Zenn ser, ki mannyer ou kapab vin en Kretyen matir?

 1. Ki nou bezwen fer pour nou vin en Kretyen matir?

NOU kontan pour vwar lafason ki en zanfan i grandi pour vin en adilt. I kapab paret ki sa zanfan i grandi san ki i bezwen fer okenn zefor. De lot kote, nou bezwen fer zefor si nou anvi vin en Kretyen matir.b (1 Kor. 13:11; Ebr. 6:1) Pour nou kapab fer sa, nou bezwen annan en bon lanmitye avek Zeova. Nou osi bezwen led lespri sen Bondye pour nou kapab devlop bann kalite ki fer Bondye plezir, pour devlop bann abilite e pour prepar nou pour bann responsabilite ki nou kapab annan dan lavenir.—Prov. 1:5.

 2. Ki nou aprann dan Zenez 1:27 e ki nou pou diskite dan sa lartik?

² Ler Zeova ti kree bann imen, i ti kree zonm ek fanm. (Lir Zenez 1:27.) I kler ki fizikman, bann zonm ek fanm i diferan avek kanmarad me i annan lezot fason ki zot diferan. Par egzanp, Zeova ti kree zonm ek fanm pour zot annan diferan responsabilite. Sa i fer ki zot bezwen bann kalite ek abilite ki pou ed zot desarz sa bann responsabilite. (Zen. 2:18) Dan sa lartik, nou pou vwar ki en zenn ser i kapab fer pour li vin en Kretyen matir. Dan sa lartik ki swiv, nou pou vwar sa ki bann zenn frer i kapab fer.

3-4. Kote ki bann zenn ser i kapab trouv bann bon legzanp ki zot kapab swiv? (Vwar portre.)

³ Labib i koz lo plizyer madanm ki ti kontan Zeova e ki ti servi li. (Vwar sa lartik ki annan pour tit “Bann madanm dan Labib—Ki nou kapab aprann avek zot?” lo jw.org.) Sa bann madanm ti demontre bann kalite ki ganny mansyonnen dan verse tenm sa lartik, setadir zot ti “fidel e annan kontrol dan tou keksoz.” Bann zenn ser i kapab osi swiv legzanp bann madanm Kretyen ki matir dan zot kongregasyon.

⁴ Zenn ser, akoz ou pa reflesir lo bann ser dan ou kongregasyon e idantifye serten ki ou kapab swiv zot legzanp? Obzerv zot bann zoli kalite e apre reflesir lo ki mannyer ou kapab demontre sa bann menm kalite. Dan bann paragraf ki swiv, nou pou vwar trwa kalite enportan ki bann ser i bezwen devlope pour zot kapab vin en Kretyen matir.

 5. Akoz i enportan pour en ser matir annan limilite?

⁵ Limilite i en kalite enportan ki pou ed en Kretyen vin matir. Si en madanm i annan limilite, i pou annan en bon lanmitye avek Zeova e avek lezot. (Zak 4:6) Par egzanp, en madanm ki kontan Zeova i demontre limite par siport sa prensip konsernan lotorite ki son Papa ki dan lesyel in met an plas. (1 Kor. 11:3) Sa prensip i aplikab dan kongregasyon e dan fanmir.c

 6. Ki bann zenn ser i kapab aprann konsernan limilite avek legzanp Rebeka?

⁶ Mazin legzanp Rebeka. I ti en madanm saz ki ti demontre kouraz. Tou dilon son lavi, i ti fer bann bon desizyon e i ti konnen kan e konman pour azir. (Zen. 24:58; 27:​5-17) Me kantmenm sa, i ti en madanm ki ti demontre respe pour lezot e ki ti pare pour soumet. (Zen. 24:​17, 18, 65) Si ou demontre limilite e pare pour soumet avek bann laranzman Zeova parey Rebeka, ou pou vin en bon legzanp pour ou fanmir ek ou kongregasyon.

