Lekel ki kapab delivre sa bann ki pe kriy o sekour?

“O Bondye, enstrir lerwa konsernan ou bann zizman . . . Akoz i pou delivre sa enn pov ki pe kriy o sekour.”—PS. 72:1, 12.

1. Ki nou aprann avek mizerikord Bondye dan ka David?

ESKI pa sa bann parol ki tre probab ti ganny ekrir par Lerwa David dan ansyen Izrael, i vreman tousan! En pe letan avan i ti ekrir sa parol, David ti annan remordkonsyans apre ki i ti’n komet adilter avek Batseba. Sa letan, David ti sipliy Zeova: “Selon labondans ou mizerikord, efas mon bann lofans. . . . Mon pese i devan mwan konstaman. . . . Gete! Dan lerer mon’n ganny met o monn avek douler lakousman, e dan pese mon manman in fer mwan.” (Ps. 51:1-5) Avek mizerikord, Zeova i pran kont nou lenperfeksyon.

2. Dan ki fason Psonm 72 i ed nou?

² Zeova i konpran nou sityasyon deplorab. Par kont, parey i’n ganny predir, sa Lerwa ki Bondye in swazir pou “delivre sa enn pov ki pe kriy o sekour, osi sa enn ki pe soufer e nenport ki ki napa personn pour vin ed li. I pou pran lapenn pour sa dernyen dimoun ek sa enn pov, e i pou sov lavi bann pov.” (Ps. 72:12, 13) Konman ki zot ti pou ganny soulazman? Psonm 72 i dir nou. Sa kantik ki ti ganny konpoze an rapor avek renny Salomon, garson David, i donn en apersi konsernan lafason ki Zezi Kri, Garson Bondye pou soulaz limanite dan difikilte.

En apersi renny Kris

3. Ki Salomon ti demande e ki Bondye ti donn li?

³ Apre ki i ti’n donn lord pour ki Salomon i vin lerwa, David ki ti aze sa letan ti donn li bann lenstriksyon spesifik e Salomon ti fer tou sa la fidelman. (1 Rwa. 1:32-35; 2:1-3) Pli tar, Zeova ti aparet avek Salomon dan en rev e dir: “Dir mwan ki ou oule.” Salomon ti demann zis en keksoz: “Ou devret donn ou serviter en leker obeisan pour ziz ou pep, pour fer ladiferans ant sa ki bon ek sa ki move.” Konman rezilta pour son demann ki i ti’n fer avek limilite, Zeova ti donn li sa ki i ti’n demande e menm plis ankor.—1 Rwa. 3:5, 9-13.

4. Ki mannyer en lot dirizan dan son letan ti dekrir renny Salomon?

⁴ Lefet ki i ti annan benediksyon Zeova, renny Salomon ti enn ki ti vreman remarkab akoz napa okenn gouvernman ki’n egziste apard pour li, kot in annan lape ek prosperite. (1 Rwa. 4:25) Larenn Seba, ansanm avek plizyer son bann dimoun ti enn parmi bann ki ti vin gete pour li menm ki mannyer renny Salomon ti ete. I ti dir Salomon: “Sa parol ki mon’n tande dan mon pei lo ou ek ou lasazes i vre . . . Ni menm lanmwatye zot pa’n dir mwan. Ou annan plis lasazes ek prosperite ki sa ki mon’n tande.” (1 Rwa. 10:1, 6, 7) Par kont, Zezi ti sa enn ki ti demontre pli gran lasazes, i ti kapab dir sa lo son lekor: “Isi i annan enn ki pli enportan ki Salomon.”—Mat. 12:42.

Soulazman anba dominasyon sa pli Gran Salomon

5. Ki Psonm 72 i revele e ki avangou i donnen?

⁵ Annou aprezan egzamin bann diferan pwen dan Psonm 72 pour aprann ankor plis konsernan bann benediksyon anba renny Zezi Kri, sa pli Gran Salomon. (Lir Psonm 72:1-4.a) Sa psonm i revel santiman Zeova anver “renny [Zezi Kri] konman prens,” ek “Prens Lape.” (Iza. 9:6, 7) Anba gidans Bondye, sa pli Gran Salomon pou ‘pled pour sa bann ki aflize e sov garson sa enn ki pov.’ Son dominasyon pou enn kot pou annan lape ek ladrwatir. Ler i ti lo later, Zezi ti donn en avangou konsernan sa ki pou ganny akonplir pandan sa Mil An ki i pou dirize ki pe vini.—Rev. 20:4.

