Parol Zeova i vivan

SAMARI, kapital sa dis tribi dan rwayonm Izrael ti’n fini deza ganny devaste par pouvwar mondyal Lasiri. I ti fer osi en bann letan depi ki Lasiri ti en menas pour Zida. Profet Naoum ki sorti Zida ti annan en mesaz pour Niniv, kapital Lasiri. Sa mesaz i trouve dan liv Naoum ki ti ganny ekrir avan 632 A.N.L.

Sa lot pouvwar ki ti pou leve ti lanpir Babilonn, annandeler i ti ganny dirize par bann lerwa Kaldeen. Liv Abakouk ki ti’n petet fini ganny ekrir an 628 A.N.L., ti predir ki mannyer Zeova ti pou servi sa pouvwar konman son zouti pour egzekit son zizman e sa ki ti pou arive finalman avek Babilonn.

Profet Tsefanya ki ti sorti Zida ti profetiz avan Naoum ek Abakouk. Tsefanya ti konmans profetiz 40 an avan destriksyon Zerizalenm an 607 A.N.L., i ti anons anmenmtan en mesaz destriksyon e en mesaz lespwar pour Zida. Dan liv Tsefanya i osi annan bann mesaz kont lezot nasyon.

“MALER POUR SA LAVIL KI TOUY DIMOUN”

(Naoum 1:1–3:19)

“Sa deklarasyon kont Niniv” i sorti kot Zeova, sa enn ki “pa ankoler vitman e i annan gran pwisans.” Menm si Zeova i “en landrwa proteksyon dan letan ladetres” pour sa bann ki pe rod refiz dan li, sa pa leka pour Niniv, i pou ganny detrir.—Naoum 1:1, 3, 7.

“San manke, Zeova pou rasanble lafyerte Zakob ansanm.” Parey ‘en lyon ki desir par morso,’ Lasiri in met pep Bondye dan lafreyer. Zeova “pou fer flanbe saret lager [Niniv] dan lafimen. E lepe pou devor [son] bann zenn lyon.” (Naoum 2:2, 12, 13) “Maler sa lavil ki touy dimoun” setadir Niniv. “Tou sa bann ki pou tann koz lo [li] pou bat lanmen” e zot pou zwaye.—Naoum 3:1, 19.

Larepons pour bann kestyon lo Labib:

1:9—Ki “destriksyon konplet” Niniv pou vedir pour Zida? Sa i vedir ki zot pou ganny en soulazman permanan avek zot difikilte koze par Lasiri; “ladetres pa pou rekonmans en dezyenm fwa.” Naoum ti koz lo Niniv konmsi i ti nepli egziste ler i ti dir: “Get lipye sa enn ki pe anmenn bon nouvel lo bann montanny, sa enn ki pe anons lape. O Zida, selebre ou bann lafet.”—Naoum 1:15.

2:6—Ki sa “bann baro larivyer” ki ti ganny ouver? Sa bann baro ti aplik avek sa bann trou ki ti ganny fer dan miray Niniv par delo ki sorti Larivyer Tig. Dan lannen 632 A.N.L. kan larme Babilonn ek Med ki ti’n zwenn ansanm ti atak Niniv, i pa ti santi li anba okenn menas. An sekirite deryer son bann gran miray, Niniv ti mazinen ki i ti enposib pour antre dan son lavil. Me en gro lapli ti fer larivyer Tig deborde. Dapre en istoryen Diodorus, sa lapli “ti inond en porsyon lavil e osi kas en bon bout miray.” Alors bann baro larivyer ti ouver e parey ti ganny predir, Niniv ti ganny kaptire avek en lavites parey ler en dife i devor lapay sek.—Naoum 1:8-10.

3:4—Ki mannyer Niniv ti parey en prostitye? Niniv ti tronp bann nasyon par promet zot son lanmitye ek led, me an realite i ti fer zot anmenn fardo akoz son labi pouvwar. Par egzanp, Lasiri ti ed Lerwa Aaz kont konplo Siri ek Izrael. Me finalman “lerwa Lasiri ti al lager avek [Aaz] e fer li sibir ladetres.”—2 Kronik 28:20.

Leson pour nou:

1:2-6. Vanzans Zeova lo son bann lennmi ki refize donn li tou zot devosyon, i montre ki i ekspekte son bann adorater pour donn li tou zot devosyon.—Egzod 20:5.

1:10. Sa bann gran miray avek plizyer santenn latour pa ti anpes Zeova pour akonplir son parol kont Niniv. Bann lennmi Zeova dan nou letan pa pou kapab sap move konsekans zizman Zeova.—Proverb 2:22; Danyel 2:44.

