Tulayi Waze Akufunga Mapanga

YESU kasolwele pundu ngwenyi kapwile “kafunga mupema” muze apwile ni kulinga mulimo wenyi hano hashi. (Yoa. 10:11) Hakumona mbunga ya atu waze te anamukaula, “yaavwila keke, mumu [te kanalikatalisa] nikulimbilambila, ngwe mapanga waze keshi kafunga.” (Mateu 9:36) Petulu ni apostolo akwo kamwene mbunge yipema yize Yesu apwile nayo. Yesu kapwile mutu walisa ni tufunga A-Izalele a mahuza, waze te akwechelela mapanga hanga alumbwangile cha kuhona kulia cha ku spiritu. (Eze. 34:7, 8) Yesu kasolwele chilweza chipema hakulongesa ni kufunga kanawa mapanga ndo ni muze ahanyine mwono wenyi hali ayo. Chino chakwashile apostolo anyingike mwakukwashila waze apwile ni ufulielo hanga afune kuli Yehova, “Kafunga kanda Kalayi ka mbunge” jo.—1 Petu. 2:25.

² Tangwa limwe, Yesu yahanjika ni Petulu ni kumulweza ulemu wakupwa ni kulisa mapanga ni kwafunga kanawa. (Yoa. 21:15-17) Sango jacho jakwachile chinji Petulu ku mbunge, mba hanyima neye yakolweza makulwana a mu chikungulwila chitangu cha akwa-Kristu ngwenyi: ‘Fungenu mbunga ya mapanga a Zambi, yize yili hakachi kenu. Pwenu tulayi, hi ha kunuzangisa ko alioze mumu nunachizange: chipwe hi mukufumbuka ko ku upite wa sonyi, alioze mumu ha zango. Kanda nulipwisa ngwe nuli mianangana hakachi ka waze hananukunjika, alioze lingenu ni kulipwisa yilweza ku mbunga.’ (1 Petu. 5:1-3) Maliji ja Petulu kanatale ni hali tulayi a mu yikungulwila musono. Kashika, makulwana katamba kwimbulula Yesu ha kupwa yilweza ku mbunga ni kusongwela milimo ya Yehova ni mbunge yo yeswe.—Hepre. 13:7.

³ Twatamba kusakwilila chinji hakupwa ni tulayi mu yikungulwila waze akutongola ni spiritu yisandu. Twakuyuka chinji ha chize ayo akutufunga. Chakutalilaho, tulayi kakukolweza ni kufunga hita mutu mu chikungulwila. Hita poso, kakusa tachi hanga asongwele kukunguluka cha chikungulwila chize chakututakamisa ku ufulielo. (Roma 12:8) Kakukalakala chinji hanga afunge mapanga ahone kwapiangula kuli atu api hanji yuma yipi. (Iza. 32:2; Titu 1:9-11) Hakukalakala chinji mu munda, kakutukolweza hanga ni yetu tupwe ni kwambujola sango lipema mashimbu eswe hita kakweji. (Hepre. 13:15-17) Pundu lume, Yehova kakuzachisa malunga wano ali ngwe “yawana kuli atu” hanga akolese chikungulwila.—Efwe. 4:8, 11, 12.

⁴ Malunga waze akutongola kupwa tulayi katamba kukaula shimbi jili mu Liji lia Zambi mba ahase kufunga kanawa chikungulwila. Ewa, ndo akaule shimbi jacho mba atu ambe ngwo kaatongola ni spiritu yisandu. (Yili. 20:28) Kwamba pundu, yikuma asoneka mu Yisoneko yize tulayi akwa-Kristu atamba kukaula yili yikalu, mumu mulimo wa kalayi uli ulemu chinji. Alioze akwa-Kristu a malunga eswe waze akuzanga chinji Yehova, waze nawa anazange hanga iye aazachise mahasa kukaula shimbi jacho. Kashika, mandumbu eswe katamba kumona ngwo tulayi kali mandumbu waze akukaula shimbi ja Mbimbiliya mu mwono wo weswe.

⁵ Postolo Paulu kasonekene yuma yilemu ya mu Yisoneko yize tulayi atamba kukaula, mu mukanda utangu uze asonekenene Timoteu ni uze asonekenene Titu. Ha 1 Timoteu 3:1-7 twakutangaho ngwo: “Liji lino liamwenemwene ngwo, Nyi umwe mafupa milimo ya kalayi, kachi mazanga milimo yipema. Kashika chatamba kalayi akapwe keshi kapalia, lunga wa pwo umuwika, mukwa kusuula, mukwa mana, mukwa kulita ha yilinga yenyi, mukwa kuzumbula ngeji, mukwa kujama ha kulongesa; hi mukwa chimbangwinya ku vinyu ko; hi mukwa kumbufula ko; alioze chimbovu, hi mukwa ndombo ko; hi mukwa kufwila mbongo ko; mukwa kuyula zuwo lienyi kanawa, ni ana jenyi akwa kumuzeyela, keshi lwelia. (Nyi mutu kanyingikine kuyula zuwo lienyi mwene, ngwe kuchi mafunga chikungulwila cha Zambi?) Hi yoze ko hafuliela shimbu likepe, kuchina ha kulifuza malimbukila mu uhie wa Ndiapu. Chikwo nawa, chamutamba kupwa ni shindakenyo yipema kuli waze ali haze; kuchina malimbukila mu luchoko ni mu muheto wa Ndiapu.”

