Apocalipsis
8 Cheʼ bʌ jiñi Tiñʌmeʼ tsiʼ jamʌ jiñi i sietejlel bʌ sello, media hora ñʌchʼʌl tsaʼ cʌyle jiñi panchan. 2 I tsaʼ j qʼuele jiñi 7 ángelob waʼaloʼ bʌ tiʼ tojel Dios, i tsaʼ aqʼuentiyob 7 trompeta.
3 Tsaʼ cʼoti yambʌ ángel am bʌ i chaʼan i yajñib pom melbil bʌ ti oro chaʼan miʼ pul pom, i waʼal tsaʼ cʌyle yaʼ tiʼ tʼejl pulʌntib. Cabʌl pom tsaʼ aqʼuenti chaʼan miʼ pul yaʼ ti pulʌntib melbil bʌ ti oro am bʌ tiʼ tojel jiñi trono cheʼ bʌ tsaʼ ubinti i yoración jiñi chʼujuloʼ bʌ. 4 I, tiʼ cʼʌb jiñi ángel, jiñi i butsʼil pom yicʼot i yoración jiñi chʼujuloʼ bʌ tsaʼ caji ti letsel tiʼ tojel Dios. 5 Pero jiñi ángel ti ora tsiʼ chʼʌmʌ jiñi i yajñib pom, tsiʼ butʼu ti ñich cʼajc am bʌ ti pulʌntib i tsiʼ choco tilel ti pañimil. I tsaʼ caji chajc, tʼan tac, i cʼʌcʼal chajc yicʼot yujquel. 6 I jiñi 7 ángelob añoʼ bʌ i chaʼan jiñi 7 trompeta tsiʼ chajpayob i bʌ chaʼan miʼ wusob.
7 Jiñi ñaxam bʌ ángel tsiʼ wusu jiñi i trompeta. Cheʼ jiñi tsaʼ tili tuñijaʼ yicʼot cʼajc xʌcʼbil bʌ ti chʼichʼ, i tsaʼ chojqui tilel ti pañimil. I jumpʼejl parte* pañimil tsaʼ puli, cheʼ jaʼel jumpʼejl parte teʼel tsaʼ puli, i pejtelel mateʼel tsaʼ puli.
8 Jiñi i chaʼticlel ángel tsiʼ wusu jiñi i trompeta. Cheʼ jiñi an chuqui tsaʼ chojqui ochel yaʼ ti mar lajal bʌ bajcheʼ colem wits am bʌ i cʼʌcʼal. I jumpʼejl parte mar tsaʼ sujti ti chʼichʼ, 9 jumpʼejl parte cuxul tac bʌ ti mar tsaʼ chʌmi, i jumpʼejl parte barco tac tsaʼ jisʌnti.
10 Jiñi i yuxticlel ángel tsiʼ wusu jiñi i trompeta. Cheʼ jiñi yaʼ ti panchan tsaʼ yajli tilel jumpʼejl colem ecʼ am bʌ i cʼʌcʼal bajcheʼ jumpʼejl antorcha. Tsaʼ yajli ti jumpʼejl parte colem jaʼ tac yicʼot i pasibal tac jaʼ. 11 I cʼabaʼ jiñi ecʼ jiñʌch Ajenjo.* I jumpʼejl parte jaʼ tac tsaʼ sujti ti ajenjo. Yonlel lac piʼʌlob tsaʼ chʌmiyob tiʼ caj jiñi jaʼ, come tsaʼ chʼajʼa.
12 Jiñi i chʌnticlel ángel tsiʼ wusu jiñi i trompeta. Cheʼ jiñi jumpʼejl parte qʼuin, jumpʼejl parte uw yicʼot jumpʼejl parte ecʼ tac tsaʼ icʼa. I yaʼi jumpʼejl parte qʼuin yicʼot acʼʌlel icʼyochʼan tsaʼ ajñi.
13 Tsaʼ j qʼuele i tsaʼ cubi juncojt xiyeʼ* woli bʌ ti wejlel tiʼ yojlil panchan i woli bʌ i yʌl ti cʼam bʌ tʼan: «¡Jiñi chumuloʼ bʌ ti pañimil mi caj i ñusañob tsʌts bʌ wocol tac cheʼ bʌ miʼ sub i bʌ jiñi trompeta tac cʌylemto bʌ muqʼuix bʌ caj i wusob jiñi uxtiquil ángelob!».