyongonona muze apwile mu zuwo lia ususu mumu lia ufulielo wenyi.
Tala yize yakwashile amwe waze alimbata kunyongonona ha miaka yinji ni kulingila Yehova chipwe ngwe kapwile mu yihungumiona.
Lilongese chize muhasa kunyongonona mu yihungumiona.
“Lilulieke Haliapwila Hakutwala ku Yihungumiona” (Kaposhi wa Kutalila wa Julho 2019)
Yika twatamba kulinga mba tupwe ni sambukila mu usoko aku tunashishika kuli Yehova?
“Umwenemwene Kuushi Kuneha ‘Sambukila Alioze Katana’” (Kaposhi wa Kutalila wa Outubro 2017)