Eski later pou ganny detrir?

Non, plannet later pa pou zanmen ganny detrir, ganny brile oubyen ranplase. Labib i dir ki Bondye ti kree later pour ki dimoun i toultan reste lo la.

• “Bann dimoun drwat pou ganny donnen later e zot pou reste lo la pour touzour.”​—Psonm 37:29, NWT.

• “[Bondye] i fikse later lo son bann fondasyon; i pa pou zanmen bouze.”​—Psonm 104:5.

• “Later i reste touzour lanmenm.”​—Eklezyast 1:4.

• “Sa Bondye ki’n kree later, ki’n form li e soutenir li; i pa’n kree li pour reste vid; me, i’n form li pour ki i ganny abite.”​—Izai 45:18.

Bondye pa pou permet ki imen i konpletman detri later par polisyon, lager oubyen okenn lezot fason. O kontrer, i pou “detri bann ki pe detri later.” (Revelasyon 11:18) Ki mannyer i pou fer sa?

Bondye pou ranplas tou bann gouvernman imen, ki pa’n reisi protez later, avek en Rwayonm parfe ki pou dan lesyel. (Danyel 2:44; Matye 6:9, 10) Sa Rwayonm pou ganny dirize par Zezi Kri, Garson Bondye. (Izai 9:6, 7) Ler i ti lo later, Zezi ti montre ki i kapab kontrol lanatir. (Mark 4:35-41) Konman Lerwa dan Rwayonm Bondye, Zezi pou annan kontrol total lo later ek lanatir. I pou rezourd bann problenm ki i annan dan lanatir, pour fer ki keksoz i vin parey i ti ete dan zarden Edenn.​—Matye 19:28; Lik 23:43.

Non, Labib pa dir sa. Bokou dimoun i krwar sa akoz 2 Pyer 3:7 i dir: “Lesyel ek later ki egziste konmela in ganny anmase . . . pour ganny detrir par dife.” Me sa i zis en mal konprenezon. Annou vwar de pwen enportan ki pou ed nou konpran sa verse:

1. Labib i servi sa mo “lesyel,” “later” ek “dife” pour reprezant plizyer keksoz. Par egzanp, Psonm 97:1 i dir: “Later i rezoui!” Dan sa verse, “later” i vedir bann imen.

2. Ler nou get konteks 2 Pyer 3:7 nou kapab konpran lekel sa lesyel, later ek dife ki sa verse pe refer avek. Verse 5 ek 6 dan 2 Pyer sapit 3, i mansyonn Deliz ki ti arive dan letan Noe e ki ti detri lemonn sa letan. Me plannet later pa ti ganny detrir. O kontrer, zis bann move dimoun oubyen “later” ki ti ganny detrir. (Zenez 6:11) Sa Deliz ti osi detri “lesyel” setadir bann dimoun ki ti pe diriz bann imen sa letan. Zis bann move dimoun ki ti ganny detrir pa plannet later. Noe ek son fanmir ti sirviv sa destriksyon e zot ti kontinyen reste lo later apre Deliz.​—Zenez 8:15-18.

Dan sa menm fason ki delo ti detri bann move dimoun pandan Deliz, sa “dife” ki ganny mansyonnen dan 2 Pyer 3:7, pou detri bann move dimoun e pa plannet later. Bondye i promet ki i pou annan “en nouvo lesyel ek en nouvo later kot i pou annan ladrwatir.” (2 Pyer 3:13) Sa “nouvo later” setadir bann imen obeisan, pou ganny dirize par en “nouvo lesyel” setadir Rwayonm Bondye. Ler Rwayonm Bondye pour dirize, later pou vin en paradi kot tou pou anpe.​—Revelasyon 21:1-4.