“Hamuka Uchilinge”
“Takama; hamuka uchilinge. Kanda wivwa woma, hanji kulishimwoka mumu Yehova . . . kwali hamwe ni yena.”—1 SANGO JA MIANANGANA 28:20.
1, 2. (a) Mulimo uka ulemu apwile nawo Solomone? (b) Mumu liaka Ndawichi alihulumbile hali Solomone?
SOLOMONE, katambwile mulimo ulemu. Yehova kamusakwile hanga asongwele mulimo wa kutunga tembele mu Yerusaleme. Mulimo wacho wapwile ulemu chinji! Tembele te ‘muyihiana upeme,’ ni kuya fuma chinji nawa mumu lia upeme wayo. Alioze chuma chahiana ulemu shina, tembele yacho te muyipwa “zuwo lia Yehova Zambi.”—1 Sango ja Mianangana 22:1, 5, 9-11.
2 Mwanangana Ndawichi kafulielele ngwenyi, Zambi makwasa Solomone. Solomone te uchili ‘mukweze nawa te kanda achinyingika yuma yinji.’ Shina iye te mapwa ni hamu lia kutayiza mulimo wacho wa kutunga tembele? Kutala ukweze wenyi ni kuhona kunyingika yuma yinji te muyimukwika kulinga mulimo wacho nyi? Ewa, chuma Solomone atambile kulinga wika shina kupwa ni hamu ni kuputuka mulimo.
3. Yika Solomone ahashile kulilongesa ku hamu lia tato?
3 Solomone kalilongesele chinji ha hamu lia tato, Ndawichi. Muze te Ndawichi uchili mukweze, kashihile tushitu waze akwachile mapanga ja tato. (1 Samuele 17:34, 35) Kasolwele nawa hamu linene muze ashile jita ni swalale wa ndundo, Ngoliate. Chochene, ni ukwaso wa Zambi, Ndawichi yashiha Ngoliate ni liwe.—1 Samuele 17:45, 49, 50.
4. Mumu liaka Solomone atambile kupwa ni hamu?
4 Tunanyingika yize Ndawichi apwilile mutu walita kukolweza Solomone kupwa ni hamu hanga atunge Tembele. (Tanga 1 Sango ja Mianangana 28:20.) Nyi Solomone te kakapwile ni hamu, kachi kakahashile kuputuka mulimo wacho ha mukunda wa woma. Chino kachi chapwile chipi chinji hakutwala ku mulimo uze amwehele.
Tunafupiwa ukwaso wa Yehova mba tupwe ni hamu ni kulinga mulimo uze iye hanatwehe
5. Mumu liaka twatamba kupwa ni hamu?
5 Ngwe Solomone, ni yetu tunafupiwa ukwaso wa Yehova mba tupwe ni hamu ni kulinga mulimo uze hanatwehe. Kashika, mu mutwe uno, mutulilongesa yilweza ya amwe atu waze asolwele hamu ku shakulu. Mba, hanyima, tumone chize mutuhasa kusolola hamu ni kulinga mulimo wetu.
YILWEZA YA HAMU
6. Yika ya kukukomwesa ha hamu lia Yosefwe?
6 Yosefwe kasolwele hamu muze pwo lia Potifwa amwichile hanga alipombe nenyi. Kanyingikine ngwenyi mwono wenyi te muupwa mu ponde nyi malituna. Alioze, shimbu atayize, aye yasolola hamu ni kulituna yo hazehene.—Uputukilo 39:10, 12.
7. Kuchi Rahape asolwele hamu? (Tala chizulie ha uputukilo.)
7 Rahape neye kali chilweza chikwo cha hamu. Muze ngendeshi ja A-Izalele ayile ku zuwo lienyi mu Yeriku, iye kachi kevwile woma ni kulituna kwaakwasa. Alioze, mumu lia kufuliela muli Yehova, yahamuka ni kusweka waze malunga aali ni kwaakwasa hanga alamwine mwono wo. (Yoshua 2:4, 5, 9, 12-16) Rahape kafulielele ngwenyi Yehova kali Zambi wamwenemwene, nawa kapwile ni shindakenyo ngwenyi kwasala hakehe A-Izalele atambule chifuchi. Iye kakakechele woma wa atu, ni wa mwanangana wa Yeriku, umukinde kukwasa ngendeshi jacho. Alioze yapwa ni hamu chocho yalilamwina hamwe ni asoko jenyi.—Yoshua 6:22, 23.