 7. Ki mannyer bann zenn ser i kapab swiv legzanp Ester e vin en dimoun modes?

⁷ En Kretyen i bezwen modes pour li kapab vin en Kretyen matir. Labib i dir ki “bann ki modes [i] saz.” (Prov. 11:2) Ester ti en madanm ki modes e ki ti fidel avek Bondye. Sa ti fer ki i pa ti vin arogan ler i ti vin larenn. O kontrer i ti ekout konsey son kouzen Mordekay ki ti pli vye ki li. (Ester 2:​10, 20, 22) Ou osi ou kapab vin en dimoun modes par rod konsey avek lezot e aplik li.—Tit 2:​3-5.

 8. Dapre 1 Timote 2:​9, 10, ki mannyer en ser i montre ki i modes ler i pe fer desizyon konsernan son laparans?

⁸ Ester ti montre ki i modes dan en lot fason. Menm si Ester “ti vreman zoli,” i pa ti rod latansyon lezot pour fer zot remark li. (Ester 2:​7, 15) Ki mannyer en madanm Kretyen i kapab swiv legzanp Ester? En fason ki zot kapab fer sa i par aplik sa ki 1 Timote 2:​9, 10. (Lir.) Dan sa bann verse, zapot Pol i donn lenstriksyon bann madanm pour abiy zot dan en fason modes e ki montre ki zot annan bon zizman. Bann mo Grek ki Pol ti servi i montre ki en madanm i devret toultan sanz dan en fason apropriye e ki son fason sanze i devret montre ki i’n pran kont santiman ek lopinyon lezot. Nou vreman apresye nou bann ser matir ki sanz dan en fason modes.

 9. Ki nou kapab aprann avek legzanp Abigel?

⁹ En lot kalite ki en ser i bezwen annan pour li kapab vin matir i disernman. Kisisa disernman? En dimoun ki annan disernman i annan sa abilite pour konnen kwa ki byen e kwa ki mal e apre i swazir pour fer sa ki byen. Mazin legzanp Abigel. Son msye ti fer en move desizyon ki ti pou anmenn maler pour tou dimoun dan son lakaz. Me Abigel ti azir vitman. I ti annan disernman e akoz sa, i ti sov lavi bann dimoun dan son lakaz. (1 Sam. 25:​14-23, 32-35) Ler nou annan disernman, sa pou ed nou pour konnen kan pour koze e kan pour reste trankil. Sa kalite pou osi ed nou pour demontre lentere dan lezot san ki nou fer zot enkonfortab.—1 Tesa. 4:11.

10-11. Ki byenfe ou pou gannyen e ki byenfe lezot pou gannyen ler ou aprann pour lir e ekri byen? (Vwar portre.)

¹⁰ En ser Kretyen i bezwen devlop bann abilite ki pou ed li dan son lavi toulezour. I annan serten abilite ki en fiy i aprann ler i ankor zanfan ki pou ed li tou dilon son lavi. Annou vwar serten legzanp.

¹¹ Aprann pour lir e ekri byen. Dan serten kiltir, dimoun i krwar ki i pa enportan pour en madanm aprann lir e ekri. Me i enportan pour tou Kretyen konn fer sa.d (1 Tim. 4:13) Alor pa les okenn keksoz anpes ou aprann pour lir e ekri byen. Ki byenfe ou pou gannyen? Ler ou konn lir e ekri, sa pou ed ou pour trouv en travay. I pou pli fasil pour ou etidye Parol Bondye e pour ansenny lezot osi. Pli enportan ankor, ler ou lir e medit lo Parol Bondye, sa pou ed ou pour vin pli pros avek Zeova.—Zoz. 1:8; 1 Tim. 4:15.

12. Ki mannyer Proverb 31:26 i kapab ed ou pour kominik byen?

¹² Aprann pour kominik byen. I enportan pour en Kretyen fer sa. I pour sa rezon ki disip Zak i donn nou sa bon konsey: “En dimoun i devret pare pour ekoute, me i devret pran letan avan koze.” (Zak 1:19) Ler ou ekout lezot byen, ou montre ki ou konpran zot santiman. (1 Pyer 3:8) Si ou pa tro asire si ou konpran sa ki sa dimoun pe dir oubyen santi, demann bann kestyon ki apropriye. Apre, pran letan pour reflesir avan ou koze. (Prov. 15:28) Demann ou lekor: ‘Eski sa ki mon pe al dir i vre e pou ankouraz sa dimoun? Eski sa ki mon pe al dir i montre ki mon annan respe pour sa dimoun e ki mon pe demontre labonte?’ Aprann avek legzanp bann ser matir ki kominik byen. (Lir Proverb 31:26.) Ekout byen sa ki zot dir e lafason ki zot koze. Pli ou aprann pour kominik byen, pli ou pou annan bann bon lanmitye avek zot.