⁶ Paulu yasonekena Titu ngwenyi: “Ha chikuma chino nakuhichikile mu Kreta, hanga ukalulike yuma yize yinahono, hanga ukasele makulwana mu membo eswe, chizechene ngwe nakwambile; nyi kachi umwe masamba ku kusuma cheswe, lunga wa pwo umuwika, kali ni ana akwa kufuliela, waze keshi kusumiwa ha kuhungumuka ni yipi, hanji kukolema. Mumu chatamba kalayi, se iye kaselo ka Zambi, akapwe keshi kapalia; hi mukwa pami ko, hi chitenu ko, hi mukwa kuzengewa ni vinyu ko, hi mukwa kumbufula, yoze keshi chipululu cha upite wa sonyi; alioze mukwa kuzumbula ngeji, mukwa kufwila yipema, mukwa mana, mukwa ululi, musandu, mukwa kusuula; mukwa kukakaminya ku liji lia umwenemwene lize liakulita ni lie longeso, hanga akahase kushinjila mu longeso lingunu ni kukumika akwa kuhamika nawa.”—Titu 1:5-9.

⁷ Chipwe ngwe shimbi ja mu Yisoneko jize tulayi atamba kukaula jakukola woma, nihindu malunga akwa-Kristu katambile kuchina mulimo wacho. Tulayi katamba kusolola yitanga yipema ya Ukristu mba ahase kukolweza mandumbu mu chikungulwila hanga no apwe ni yitanga yacho. Paulu yasoneka ngwenyi “yawana kuli atu” kaaseleko hanga “akalulike asandu ha milimo ya uvumbiko, mukukolesa mujimba wa Kristu, ndo yetu eswe mutuheta ku kununga cha we ufulielo, ni ku chinyingi cha mwe Mwana Zambi, kuli mutu mungunu, ku cheseko cha chizundamo cha kuzala too cha Kristu.”—Efwe. 4:8, 12, 13.

⁸ Tulayi katambile kupwa twanuke akehe hanji malunga waze afuliela ha shimbu likepe. Alioze katamba kupwa malunga ajama mu mwono wa akwa-Kristu, ali ni chinyingi chinji cha Mbimbiliya, ni kunyingika kanawa Yisoneko ni kuzanga chikungulwila ni mbunge yo yeswe. Katamba kupwa ni hamu lia kukumika yihenge, ni kufunga mapanga kuchina maapiangula kuli atu api. (Iza. 32:2) Kashika, mandumbu eswe mu chikungulwila kakumona ngwo tulayi kali malunga waze hanahi ku ufulielo, waze nawa akuzanga chinji mapanga ja Zambi.

⁹ Mandumbu waze hajama anatela kutongola apwe tulayi kakusolola malinjekela ku mwono wo. Nyi hanambata, kalayi kakukaula shimbi ya Ukristu hakutwala ku ulo, chekwamba ngwo, katamba kupwa lunga lia pwo umuwika ni kusongwela kanawa usoko wenyi. Nyi kalayi kali ni ana waze akuwayila Yehova ni kumuzeyela mu yuma yeswe, hi yihulia ko, mandumbu mu chikungulwila mahasa kutayiza ni mbunge yeswe fumbo maaha hakutwala ku usoko ni ku mwono wa Ukristu. Kalayi katamba nawa kupwa keshi kapalia chipwe chitela, alioze kakwete uchela upema chipwe kuli atu a haze. Katambile kupwa ni ndako yipi yize muyipihisa lufuma wa chikungulwila. Chikwo nawa katambile kupwa mutu yoze watambula fumbo haliapwila mumu lia kulinga shili yinene. Chino muchikwasa mandumbu mu chikungulwila embulule chilweza chenyi chipema ni kwivwa kuwaha ha kukaula usongwelo wenyi uze muwafunga ku ufulielo.—1 Kori. 11:1; 16:15, 16.

¹⁰ Mulimo uze malunga wano ajama akulinga mu chikungulwila cha akwa-Kristu, walifwa ni uze apwile ni kulinga makulwana a mu Izalele waze avulukile ngwo ‘akwa mana, yinyingi, ni lufuma’ mupema. (Shimbi 1:13) Makulwana a mu chikungulwila cha akwa-Kristu hi atu angunu ko, alioze kaanyingika kuli mandumbu ni atu a kuze atwama ngwo kali akwa-ululi nawa kali malunga waze akuvwila Zambi woma, waze nawa asolola ha miaka yinji ngwo kakukaula shimbi ja Zambi mu mwono wo. Ayo kakuhasa kuhanjika ni hamu mu chikungulwila mumu lia kuhona ulembekese mumu keshi ni chitela chakusumina milonga.—Roma 3:23.

¹¹ Malunga waze matela kupwa tulayi katamba kupwa ni yitanga yalita ni kutwama kanawa ni akwo. Katambile kuhianyisa chinji ha yize akulinga ku mwono wo. Alioze, katamba kupwa ni mwono walita hamwe ni kulihumikiza. Yitanga yo yalita kuyakusoloka ha chize akulia, akunwa, hanji akuheha. Keshi kunwa chinji walwa hanji kupwa yizengi. Mutu yoze wa kunwa walwa unji keshi kulihumikiza, kashika kechi kuhasa kutala kanawa milimo ya mu chikungulwila.

¹² Mutu katamba kupwa mukwa-kululieka kanawa yuma mba ahase kusongwela kanawa mu chikungulwila. Yitanga yenyi yipema yakusoloka ha chize akulilulieka mwene, kululieka yuma ku zuwo lienyi ni milimo yenyi ya hita tangwa. Keshi kuchelewa kulinga yuma. Kakutala ha yize yinafupiwa ni kulilulieka hanga ayilinge kawashi. Kakukaula shimbi ja Mbimbiliya ku mwono wenyi.