‘SA ENN KI DRWAT POU KONTINYEN VIV’

(Abakouk 1:1–3:19)

Sa de premye sapit dan liv Abakouk i en konversasyon ant profet Abakouk avek Zeova. Akoz son sagrinasyon lo sa ki ti pe arive Zida, Abakouk ti demann avek Bondye: “Akoz ou fer mwan vwar sa ki fer mal, e ou kontinyen get zis problenm menm?” An repons Zeova ti dir: “Mon pou servi bann Kaldeen, sa nasyon vreman feros e sovaz.” Profet Abakouk ti etonnen ki Bondye ti pou servi “bann tret” pour pini Zida. (Abakouk 1:3, 6, 13) Abakouk ti asire ki sa enn ki drwat pou kontinyen viv, me bann lennmi pa pou kapab sap pinisyon. Deplis, Abakouk ti ekrir senk maler ki ti pou arive avek bann Kaldeen ki ti bann lennmi.—Abakouk 2:4.

Dan en lapriyer pour demann mizerikord, Abakouk ti rakonte avek profon sagrinasyon fason ki Zeova ti demontre son pwisans ekstraordiner dan lepase parey kot Lanmer Rouz, dan dezer e Zeriko. Sa profet ti osi dir ki sa zour setadir zour Armagedon kot Zeova pou tir son lakoler pe aprose. Sa lapriyer ti termin par sa bann parol: “Souvren Senyer Zeova i mon lafors; e i pou fer mon lipye vin parey lipye bann femel serf e lo mon bann oter i pou fer mwan marse.”—Abakouk 3:1, 19.

Larepons pour bann kestyon lo Labib:

1:5, 6—Akoz i ti paret difisil pour bann Zwif krwar ki bann Kaldeen ti pou kapab atak Zerizalenm? Letan profet Abakouk ti konmans profetize, Lezip ti deza annan en gran lenfliyans lo Zida. (2 Lerwa 23:29, 30, 34) Menm si bann Babilonnyen ti pe vin pli for, zot larme pa ti ankor defet Faraon Neko. (Zeremi 46:2) Deplis, tanp Zeova ti Zerizalenm e bann lerwa desandans David ti pe kontinyen rennyen ziska prezan. Pour bann Zwif dan sa letan “proze” Bondye pour les bann Kaldeen detrir Zerizalenm ti paret enposib. I vre ki zot ti vwar li enposib pour krwar parol Abakouk, me sa vizyon konsernan destriksyon Zerizalenm par bann Babilonnyen ‘ti sirman arive’ dan lannen 607 A.N.L.—Abakouk 2:3.

2:5—Lekel sa “zonm kosto,” e akoz “i pa pou akonplir son lobzektif”? Bann Babilonnyen ki ti servi zot talan militer pour konkerir bann nasyon ti ganny reprezante par sa “zonm kosto.” Laviktwar ki i ti’n eksperyanse ti fer li vin parey en dimoun ki’n vin sou avek diven. Me i pa ti reisi rasanble tou bann nasyon pour li menm akoz Zeova ti servi bann Med ek bann Pers pour fer li tonbe. Sa “zonm” dan nou letan i konpoze avek bann pouvwar politik. Li osi i’n vin sou akoz en tro gran konfyans dan son lekor, akoz larogans e akoz son vorasite pour agrandi son teritwar. Me i pa arive akonplir son lobzektif pour “rasanble tou bann nasyon pour li menm.” Zis Rwayonm Bondye ki kapab ini limanite.—Matye 6:9, 10.

Leson pour nou:

1:1-4; 1:12–2:1. Abakouk ti demann bann kestyon senser e Zeova ti reponn li. Sa vre Bondye i ekout lapriyer son bann serviter fidel.

2:1. Parey Abakouk, nou devret reste spirityelman eveye e aktif dan servis Zeova. Nou devret osi pare pour aziste nou fason panse anver okenn “reprimann” oubyen disiplin ki nou kapab resevwar.

2:3; 3:16. Anmezir ki nou pe esper avek lafwa pour ki sa zour Zeova i arive, annou gard antet ki letan i kourt.

2:4. Pour sirviv sa zour zizman Zeova ki pe vini, nou bezwen andire par reste fidel.—Ebre 10:36-38.

2:6, 7, 9, 12, 15, 19. Maler pou definitivman ariv lo sa enn ki oule ganny touzour plis bann byen malaki, ki kontan vyolans, ki komet limoralite, oubyen ki pratik idolatri. Nou devret veye pour evit sa bann move lenfliyans ek pratik.

2:11. Si nou aret dir ki sa lemonn i mesan, “en ros avek en ton lavwa tris pou kriye.” I enportan ki nou kontinyen pres sa bon nouvel lo Rwayonm avek kouraz!

3:6. Napa nanryen ki pou kapab anpes Zeova egzekit son zizman, ni menm bann lorganizasyon imen ki’n paret toultan la parey bann montanny.

3:13. Nou annan sa lasirans ki sa destriksyon zour Armagedon pa pou ariv lo nenport ki dimoun. Zeova pou sov son bann serviter fidel.

3:17-19. Menm si nou kapab pas atraver difikilte avan e pandan Armagedon, nou kapab annan konfyans ki Zeova pou donn nou “lafors” anmezir ki nou kontinyen servi li avek lazwa.

