Eski ou pe esper sa “lavil ki annan en fondasyon solid”?

 1. Ki bann sakrifis serten frer ek ser in fer e akoz zot in fer sa?

OZORDI, i annan plizyer milyon serviter Bondye ki’n fer bann sakrifis. Plizyer frer ek ser in swazir pour pa marye. Bann koup marye in swazir pour pa fer zanfan konmela. Serten fanmir in swazir pour viv en lavi senp. I annan en rezon enportan akoz zot in fer sa bann desizyon. Zot tou zot anvi fer tou sa ki zot kapab pour servi Zeova. Zot satisfe avek sa ki zot annan e zot annan konfyans ki Zeova pou donn zot tou sa ki zot bezwen. Eski zot pou dezapwente? Pa ditou! Akoz nou kapab asire? Parski dan lepase, Zeova ti donn son bann serviter tou sa ki zot ti bezwen. Par egzanp, Zeova ti beni Abraam, “papa tou sa bann ki annan lafwa.”​—Rom. 4:11.

 2. (a) Dapre Ebre 11:8-10, 16, akoz Abraam ti pare pour kit lavil Our? (b) Ki nou pou diskite dan sa lartik?

² Abraam ti annan en lavi konfortab dan lavil Our. Me i ti pare pour kit tousala deryer. Akoz? Parski i ti pe esper “en lavil ki annan en fondasyon solid.” (Lir Ebre 11:8-10, 16.) Ki sa “lavil” ki i ti pe espere? Ki bann problenm Abraam ti fer fas avek pandan ki i ti pe esper sa lavil ganny konstrir? Ki mannyer nou kapab swiv legzanp Abraam? Osi, ki mannyer nou kapab fer parey bann frer ek ser dan nou letan ki’n swiv legzanp Abraam?

 3. Ki sa lavil ki Abraam ti pe espere?

³ Sa lavil ki Abraam ti pe espere i Rwayonm Bondye. Zezi Kri ek 144,000 Kretyen swazir i bann dirizan dan sa Rwayonm. Pol i dir ki sa Rwayonm i “lavil sa Bondye vivan setadir Zerizalenm dan lesyel.” (Ebr. 12:22; Rev. 5:8-10; 14:1) Zezi ti ansenny son bann disip pour priye pour sa Rwayonm vini, pour ki lavolonte Bondye i kapab ganny fer lo later parey dan lesyel.​—Mat. 6:10.

 4. Dapre Zenez 17:1, 2, 6, ki Abraam ti konnen konsernan sa lavil oubyen Rwayonm ki Bondye ti’n promet?

⁴ Eski Abraam ti konnen ki mannyer Rwayonm Bondye ti pou ganny organize? Non. Pour plizyer santenn lannen, sa lenformasyon ti en “sen sekre.” (Efe. 1:8-10; Kol. 1:26, 27) Me Abraam ti konnen ki serten son desandans ti pou vin lerwa parski Zeova ti’n fer sa promes avek li. (Lir Zenez 17:1, 2, 6.) Abraam ti sitan annan lafwa dan bann promes Bondye ki i ti konmsi i ti vwar Mesi, sa enn ki ti pou vin Lerwa dan Rwayonm Bondye. I pour sa rezon ki Zezi ti dir bann Zwif dan son letan: “Zot papa Abraam ti telman anvi vwar sa letan kot mon ti pou vini e i ti rezoui ler i ti pe reflesir lo la.” (Zan 8:56) Alor, i kler ki Abraam ti konnen ki serten son desandans ti pou form parti en Rwayonm ki ti pou ganny etablir par Zeova e i ti pare pour espere ziska ki Zeova i akonpli son promes.

