Konman ou kapab okip en lakour?

 1. Akoz i kapab difisil pour okip en lakour ozordi?

“LEMONN pe sanze.” (1 Korentyen 7:31, NW) Sa bann parol ti ganny ekrir plis ki 1,900 an pase, e ozordi sa parol i vreman en realite! Bann keksoz pe sanze, espesyalman dan domenn lavi fanmiy. Sa ki ti ganny konsidere konman normal oubyen tradisyonnel 40 oubyen 50 an pase i pa akseptab ozordi. Se pour sa ki, pour reisi okip en lakour i kapab tre difisil. Sepandan, si ou swiv bann konsey Labib, ou pou kapab sirmont sa bann difikilte.

 2. Ki sitiasyon ekonomik ki kree difikilte pour en fanmiy?

² Denozour, bokou dimoun nepli satisfe pour zot viv en lavi senp, kot fanmiy i pli enportan. Lemonn komersyal i prodwir plis keksoz e servi piblisite pour donn piblik lanvi pour ganny sa bann keksoz. Plizyer milyon papa ek manman i konsakre bokou letan dan travay pour kapab aste sa ki zot anvi. Plizyer milyon lezot i lite toulezour zis pour ganny en pe manze. Zot pas bokou plis letan dan travay ki oparavan, petet annan de travay, zis pour kapab pey bann nesesite. Me i annan lezot ki ti pou kontan trouv en travay, vi ki mank lanplwa i en gro problenm. Wi, pour en fanmiy ozordi, lavi pa touzour fasil. Me bann prensip Labib i kapab ed zot pour fer zot mye dapre zot sitiasyon.

 3. Ki prensip zapot Pol ti eksplike, e ki mannyer sa prensip i kapab ed en dimoun reisi okip son lakour?

³ Zapot Pol ti rankontre bann difikilte ekonomik. Atraver sa bann sitiasyon, i ti aprann en bon leson. I ti eksplik sa dan son let ki i ti anvoy son zanmi Timote. Pol ti ekrir: “Annefe, nou pa’n vin avek nanryen dan lemonn e nou pa pou kapab anmenn nanryen avek nou. Alor si nou annan manze ek lenz sa i ase.” (1 Timote 6:7, 8) I vre, en fanmiy i bezwen plis ki zis manze ek lenz. I osi bezwen en landrwa pour reste. Bann zanfan i bezwen ledikasyon. I osi annan bann fre medikal ek lezot depans. Kantmenm sa, sa prensip ki Pol ti donnen i aplikab. Si nou kontant nou pour satisfer nou bezwen olye ki satisfer nou dezir, lavi pou pli fasil.

4, 5. Konman ki prevwayans e plàn davans i itil pour kapab okip en lakour?

⁴ En lot prensip ki itil i ganny trouve dan en legzanp ki Zezi ti donnen. I ti dir: “Lekel parmi zot ki bezwen fer en gran batiman, ki pa asize premyerman e estimen konbyen i pou koute, e war si i annan ase larzan pour fer sa travay?” (Lik 14:28) La, Zezi ti pe koz lo prevwayans, plàn davans. Nou ti vwar dan en sapit avan ki mannyer sa i ede kan en zenn koup pe pans pour zot marye. Apre maryaz, sa prensip i osi itil pour okip en lakour. Prevwayans dan sa domenn i enplik annan en bidze, e plàn davans pour servi bann resours ki disponib dan en pli bon fason. Dan sa fason en fanmiy i kapab kontrol bann depans, met larzan dekote pour aste bann keksoz neseser toulezour oubyen tou le semenn, e pa viv dan en fason ki an deor zot mwayen.