¹³ Kalayi katamba kupwa chimbovu. Katamba kunyingika kukalakala kanawa ni makulwana-ni-akwo ni kulivwashana no. Katamba kupwa ni nyonga lialita hali iye mwene. Chikwo nawa katambile kushimbwila akwo hanga alinge yuma yize keshi kuhasa kulinga. Nyi kalayi kali chimbovu, kechi kukakaminya ha nyonga lienyi wika ngwenyi lie linahiana manyonga ja makulwana-ni-akwo. Makulwana akwo mahasa kupwa ni yitanga hanji uhashi uze iye keshi nawo. Makulwana masolola ngwenyi keshi mbunge yikalu nyi mapwa ni kukaula Yisoneko ha yeswe yize malinga ni kusa tachi hanga akaule chilweza cha Yesu Kristu. (Fwili. 2:2-8) Mukulwana katambile kupwa mukwa-ndombo hanji mukwa-kulamba atu, alioze katamba kuvumbika akwo ni mbunge yeswe ni kwamona ngwe kali alemu kuhiana iye. Hi mukwa-pami ko, yoze wakuzanga hanga akwo atayize wika manyonga jenyi. Hi chitenu ko, alioze kakutwama kanawa ni akwo.

¹⁴ Mutu yoze watela kupwa kalayi mu chikungulwila, katamba kupwa mukwa-mana. Chino chinalumbunuka ngwo katamba kupwa chihomboloji, hi mukwa-kulipupwisa ko kukwata yiyulo. Katamba kunyingika kanawa shimbi ja Yehova ni kujikaula. Mutu yoze ukwete mana kakutayiza chiyulo mamwaha ni kukaula usongwelo. Hi chilembekese ko.

¹⁵ Paulu kewulwile Titu ngwenyi, kalayi kapwa mutu mukwa-kufwila yipema. Iye katamba kupwa mukwa-ululi ni kushishika. Yitanga yino yakusoloka ha chize iye akutwama ni akwo ni chize akukakaminya ku yuma yipema nawa yize yalita. Iye kakulemesa uwayilo ni usepa wenyi kuli Yehova, ni kukalila shimbi jenyi ja ululi. Katamba kupwa mukwa-kufunga sango. Kalayi katamba nawa kupwa mukwa-kuzumbula ngeji, ha kulihana mwene ni yuma yenyi hanga akwase akwo.—Yili. 20:33-35.

¹⁶ Kalayi katamba kulongesa kanawa mba akalakale kanawa mu chikungulwila. Kulita ni maliji waze Paulu atumine kuli Titu, kalayi katamba kupwa “mukwa kukakaminya ku liji lia umwenemwene lize liakulita ni lie longeso, hanga akahase kushinjila mu longeso lingunu ni kukumika akwa kuhamika.” (Titu 1:9) Kalayi katamba kulumbununa kanawa yuma, ni kusolola umwenemwene wa yize anahanjika, ni kukwasa waze mahamika ni kuzachisa Yisoneko mu jila yize muyikwasa akwo hanga apwe ni shindakenyo ni kukolesa ufulielo wo. Kalayi katamba kupwa ni uhashi wakulongesa kanawa ha mashimbu apema ni ha mashimbu api. (2 Timo. 4:2) Katamba kulihumikiza muze makumika mutu yoze wahengesa yimwe hanji kukwasa yoze unakakajana hanga alinge milimo yipema ya ufulielo. Kalayi yoze wakulongesa kanawa ha mbunga hanji kuli mutu ni mutu, kakusolola pundu ngwo kanatela mulimo uno ulemu.

¹⁷ Chili chilemu kuli makulwana kupwa ni zango lia kwambujola sango lipema. Ayo katamba kusolola ngwo kanembulula Yesu, yoze wasele kulutwe mulimo wa kwambujola sango lipema. Yesu te kakulihulumba hali tumbaji twenyi, chocho yaakwasa hanga ambujole kanawa sango lipema. (Marku 1:38; Luka 8:1) Nyi makulwana makilikita chinji mu munda chipwe ngwe kali ni milimo yinji, mahasa kukwasa mandumbu mu chikungulwila hanga no apwe ni kwambujola chinji. Nawa muze makulwana mambujola hamwe ni asoko jo ni mandumbu akwo mu chikungulwila ‘malitakamisa umwe ni mukwo.’—Roma 1:11, 12.

¹⁸ Yino yeswe muyihasa kusoloka ngwe yili yikalu chinji kuli ndumbu yoze unazange kupwa kalayi. Kwamba pundu, kukushi kalayi niumwe yoze mahasa kusolola kanawa yitanga yeswayi ya mu Mbimbiliya ngwe chize chatamba kupwa. Nihindu kukwatambile kupwa kalayi yoze mahona kusolola chimwe cha ku yitanga yacho. Nyi kalayi mahona chimwe cha ku yitanga yacho muchisolola kapalia munene. Makulwana amwe mahasa kusolola kanawa yitanga yimwe, akwo nawa masololako yitanga yikwo. Chocho, chizavu cheswe cha makulwana muchihasa kupwa ni yitanga yipema yize yinafupiwa ha kusongwela chikungulwila cha Zambi.