 5. Ki mannyer nou konnen ki Abraam ti pe esper sa lavil ki son arsitek i Bondye?

⁵ Ki mannyer Abraam ti montre ki i ti pe esper sa lavil oubyen Rwayonm, ki son arsitek i Bondye? Premyerman, Abraam pa ti vin sitwayen okenn rwayonm lo later. Menm si i ti al diferan landrwa, i pa ti zanmen etabli li dan en landrwa e i pa ti siport okenn lerwa imen. Osi, Abraam pa ti esey fer son prop rwayonm. O kontrer, i ti kontinyen obei Zeova e i ti espere ziska ki Zeova i akonpli Son promes. Par fer sa, i ti montre ki i ti annan en gran lafwa dan Zeova. Aprezan, annou diskit lo serten problenm ki Abraam ti fer fas avek e nou pou vwar ki nou kapab aprann avek son legzanp.

 6. Ki mannyer lavil Our ti ete?

⁶ Abraam ti kit lavil Our, en lavil ki ti konfortab e byen ganny proteze kot bann dimoun ti ris e byen edike. Sa lavil ti ganny proteze par en gran miray e i ti annan en gran rigol ranpli avek delo lo trwa kote sa lavil. Bann dimoun laba ti konn ekri e konte. I paret ki bokou dimoun ti fer biznes dan sa lavil parski bann arkeolog in trouv bann dokiman ki ti ganny servi dan bann tranzaksyon. Bann lakaz ti ganny fer avek blok, zot bann miray ti’n byen krepi e zot ti ganny penn blan. Serten sa bann lakaz ti annan 13 oubyen 14 lasanm avek en lakour dan milye lakaz.

 7. Akoz Abraam ti bezwen annan konfyans ki Zeova ti pou protez li ek son fanmir?

⁷ Abraam ti bezwen annan konfyans ki Zeova ti pou protez li ek son fanmir. Akoz? Rapel ki Abraam ek Sara ti kit zot lakour dan lavil Our kot zot ti konfortab e an sekirite, pour zot al viv anba latant dan lakanpanny Kanaan. I ti nepli annan bann gran miray ek rigol pour protez li ek son fanmir. Aprezan, zot bann lennmi ti kapab fasilman atak zot.

 8. Ki ti arive avek Abraam?

⁸ Abraam ti fer sa ki Bondye ti’n demann li pour fer me kantmenm sa i ti annan en letan kot i ti napa ase manze pour donn son fanmir. I ti annan en gran lafamin dan sa pei kot Zeova ti’n dir li ale. Akoz sa, Abraam ti deside pour anmenn son fanmir Lezip pour en pe letan. Me ler i ti Lezip, Faraon ki ti lerwa sa pei, ti pran son madanm. Nou kapab mazinen ki pandan sa letan Abraam ti vreman enkyet e i ti vreman soulaze ler Zeova ti persyad Faraon pour fer Sara retourn kot li.​—Zen. 12:10-19.

 9. Ki problenm ti annan dan fanmir Abraam?

⁹ I ti osi annan problenm dan fanmir Abraam. Sara, son madanm ki i ti vreman kontan, pa ti kapab fer zanfan. Pour plizyer lannen, zot ti vreman sagren akoz sa. En zour, Sara ti donn Abraam son servant ki ti apel Agar, pour Abraam fer zanfan avek li e sa zanfan ti pou vin pour Abraam ek Sara. Me ler Agar ti ansent pour ganny Ismael, i ti konmans ay Sara. Sa sityasyon ti vin sitan difisil ki Sara ti fer problenm avek Agar e Agar ti ale.​—Zen. 16:1-6.

10. Ki ti arive avek Ismael ek Izaak ki ti’n kapab fer li difisil pour Abraam annan konfyans dan Zeova?

¹⁰ Finalman, Sara ti ansent e i ti ganny en garson ki Abraam ti apel Izaak. Abraam ti kontan son de garson. Me vi ki Ismael pa ti tret Izaak byen, Abraam ti bezwen fer Ismael ek Agar ale. (Zen. 21:9-14) Plizyer lannen pli tar, Zeova ti demann Abraam pour ofer Izaak konman en sakrifis. (Zen. 22:1, 2; Ebr. 11:17-19) Tou le de fwa, Abraam ti bezwen annan konfyans ki Zeova ti pou gard son promes konsernan son bann garson.