⁵ Dan serten pei, pour annan en tel bidze i kapab vedir reziste sa dezir pour pret larzan ki son lentere i o pour aste bann keksoz ki pa vreman neseser. Dan lezot pei, i kapab vedir annan en kontrol strik lo lafason ki kart kredi i ganny servi. (Proverb 22:7) I osi kapab enplik reziste sa dezir pour aste en keksoz en sel kou san mazinen si i neseser e ki son konsekans. Deplis, en bidze pou montre ki gaspiy larzan dan en fason egois dan zwe larzan, fimen, konsonm tro bokou lalkol, i afekte sitiasyon ekonomik en fanmiy, e i al kont bann prensip Labib.​—Proverb 23:20, 21, 29-35; Romen 6:19; Efezyen 5:3-5.

 6. Ki laverite dan Labib ki ed bann ki bezwen viv dan lanmizer?

⁶ Me pour bann ki oblize viv dan lanmizer, ki zot pou fer? Zot kapab ganny rekonforte pour konnen ki sa problenm ki egziste partou dan lemonn i zis tanporer. Dan sa nouvo lemonn ki pe aprose rapidman, Zeova pou elimin lanmizer ansanm avek tou lezot problenm ki afekte limanite. (Psonm 72:1, 12-16) Antretan, bann vre Kretyen, menm si zot mizer, zot pa dezespere totalman akoz zot annan lafwa dan promes Zeova: “Mon pa pou zanmen negliz ou, mon pa pou zanmen abandonn ou.” Alor, en Kretyen i kapab dir avek konfyans: “Senyer i mon sekour, mon pa per personn.” (Ebre 13:5, 6) Dan sa bann zour difisil, Zeova in soutenir son bann adorater dan bokou fason ler zot in viv dapre son bann prensip e met son Rwayonm premye dan zot lavi. (Matye 6:33) En gran kantite zot i kapab konfirm parol zapot Pol: “Mon aprann kontant mwan partou dan tou sirkonstans, kan mon annan an-tro ou kan mon lafen, dan labondans konman dan lamizer. Mon kapab fer fas avek tou par Kris ki donn mwan lafors.”​—Filipyen 4:12, 13.

 7. Ki parol Zezi ki si i ganny met an pratik i ede pour en lakour ganny byen okipe?

⁷ Ver lafen son minister lo later, Zezi ti dir: “Kontan ou prosen parey ou kontan ou prop lekor.” (Matye 22:39) I pli fasil pour okip en lakour kan sa konsey i ganny aplike dan fanmiy. Apre tou, lekel nou prosen ki pli pros avek nou e ki nou pli kontan? Eski pa i sa bann ki viv dan menm lakaz avek nou​—mari ek madanm, paran ek zanfan? Ki mannyer bann manm fanmiy i kapab demontre lanmour pour kanmarad?

 8. Ki mannyer lanmour i kapab ganny eksprimen dan fanmiy?

⁸ En fason se ki sak manm fanmiy i fer son par dan travay kot lakour. Alors, bann zanfan i bezwen aprann remet keksoz dan zot plas apre ki zot in servi, ki swa lenz oubyen zouzou. I kapab pran letan ek zefor pour aranz lili tou le bomaten, me i kontribye bokou pour en bon lord kot lakour. Byensir, nou pa kapab evite ki serten pti dezord tanporer i arive, me nou tou nou kapab donn lanmen pour gard lakour ase prop, osi byen ki pour netwaye apre repa. En latitid pares, egois, e napa lentere i annan en lefe negatif lo tou dimoun. (Proverb 26:14-16) De lot kote, en leta lespri zwaye e volonter i kontribye pour en lavi fanmiy ere. “Bondye i kontan sa ki donn avek lazwa.”​—2 Korentyen 9:7.

9, 10. (a) Ki fardo ki souvan repoz lo en madanm kot lakour, e konman ki lezot i kapab ede? (b) Ki pwennvi balanse konsernan louvraz lakour ki’n ganny sizere?

