Malaki

2 “Aprezan, zot bann pret, sa i en komannman pour zot.” 2 La sa ki Zeova Sef larme i dir, “Si zot pa oule ekoute e i pa enportan pour zot glorifye mon non, mon pou modi zot e fer zot bann benediksyon vin bann malediksyon. Wi, mon’n fer bann benediksyon vin bann malediksyon parski zot pa pe pran aker mon komannman.”

3 “Gete! Akoz zot, mon pou detri* zot bann lagrenn ki zot in senmen. Mon pou zet malpropte dan zot figir, malpropte bann zannimo ki zot ofer dan zot bann lafet. Zot pou ganny anmennen e zete dan malpropte.* 4 Alor zot pou konnen ki mon’n donn zot sa komannman pour ki mon lalyans avek Levi i kontinyen.” La sa ki Zeova Sef larme in dir.

5 “Lalyans ki mon ti fer avek li ti en lalyans lavi ek lape e sa ti fer li annan en gran respe* pour mwan. I ti annan en gran respe pour mwan, wi, i ti annan en gran respe pour mon non. 6 Lalwa* laverite ti dan son labous e i pa ti zanmen dir bann move parol. I ti mars avek mwan dan lape ek ladrwatir e i ti ed en kantite dimoun pour retourn lo sa bon semen. 7 Parski en pret i devret ansenny konnesans lo Bondye e bann dimoun i devret al kot li pour konn lalwa,* parski i mesaze Zeova Sef larme.

8 La sa ki Zeova Sef larme i dir, “Me zot, zot in aret swiv sa semen. Zot in fer en kantite dimoun kas lalwa.* Zot in kas lalyans ki mon ti fer avek Levi. 9 Alor mon pou fer zot ganny meprize e mon pou abes zot devan tou dimoun, parski zot pa ti gard mon bann komannman e zot ti fer lapreferans ler zot ti aplik lalwa.”

10 “Pa nou tou nou annan en sel papa? Pa en sel Bondye ki’n kree nou? Alor akoz nou trai kanmarad e kas lalyans nou bann zanset? 11 Zida in azir konman en tret e en keksoz degoutan in ganny fer Izrael ek Zerizalenm, parski Zida in mank respe pour Zeova ki kontan sa ki sen.* I’n marye avek en fiy ki ador en bondye etranze. 12 Zeova pou detri nenport dimoun ki sorti dan latant Zakob ki fer sa, nenport ki ki i ete,* menm si i ofer en lofrann avek Zeova Sef larme.”

13 “I annan en lot* keksoz ki zot fer, ki fer lotel Zeova ganny kouver avek larm dimoun ki pe plere e plennyen. Sanmenm sa i nepli pran kont zot bann lofrann e i pa aksepte nanryen ki zot ofer li. 14 Zot demande, ‘Akoz?’ Parski Zeova i temwen ant ou ek ou madanm ki ou ti marye avek ler ou ti zenn, sa enn ki ou’n trai menm si i ti ou zanmi ki ou’n fer promes avek.* 15 Me i annan enn ki pa’n fer sa, parski i ti ankor annan lespri sen.* Ki sa dimoun ti pe rode? I ti pe rod sa desandans Bondye. Alor vey ou leta lespri* e pa trai sa madanm ki ou ti marye avek ler ou ti zenn.” 16 Parski la sa ki Zeova Bondye Izrael i dir, “Mon ay* divors” e Zeova Sef larme i dir, “Mon ay sa enn ki koupab pour fer vyolans.* Vey zot leta lespri e zot pa devret trai zot madanm.

17 “Zot in fatig Zeova par sa ki zot dir. Me zot dir, ‘Ki mannyer nou’n fatig li?’ Par dir, ‘Nenport dimoun ki fer sa ki mal, i en bon dimoun devan Zeova e i fer li plezir’ oubyen zot dir, ‘Oli sa Bondye lazistis?’”