6. Ki avangou Zezi ti donnen konsernan benediksyon anba dominasyon Rwayonm Bondye?

⁶ Egzamin serten keksoz ki Zezi Kri ti fer ki donn nou en apersi lo sa ki i pou fer pour limanite, pour akonplir Psonm 72. Nou annan rezon enpresyonnen par sa gran konpasyon ki i ti annan pour bann ki ti pe soufer. (Mat. 9:35, 36; 15:29-31) Par egzanp, en zonm ki ti ganny lalep ti apros Zezi e sipliye: “Si ou oule ou kapab pirifye mwan.” Zezi ti reponn li: “Mon oule ganny pirifye.” Deswit apre, sa zonm ti geri! (Mark 1:40-42) Pli tar, Zezi ti zwenn en vev ki son sel garson ti’n mor. “I ti pran pitye pour li” e i ti dir sa garson: “Leve!” Sa garson ti leve. I ti’n revin vivan ankor!—Lik 7:11-15.

7, 8. Ki serten mirak Zezi ti fer pour montre ki i ti annan sa pouvwar pour geri?

⁷ Zeova ti donn Zezi sa pouvwar pour fer mirak. Sa madanm ki “ti ganny lemorazi depi douz an” i en legzanp. Menm si “i ti’n soufer bokou e ti’n depans tou sa ki i ti posede avek bokou dokter,” son sityasyon ti vin pli pir. Sa madanm ti al parmi lafoul e tous Zezi, ki ti en keksoz mal pour fer dapre Lalwa vi ki i ti annan en “desarz disan.” (Lev. 15:19, 25) Zezi ti santi ki en pe son lafors ti’n sorti dan li, alor i ti demande lekel ki ti’n tous li. Sa madanm ti aprose an “tranblan avek lafreyer [i] ti tonm azenou devan li e ti dir li tou laverite.” Zezi ti realize ki Zeova ti’n geri sa madanm, alor i ti tret li zantiman e dir: “Ma-fiy ou lafwa in sov ou, al an-pe, e ganny delivre avek ou maladi.”—Mark 5:25-27, 30, 33, 34.

⁸ Atraver lafors ki i ti’n gannyen avek Bondye, Zezi ti kapab geri bann malad, e sirman sa ti osi annan en gran lefe lo bann ki ti pe gete. Par egzanp, san dout, bokou ti enpresyonnen kan zot ti vwar Zezi geri bann dimoun avan son Sermon renonmen lo montanny. (Lik 6:17-19) Kan Zan Batis ti anvoy de mesaze pour konfirmen si Zezi ti vreman Mesi, zot ti vwar Li pe ‘geri plizyer dimoun malad, paralize, e posede par move lespri, e fer en kantite aveg war kler.’ Apre sa, Zezi ti dir sa de mesaze: “Al raport avek Zan sa ki zot in war e tande. Bann aveg i war kler, dimoun bwete i mars drwat, lepre i geri, bann sourd i tande, bann mor i resisite e bann pov i tann Bonn Nouvel.” (Lik 7:19-22) Sirman sa mesaz ti ankourazan pour Zan!

9. Bann mirak Zezi ti pe montre kwa pour lavenir?

⁹ I vre, sa soulazman ki Zezi ti donn zot pour zot soufrans pandan son minister lo later ti zis tanporer. Sa bann ki i ti geri ouswa resisite ti mor apre. Me par kont, sa bann mirak ki Zezi ti fer kan i ti lo later ti bann apersi konsernan sa soulazman eternel ki limanite pou gannyen anba dominasyon son renny konman Mesi.

Paradi lo later antye i pros!

10, 11. (a) Pour konbyen letan sa bann benediksyon anba dominasyon Rwayonm Bondye pou dire e ki mannyer dominasyon Zezi pou ete? (b) Lekel ki pou avek Kris dan Paradi e ki i pou bezwen fer pour viv pour touzour?

¹⁰ Esey vwar dan ou lespri ki mannyer lavi pou ete dan Paradi lo later. (Lir Psonm 72:5-9.b) Bann adorater sa sel vre Bondye pou kapab rezwir lavi dan en Paradi ziska ki soley ek lalin i nepli egziste, andotmo, pour touzour! Lerwa Zezi Kri pou rekonfort nou ‘parey lapli lo zerb koupe e gro lapli ki mouy later.’

¹¹ Anmezir ou esey vwar lakonplisman sa psonm dan ou lespri, eski pa ou leker i zwaye par sa lespwar ki ou annan pour viv pour touzour dan en paradi lo later? Sirman sa malfeter ki ti ganny kloute akote Zezi ti kontan kan Zezi ti dir li: “Ou pou avek mwan dan paradi.” (Lik 23:43) Pandan sa Mil An ki Zezi pou dirize, sa zonm pou ganny resisite. Si i soumet avek dominasyon Kris, i pou kapab viv pour touzour lo later konman en imen parfe e zwaye.