11. Akoz Abraam ti bezwen esper avek pasyans pour Zeova akonpli son promes?

¹¹ Pandan sa letan, Abraam ti bezwen aprann esper avek pasyans pour Zeova akonpli son promes. I tre probab ki i ti annan plis ki 70 an ler i ti kit lavil Our ansanm avek son fanmir. (Zen. 11:31–12:4) Pour apepre san-t-an, i ti reste anba latant dan diferan landrwa dan pei Kanaan. Abraam ti mor a laz 175 an. (Zen. 25:7) Me i pa ti vwar lakonplisman promes Zeova pour donn son desandans sa pei ki Zeova ti’n promet. Osi, i pa ti vwar sa lavil, setadir Rwayonm Bondye ganny etablir. Kantmenm sa, Labib i dir ki Abraam ti mor “en bon pti laz, vye e satisfe.” (Zen. 25:8, NWT) Menm si Abraam ti fer fas avek en kantite problenm, son lafwa ti reste for e i ti pare pour esper Zeova akonpli son promes. Akoz i ti kapab andire? Parski tou dilon lavi Abraam, Zeova ti protez li e tret li konman en zanmi.​—Zen. 15:1; Iza. 41:8; Zak 2:22, 23.

12. Ki nou pe espere e ki nou pou diskit lo la?

¹² Parey Abraam, nou pe esper sa lavil ki annan en fondasyon solid. Par kont, nou pa pe esper sa lavil ganny konstrir parski Rwayonm Bondye ti ganny etablir an 1914 e i deza pe diriz lesyel antye. (Rev. 12:7-10) Nou, nou pe espere ziska ki sa Rwayonm i diriz later antye. Anmezir ki nou espere, nou bezwen fer fas avek bann menm sityasyon ki Abraam ek Sara ti pas ladan. Plizyer serviter Zeova ozordi in swiv legzanp Abraam. Bann biografi ki dan bann Latour Veyer, i montre ki plizyer serviter Zeova ozordi in demontre lafwa ek pasyans. Annou diskit lo detrwa sa bann leksperyans e vwar ki nou kapab aprann.

13. Ki ou kapab aprann avek leksperyans Frer Walden?

¹³ Ou bezwen pare pour fer sakrifis. Si nou anvi met Rwayonm Bondye premye dan nou lavi, nou bezwen swiv legzanp Abraam ki ti pare pour fer bann sakrifis ki fer plezir Bondye. (Mat. 6:33; Mark 10:28-30) Annou vwar legzanp en frer ki apel Bill Walden.b An 1942, ler Bill ti pros pour ganny son degre dan architectural engineering dan en liniversite Leta-z-ini, i ti konmans etidye Labib avek Temwen Zeova. Enn son bann profeser ti’n fer laranzman pour Bill ganny en louvraz ler i fini liniversite me Bill ti refize. I ti eksplik son profeser ki olye aksepte en travay ki pey byen, in deside pour servi Bondye a plen tan. Pa bokou letan apre, gouvernman ti dir Bill ki i devret zwenn larme. Avek respe, Bill ti refize e akoz sa i ti bezwen pey en lanmann 10,000 dolar e fer senk an prizon. I ti ganny large prizon apre trwa-z-an. Pli tar, i ti ganny envite Lekol Gilead e apre i ti al servi konman en misyonner Lafrik. Bill ti marye avek Eva e zot ti al servi Lafrik, ki vedir zot ti bezwen fer bann sakrifis. Apre plizyer lannen, zot ti retourn Leta-z-ini pour pran swen avek manman Bill. Bill i dir: “Ler mon mazin sa gran loner ki mon’n annan pour servi Zeova pour plis ki 70 an, mon vreman kontan e mon rekonesan. Tanzantan mon remersye Zeova parski i’n gid mwan pour mwan kapab donn mon lavi pour servi li.” Eski ou osi ou kapab pran servis a plen tan?

14-15. Ki ou aprann avek leksperyans Frer ek Ser Apostolidis?

