MUTWE WAKULILONGESA 8
Chize Mutufunga Uwahililo Wetu Muze Tunapalika mu Yipikalo
“Mandumbu jami, muze yeseko yeka ni yeka muyinuwana, chinyongenu kupwa uwahililo unene.”—TIA. 1:2.
MWASO 111 Yuma Yize Yakutuvwisa Kuwaha
CHIKUMA CHILEMUa
1-2. Kulita ni Mateu 5:11, kuchi twatamba kumona yipikalo?
YESU kalakenyene tumbaji twenyi ngwenyi, ayo te mapwa ni uwahililo wamwenemwene. Alioze yaalweza nawa ngwenyi, waze akumuzanga te mapalika mu yipikalo. (Mateu 10:22, 23; Luka 6:20-23) Twakuwahilila chinji hakupwa tumbaji twa Kristu. Alioze kuchi mutwivwa nyi asoko jetu matukinda kulingila Yehova, manguvulu matuhungumiona, waze twakalakala no hanji akwetu ku shikola matushinjila kulinga yuma yize kuyalitele? Nyi twanyonga ha yuma yino mutuhasa kulipikala.
2 Kanji-kanji, atu keshi kumona yihungumiona ngwe chuma chize muchihasa kwanehena uwahililo. Alioze, yino ye Liji lia Zambi yinatulweze hanga tulinge. Chakutalilaho, kambaji Tiangu kasonekene ngwenyi, muze mutupalika mu yeseko kutwatambile kuhonga, alioze twatamba kuwahilila. (Tia. 1:2, 12) Yesu kambile ngwenyi, twatamba kuwahilila chipwe muze mutupalika mu yihungumiona. (Tanga Mateu 5:11.) Kuchi mutuhasa kufunga uwahililo wetu muze mutupalika mu yipikalo? Mutuhasa kulilongesa yuma yinji ha kushimutwina yikuma yimwe yize Tiangu asonekenene akwa-Kristu a ku sekulu yitangu. Chitangu, tushimutwinenu yipikalo yize akwa-Kristu jacho apalikile.
YIPIKALO YIKA AKWA-KRISTU A KU SEKULU YITANGU APALIKILE?
3. Yika yalingiwileko ha mashimbu amwe muze Tiangu apwile kambaji ka Yesu?
3 Ha amwe mashimbu muze Tiangu mwanako ya Yesu apwile kambaji, akwa-Kristu mu Yerusaleme yaputuka kwahungumiona. (Yili. 1:14; 5:17, 18) Nawa muze ashihile kambaji Eshetevau, akwa-Kristu anji “amwanganyine mwamwa mu yifuchi ya Yundeya ni Samaria” ni kuya ndo Shipre ni Andiakia. (Yili. 7:58–8:1; 11:19) Tumbaji wano kapalikile mu yipikalo yinji. Chipwe chocho, ayo te kakwambujola sango lipema kweswako kuze te akuya, nawa kasele yikungulwila mu mambonge mweswe muze te akuyula kuli A-Roma. (1 Petu. 1:1) Hanyima lia yipikalo yino, ayo yapalika nawa mu yipikalo yikwo yinji kuhiana.
4. Yipikalo yikwo yika yize akwa-Kristu a ku sekulu yitangu apalikile?
4 Akwa-Kristu a ku sekulu yitangu kapalikile mu yipikalo yeka ni yeka. Ha mwaka 50 M.J., mwanangana wa Roma Kelautiu yahana shimbi hanga A-Yunda eswe atuhuke mu Roma. Hachino, A-Yunda waze apwile akwa-Kristu yaashinjila kuhichika mazuwo jo ni kuya ku yihela yeka. (Yili. 18:1-3) Ha mwaka 61 M.J., postolo Paulu yasoneka ngwenyi, akwa-Kristu amwe kapwile ni kwakekuna-kekuna ha mbunga, kwasa mu mazuwo a ususu ni kweya yuma. (Hepre. 10:32-34) Chizechene ngwe atu akwo, akwa-Kristu no kapwile ni uswale ni kuyiza.—Roma 15:26; Fwili. 2:25-27.