8. Kuchi hamu lia Yesu liakwashile apostolo jenyi?
8 Apostolo ashishika a Yesu no kasolwele hamu linene. Ayo kamwene hamu asolwele Yesu, mba achi chaakwashile kumwimbulula. (Mateu 8:28-32; Yoano 2:13-17; 18:3-5) Muze A-Saduseu afupile kwaakanjisa kulongesa hakutwala kuli Yesu, apostolo yalituna kulinga chocho.—Yilinga 5:17, 18, 27-29.
9. Kuchi mukanda wa 2 Timoteu 1:7, wakutukwasa kunyingika kuze kwakukatuka hamu?
9 Yosefwe, Rahape, Yesu ni apostolo kafupile kulinga yize yalita. Ayo kasolwele hamu, hi ngwo mumu lia kujikijila ha tachi jo-ene ko, alioze mumu lia kujikijila hali Yehova. Kashika, ni yetu nawa, ha mashimbu mutufupiwa kusolola hamu, twatamba kujikijila hali Yehova, hi hali yetwene ko. (Tanga 2 Timoteu 1:7.) Tutalenu yihela yaali mu mwono wetu kuze twatamba kusolwela hamu: mu usoko ni mu chikungulwila.
YUMA YIZE MUTUFUPIWA KUPWA NI HAMU
10. Mumu liaka akweze akwa-Kristu anafupiwa hamu?
10 Kuli yuma yinji yize akweze akwa-Kristu atamba kusolola hamu mba awayile kanawa Yehova. Ayo mahasa kulilongesa ni kukaula chilweza cha Solomone, yoze wasolwele hamu hakukwata yiyulo ya mana hanga ahwise kutunga tembele. Chipwe ngwe akweze katamba kwaasongwela kuli yisemi jo, nihindu kuli yuma yilemu yize atamba kulilingila ene. (Yishima 27:11) Ayo kanafupiwa hamu hakusakula masepa jo, mutapu wa kuheha cho, chize mehuka yuma ya luchisa, ni shimbu lia kwaapapachisa. Kashika, kanafupiwa hamu liacho mumu yuma malinga yinalimika ni upale wa Satana, yoze wa kuchoka Zambi.
11, 12. (a) Kuchi Mose asolwele hamu? (b) Kuchi akweze musono mahasa kwimbulula chilweza cha Mose?
11 Chiyulo chilemu chize akweze atamba kukwata chili kutesa yize malinga ku mwono wo. Mu yifuchi yimwe, akweze kakwaashinjila aye ku shikola yinene hanga akapwe ni mulimo wa mbongo jinji. Mu yifuchi yikwo, mbongo jinakale chinji, hachino, akweze mahasa kunyonga ngwo katamba kukalakala chinji hanga akwase asoko jo. Nyi yino yinalingiwa kuli yena, nyonga ha chilweza cha Mose. Kamulelele kuli mwana wa pwo wa Falau, kashika iye te mahasa kupwa ni mbongo jinji hanji lufuma. Achinyonga ha yuma yize apwile ni kumushinjila hanga alinge kuli asoko jenyi A-Engitu, alongeshi jenyi ni akwa-yiyulo! Alioze Mose kapwile ni hamu chocho yasakula kulingila Yehova. Muze Mose ahichikile Engitu ni upite wamo, yafuliela chinji muli Yehova. (A-Hepreu 11:24-26) Hachino, Yehova yamupala chinji, nawa makamupala chahiana kulutwe lia matangwa.
12 Nyi akweze napwa ni hamu lieswe ni kulitesa yize malinga mu mulimo wa Yehova ni kusa Wanangana wenyi kulutwe ku mwono wo, iye maakwasa. Maakwasa nawa hanga awane yize muyifupiwa mu usoko wo. Ku sekulu yitangu, mukweze Timoteu kahulikilile mwono wenyi mu mulimo wa Zambi, ni yena muhasa kuchilinga.a (Tala maliji mushi lia lifwo.)—Tanga A-Fwilipu 2:19-22.
Shina muhasa kupwa ni hamu mu yuma yeswe ku mwono we nyi? (Tala paragrafu 13-17)
13. Kuchi hamu liakwashile pangi yetu wa kanuke alinge yize alitesele kulinga mu mulimo wa Zambi?
13 Umwe ndumbu mu Alabama E.U.A., kafupiwile hamu hanga atese yize malinga mu mulimo wa Zambi. Yasoneka ngwenyi: “Kuwanuke wami te nakwivwa chinji sonyi. Chapwile chikalu kuli yami kuhanjika ni atu ku Zuwo lia Wanangana, ni ku mazuwo ja atu waze chanyingikine.” Ni ukwaso wa yisemi jenyi ni mandumbu a mu chikungulwila, mukweze wacho yalisonekesa upionelu wa shimbu lieswe. Aye yamba ngwenyi: “Hano hashi ha Satana, atu kakulingisa akweze hanga amone ngwo kuya shikola yinene, kupwa ni lufuma, mbongo ni yikumba yinji ye yakufupiwa wika ku mwono.” Alioze kanuke wacho yamona nawa ngwenyi, atu anji kakulikachesa kulinga yuma yacho, ni kulikokela wika lamba ni yinyengo. Yawezela ko nawa ngwenyi: “Kuwayila Yehova che changunehena uwahililo unji ni kungusuulwisa mu mulimo wami.”
