Matye i ganny envite pour swiv Zezi

Zezi i reste dan lavil Kapernaoum ki o bor Lanmer Galile pour detrwa zour apre ki i’n geri sa zonm ki ti paralize. Ankor enn fwa, en lafoul dimoun i vin kot li e i konmans ansenny zot. Anmezir ki i pe marse, i vwar Matye ki osi apel Levi pe asize kot lofis taks. Zezi i donn li en zoli lenvitasyon: “Vin mon disip.”​—Matye 9:9.

I tre probab ki Matye i deza familye avek bann lansennyman Zezi ek bann mirak ki i’n fer dan sa landrwa parey Pyer, Andre, Zak ek Zan. Zis parey zot, Matye i aksepte lenvitasyon Zezi deswit. Matye i dekrir sa dan son Levanzil. I dir: “Deswit i [Matye] ti leve e swiv” Zezi. (Matye 9:9) Alor, Matye i kit son travay konman en kolekter taks e i vin en disip Zezi.

Pli tar, Matye i fer en gran dinen kot li, petet pour demontre son lapresyasyon pour sa lenvitasyon spesyal ki Zezi in donn li. Lekel ankor ki ganny envite apard ki Zezi ek son bann disip? I osi annan en kantite lezot kolekter taks ki Matye ti travay avek avan. Zot anmas taks pour lotorite Romen ki bann Zwif pa kontan. Sa i enkli taks lo bann marsandiz ki antre dan pei e osi taks lo bann bato ki vin lo por oubyen lo bann ki anmenn marsandiz lo semen. Ki mannyer bann Zwif an zeneral i konsider sa bann kolekter taks? Bann dimoun i ay zot parski souvan zot demann plis larzan ki zot sipoze. Dan sa dinen, i osi annan bann dimoun ki “annan en move lavi.”​—Lik 7:37-39.

Bann Farizyen ki krwar ki zot sitan drwat devan Bondye i la osi. Ler zot vwar Zezi avek sa bann dimoun dan sa dinen, zot demann son bann disip: “Akoz zot ansenyan i manz avek bann kolekter taks ek dimoun ki annan en move lavi?” (Matye 9:11) Ler Zezi i tann zot, i dir: “Dimoun an bonn sante pa bezwen dokter, me bann ki malad ki bezwen dokter. Alor, al aprann ki sa i vedir: ‘Pa sakrifis ki mon oule, me konpasyon.’ Parski mon pa’n vin pour dimoun drwat me pour bann ki annan en move lavi.” (Matye 9:12, 13; Osea 6:6) Bann Farizyen pa senser ler zot apel Zezi, “ansenyan,” me toudmenm Zezi i kapab ansenny zot en keksoz konsernan sa ki byen.

Aparaman, Matye in envit bann kolekter taks ek bann ki annan en move lavi kot li pour zot kapab ekout Zezi e ganny gerizon spirityel, “parski i ti annan en kantite zot ki ti pe swiv li.” (Mark 2:15) Zezi i anvi ed zot ganny en bon relasyon avek Bondye. Kontrerman avek bann Farizyen, Zezi pa mepriz sa bann dimoun. I annan en kantite konpasyon ek pitye e dan en sans, i kapab vin en dokter spirityel pour tou bann ki malad spirityelman.

Zezi i demontre konpasyon anver bann kolekter taks ek bann ki annan en move lavi. I pa soutir sa ki mal me i annan pitye pour bann ki annan en move lavi ensi ki pour bann ki malad. Par egzanp, mazin ler Zezi ti tous sa zonm ki ti annan lalep akoz i ti annan konpasyon pour li e i ti dir li: “Mon oule ki ou vin pir, vin pir!” (Matye 8:3) Pa nou devret devlop menm konpasyon pour lezot e ed bann ki dan bezwen, sirtou bann dimoun ki bezwen ganny ede spirityelman?