13. Ki mannyer ou kapab aprann pour pran swen avek en lakour? (Vwar portre.)

¹³ Aprann pour pran swen avek en lakour. Dan bokou landrwa dan lemonn, bann madanm ki fer laplipar keksoz kot lakour. Petet ou manman oubyen en lot ser i kapab ed ou pour aprann fer sa. En ser ki apel Cindy i dir: “Enn bann pli bon kado ki mon manman in donn mwan i pour ansenny mwan ki ler nou travay dir, sa i fer nou vreman zwaye. Lefet ki i’n montre mwan ki mannyer pour kwi manze, netwaye, koud e pour zer byen mon larzan ler mon pe aste konmisyon, sa i fer ki mon kapab pran swen avek mon lekor e osi pour fer plis dan servis Zeova. Manman ti ansenny mwan pour demontre lospitalite e akoz sa, mon’n rankontre plizyer frer ek ser ki bann bon legzanp pour mwan swiv.” (Prov. 31:​15, 21, 22) En madanm ki travay dir, ki demontre lospitalite e ki’n aprann pour pran swen avek en lakour i anmenn lazwa dan son fanmir e dan son kongregasyon.—Prov. 31:​13, 17, 27; Akt 16:15.

14. Ki ou aprann avek leksperyans Crystal e ki ou devret konsantre lo la?

¹⁴ Aprann pour fer keksoz lo ou menm. Sa i en keksoz enportan ki tou Kretyen matir i bezwen aprann. (Fili. 4:11) En ser ki apel Crystal i dir: “Ler mon ti segonder, mon paran ti ed mwan pour swazir bann leson ki ti pou ed mwan aprann bann abilite ki mon pou kapab servi dan lavenir. Mon papa ti ankouraz mwan pour pran bann laklas accounting e sa in ed mwan en kantite.” Apard ki aprann bann abilite ki pou ed ou ganny en travay, esey aprann ki mannyer pour fer en bidze e pour swiv sa bidze. (Prov. 31:​16, 18) Si ou swazir pour viv en lavi senp e ou evite fer bann det ki pa neseser, sa pou ed ou pour konsantre lo bann lobzektif spirityel.—1 Tim. 6:8.

15-16. Akoz bann ser selibater i presye pour lezot? (Mark 10:​29, 30)

¹⁵ Ler ou devlop bann kalite ki fer Bondye plezir e ou aprann bann abilite ki pou ed ou dan lavi toulezour, sa pou ed ou ler ou pe fer bann desizyon konsernan lavenir. Annou vwar serten keksoz ki ou kapab fer.

¹⁶ Ou kapab reste selibater pour en pe letan. Parey Zezi ti dir, serten i swazir pour pa marye menm si sa i pa en keksoz normal dan zot kiltir. (Mat. 19:​10-12) I annan ki reste selibater pour lezot rezon. Ou kapab asire ki Zeova ek Zezi pa krwar ki ou pa vo nanryen zis akoz ou selibater. Bann ser selibater partou dan lemonn i annan en bon lenfliyans dan kongregasyon. Sa lanmour ek lentere senser ki zot demontre, i fer zot vin bann ser ek manman spirityel pour lezot dan kongregasyon.—Lir Mark 10:​29, 30; 1 Tim. 5:2.