¹⁹ Muze chizavu cha makulwana anatale hali mandumbu hanga amone nyi mahasa kupwa tulayi, ayo katamba kwiwuluka maliji ja postolo Paulu anambe ngwo: “Ngunambe kuli mutu mweswe hakachi kenu ngwami, Kanda alinyongena kuhiana chize chamutamba kunyonga; alioze akanyonge ni mana, ngwe Zambi hanapangila kuli mutu mweswe njongo yenyi ya ufulielo.” (Roma 12:3) Kashika, hita mukulwana katamba kulimona ngwe kali mukehe kuli akwo. Niumwe katambile kulipwisa ‘mukwa ululi kuhiana’ muze mahengwola waze anazange kuhana yiteli. (Chilu. 7:16) Nyi makulwana manyingika kanawa yize yakufupiwa mba ndumbu apwe kalayi kulita ni Yisoneko, muchipwa chashi kuli ayo kumona nyi ndumbu yoze anambe kutongola kanase tachi hanga akaule shimbi ja Zambi hakutwala ku chiteli chacho. Nyi makulwana mahona katonde ni ulembekese ni kwiwuluka nawa ngwo tulieswe tuli yihenge, mahasa kutongola kanawa mandumbu kulita ni shimbi ja Yehova ni kuneha yiwape yinji mu chikungulwila. Muze anatale hali hita ndumbu yoze matongola, katamba kulemba hanga ete usongwelo wa spiritu yisandu ya Zambi. Chino chili chiteli chilemu chize akwete, kashika katamba kukaula utowezo wa Paulu unambe ngwo: “Kanda ukasayika moko nikawashi hali mutu niumwe.”—1 Timo. 5:21, 22.

²⁰ Mandumbu waze ajama ku ufulielo kakusolola ngwo spiritu yisandu ye yakwasongwela, ha kusolola mihuko ya spiritu ku mwono wo. Paulu katongwele mihuko ya spiritu livwa. Mihuko yacho yili ‘zango, uwahililo, sambukila, kulihumikiza, utu, upeme, kushishika, kushimbika ni kusuula.’ (Ngala. 5:22, 23) Tulayi jacho kakuneha uwahililo kuli mandumbu jo ni kukwasa chikungulwila chilinunge hanga alingile Zambi milimo yisandu. Yitanga ni milimo yo ye yakusolola ngwo chamwenemwene kali akutongola ni spiritu yisandu.—Yili. 20:28.

²¹ Chili chilemu kuli makulwana kupwa alinunga hanga anehe sambukila mu chikungulwila. Ewa, kali atu alisa, alioze katamba kulinunga ha kulipanjika umwe ni mukwo, chipwe ngwe kali ni manyonga alisa ha chikuma chize anashimutwina. Hita mukulwana katamba kukaula chiyulo chize chizavu cheswe cha makulwana makwata, nyi chiyulo chacho kuchalimikine ni shimbi ja Mbimbiliya. Mutu yoze keshi kulikwachilila ha nyonga lienyi kakusolola ngwo kali ni “mana a kwilu” waze “atoma, a sambukila.” (Tia. 3:17, 18) Kukushi niumwe mukulwana mu chizavu yoze watamba kunyonga ngwenyi kahiana akwo, hanji kulitenga mwata wo. Muze makulwana akulivwashana ngwe chizavu hanga akwase chikungulwila, ayo kakuzeyela Yehova.—1 Kori., kap. 12; Kolo. 2:19.

²² Mandumbu waze ajama ku ufulielo katamba kupwa ni mbunge ya kufupa kupwa tulayi. (1 Timo. 3:1) Alioze kupwa mukulwana mu chikungulwila chikwete milimo yinji nawa chakufupiwa mutu kulihana mwene. Ewa, mukulwana katamba kulihana mwene hanga alingile mandumbu jenyi ni kwakwasa ku ufulielo. Kashika, ndumbu yoze mafupa kupwa kalayi katamba kukaula yize Yisoneko yinambe hakutwala ku chiteli chacho.

²³ Ndumbu yoze wakalakala miaka yinji ngwe mukulwana washishika mahasa kuyiza hanji kuhona kulinga yuma yimwe. Hanji keshi kuhasa nawa kulinga milimo yinji yize akulinga tulayi hamukunda wa ushinakaji. Chipwe chocho, ndumbu wacho kaatela kumusa vumbi ni kumumona ngwe mukulwana shimbu machinunga ni chiteli chenyi. Kafupiwile kwecha ukulwana mumu ngwo hazeya ku mujimba. Iye nihindu kanatela ulemu ngwe chize akulinga kuli makulwana eswe waze anase tachi hanga afunge mapanga ja Zambi.

²⁴ Ndumbu mahasa tuhu kwecha mwene kukalakala ngwe mukulwana nyi mamona ngwenyi keshi kuhasa nawa kukalakala kanawa milimo ya ukulwana mumu mwono wenyi walumuka. (1 Petu. 5:2) Nihindu, ndumbu wacho ndo kumusa vumbi. Mahasa kukwasa chinji chikungulwila chipwe ngwe keshi ni kukalakala nawa ngwe mukulwana mu chikungulwila.

²⁵ Makulwana kali ni yiteli yinji mu chikungulwila. Kuli kasongo wa chizavu cha makulwana, mukwa-kusoneka, kalayi wa mulimo, kasongo wa Longeso lia Kaposhi wa Kutalila ni kalayi wa Kukunguluka cha Mwono ni Mulimo Wetu. Makulwana anji kakupwa tulayi a yizavu. Makulwana kakupwa mu yihela yacho mashimbu eswe. Alioze nyi mukulwana umwe maya ku chikungulwila cheka, hanji kahashile nawa kulinga milimo yimwe mumu lia kuyiza, chipwe mamuchiza ha ukulwana ha kuhona kukaula shimbi ja Mbimbiliya, kakutongola mukulwana mweka amusalakane. Mu yikungulwila muze muli makulwana akehe wika, mukulwana umuwika mahasa kupwa ni yiteli yinji ndo ni haze makatongwela makulwana akwo.