5. Yihula yika mutushimutwina ha mutwe uno?
5 Muze Tiangu asonekene mukanda wenyi hanyima lia mwaka 62 M.J., iye kanyingikine kanawa yipikalo yize mandumbu jenyi apwile ni kupalika. Yehova katumine Tiangu kusonekena akwa-Kristu wano, hanga aehe yiyulo yize te muyakwasa kununga ni kuwahilila chipwe ngwe te kanapalika mu yipikalo. Tuhengwolenu mukanda wa Tiangu, mba tukumbulule yihula yino: Tiangu kasonekene hakutwala ku uwahililo uka? Yuma yika yize muyihasa kutwala mukwa-Kristu kutokesa uwahililo wenyi? Nawa kuchi mana, ufulielo ni hamu muyihasa kutukwasa kufunga uwahililo wetu chipwe ngwe tunapalika mu yipikalo?
YIKA YAKUKWASA MUKWA-KRISTU KUWAHILILA?
Ngwe chize kahia kakununga mu ndeya hanji mwenda, uwahililo uze Yehova akutwaha wakununga mu mbunge yetu (Tala paragrafu 6)
6. Kulita ni Luka 6:22, 23, mumu liaka mukwa-Kristu mahasa kuwahilila chipwe ngwe kanapalika mu yipikalo?
6 Atu anji kakunyonga ngwo, ayo mahasa kuwahilila wika nyi mapwa ni mwono upema, mbongo jinji nawa ni usoko upema. Alioze uwahililo uze Tiangu asonekene uli chihanda cha muhuko wa spiritu yisandu, nawa kuushi kutala ha yize yinalingiwa ku mwono wetu. (Ngala. 5:22) Mukwa-Kristu kakuwahilila hanji kupwa ni uwahililo wamwenemwene hakunyingika ngwenyi, kanalingi yuma yize yinevwisa Yehova kuwaha ni kukaula chilweza cha Yesu. (Tanga Luka 6:22, 23; Kolo. 1:10, 11) Uwahililo wetu mutuhasa kuutesa ni kahia kaze kali mukachi ka ndeya hanji mwenda. Kahia kali mukachi ka ndeya keshi kujima chipwe ngwe mukunoka vula hanji mukulingiwa fuji yinji. Chizechene ngwe kahia kaze kali mukachi ka ndeya, ni yetu mutuhasa kununga kuwahilila chipwe ngwe mukulingiwa yuma yeswayo ku mwono wetu. Yetu kutushi kutokesa uwahililo wetu chipwe muze mutuyiza hanji mutuhona mbongo. Chikwo nawa, mutununga ni kuwahilila chipwe muze atu matukekuna, hanji muze asoko ni atu akwo malimika ni yetu. Uwahililo wetu muhasa kwoka hita shimbu lize atu matulinga yuma yize muyihasa kuutokesa. Yipikalo yize twakupalika mumu lia ufulielo wetu, yakusolola pundu ngwo tuli tumbaji amwenemwene a Kristu. (Mateu 10:22; 24:9; Yoa. 15:20) Kashika Tiangu asonekene ngwenyi: “Mandumbu jami, muze yeseko yeka ni yeka muyinuwana, chinyongenu kupwa uwahililo unene.”—Tia. 1:2.
Mumu liaka yipikalo mutuhasa kuyitesa ni kahia kaze fuli akufulanako yikungo? (Tala paragrafu 7)b
7-8. Kuchi ufulielo wetu muhasa kukola muze tunapalika mu yipikalo?
7 Tiangu kasolwele chikuma chikwo cha mumu liaka akwa-Kristu mahasa kunyongonona mu yipikalo, chipwe muze yili yinji. Yamba ngwenyi: “Se nunanyingika kweseka cha ufulielo wenu kuchakulinga kunyongonona.” (Tia. 1:3) Yipikalo mutuhasa kuyitesa ni kahia kaze fuli akuzachisa hanga afule yikungo. Chikungo muze akuchichiza ha kahia nyi chakekema chakukola chinji kuhiana. Chizechene nawa, nyi twapalika mu yihungumiona, ufulielo wetu wakukola chinji. Kashika Tiangu asonekene ngwenyi: “Kunyongonona chikaye ndo ku songo lia milimo yacho, hanga nukapwe angunu, a muwundu.” (Tia. 1:4.) Muze mutumona ngwetu yipikalo yize tunapalika yinakolesa ufulielo wetu, mutuhasa kunyongonona mu yipikalo yacho ni uwahililo.
