Mateo
1 I juñilel i ñojteʼelob Jesucristo,* i yalobil* David, i yalobil Abrahán.
2 Abrahán i tatʌch Isaac,
Isaac i tatʌch Jacob,
Jacob i tatʌch Judá yicʼot i yerañob,
3 Judá i tatʌch Pérez yicʼot Zérah (i ñaʼ jiñʌch Tamar),
Pérez i tatʌch Hezrón,
Hezrón i tatʌch Ram,
4 Ram i tatʌch Aminadab,
Aminadab i tatʌch Nahsón,
Nahsón i tatʌch Salmón,
5 Salmón i tatʌch Boaz (i ñaʼ jiñʌch Rahab),
Boaz i tatʌch Obed (i ñaʼ jiñʌch Rut),
Obed i tatʌch Jesé,
6 Jesé i tatʌch jiñi rey David.
David i tatʌch Salomón (i ñaʼ jiñʌch i yijñam Urías),
7 Salomón i tatʌch Rehoboam,
Rehoboam i tatʌch Abías,
Abías i tatʌch Asá,
8 Asá i tatʌch Jehosafat,
Jehosafat i tatʌch Jehoram,
Jehoram i tatʌch Uzías,
9 Uzías i tatʌch Jotán,
Jotán i tatʌch Acaz,
Acaz i tatʌch Ezequías,
10 Ezequías i tatʌch Manasés,
Manasés i tatʌch Amón,
Amón i tatʌch Josías,
11 Josías tsaʼ sujti tiʼ tat Jeconías yicʼot i yerañob cheʼ bʌ tsʼitaʼ jax yom chaʼan miʼ pʌjyelob majlel ti Babilonia.
12 Cheʼ bʌ yaʼañob ti Babilonia, Jeconías tsaʼ sujti tiʼ tat Sealtiel,
Sealtiel i tatʌch Zorobabel,
13 Zorobabel i tatʌch Abiud,
Abiud i tatʌch Eliaquim,
Eliaquim i tatʌch Azor,
14 Azor i tatʌch Sadoc,
Sadoc i tatʌch Aquim,
Aquim i tatʌch Eliud,
15 Eliud i tatʌch Eleazar,
Eleazar i tatʌch Mattán,
Mattán i tatʌch Jacob,
16 Jacob i tatʌch José, i ñoxiʼal María, yaʼ baqui tsaʼ tili Jesús, cʌmbil bʌ bajcheʼ Cristo.
17 Cheʼ mi lac tsic tiʼ pejtelel jiñi familia, ti Abrahán cʼʌlʌl tiʼ yorajlel David an 14 familia, tiʼ yorajlel David cʼʌlʌl cheʼ tsaʼ pʌjyiyob majlel ti Babilonia an 14 familia, i cheʼ tsaʼ pʌjyiyob majlel ti Babilonia cʼʌlʌl tiʼ yorajlel Cristo an 14 familia.
18 Cheʼʌch tsiʼ yila pañimil Jesucristo bajcheʼ iliyi: María, jiñi i ñaʼ, cʼajtibilix chaʼan miʼ ñujpuñel yicʼot José, pero jiñi chʼujul bʌ espíritu* tsiʼ yʌqʼue i cʌntan i yalobil cheʼ bʌ maxto tem chumulobic. 19 José, jiñi i ñoxiʼal, juntiquilʌch toj bʌ wiñic i mach yomic i yʌcʼ ti quisin María tiʼ wut lac piʼʌlob. Jin chaʼan, tsiʼ ñaʼta i mucu chaʼlen i bʌ ti divorciar tiʼ tojlel. 20 Pero cheʼ bʌ tsaʼix i ñaʼta ili, ¡laʼ wilan!, jiñi i yángel Jehová* tsiʼ pʌsʌ i bʌ tiʼ ñajal i tiʼ sube: «José, i yalobilet bʌ David, mach a bʌcʼñan a pʌy majlel María ti a wotot come jiñi chʼujul bʌ espíritu jiñʌch tsaʼ bʌ i yʌqʼue i cʌntan jiñi alʌl. 21 Mi caj i yʌcʼ ti pañimil juntiquil alʌ chʼiton i yom maʼ wotsʌben i cʼabaʼ Jesús* come jin mi caj i coltan* loqʼuel ti mulil jiñi i tejclum». 22 Tsaʼ ujti pejtelel iliyi chaʼan miʼ tsʼʌctiyel tsaʼ bʌ i yʌlʌ Jehová* tiʼ tojlel jiñi xʼaltʼan: 23 «¡Qʼuelela! Jiñi xchʼoc maxto bʌ piʼlebilic mi caj i cʌntan i yalobil i mi caj i yʌcʼ ti pañimil juntiquil alʌ chʼiton, mi caj i yotsʌbeñob i cʼabaʼ Emmanuel», ili yom i yʌl, «an la quicʼot Dios».
24 Cheʼ bʌ José tsaʼ chʼojyi* ti wʌyel, tsiʼ mele bajcheʼ tiʼ sube jiñi i yángel Jehová* i tsiʼ pʌyʌ majlel i yijñam tiʼ yotot. 25 Pero maʼañic tsiʼ piʼle jinto tsiʼ yila pañimil jiñi chʼiton. I tsiʼ yotsʌbe i cʼabaʼ Jesús.