²⁶ Kasongo wa chizavu cha makulwana mwe wakusongwela muze chizavu cha makulwana analikungulula. Kashika, katamba kulipalumwisa hanga akalakale kanawa ni makulwana akwo muze anafungu mapanga ambala ja Zambi. (Roma 12:10; 1 Petu. 5:2, 3) Katamba kupwa mukwa-kululieka yuma kanawa hanga ahase kusongwela ni mbunge yeswe.—Roma 12:8.

²⁷ Mukwa-kusoneka mwe wakutala ha milimo yakusonejeka mu chikungulwila ni kulweza makulwana sango jize atambula mu chikungulwila. Nyi muchilita, ndumbu wacho katamba kumwaha mukulwana-ni-mukwo hanji kavumbi wajama yoze mapwa ni kumukwasa.

²⁸ Kalayi wa mulimo mwe ukwete chiteli chakutala ha mulimo ni sango jeswe ja mu munda. Kakululieka katalilo wa kumeneka yizavu ya mulimo wa kuya mu munda. Ha hita kakweji kakumeneka chizavu kusongo lia poso. Yikungulwila yikehe yakupwa ni yizavu ya mulimo yikehe nawa, kashika mahasa kumeneka hita chizavu kaali mu mwaka. Muze mameneka chizavu, kakusongwela kukunguluka cha kuya mu munda, kukalakala mu munda ni mandumbu, kukwasa akwa-kwambujola apwe ni kufunyina atu ni kusongwela malongeso a Mbimbiliya.

²⁹ Mulimo wa kalayi wa chizavu uli umwe wa milimo yilemu mu chikungulwila. Mulimo wacho uli (1) wa kutala ha chize hita ndumbu mu chizavu ali ku ufulielo; (2) wa kukwasa hita ndumbu mu chizavu apwe ni kukalakala kanawa mashimbu eswe mu munda; (3) wa kukwasa tuvumbi ali mu chizavu hanga ajame ni kutambula yiteli yikwo mu chikungulwila. Chizavu cha makulwana che chakutongola mandumbu waze mahasa kulinga milimo yacho.

³⁰ Nyi muchilita, tulayi a yizavu katamba kupwa makulwana a mu yikungulwila hamukunda wa chize mulimo wacho wapwa. Alioze ni kavumbi wajama neye mahasa kulinga mulimo wacho ndo ni haze mukukapwila mukulwana. Kavumbi yoze malinga mulimo wacho, mamuvuluka ngwo kavumbi wa chizavu, mumu iye hi kalayi wa mu chikungulwila ko. Iye katamba kukalakala mushi lia usongwelo wa makulwana.

³¹ Chiteli chilemu chinji atwama nacho kalayi wa chizavu chili kusongwela mulimo wa kwambujola. Mandumbu a mu chizavu chenyi mahasa kukalakala chinji mu munda nyi neye kakukalakala mashimbu eswe mu munda ni mbunge yenyi yeswe. Amu mandumbu akulitakamisa ni kulikwasa umwe ni mukwo muze ali hamuwika, kashika kalayi wa chizavu katamba kululieka katalilo wa kuya mu munda yoze makwasa eswe. (Luka 10:1-16) Kalayi katamba kusa shindakenyo ngwenyi kuli yihela yalita yakwambulwilamo. Kanji-kanji, iye mwe wakusongwela muze maliwana hanga aye mu munda ni kululieka akwa-kwambujola ha chize makalakala. Nyi kechi kapwako, katamba kulweza mukulwana mukwo, hanji kavumbi chipwe mukwa-kwambujola yoze wajama hanga akasongwele ni kukwasa akwa-kwambujola akanyingike chize makalakala.

³² Kalayi wa chizavu katamba kulianga kululieka yuma hakutwala ku kumeneka cha kalayi wa mulimo, hakulweza chizavu ngwenyi makaameneka ni kwalweza yize makayukako. Nyi eswe mu chizavu manyingika mashimbu waze makaameneka muchipwa chashi kuli mandumbu kulilulieka.

³³ Hita chizavu cha mulimo chatamba kupwa ni atu akehe. Chino chakukwasa kalayi wa chizavu hanga anyingike kanawa mandumbu eswe a mu chizavu chenyi. Kalayi wacho kakulihulumba hali hita ndumbu mu chizavu mumu lia zango lienyi hali ayo. Kakusa tachi akwase hita ndumbu ni kumukolweza hanga apwe ni kuya mu munda ni ku kukunguluka cha chikungulwila. Iye kakuzanga nawa kukwasa hita ndumbu mu chizavu ha yeswe yize muyifupiwa hanga anunge ni kukola ku ufulielo. Waze akuyiza hanji kulema ku mbunge kakuyuka chinji muze akuya ni kwameneka. Mandumbu amwe kakutambula yimwe yiteli mu chikungulwila ni kukwasa chinji mandumbu, hanyima lia kwakolweza hanji kwaha fumbo. Kalayi wa chizavu kakukwasa chitangu mandumbu a mu chizavu chenyi. Alioze, amu ali mukulwana nawa kafunga, katamba kutala nawa ha chikungulwila cheswe hanga akwase mweswawo mafupiwa ukwaso.—Yili. 20:17, 28.