⁹ Konsiderasyon ek lanmour pou ede anpes en sitiasyon ki’n vin en problenm grav dan serten lakour. Tradisyonnelman, bann manman in en pilye kot lakour. Zot okip bann zanfan, netway lakaz, lav lenz, aste e kwi manze. Dan serten pei, souvan bann madanm i osi travay dan bitasyon, vann bann prodwi dan bazar, oubyen kontribye dan lezot fason pour bidze fanmiy. Menm kot sa pa ti leka oparavan, plizyer milyon madanm marye i oblize al rod travay an deor lakour. En madanm ki osi en manman ki travay dir dan sa bann diferan domenn i merit ganny felisite. Parey sa fanm debrouyer ki ganny dekrir dan Labib, i toultan okipe. “I pa manz dipen lapares.” (Proverb 31:10, 27) Me sa pa vedir ki selman madanm ki devret fer louvraz lakour. Apre ki en mari ek en madanm in travay tou lazournen an deor lakour, eski zis sa madanm tousel ki devret fer tou louvraz kot lakour pandan ki sa mari ek leres manm fanmiy i relaks? Sertennman non. (Vwar 2 Korentyen 8:13, 14.) Par egzanp, si sa manman pe al prepar repa, i pou apresye si lezot manm fanmiy i ede avek preparasyon, par egzanp aranz latab, fer konmisyon, oubyen netway lakaz en pti pe. Wi, tou dimoun i kapab partaz sa responsabilite.​—Vwar Galat 6:2.

¹⁰ Serten i kapab dir: “Kot mon reste i pa devwar en zonm pour fer sa bann keksoz.” Sa i kapab vre, me eski pa i pou byen pour reflesir en pe lo sa size? Kan Zeova Bondye ti kree fanmiy, i pa ti demande ki serten travay i ganny fer zis par bann madanm. En zour, kan sa zonm fidel, Abraam ti ganny vizite par bann mesaze spesyal sorti kot Zeova, i ti personnelman partisip dan preparasyon repa e servi sa bann viziter. (Zenez 18:1-8) Labib i donn sa konsey: “Bann zonm devre alor, kontan zot madanm parey zot kontan zot prop lekor.” (Efezyen 5:28) Si alafen lazournen, sa mari i fatige e i anvi repoze, eski pa i posib ki sa madanm osi i santi menm parey, petet menm plis ankor? (1 Pyer 3:7) Dan sa ka, eski pa i bon pour en mari ede kot lakour?​—Filipyen 2:3, 4.

11. Dan ki fason Zezi ti kit en bon legzanp pour sak manm fanmiy?

¹¹ Zezi i pli bon legzanp en dimoun ki ti fer plezir Zeova e ki ti anmenn lazwa pour son bann konpanyon. Kantmenm i pa ti zanmen marye, Zezi i en bon legzanp pour bann mari, osi byen ki pour bann madanm ek zanfan. I ti dir sa lo li menm: “Fis-de-Lonm pa’n vin pour ganny servi, me pour servi,” setadir, pour servi lezot. (Matye 20:28) Pa i agreab pour bann fanmiy ler tou manm i devlop sa latitid!

12. Ki Zeova i demann bann ki servi li?

¹² En lot prensip Labib ki kapab ede pour okip en lakour i ganny trouve dan 2 Korentyen 7:1, kot nou lir: “Annou pirifye nou avek tou sa ki sali lekor ek lespri.” Zeova, ki demann en ‘ladorasyon ki pir e san defo,’ i aksepte bann ki obeir sa parol enspire. (Zak 1:27) Sa i anmenn bokou byenfe pour en lakour.

13. Akoz i enportan pour gard en lakour prop?

¹³ Par egzanp, Labib i asir nou ki sa zour pou arive kot maladi pou nepli egziste. Dan sa letan, “okenn zabitan pa pou dir: ‘Mon malad.’” (Izai 33:24; Revelasyon 21:4, 5) An atandan, tou fanmiy i bezwen fer fas avek maladi tanzantan. Menm Pol ek Timote ti tonm malad. (Galat 4:13; 1 Timote 5:23) Sepandan, bann eksper medikal i dir ki en kantite maladi i kapab ganny anpese. Kan bann fanmiy i fer byen atansyon pour evit salte fizik e spirityel, sa i protez zot kont plizyer maladi. Annou vwar konman.​—Vwar Proverb 22:3.