14. Ha shimbu lika yisemi anafupiwa kupwa ni hamu?
14 Yisemi akwa-Kristu no katamba kupwa ni hamu. Chakutalilaho, mwata we wa mulimo mahasa kukulweza mashimbu eswe hanga ukalakale ha matangwa a uwayilo wa mu usoko, a kuya ni kwambujola chipwe a kukunguluka. Unafupiwa hamu mba ukumbulule ngwe ka ni kusolwela ana je chilweza chipema. Hanji yisemi amwe mu chikungulwila kakwecha ana jo alinge yuma yize kushi kuzanga hanga ana je alinge. Mba muze yisemi jacho makuhula chitela chacho, shina mwopwa ni hamu ni kwaalumbunwina cho ni vumbi lieswe nyi?
15. Kuchi mukanda wa Samu 37:25; ni wa A-Hepreu 13:5 muyihasa kukwasa yisemi?
15 Twatamba kupwa ni hamu mba tukwase ana jetu hanga atese yize malinga mu mulimo wa Zambi. Chakutalilaho, yisemi amwe mahasa kwivwa woma wakukolweza ana jo hanga apwe pionelu, kukalakala kuze kunafupiwa chinji akwa-kwambujola, kukalakala ku Mbetele, kukwasa mulimo wa kutunga Mazuwo a Wanangana ni a Kukunguluka cha Mambonge. Yisemi jacho kakwivwa woma ngwo hanji ana jo kechi kahasa kulifunga ene muze makola. Chipwe chocho, yisemi akwa-mana kakusolola hamu ni kufuliela muli Yehova ngwo makamanununa yilakenyo yenyi ya kufunga tuvumbi twenyi. (Tanga Samu 37:25; A-Hepreu 13:5.) Yisemi waze akusolola hamu liacho ni kufuliela muli Yehova kakukwasa ana jo akaule chilweza cho.—1 Samuele 1:27, 28; 2 Timoteu 3:14, 15.
16. Kuchi yisemi amwe akwashile ana jo hanga atese yize malinga mu mulimo wa Zambi, nawa kuchi chino chayukishile ana jo?
16 A lunga ni pwo amu Estados Unidos kakwashile ana jo hanga alihulikile mu mulimo wa Yehova. Lunga yamba ngwenyi: “Shimbu ana jetu te kanda enda ni kuhanjika, twapwile ni kwaalweza chiseke chatwama mu mulimo wa pionelu ni wa mu chikungulwila. Haliapwila ayi ye azanga chinji.” Yawezela ngwenyi amu ana jo katesele yize malinga mu mulimo wa Zambi, chino chaakwashile hanga alimike ni yeseko ya hano hashi ha Satana ni kulihulikila mu mulimo wa Yehova. Ndumbu yoze ukwete ana aali yasoneka ngwenyi: “Yisemi anji kakusa tachi ni kuzachisa upite wo hanga akwase ana jo alinga yuma yili ngwe, kuheha konda, yiwanyino ni kuya ku shikola yinene. Alioze kuli yetu twatamba kusa tachi ni kuzachisa upite wetu hanga tukwase ana jetu alinge yuma yize muyaakwasa kupwa ni usepa upema ni Yehova. Twakuwahilila chinji ha kukalakala hamuwika ni ana jetu milimo ya Zambi.” Muhasa kupwa ni shindakenyo ngwe yisemi waze akukwasa ana jo hanga atese yize malinga mu mulimo wa Zambi kakwete utayizo wenyi.
HAMU MU CHIKUNGULWILA
17. Hana yilweza ya chize amwe mahasa kusolola hamu mu chikungulwila.
17 Yetu nawa twatamba kusolola hamu mu chikungulwila. Chakutalilaho, makulwana katamba kupwa ni hamu hakukwasa waze mavulumuna milonga yinene chipwe muze maakwasa mandumbu waze ali mu ponde mumu lia uwukiso. Makulwana amwe kakuya mu mazuwo a ususu akalilongese funge Mbimbiliya hanji kusongwela kukunguluka. Kuchi mba mandumbu a mapwo waze ali twamishi? No kali ni uhashi wakusolwelamo hamu ni kulingila Yehova. Ayo mahasa kupwa pionelu, kuya kuze kunafupiwa chinji akwa-kwambujola, kulinga Mulimo wa Kutunga Mazuwo, ni kuya ku Shikola ya Akwa-Kwambujola Wanangana. Amwe mahasa kwaasanyika ku Shikola ya Ngiliate.