³⁴ Mulimo ukwo wa kalayi wa chizavu uli kukwasa kutambula sango ja mulimo wa mu munda kuli waze atwama mu chizavu chenyi. Kakuhana sango jacho kuli mukwa-kusoneka. Akwa-kwambujola mahasa kukwasa kalayi wa chizavu cho nyi mapwa ni kumwaha ni kawashi sango jo ja mu munda. Ayo mahasa kuhana sango jacho kuli kalayi wa mu chizavu cho ku songo lia hita kakweji, hanji kujisa mu kasha ya kusa sango ja mu munda yize yili mu Zuwo lia Wanangana

³⁵ Kuli milimo yimwe yize akutala kuli akwa-Komite ya Mulimo ya Chikungulwila. Mu komite yacho mwakupwa kasongo wa chizavu cha makulwana, mukwa-kusoneka ni kalayi wa mulimo. Chakutalilaho, komite ya mulimo ye yakutayiza mandumbu hanga alingile pande jo ja ulo hanji ja ufwe mu Zuwo lia Wanangana. Ayo nawa e akusakula yizavu yize akwa-kwambujola atamba kupwa. Komite yacho ye yakutayiza waze malisonekesa hanga apwe mapionelu a shimbu lieswe hanji a shimbu likehe ni mu milimo yikwo ya mu ululikiso wetu. Komite ya mulimo yakukalakala mushi lia usongwelo wa chizavu cha makulwana.

³⁶ Mutango we wakuhana usongwelo hakutwala ku yiteli ya mandumbu jacho, hamwe ni kasongo wa Longeso lia Kaposhi wa Kutalila, kalayi wa Kukunguluka cha Mwono ni Mulimo Wetu ni mandumbu akwo a mu chizavu cha makulwana.

³⁷ Chizavu cha makulwana cha hita chikungulwila chakulingulula ha kupalika cha amwe tukweji hanga amone chize chikungulwila chinakolo ku ufulielo. Kuchizako kukunguluka chize makulwana akulinga muze anaameneka kuli kalayi wa mbonge, makulwana kakulikungulula nawa muze mukupalika tukweji atatu hanyima lia kwameneka. Chipwe chocho, makulwana mahasa nawa kulikungulula, shimbu lieswalio mukusoloka chimwe chuma chize chinafupiwa kulinga.

³⁸ Tulayi no kali yihenge; alioze, Mbimbiliya yinatukolweza tulieswe mu chikungulwila hanga tuzeyele kuli makulwana, mumu uno uli ululikiso wa Yehova. Tulayi wano makalumbununa kuli Yehova ha yitanga yo. Ayo kakumanyinako Zambi hamwe ni wata wenyi. Mukanda A-Hepreu 13:17, unambe ngwo: “Ononokenu kuli waze apwa tusongo twenu, nukazeye kuli ayo: mumu kakulawoka ha mbunge jenu, chizechene ngwe waze makalumbununa kuli Zambi, hanga akalinge chino ni uwahililo, hi ni kutwa mikuma ko, mumu chino kuchichi kanufumbula.” Ngwe chize Yehova akuzachisa spiritu yisandu hanga ahane chiteli kuli mutu, chizechene nawa kakuyizachisa hanga achize chiteli kuli mutu yoze keshi kusolola mihuko ya spiritu ni kwenda kulita ni shimbi ja Mbimbiliya.

³⁹ Shina twakusakwilila ha mulimo ukalu ni yilweza yipema ya tulayi wano a mu chikungulwila? Ha mukanda uze asonekenene chikungulwila cha mu Tesalonika, Paulu yakolweza mandumbu ngwenyi: “Tunaliumbu kuli yenu, mandumbu, nukanyingike waze akukilikita hakachi kenu, ni waze akunwendesa muli Mwene ni waze akunukanyamisa; nukaalemese kuhiana chikolo mu zango, mumu ha milimo yo.” (1 Tesa. 5:12, 13) Mulimo uze akulinga tulayi a mu chikungulwila, wakwashiwisa mulimo uze twakulingila Zambi ni kutukwasa hanga tuwahilile mu mulimo wacho. Chikwo nawa, ha mukanda wenyi utangu kuli Timoteu, Paulu yatongola yitanga yize mandumbu mu chikungulwila atamba kusolola kuli tulayi, ngwenyi: “Makulwana waze akuyula kanawa, katela kuaweza ulemu, kuhiana chikolo kuli waze akukilikita mu milimo ya kwambujola liji ni kulongesa.”—1 Timo. 5:17.

⁴⁰ Ha mashimbu amwe, makulwana amwe kakwatongola hanga akalakale mu Chizavu cha Akwa-kumeneka Mieji. Akwo kakukalakala mu Komite ya Akwa-kutala Yuma ya Shipitali, waze akuya ku mashipitali ni kukolweza mandotolo hanga awuke Yela ja Yehova chakuhona kwasa manyinga. Tulayi akwo kakukwasa mulimo wa kutunga ni kufunga Mazuwo a Wanangana ni Mazuwo a Kukunguluka Chinene hanji kukalakala mu Komite ya kukunguluka cha Mambonge hanga milimo ya Wanangana yende kanawa. Mandumbu eswe mu ululikiso wetu kakusakwilila chinji ha milimo yize akukilikita wano mandumbu ni kulihana cho ku milimo yacho. Kashika, tunungenu ni ‘kulemesa atu ngwe wano.’—Fwili. 2:29.