8 Ha mukanda wenyi, Tiangu kanalumbununa yuma yikwo yize muyihasa kutokesa uwahililo wetu. Yuma yika yenayo? Nawa kuchi mutuhasa kuyikumba?
YIZE MUTUHASA KULINGA HANGA TUCHINE KUTOKESA UWAHILILO WETU
9. Mumu liaka tunafupiwa mana?
9 Yipikalo: Muze kutwanyingikine yize mutulinga. Muze mutupalika mu yipikalo, twatamba kufupa ukwaso wa Yehova hanga tulinge yuma yize muyimuvwisa kuwaha, muyiyukisa mandumbu jetu ni kutukwasa hanga tufunge ungunu wetu. (Jere. 10:23) Tunafupiwa mana mba tunyingike yize mutulinga ni yize twatamba kulweza waze akulimika ni yetu. Nyi kutwanyingikine yize mutulinga, mutuhasa kuhonga nawa mutuhasa kutokesa uwahililo wetu ni kawashi.
10. Mba tupwe ni mana, yika Tiangu 1:5 unatulweze hanga tulinge?
10 Chize mutuyihwisa: Eta mana kuli Yehova. Nyi tunazange kukumba yipikalo ni uwahililo, chitangu twatamba kulemba kuli Yehova atwehe mana waze tunafupiwa hanga tukwate yiyulo yipema. (Tanga Tiangu 1:5.) Yika twatamba kulinga nyi mutwivwa ngwe Yehova keshi kukumbulula yilemba yetu ni kawashi? Tiangu kanambe ngwenyi, twatamba “kununga ni kwita” kuli Zambi. Yehova keshi kwivwa uli muze twakununga ni kwita mana kuli iye. Tata yetu wa mu malilu, “kakutwaha mana” waze twakumwita hanga tunyongonone mu yihungumiona. (Samu 25:12, 13) Iye kakumona yipikalo yetu, kakutuvwila keke muze twakupalika mu yipikalo yacho, nawa kanazange kutukwasa. Chochene, yino yakutwaha uwahililo unji! Mba, kuchi Yehova akutwaha mana?
11. Yika nawa twatamba kulinga mba tupwe ni mana?
11 Yehova kakutwaha mana kupalikila mu Liji lienyi. (Yishi. 2:6) Mba tupwe ni mana, twatamba kulilongesa Liji lia Zambi ni kutanga mikanda yize yakulumbununa Mbimbiliya. Alioze, twatamba kulinga yuma yinji hi wika ko kulilongesa. Twatamba kulinga yize Yehova anatwite ni kusa yiyulo yacho mu yitanga. Tiangu yasoneka ngwenyi: “Pwenu akwa kulinga lie liji, hi akwa kwivwa wika ko.” (Tia. 1:22) Nyi twakaula yiyulo ya Zambi, mutupwa atu ashi, akwa-sambukila nawa akwa-keke. (Tia. 3:17) Yitanga yino muyitukwasa kunyongonona mu yipikalo chakuhona kutokesa uwahililo wetu.
12. Mumu liaka chili chilemu kunyingika kanawa Mbimbiliya?
12 Liji lia Zambi lili ngwe katalilo yoze wakutukwasa kumona yize twatamba kululieka ni chize twatamba kuyilinga. (Tia. 1:23-25) Chakutalilaho, hanyima lia kulilongesa Liji lia Zambi, mutuhasa kumona ngwetu tunafupiwa kupwa akwa-kulihumikiza. Ni ukwaso wa Yehova, mutuhasa kupwa yimbovu muze akwetu hanji yipikalo muyituvwisa uli. Nyi twapwa yimbovu, mutuhasa kunyongonona mu yipikalo yize tunapalika. Chikwo nawa, mutuhasa kunyonga kanawa ni kukwata yiyulo yipema. (Tia. 3:13) Kashika chili chilemu chinji kunyingika kanawa Mbimbiliya!