18. Kuchi mandumbu a mapwo waze hakola mahasa kusolola hamu?
18 Twazanga chinji mandumbu jetu a mapwo waze hakola nawa twakusakwila chinji kupwa no mu chikungulwila! Chipwe ngwe amwe mahona kukalakala chinji milimo ya Zambi, nihindu mahasa kununga ni kusolola hamu ni kulinga mu mulimo wacho. (Tanga Titu 2:3-5.) Chakutalilaho, ndumbu wapwo yoze hakola kanafupiwa hamu nyi makulwana mamwita akwase mukweze wapwo apwe ni kuzala kanawa. Iye katambile kutenukina mukweze wacho hachize akuzala, alioze ni uhomboloji weswe, mamukwasa anyonge chize akwo mahasa kwivwa hakutwala ku mazalo jenyi. (1 Timoteu 2:9, 10) Muze mandumbu a mapwo waze hakola masolola zango lio mu mutapu uno, mahasa kutakamisa chikungulwila.
19. (a) Kuchi mandumbu a malunga waze hanaapapachisa mahasa kupwa ni hamu? (b) Kuchi A-Fwilipu 2:13 ni 4:13 anakwase mandumbu a malunga hanga apwe ni hamu?
19 Mandumbu a malunga akupapachisa no katamba kupwa ni hamu ni kulinga milimo mu chikungulwila. Muze matayiza kukalakala ngwe tuvumbi hanji makulwana, chikungulwila chakuyuka chinji. (1 Timoteu 3:1) Alioze keshi kutayiza yiteli yacho. Hanji ndumbu umwe kalingile umwe kapalia ku mashimbu akunyima, mba haliapwila malivwa ngwe katambile kupwa kavumbi hanji mukulwana. Weka nawa mahasa kulivwa ngwenyi keshi ni uhashi wakulinga mulimo wacho. Nyi che wakwivwa, Yehova mahasa kukukwasa hanga upwe ni hamu. (Tanga A-Fwilipu 2:13; 4:13.) Iwuluka chilweza cha Mose. Neye kalivwile ngwe te keshi kuhasa kulinga yize Yehova amutumine kulinga. (Kutuhuka 3:11) Alioze Yehova yamukwasa kupwa ni hamu ni kulinga yeswe yize te mahasa kulinga. Kuchi ndumbu wa lunga wakupapachisa mahasa kupwa ni hamu liacho? Iye mahasa kulemba kuli Yehova ni kutanga Mbimbiliya matangwa eswe. Mahasa nawa kupukuna ha yilweza ya tuvumbi twa Yehova waze asolwele hamu. Ni kulikehesa cheswe mahasa kwita fumbo kuli makulwana hanga ahase kukwasa chikungulwila kulita ni yize yinafupiwamo. Tunakolweza mandumbu eswe a malunga akupapachisa ahamuke ni kuhondangana milimo mu chikungulwila!
“YEHOVA . . . KWALI HAMWE NI YENA”
20, 21. (a) Yika Ndawichi ewulwile Solomone? (b) Ha yika mutuhasa kupwa ni shindakenyo?
20 Mwanangana Ndawichi kewulwile Solomone ngwenyi, Yehova te makapwa hamwe nenyi ndo haze mahwishila kutunga tembele. (1 Sango ja Mianangana 28:20) Hachino, Solomone yapukuna ha maliji jacho, ni kuhona kwecha ukweze wenyi ni kuhona kunyingika yuma yinji yimukwike kulinga mulimo. Alioze, yasolola hamu linji mba ni ukwaso wa Yehova, yahwisa kutunga tembele ha miaka shimbiali ni tukweji asambano.
21 Yehova matukwasa tupwe ni hamu ni kulinga mulimo wetu mu usoko ni mu chikungulwila ngwe chize akwashile Solomone. (Izaia 41:10, 13) Nyi mutusolola hamu ha kulingila Yehova, mutupwa ni shindakenyo ngwetu matupala haliapwila ni kulutwe lia mangwa. Kashika, twatamba ‘kuhamuka ni kulinga’ milimo.
a Muhasa kuwana yikuma yimwe ha chize muhasa kutesa yize mulinga mu mulimo wa Zambi ha mutwe wakwamba ngwo, “Linga Mulimo wa ku Spiritu Hanga Uhalise Sakatanga We,” mu Kaposhi wa Kutalila wa ingles 15 Julho , 2004.