⁴¹ Chizavu cha Tusongo chakusala makulwana waze ajama hanga akalakale ngwe tulayi a mambonge. Hita umwe wa kuli ayo, kakumusakula ku mutango hanga ameneke yikungulwila mu yimwe mbonge. Kanji-kanji kakuyimeneka kaali ha mwaka. Ha mashimbu amwe, kakumeneka nawa mapionelu waze ali ni kukalakalila ku yihela ya kusuku. Kakululieka katalilo wo ni kulianga kulweza hita chikungulwila hanga mandumbu eswe akayuke muze makameneka.

⁴² Kasongo wa chizavu cha makulwana mwe wakukwasa kululieka yuma hanga mandumbu eswe akayuke ku ufulielo muze maameneka. (Roma 1:11, 12) Hanyima lia kutambula utowezo wa kwameneka ni sango hakutwala ku yize kalayi wa mbonge anafupiwa ni mukwo-pwo (nyi hanambata), kasongo wa chizavu cha makulwana kakukalakalila hamuwika ni mandumbu akwo hanga alulieke kuze makapomba ni yuma yikwo yize makafupiwa. Iye kakusa shindakenyo hanga mandumbu eswe, hamwe ni kalayi wa mbonge anyingike ululikiso wacho.

⁴³ Kalayi wa mbonge kakuhanjika ni kasongo wa chizavu cha makulwana hanga atambule sango hakutwala ku maola a kukunguluka ni kukunguluka cha kuya mu munda. Kukunguluka chacho, kakuchilulieka kulita ni nyonga lize akuhana kalayi wa mbonge hamwe ni usongwelo uze wakukatuka ku mutango. Eswe katamba kulianga kwalweza hakutwala ha maola ni chihela cha kukunguluka cha chikungulwila, kukunguluka cha mapionelu ni cha makulwana hamwe ni tuvumbi ni kukunguluka cha kuya mu munda.

⁴⁴ Liamaali chingoloshi, kalayi wa mbonge kakuhengwola mikanda ya sango ja akwa-kwambujola mu chikungulwila, mikanda yize yinasolola atu waze akwiza ha kukunguluka, mikanda ya njiza ni yize yinatale ha mbongo ja mu chikungulwila. Chino muchimukwasa hanga amone yize yinafupiwa mu chikungulwila ni chize mahasa kukwasa waze atala ha milimo yacho. Kasongo wa chizavu cha makulwana, katamba kusa shindakenyo hanga kalayi wa mbonge aliange kutambula mikanda yacho.

⁴⁵ Muze kalayi wa mbonge anameneka chikungulwila, kakusa mashimbu hanga ahanjike ni hita ndumbu ha kukunguluka, muze ali mu munda, muze anali hamwe ni mandumbu ni ha mashimbu akwo nawa. Chikwo nawa, kakulikungulula ni makulwana hamwe ni tuvumbi hanga aakolweze ni kwaha yiyulo ya Mbimbiliya hanga alinge kanawa mulimo wo wa kufunga mapanga. (Yishi. 27:23; Yili. 20:26-32; 1 Timo. 4:11-16) Iye kakulikungulula nawa ni mapionelu hanga aakolweze mu mulimo wo, ni kuhana ukwaso kuli hita umwe wa kuli ayo yoze unapalika mu kapinda mu mulimo wenyi wa kwambujola.

⁴⁶ Nyi kuli yimwe yize yinafupiwa kululieka, kalayi wa mbonge kakuhana ukwaso ha poso yize anameneka chikungulwila. Alioze nyi yuma yimwe kayihwishile ha poso yacho, kakukwasa makulwana hanji atu waze ali ni ukalu wacho hanga ahengwole usongwelo wa Mbimbiliya hakutwala ku chikuma chacho. Nyi mutango watamba kunyingika chikuma chacho, kalayi wa mbonge ni makulwana kakusonekena mutango mukanda wa kulumbununa lusango wacho.

⁴⁷ Muze anameneka chikungulwila, kalayi wa mbonge kakupwa ha kukunguluka cheswe cha chikungulwila. Ha mashimbu amwe kukunguluka chacho mahasa kuchalumuna kulita ni usongwelo wa ku mutango. Iye kakulinga pande hanga atakamise, akolweze ni kulongesa mandumbu mu chikungulwila. Kakusa tachi akolweze mandumbu hanga azange chinji Yesu Kristu, Yehova ni ululikiso wenyi.

⁴⁸ Chikuma chimwe chize kalayi wa mbonge akumenekena chikungulwila, chili kukolweza mandumbu hanga apwe ni zango lia kwambujola ni kwaha ukwaso uze mafupiwa. Mandumbu anji mu chikungulwila mahasa kululieka katalilo wo hanga ambujole chinji ha poso yacho, ha kupwa mapionelu a ha shimbu likehe ha kakweji yoze anameneka chikungulwila. Mweswawo mazanga kukalakala nenyi hanji kukalakala ni mukwo-pwo, mahasa kulianga kwita. Chili kuyuka chinene kutwala kalayi wa mbonge hanji mukwo-pwo kuli alongi a Mbimbiliya ni kufuna ni kumeneka atu. Tachi jeswajo muosa hanga ukwase ha poso yize kalayi wa mbonge meza ni kumeneka chikungulwila, jili jilemu.—Yishi. 27:17.