13. Mumu liaka twatamba kulilongesa yilweza ya atu waze ali mu Mbimbiliya?
13 Ha mashimbu amwe twakwehuka wika kulinga yuma yipi hanyima lia kulinga uhenge. Alioze yino hi jila yipema ko ya kulilongeselamo. Jila yipema yize mutuhasa kuzukilamo mana, yili kulilongesa ha yuma yipema yize akwetu alingile ni uhenge uze alingile. Kashika Tiangu anatukolweza hanga twimbulule yilweza ya atu waze ali mu Mbimbiliya ngwe Apalahama, Rahape, Yombi ni Eliya. (Tia. 2:21-26; 5:10, 11, 17, 18) Tuvumbi wano ashishika a Yehova, kanyongonwene mu yipikalo yize te muyihasa kutokesa uwahililo wo. Yilweza yo yakunyongonona yinasolola ngwo, ni ukwaso wa Yehova ni yetu mutuhasa kunyongonona.
14-15. Mumu liaka kutwatambile kulengulula kuyambashana chetu?
14 Yipikalo: Muze tunayambashana ha yize twakufuliela. Ha mashimbu amwe, muchihasa kupwa chikalu kunyingika yize Mbimbiliya yinambe kwamba. Hanji Yehova kakumbulwile yilemba yetu ngwe chize te tunashimbwila. Chino muchihasa kututwala hanga tuyambashane. Nyi twalengulula kuyambashana chetu, muchikeketesa ufulielo wetu ni kupihisa usepa wetu ni Yehova. (Tia. 1:7, 8) Nawa muchihasa kututwala tutokese kutalatala chetu cha kulutwe lia matangwa.
15 Postolo Paulu katesele kutalatala chetu cha kulutwe lia matangwa ni ankora. (Hepre. 6:19) Ankora yakukwasa ulungu ha mashimbu a kangonga nawa yakuukinda hanga uchine kulipupa ku mawe. Alioze ankora yikwete ulemu nyi lenge lize linakwate ku ulungu kuliapatukile. Chizechene ngwe ngengeya muyihasa kupihisa lenge lize linakwate ku ankora, kuyambashana nyi twachihwishile muchihasa kukekemesa ufulielo wetu. Mutu yoze unayambashana, nyi mapalika mu yeseko mahasa kutokesa ufulielo wenyi ha yilakenyo ya Yehova. Nyi twatokesa ufulielo, mutuhasa kutokesa nawa kutalatala chetu. Kashika Tiangu ambile ngwenyi, mukwa-kuyambashana “kali ngwe mukanya wa mu kalunga-lwiji wa kuhehuka ni fuji ni kufuza.” (Tia. 1:6) Mutu wamutapu au chikalu kuwahilila!
16. Yika twatamba kulinga nyi tunayambashana?
16 Chize mutuchihwisa: Hwisa kuyambashana che ha kukolesa ufulielo we. Hwisa kuyambashana che nikawashi. Ha matangwa a profeta Eliya, atu ja Yehova kapwile ni kuyambashana hakutwala ku ufulielo wo. Eliya yaalweza ngwenyi: “Ndo mwaka uka munukakashana hakachi ka mbunge jiali? Nyi Yehova iye Zambi mukaulenu. Alioze nyi Mbale mukaulenu!” (1 Mia. 18:21) Ni musono che twatamba kulinga. Twatamba kuhengwola hanga tupwe ni shindakenyo ngwetu, Yehova iye Zambi, Mbimbiliya yili Liji lienyi nawa ngwetu Yela ja Yehova kali atu jenyi. (1 Tesa. 5:21) Nyi twachilinga, mutuhwisa kuyambashana chetu nawa ufulielo wetu muukola. Chikwo nawa, nyi tunafupiwa ukwaso wa chize mutuhasa kuhwisa kuyambashana chetu, mutuhasa kuhanjika ni makulwana a mu chikungulwila. Twatamba kuhwisa kuyambashana chetu nikawashi hanga tufunge uwahililo wetu ha kulingila Yehova!