17. Ki en zenn ser i kapab fer la konmela pour prepare pour li pran servis a plen tan?

¹⁷ Ou kapab vin en serviter a plen tan. Bann ser dan kongregasyon i fer en kantite dan sa travay predikasyon ki pe ganny fer partou dan lemonn. (Ps. 68:11) Eski ou kapab fer plan la konmela pour ou pran servis a plen tan dan lavenir? Petet ou kapab vin en pionye, en volonter dan travay konstriksyon pour lorganizasyon Temwen Zeova oubyen en Betelit. Koz avek Zeova konsernan ou lobzektif. Koz avek lezot ki’n atenn en lobzektif parey e demann zot ki ou bezwen fer pour ou kalifye pour pran sa servis. Apre fer en plan ki pou ed ou atenn sa lobzektif. Si ou vin en serviter a plen tan, sa pou fer li posib pour ou fer lezot keksoz eksitan dan servis Zeova.

18. Akoz en ser i devret swazir byen sa frer ki i pou marye avek? (Vwar portre.)

¹⁸ Ou kapab deside pour marye. Bann kalite ek abilite ki nou’n koz lo la dan sa lartik, pou ed ou vin en bon madanm. Byensir, si ou pe deside pour marye, ou bezwen swazir byen sa frer ki ou pou marye avek. I enn bann desizyon pli enportan ki ou pou fer. Gard antet ki sa frer ki ou swazir, pou vin ou sef fanmir. (Rom. 7:2; Efe. 5:​23, 33) Alor demann ou lekor: ‘Eski i en Kretyen matir? Eski bann keksoz spirityel i sa keksoz pli enportan dan son lavi? Eski i pe fer bann desizyon saz? Eski i admet ler in fer en fot? Eski i annan respe pour bann madanm? Eski i pou kapab ed mwan pour kontinyen annan en bon lanmitye avek Zeova? Eski i pou kapab pran swen avek mwan materyelman e eski i pou en bon zanmi pour mwan? Eski i en dimoun responsab? Par egzanp, eski i annan bann responsabilite dan kongregasyon e eski i desarz byen sa bann responsabilite?’ (Lik 16:10; 1 Tim. 5:8) Byensir, si ou anvi trouv en bon msye, ou osi ou bezwen vin en bon madanm.

19. Akoz sa rol ki en madanm i annan pour “ed” son msye i en loner?

¹⁹ Labib i dir ki en bon madanm i “en konpanny” pour son msye e i “ed” son msye. (Zen. 2:18) Eski sa ki Labib i dir i abes sa madanm? Non! O kontrer, sa i en loner pour li. Anfet, souvandfwa Labib i dekri Zeova konman en “led.” (Ps. 54:4; Ebr. 13:6) En madanm i vin en led pour son msye ler i siport li. Par egzanp, ler son msye i fer en desizyon pour lafanmir, i travay ansanm avek son msye pour fer sir ki sa desizyon i reisi. Vi ki sa madanm i kontan Zeova, i fer sa ki i kapab pour ed lezot vwar bann bon kalite ki son msye i annan. (Prov. 31:​11, 12; 1 Tim. 3:11) Si ou anvi marye, ou kapab prepare depi la konmela pour vin en bon madanm par ranforsi ou lanmour pour Zeova e vin en led pour lezot dan kongregasyon.

20. Ki byenfe en manman i kapab anmennen pour son fanmir?

²⁰ Ou kapab vin en manman. Apre ki ou’n marye, i kapab ki ou ek ou msye zot ganny zanfan. (Ps. 127:3) Alor, i saz pour reflesir davans lo sa size. Bann kalite ek abilite ki nou’n diskit lo la dan sa lartik pou ed ou si ou marye e annan zanfan. Ou lanmour, labonte ek pasyans pou fer ki ou lakour pou en landrwa kot ou zanfan i santi zot an sekirite e kot zot zwaye.—Prov. 24:3.

21. Ki mannyer nou santi anver nou bann ser e akoz? (Vwar portre lo kouvertir.)

²¹ Bann ser, nou kontan zot pour tou sa ki zot fer pour Zeova ek son pep. (Ebr. 6:10) Ou fer zefor pour devlop bann kalite ki fer Bondye plezir, ou devlop bann abilite ki fer ou zwaye e ki fer lezot osi zwaye. Ou osi prepar ou depi la konmela pour bann responsabilite ki ou kapab annan dan lavenir. Ou vreman presye pour lorganizasyon Zeova!