⁴⁹ Mwaka ha mwaka, kwakupwa kukunguluka chaali cha mbonge mu hita mbonge. Kalayi wa mbonge mwe ukwete chiteli cha kululieka yuma yeswe ha kukunguluka chacho. Kalayi wa mbonge kakutongola kalayi wa kukunguluka cha mbonge ni chikwashi chenyi. Mandumbu jacho, kakukalakala hamuwika ni kalayi wa mbonge hanga alulieke kukunguluka. Chino chakukwasa kalayi wa mbonge hanga alihulikile chinji ha chize pande ja kukunguluka mujikenda. Kalayi wa mbonge kakusakula nawa mandumbu akwo ajama hanga akalakale mu yipatulo yeka ni yeka. Iye kakusa shindakenyo hanga mandumbu amwe atale ha mbongo ja mu mbonge hanyima lia hita kukunguluka. Hita mwaka, ha kukunguluka chimwe cha mbonge hakupwa umwe mukwa-kuhanjika pande yoze wakumanyinako mutango.Hamukunda wa tando hanji chihela cha kulikungulwila, mbonge jimwe kakujiteta mu yihanda yaali. Hita chihanda chakulilingila kukunguluka cho cha mbonge.

⁵⁰ Hita kakweji, kalayi wa mbonge kakutuma mulimo wenyi wa mu munda ku mutango. Nyi chikungulwila chize anameneka kuchahashile kumukwasa ni mbongo jakwendela, kulanda kulia, kufwetela zuwo lia kupomba hanji kulanda yuma yize mafupiwa mu mulimo wenyi, mahasa kwita ukwaso wacho ku mutango. Tulayi a mambonge kakufuliela ngwo, nyi masa Wanangana wa Yehova kulutwe, yuma yeswe yize anafupiwa mapwa nayo ngwe chize Yesu alakenyene. (Luka 12:31) Kashika, yikungulwila yakusa tachi hanga azumbule makulwana wano akwiza ni kwakwasa mumu kakumona ngwo kuzumbula mandumbu jacho chili kuyuka chinene.—3 Yoa. 5-8.

⁵¹ Mitango ya Yela ja Yehova hashi heswe, kakuyisongwela ku Komite ya Mutango, yize yakupwa ni mandumbu ajama atatu hanji kuhiana waze akusongwela mulimo wa kwambujola mu chifuchi chacho hanji mu yifuchi yikwo nawa. Kakusakula umwe wa kuli mandumbu jacho hanga apwe kasongo wa Komite ya Mutango.

⁵² Waze akukalakala mu Komite ya Mutango, kakusongwela yikuma yize yinatale ha yikungulwila yeswe yili mu njiza ya mutango wo. Komite yacho, yakusongwela mulimo wa kwambujola mu njiza ya mutango, yakusa shindakenyo hanga kupwe yikungulwila ni mambonge waze mahasa kulinga mulimo wacho. Chikwo nawa, Komite ya Mutango yakutala ha mulimo wa mamishionaliu, mapionelu alipwila, mapionelu a shimbu lieswe ni mapionelu a shimbu likehe. Kakusongwela nawa milimo ya kukunguluka cha mbonge ni cha mambonge, ni kuhana yiteli kuli mandumbu ya kukunguluka chacho hanga yuma yeswe ayilinge “nikulita ni kululieka.”—1 Kori. 14:40.

⁵³ Mu yifuchi yimwe, kakusamo Komite ya Chifuchi yize yakukalakala mushi lia Komite ya Mutango mu chifuchi chikwo. Chino chakukwasa hanga asongwele kanawa mulimo mu chifuchi muze muli Komite yacho. Komite yacho, yakutala ha milimo ya Mbetele, kukumbulula mikanda yize akwatumina ni kutala ha mulimo wa kwambujola. Komite ya Chifuchi, yakukalakala hamuwika ni Komite ya Mutango hanga mulimo wa Wanangana uye kulutwe.

⁵⁴ Chizavu cha Tusongo che chakutongola mandumbu waze akukalakala mu Komite ya Mitango ni mu Komite ya Yifuchi.

⁵⁵ Ha mashimbu amwe, Chizavu cha Tusongo chakutuma mandumbu waze akumanyinako chishina chinene hanga ameneke mitango ya hashi heswe. Chikuma chize mandumbu jacho akumenekena mitango, chili kukolweza usoko wa Mbetele ni kukwasa Komite ya Mutango ha yipikalo yize ali nayo hanji yihula yize mahasa kupwa nayo hakutwala ku mulimo wa kwambujola ni kutayisa tumbaji. Kakukunguluka ni amwe tulayi a mambonge. Ha mashimbu amwe kakulikungulula nawa ni mamishionaliu waze ali mu munda. Ha mashimbu jacho, kakuhanjika ni mandumbu wano hakutwala ku yipikalo yize ali nayo ni yize anafupiwa ni kwakolweza hanga anunge ni mulimo wo ulemu wa kwambujola sango lipema ni kutayisa tumbaji.

⁵⁶ Waze akumanyinako chishina chinene, kakufupa chinji kunyingika yize yinalingiwa mu njiza ya mutango hakutwala ku mulimo wa kwambujola ni milimo yikwo ya mu yikungulwila. Nyi mukupwa mashimbu, kakumeneka nawa ma escritório remoto a kulumbunwina mikanda. Muze akumeneka mutango, kakutuhuka nawa mu mulimo wa kwambujola kulita ni katalilo wo.

⁵⁷ Twakuyuka chinji ha milimo ni zango lia mandumbu jetu ajama. Nyi mutununga ni kuzeyela makulwana waze hanatongola hanga afunge mapanga, mutukalakala hamuwika ni Mutwe wa chikungulwila, Kristu Yesu. (1 Kori. 16:15-18; Efwe. 1:22, 23) Nyi twachilinga, spiritu ya Zambi muyipwa mu yikungulwila yeswe ya hashi hanga milimo yeswe yende kulita ni usongwelo wa Liji lia Zambi.—Samu 119:105.