“ZOUR ZEOVA I PROS”

(Tsefanya 1:1–3:20)

Zida ti’n ganny anvair par ladorasyon Baal. Atraver profet Tsefanya Zeova ti dir: “Mon pou anvoy mon lanmen kont Zida e kont tou bann zabitan Zerizalenm.” Tsefanya i averti ki: “Zour Zeova i pros.” (Tsefanya 1:4, 7, 14) Zis sa bann ki pe fer sa ki Bondye i demande ki pou ganny “kasyet” sa zour Zeova.—Tsefanya 2:3.

“Maler pour . . . sa lavil dominer,” Zerizalenm! “‘Kontinyen espekte mwan,’ se sa ki Zeova i anonse, ‘ziska zour mon leve pour fer ravaz, akoz mon zizman se pour reini bann nasyon . . . pour devers lo zot mon lakoler brilan.’” Me Bondye ti promet: “Mon pou fer zot vin renonmen e vin en louanz parmi tou bann pep lo later, ler mon rasanble zot bann prizonnyen devan zot lizye.”—Tsefanya 3:1, 8, 20.

Larepons pour bann kestyon lo Labib:

2:13, 14—Ki “lavwa” ki zot pou tande dan lavil Niniv ki’n ganny konpletman detrir? Vi ki Niniv ti pou vin en landrwa pour bann zannimo sovaz ek bann zwazo, sa lavwa ki pou kontinyen sante pe refer avek sanson zwazo e petet tapaz divan ki pas atraver lafnet bann lakaz oubyen batiman vid.

3:9—Ki sa “langaz pir” e ki mannyer i ganny koze? I sa laverite lo Bondye ki ganny trouve dan son Parol, Labib. Sa i enkli tou bann lansennyman Labib. Nou koz sa lalang pir ler nou krwar sa laverite, byen ansenny li avek lezot e par viv en armoni avek lavolonte Bondye.

Leson pour nou:

1:8. Dan letan Tsefanya serten ti aparaman rod laprouvasyon bann nasyon dan zalantour par “met resanz etranze.” Pa i ti pou bet pour bann adorater Zeova ozordi swiv sa lemonn par fer menm keksoz!

1:12; 3:5, 16. Zeova ti kontinyen anvoy son bann profet pour averti son pep konsernan son zizman. I ti fer li, menm si en kantite Zwif ti pe viv en lavi trankil, parey lanmar diven ki’n kaye dan fon en barik e pa ti pe fatig zot avek sa mesaz. Anmezir ki gran zour Zeova i aprose olye les lendiferans dimoun fer nou ‘bes lebra’ e perdi nou devouman, nou bezwen kontinyen pres sa mesaz konsernan Rwayonm san arete.

2:3. Zis Zeova ki kapab sov nou, zour son lakoler. Pour kontinyen ganny son laprouvasyon nou bezwen “rod Zeova” par etidye atantivman son Parol Labib; rod son gidans dan lapriyer e par vin pros avek li. Nou bezwen “rod ladrwatir” par viv en lavi ki moralman prop. E nou bezwen “rod limilite” par devlop en latitid kot nou pare pour abes nou e annan en latitid obeisan.

2:4-15; 3:1-5. Zour ki Zeova pou egzekit son zizman, bann Kretyen ki pretann pe reprezant li e tou bann nasyon ki’n fer soufer pep Bondye pou ganny menm pinisyon ki Zerizalenm ek bann nasyon dan son zalantour ti gannyen dan letan pase. (Revelasyon 16:14, 16; 18:4-8) San okenn lafreyer nou devret kontinyen anons zizman Bondye.

3:8, 9. Anmezir ki nou pe esper sa zour Zeova, nou pe prepar nou pour ganny sove par aprann koz sa “langaz pir” e par ‘kriy non Bondye’ par fer en dedikasyon personnel avek li. Nou osi servi Zeova “zepol kont zepol” ansanm avek son pep e “loue son non par nou labous” konman en kado.—Ebre 13:15.

“I pe vin byen vit”

Sa psalmis ti sante: “Dan ankor en ptigin letan, bann dimoun mesan pou nepli la; ou pou al get son landrwa e i pou nepli.” (Psonm 37:10) Kan nou reflesir lo sa ki ti’n ganny predir dan liv Naoum konsernan Niniv e konsernan Babilonn ek Zida dan liv Abakouk, nou napa okenn dout ki parol sa psalmis pou vin vre. Me konbyen letan nou bezwen espere ankor?

Tsefanya 1:14 i dir: “Gran zour Zeova i pros. I pros, e i pe vin byen vit.” Liv Tsefanya i osi montre nou ki mannyer nou kapab ganny kasyet sa zour e ki nou devret fer konmela menm pour prepar nou pour nou ganny sove. Vreman “parol Bondye i vivan e i annan pisans.”—Ebre 4:12.

[Portre lo paz 8]

Bann gran miray Niniv pa ti anpes profesi Naoum ganny akonpli