¹⁴ Pa ekspekte ki ou lavi pou san problenm. Atraver legzanp Abraam nou aprann ki menm bann dimoun ki’n servi Zeova tou zot lavi in fer fas avek problenm. (Zak 1:2; 1 Pyer 5:9) Sanmenm ki ti arive avek en frer ki apel Aristotelis Apostolidis.c I ti batize an 1946, Lagres. An 1952, i ti fiyanse avek en ser ki apel Eleni, ki ti annan menm lobzektif avek li. Malerezman, Eleni ti tonm malad e dokter ti dir ki i annan en timer dan son laservel. Dokter ti tir sa timer e Eleni ek Aristotelis ti marye. Me detrwa lannen pli tar, sa timer ti retournen. Bann dokter ti fer en lot loperasyon me sa ti fer Eleni en pe paralize e i pa ti kapab koz byen. Menm si Eleni ti malad e gouvernman ti persekit Temwen Zeova sa letan, Eleni ti kontinyen reste devoue dan predikasyon.

¹⁵ Pour plis ki 30 an, Frer Apostolidis in pran swen avek son madanm. Pandan sa bann lannen, i’n servi konman ansyen, servi lo konmite lasanble e ede pour konstri en Lasal Lasanble. An 1987, Eleni ti ganny dimal ler i ti dan predikasyon. Pour trwa-z-an, Eleni in dan en koma e apre i ti mor. Ver lafen son biografi, Frer Apostolidis i dir: “Pandan sa bann lannen, mon’n fer fas avek bokou problenm e serten ladan in arive san ekspekte. Mon ti bezwen determinen pour andire e pa les nanryen dekouraz mwan. Dan tou sa bann moman, Zeova in toultan donn mwan lafors pour sirmont sa bann problenm.” (Ps. 94:18, 19) Zeova i vreman kontan son bann serviter ki fer tou sa ki zot kapab pour li menm si zot fer fas avek bokou problenm.

16. Ki bon konsey Frer Knorr ti donn son madanm?

¹⁶ Kontinyen mazin lavenir. Abraam ti konsantre lo rekonpans ki Zeova ti pou donn li dan lavenir e sa ti ed li pour sirmont son bann problenm. Zis parey Abraam, Ser Audrey Hyde ti kontinyen mazin lespwar ki i ti annan pour lavenir. Son premye msye, Frer Nathan Knorr ti mor avek kanser e son dezyenm msye Frer Glenn Hyde ti ganny maladi Alzheimer.d Ser Hyde i dir ki i annan en keksoz ki son premye msye ti dir li zis detrwa semenn avan i mor, ki ti ed li andir son bann problenm avek lazwa. Ser Hyde i dir: “Nathan ti dir mwan: ‘Apre ki nou mor, nou lespwar i asire e nou pa pou zanmen soufer ankor.’ I ti osi dir: ‘Mazin lavenir parski ou rekonpans pe vini.’. . . Apre i ti osi azoute: ‘Reste okipe, esey servi ou lavi pour ed lezot. Sa pou ed ou reste zwaye.’” Sa i en bon konsey. Nou bezwen reste okipe, kontinyen fer bann bon keksoz pour lezot e ‘rezoui akoz nou lespwar’!​—Rom. 12:12.

17. (a) Akoz nou annan bon rezon pour mazin lavenir? (b) Ki mannyer sa konsey dan Mika 7:7 i kapab ed nou pour ganny bann benediksyon a lavenir?

¹⁷ Ozordi, nou annan plis rezon pour mazin lavenir. Bann keksoz ki pe arive dan lemonn i montre ki nou pe viv dan bann dernyen zour, bann dernyen zour sa lemonn. Byento, nou pa pou bezwen espere ziska ki Rwayonm Bondye i diriz later antye. Parmi bann benediksyon ki nou pou gannyen, i sa lazwa pour vwar bann dimoun ki nou kontan resisite. Sa letan, Zeova pou rekonpans Abraam pour son lafwa ek pasyans. Zeova pou resisit Abraam ek son fanmir pour zot viv lo later. Eski ou pou la pour akeyir zot? Ou kapab la ou osi, si parey Abraam, ou pare pour fer sakrifis pour Rwayonm Bondye, si ou kontinyen annan en lafwa for malgre problenm e si ou aprann pour esper Zeova avek pasyans.​—Lir Mika 7:7.