Apocalipsis
15 Tsaʼ j qʼuele yambʌ señal yaʼ ti panchan, ñuc yicʼot miʼ yʌcʼ ti toj sajtel lac pusicʼal: 7 ángelob woli bʌ i chʼʌmob tilel 7 wocol. Ili jiñʌch jiñi cojix tac bʌ, come yicʼot iliyi mi caj i cʼotel i jilibal i michʼajel Dios.
2 Tsaʼ j qʼuele jaʼel jumpʼejl mar cheʼ bʌ yilal bajcheʼ vidrio xʌcʼbil bʌ ti cʼajc yicʼot tsaʼ j qʼuele jiñi tsaʼ bʌ i mʌlbeyob* jiñi jontol bʌ bʌteʼel, jiñi i yejtal yicʼot jiñi i númerojlel i cʼabaʼ. Ili yaʼ waʼalob tiʼ tʼejl jiñi mar cheʼ bʌ yilal bajcheʼ vidrio, chuculob i chaʼan jiñi i yarpa Dios. 3 Woliʼ cʼʌyiñob jiñi i cʼay Moisés, jiñi i yaj eʼtel Dios, yicʼot i cʼay jiñi Tiñʌmeʼ. Woliʼ yʌlob:
«Jehová* Dios, jiñi Mach bʌ añic i pʼisol i pʼʌtʌlel, wen ñuc yicʼot miʼ yʌcʼ ti toj sajtel lon c pusicʼal jiñi tsaʼ tac bʌ a mele. Tojʌch yicʼot i sujmʌch jiñi a bijlel, Rey am bʌ tiʼ pejtelel ora. 4 Jehová,* ¿majqui maʼañic mi caj i bʌcʼñañet? ¿Majqui maʼañic mi caj i ñuqʼuesan a cʼabaʼ? Come jatet jach xucʼulet. Pejtelel tejclum mi caj i tilel ti a tojlel i mi caj i chʼujutesañetob come tsaʼix tsictiyi jiñi toj bʌ a mandar».
5 Ti wiʼil tsaʼ j qʼuele chaʼan yaʼ ti panchan tsaʼ jajmi jiñi chʼujul bʌ ajñibʌl am bʌ ti jiñi pisil bʌ otot muʼ bʌ i pʌs chaʼan Dios yaʼʌch an yicʼotob, 6 yaʼ ti chʼujul bʌ ajñibʌl tsaʼ loqʼuiyob tilel jiñi 7 ángelob woli bʌ i chʼʌmob tilel 7 wocol. Lʌpʌlob i chaʼan i pislel melbil bʌ ti sʌc bʌ lino yicʼot tsʼʌylaw bʌ, i yaʼ tiʼ tajn añob i cʌjchil melbil bʌ ti oro. 7 Juntiquil ti jiñi chʌntiquil querubín tsiʼ yʌqʼue jiñi 7 ángelob 7 colem tsima melbil bʌ ti oro butʼul bʌ tiʼ michʼajel Dios, jiñi cuxul bʌ tiʼ pejtelel ora. 8 I jiñi chʼujul bʌ ajñibʌl tsaʼ bujtʼi ti butsʼ tiʼ caj i ñuclel Dios yicʼot tiʼ caj i pʼʌtʌlel. Maʼañic majqui tsaʼ mejli ti ochel yaʼ ti chʼujul bʌ ajñibʌl jinto miʼ yujtel jiñi 7 wocol woli bʌ i yʌcʼob jiñi 7 ángelob.