14. Dan ki fason lapropte moral i kapab protez en fanmiy kont maladi?

¹⁴ Lapropte spirityel i enkli lapropte moral. Parey nou byen konnen, Labib i promot bann standar moral onivo e i kondann nenport kalite lentimite seksyel an deor maryaz. “Ni bann ki pratik bann akt imoral, . . . ni bann adilter, ni bann omoseksyel, . . . pa pou erit Rwayonm Bondye.” (1 Korentyen 6:9, 10) I tre enportan pour bann Kretyen ki pe viv dan sa lemonn degoutan ozordi pour obzerv sa bann standar onivo. An fezan sa, i fer plezir Bondye e osi ede pour protez lafanmiy kont bann maladi ki ganny transmet par sèks tel parey SIDA, sifilis, gonore, ek chlamydia.​—Proverb 7:10-23.

15. Donn en legzanp ki montre ki mank lapropte fizik i kapab koz en maladi ki ti’n kapab evite.

¹⁵ “Pirifye nou avek tou sa ki sali lekor ek lespri” i ede pour protez lafanmiy kont lezot maladi. Bokou maladi i arive akoz en mank lapropte fizik. En legzanp tipik se fimen. Lafimen sigaret pa zis sali poumon, lenz, ek ler me i osi fer dimoun malad. Plizyer milyon dimoun i mor sak lannen akoz zot fimen. Mazin en kou, sak lannen plizyer milyon dimoun pa ti pou’n tonm malad e mor avan ler si zot ti’n evite “sali zot lekor” avek sa salte!

16, 17. (a) Ki lalwa Zeova ti donnen ki ti protez bann Izraelit kont serten maladi? (b) Konman sa prensip par deryer Deterononm 23:12, 13 i kapab ganny aplike dan tou lakour?

¹⁶ Reflesir lo en lot legzanp. Apepre 3,500 an pase, Bondye ti donn nasyon Izrael son Lalwa pour organiz zot ladorasyon e dan en serten degre, zot lavi toulezour. Sa Lalwa ti ede pour protez sa nasyon kont maladi par etablir serten lareg debaz lo lizyenn. Enn sa lalwa ti annan pour fer avek eliminasyon malpropte imen, ki ti devret ganny byen antere lwen avek kan, afen ki sa landrwa kot dimoun i reste pa ti pou ganny kontaminen. (Deterononm 23:12, 13) Sa ansyen lalwa i ankor touzour en bon konsey. Menm ozordi dimoun i tonm malad e mor akoz zot pa swiv li.a

¹⁷ An akor avek prensip par deryer sa lalwa Izraelit, lasanmben ek kabinen​—ki swa i anndan oubyen an deor lakaz—​i devret ganny garde prop e dezenfekte. Si kabinen pa ganny garde prop e kouver, i pou atir bann mous e zot pou anmenn bann mikrob dan lezot landrwa dan lakaz​—e byensir lo nou manze! Deplis, zanfan ek adilt i devret lav lanmen apre ki zot in al dan kabinen. Sansan, zot sorti avek mikrob lo zot lapo. Dapre en dokter Franse, lav lanmen “i ankor en pli bon garanti pour prevansyon kont serten lenfeksyon dizestif, respiratwar, oubyen lapo.”

18, 19. Ki sizesyon nou kapab swiv pour gard en lakaz prop kantmenm nou pe viv dan en landrwa kot dimoun i mizer?