12. Pandan sa Mil An ki Kris pou dirize, ki loportinite sa bann move ki pou resisite pou gannyen?

¹² Anba dominasyon Zezi Kri, sa pli Gran Salomon, “sa enn ki drwat pou zermen,” setadir i pou fleri ouswa prospere. (Ps. 72:7) Lanmour ek labonte Kris pou annabondans sa letan, zis parey i ti leka kan i ti lo later. Dan sa nouvo lemonn ki Bondye in promet, menm sa bann ki “move” ki pou resisite pou ganny sa bon loportinite pour viv an armoni avek standar Zeova e kontinyen viv. (Akt 24:15) Byensir, sa bann ki pa oule viv annakor avek sa ki Bondye i ekspekte avek zot, pa pou ganny sa sans pour kontinyen viv pour zot met dezord dan nouvo lemonn.

13. Ziska ki kote Rwayonm Bondye pou dirize e akoz lape pa pou zanmen fini?

¹³ Dominasyon sa pli Gran Salomon pou lo later antye, e sa i ganny endike par sa parol: “I pou annan bann sitwayen depi lanmer ziska lanmer e depi Larivyer [Efrat] ziska partou lo later. Bann zabitan dezer pou azenou devan li, e menm son bann lennmi pou lis lapousyer.” (Ps. 72:8, 9) Wi, Zezi Kri pou domin lo later antye. (Zeka. 9:9, 10) Sa bann ki apresye son dominasyon ek benediksyon ki i pou anmennen pou “azenou” akoz zot pou volonterman soumet avek li. De lot kote, bann peser ki pa repantir pou ganny detrir, menm si zot annan “san-t-an.” (Iza. 65:20) Zot pou “lis lapousyer.”

Zezi i konpran nou

14, 15. Ki mannyer nou konnen Zezi ti konpran santiman bann imen e “delivre sa enn pov ki pe kriy o sekour”?

¹⁴ Imen enparfe i dan en leta ki fer lapenn e zot definitivman bezwen led. Me nou annan lespwar. (Lir Psonm 72:12-14.c) Zezi, sa pli Gran Salomon, i konpran nou akoz i konnen nou enparfe. Deplis, Zezi ti soufer pour ladrwatir e Bondye ti les li fer fas avek bann leprev li tousel. Zis mazinen, Zezi ti telman soufer emosyonnelman ki son “transpirasyon ti tonm ater parey gro gout disan”! (Lik 22:44) Pli tar, lo sa poto martir, i ti kriye: “Mon-dye, Mon-dye akoz ou’n abandonn mwan?” (Mat. 27:45, 46) Malgre tou sa soufrans ki i ti pas atraver, e menm si Satan ti fer en kantite zefor pour fer li vir ledo avek Zeova, Zezi ti reste fidel anver Zeova.

¹⁵ Nou kapab asire ki Zezi i vwar sa soufrans ki nou pas atraver e i “pou delivre sa enn pov ki pe kriy o sekour, osi sa enn ki pe soufer e nenport ki ki napa personn pour vin ed li.” Parey son Papa, avek lanmour, Zezi pou “ekout sa bann pov,” ‘geri sa bann ki zot leker in brize, e pans zot blesir fermal.’ (Ps. 69:33; 147:3) Zezi i kapab “senpatiz avek nou febles” akoz i’n “ganny tante dan tou keksoz, parey nou.” (Ebr. 4:15) Eski pa i gou pour konnen ki Lerwa Zezi Kri pe deza rennyen dan lesyel e i pe espere avek enpasyans pour anmenn soulazman pour nou par met en lafen avek soufrans limanite!

16. Akoz Salomon ti kapab senpatiz avek son bann sitwayen?

¹⁶ Lefet ki i ti annan lasazes ek bon zizman, san okenn dout, Salomon ti “pran lapenn pour sa dernyen dimoun.” Deplis, i ti pas atraver bann sityasyon enkyetan e fer lapenn. Son frer Amnonn ti vyol son ser Tamar, e Absalonm, frer Salomon ti touy Amnonn pour sa aksyon. (2 Sam. 13:1, 14, 28, 29) Absalonm ti anvi rennyen dan plas David, me i pa ti reisi fer li, Yoab ti touy li. (2 Sam. 15:10, 14; 18:9, 14) Pli tar, Adoniya, frer Salomon ti esey tou fason pour vin lerwa dan son plas. Si i ti’n reisi, sa ti pou san dout vedir lanmor pour Salomon. (1 Rwa. 1:5) Sa ki Salomon ti dir dan son lapriyer zour inogirasyon tanp Zeova i montre ki i ti santi soufrans bann dimoun. Dan sa lapriyer, lerwa ti dir sa lo son bann sitwayen: “Sakenn i konn son fleo ek son soufrans . . . Ou [Zeova, ou] devret pardonn li e donn sakenn dapre son aksyon.”—2 Kron. 6:29, 30.