17. Yika muyihasa kulingiwako nyi twahonga?
17 Yipikalo: Muze mutuhonga ku mbunge. Liji lia Zambi linambe ngwo: “Nyi mulezemuka ha tangwa lia lamba, tachi je jikepe.” (Yishi. 24:10) Liji lize akulumbununa mu Hepreu ngwo, “kulezumuka” mulihasa kulumbunuka “kuhonga.” Kashika, nyi wahonga muhasa kutokesa nikawashi uwahililo we.
18. Kunyongonona yika chinalumbunuka?
18 Chize mutuchihwisa: Lemba kuli Yehova hanga akwehe hamu lia kunyongonona. Tunafupiwa kupwa ni hamu mba tunyongonone mu yipikalo. (Tia. 5:11) Liji “kunyongonona” lize Tiangu azachishile, linatwehe nyonga lia mutu yoze unamana ngu ha chihela chize ali. Mutuhasa kunyonga hali swalale yoze unamane ngu ha chihela chenyi, nawa kechi kuchina muze akwa-kole mamulukukila.
19. Yika mutuhasa kulilongesa ha chilweza cha postolo Paulu?
19 Postolo Paulu kahanyine chilweza chipema cha mutu yoze wasolwele hamu ni kunyongonona. Ha mashimbu amwe iye te kakuhonga. Alioze te kakuhasa kunyongonona, mumu kapwile ni kufuliela ngwenyi Yehova mamwaha tachi jize anafupiwa. (2 Kori. 12:8-10; Fwili. 4:13) Mutuhasa kupwa ni tachi ni hamu lia mutapu au, nyi ni kulikehesa cheswe mutunyingika ngwetu tunafupiwa ukwaso wa Yehova.—Tia. 4:10.
KUNDAMA KULI ZAMBI NAWA NUNGA NI KUWAHILILA
20-21. Shindakenyo yika mutuhasa kupwa nayo?
20 Mutuhasa kupwa ni shindakenyo ngwetu, yipikalo yize twakumona kuyishi kwiza kuli Yehova. Tiangu kanatulweze ngwenyi: “Mutu niumwe muze mamweseka kanda amba ngwenyi, Zambi kananguzeze; mumu Zambi kechi kuhasa kweseka ni yuma yipi, iye mwene kechi kuzeza niumwe.” (Tia. 1:13) Nyi mutupwa ni shindakenyo ngwetu Zambi keshi kutweseka, mutupwa ni usepa upema ni Tata yetu wa mu malilu.—Tia. 4:8.
21 Yehova “keshi kwalumuka.” (Tia. 1:17) Iye kakwashile akwa-Kristu ku sekulu yitangu kunyongonona mu yipikalo yo, ni musono makwasa hita umwe wa kuli yetu. Liumbe kuli Yehova hanga akukwase kupwa ni mana, ufulielo ni hamu. Iye makumbulula yilemba ye. Kashika muhasa kupwa ni shindakenyo ngwe, iye makukwasa kununga ni kuwahilila muze unapalika mu yipikalo!
MWASO 128 Nyongononenu Ndo Kusongo
a Mu mukanda wa Tiangu muli yiyulo yinji hakutwala ku yize twatamba kulinga muze tunapalika mu yipikalo. Ha mutwe uno, mutushimutwinaho yimwe ya ku yiyulo yacho. Yiyulo yacho muyitukwasa kunyongonona muze mututokesa uwahililo wetu mu mulimo wa Yehova.
b ULUMBUNWISO WA YIZULIE: Mapulisha keza ni kukwata umwe ndumbu ku zuwo lienyi. Mukwo-pwo ni mwanenyi kanamono chize anamutwala. Muze mukwo-lunga ali mu zuwo lia ususu, mandumbu mu chikungulwila kaneza hanga alichinge ni mukwo-pwo hamwe ni mwanenyi ha uwayilo wa mu usoko. Ndumbu wa pwo ni mwanenyi kananungu ni kwita kuli Yehova hanga aehe tachi anyongonone mu yipikalo yo. Yehova kanaehe sambukila ya ku mbunge ni hamu. Hachino, ufulielo wo unakolo, nawa kanahase kunyongonona ni uwahililo.