¹⁸ I vre, i pa touzour fasil pour gard lapropte dan bann landrwa kot dimoun i mizer. En dimoun ki konn sa byen ti eksplike: “Klima ki tre so i fer netwayaz vin pli difisil ankor. Divan i anmenn en ta lapousyer ki ranpli sak pti trou dan lakaz. . . . Popilasyon ki pe ogmante rapidman dan bann lavil, ensi ki dan serten rezyon lakanpanny, i osi kree danze pour lasante. Bann septitenk ki reste ouver, salte ki pa’n ganny ramase, bann kabinen piblik sal, bann lera, kankrela ek mous ki anmenn maladi i komen partou.”

¹⁹ Mentenir lapropte anba sa bann kondisyon koumsa i difisil. Me i vo lapenn fer sa zefor. Savon, delo ek en pti travay ekstra i pli bon marse ki latizann ek fre lopital. Si ou viv dan en tel lanvironnman, otan ki posib, gard ou lakaz ek zalantour prop e pa les malpropte zannimo ater. Si semen ki vin kot ou lakaz i ganny labou pandan letan lapli, eski ou kapab met makadanm oubyen beton pour ede anpes labou ganny dan lakaz? Eski zot kapab tir zot soulye oubyen savat ki zot in mars ladan deor avan zot antre anndan? Osi, ou devret veye ki ou sours delo pa ganny kontaminen. I’n ganny estimen ki apepre de milyon lanmor par an, i okazyonnen par delo sal ek move kondisyon lizyenn.

20. Lekel ki responsab pour lapropte en lakour?

²⁰ En lakour prop i depan lo tou dimoun​—manman, papa, zanfan, ek viziter. En manman wit zanfan Kenya ti dir: “Sakenn in aprann fer son par.” En lakour prop, e annord i anmenn en bon repitasyon pour fanmiy antye. En proverb Espanyol i dir: “Napa konfli ant lanmizer ek lapropte.” Ki swa en dimoun i reste dan en gran lakaz, en apartman, en lakaz senp, oubyen en pti lakaz an tol, lapropte i en keksoz vreman enportan pour en fanmiy viv pli an bonn sante.

21. An armoni avek Proverb 31:28, kwa ki ede pour anmenn boner dan en lakour?

²¹ Kan i pe koz lo sa fanm debrouyer, liv Proverb i dir: “Son bann garson in leve e in deklar li ere; son propriyeter i leve, e i loue li.” (Proverb 31:28) Ki dernyen fwa ou’n felisit en manm ou fanmiy? Vreman, nou parey bann fler ki devlope e fleri apre ki zot in ganny lapli. Dan nou ka, sa pti lapli ki nou bezwen i felisitasyon. I ed sa madanm pour konnen ki son mari i apresye son zefor ek swen ki i donnen avek lanmour. I osi fer sa madanm vwar ki son mari pa pran li pour nanryen ditou. (Proverb 15:23; 25:11) I osi agreab kan en madanm i felisit son mari pour travay ki i’n fer an deor e anndan lakour. Zanfan osi i fleri kan zot paran i felisit zot pour zefor ki zot fer kot lakour, kot lekol, oubyen dan kongregasyon Kretyen. Pa en pti gin rekonesans i fer en gran dibyen! Konbyen i koute pour dir: “Mersi”? Pa bokou. Me i annan en bon lefe lo moral en fanmiy.

22. Kwa ki neseser pour en fanmiy “ganny solidman etablir,” e ki mannyer sa i kapab arive?

²² Pour bokou rezon, i pa fasil pour okip en lakour. Kantmenm sa, i kapab ganny fer avek sikse. En proverb dan Labib i dir: “Par lasazes en lakour pou ganny batir, e par disernman i pou ganny solidman etablir.” (Proverb 24:3) Si tou manm fanmiy i esey aprann lavolonte Bondye e aplik li dan zot lavi, sa i kapab anmenn lasazes ek disernman. Sirman, en fanmiy ere i vo tou sa zefor!