17, 18. Ki soufrans serten serviter Zeova in bezwen fer fas avek e kwa ki’n ed zot pour andire?

¹⁷ I kapab ki nou pe soufer akoz lefe en keksoz ki nou’n fer dan lepase. Mary,d en Temwen Zeova dan son trantenn lannen ti ekrir: “Mon annan tou rezon pour mwan ere, me souvan ler mon mazin lepase, mon santi laont ek repinyans. Apre sa, mon sagren e mon tant pour plere konmsi ou ava krwar tou sa la in pas yer. Bann move souvenir ki difisil oubliye i ankor fer mwan santi mwan koupab e ki mon pa vo nanryen.”

¹⁸ Bokou serviter Bondye i santi koumsa, me kwa ki kapab ed zot pour ganny sa lafors ki zot bezwen pour andire? Mary i dir: “Bann vre zanmi ek en fanmir spirityel i donn mwan sa lazwa aprezan. Mon osi esey konsantre lo promes ki Zeova in fer pour nou a lavenir e mon annan konfyans ki dan plas kriy o sekour, mon pou kriye avek lazwa.” (Ps. 126:5) Nou bezwen annan lafwa dan sa provizyon ki Bondye in fer pour donn son Garson, sa Dirizan ki i’n swazir. Konsernan li, Labib i predir: “I pou pran lapenn pour sa dernyen dimoun ek sa enn pov, e i pou sov lavi bann ki pov. I pou liber zot avek vyolans ek dominasyon kriyel, e zot disan pou presye dan son lizye.” (Ps. 72:13, 14) Eski pa sa i reasir nou!

En nouvo lemonn kot bokou keksoz pe esper nou

19, 20. (a) Parey Psonm 72 i montre, ki problenm dominasyon Rwayonm Bondye pou rezourd? (b) Lekel ki premyerman merit ganny laglwar pour dominasyon Kris e ki mannyer ou santi anver sa ki i pou akonplir?

¹⁹ Esey mazin ankor en kou lavenir ki bann imen ki drwat pou gannyen dan nouvo lemonn anba dominasyon sa pli Gran Salomon. Nou’n ganny promet: “Legren pou annabondans lo later, I pou annan en kantite anler lo latet montanny.” (Ps. 72:16) Vi ki labitid lagrenn pa pouse anler lo latet montanny, sa parol pe montre ki degre prodiktif later pou ete. Son fri “pou parey bann fri an Liban,” en rezyon kot bann fri ti pous annabondans dan letan renny Salomon. Zis mazinen! Pou nepli annan mankman manze, malnitrisyon e personn pa pou mor lafen! Tou dimoun pou apresye ‘en festen avek nouritir an lwil.’—Iza. 25:6-8; 35:1, 2.

²⁰ Lekel ki merit ganny laglwar pour tou sa bann benediksyon? Sa laglwar i premyerman al pour sa Lerwa Eternel ek Dirizan iniversel, setadir, Zeova nou Bondye. Anfet, sa letan, nou tou nou pou zwenn nou lavwa ansanm dan lazwa pour sant lafen sa kantik tousan: “Ki son non [setadir, non Lerwa Zezi Kri] i reste pour en letan endefini; ki son non i propaze devan soley, e atraver li zot ganny beni; ki tou nasyon i proklanmen ki i ere. Ki Zeova, Bondye Izrael i ganny beni, ki zis li tousel ki pe fer sa bann travay merveye. E ki son non glorye i ganny beni pour en letan endefini, e ki son laglwar i ranpli later antye. Amenn e Amenn.”—Ps. 72:17-19.

[Not anba lo paz]

Ki ou pou reponn?

• Psonm 72 i profetiz e donn en avangou konsernan kwa?

• Lekel sa pli Gran Salomon e ziska ki degre son dominasyon pou ete?

• Ki ou vwar pli atiran dan sa bann benediksyon ki ganny predir dan Psonm 72?

[Portre lo paz 28]

Ki sa prosperite anba renny Salomon ti pe reprezante?

[Portre lo paz 31]

I vo lapenn fer bokou zefor pour ganny sa lavi dan Paradi anba dominasyon sa pli Gran Salomon