Hebreos

10 Come jiñi Mandar lajal bajcheʼ i yʌxñal chuqui tac wem bʌ mi caj i tilel pero maxto ñoj jiñic muʼ bʌ caj i tilel, jiñi Mandar maʼañic* miʼ mejlel i sujtesañob ti toj jiñi muʼ bʌ i lʌcʼtesañob i bʌ ti Dios anquese miʼ yʌcʼob tsʌnsʌbil bʌ majtañʌl ti jujumpʼejl jab. 2 Cheʼ cheʼiqui, ¿mach ba tsaʼic cʌjyi ti ajqʼuel jiñi tsʌnsʌbil bʌ majtañʌl come jiñi muʼ bʌ i melob chʼujul bʌ eʼtel maʼañix i mul mi caj i yubiñob mi tsaʼix sʌqʼuesʌntiyob? 3 Pero mach cheʼiqui, yicʼot ili tsʌnsʌbil bʌ majtañʌl ti jujumpʼejl jab miʼ cʼajtesʌntel jiñi mulil tac, 4 come jiñi i chʼichʼel tat wacax yicʼot chivo maʼañic miʼ mejlel i jisan jiñi mulil.

5 Jin chaʼan, cheʼ bʌ Cristo tsaʼ tili ti pañimil, tiʼ sube Dios: «‹Mach a womix tsʌnsʌbil bʌ añimal tac mi jiñicto jiñi majtañʌl tac, pero tsaʼ chajpʌbeyon c bʌcʼtal. 6 Maʼañix tsaʼ mulaj pulbil bʌ majtañʌl mi jiñicto jiñi majtañʌl tac chaʼan bʌ mulil›. 7 Cheʼ jiñi tsaʼ cʌlʌ: ‹Qʼuele, tsaʼ tiliyon chaʼan mic mel chuqui a wom c Dios (yaʼ ti bʌlbil bʌ jun tsʼijbubil tic tojlel)›». 8 Ñaxan miʼ yʌl: «Mach a womix i maʼañix tsaʼ mulaj tsʌnsʌbil bʌ añimal tac mi jiñicto jiñi majtañʌl tac mi jiñicto pulbil bʌ majtañʌl mi jiñicto jiñi majtañʌl tac chaʼan bʌ mulil», pejtelel ili majtañʌl miʼ yʌjqʼuel come cheʼʌch miʼ yʌl jiñi Mandar. 9 Cheʼ jiñi miʼ yʌl: «Qʼuele, tsaʼ tiliyon chaʼan mic mel chuqui a wom». Miʼ jisan jiñi ñaxam bʌ chaʼan miʼ waʼchocon jiñi i chaʼpʼejlel. 10 Come cheʼʌch yom Dios tsaʼ sʌqʼuesʌntiyonla tiʼ coltaya jiñi i bʌcʼtal Jesucristo, junsujtel jach bʌ tsaʼ ajqʼui i chaʼañʌch tiʼ pejtelel ora.

11 Cheʼ jaʼel, pejtelel jiñi sacerdotejob miʼ chʼʌmob i yeʼtel ti jujumpʼejl qʼuin chaʼan miʼ melob jiñi chʼujul bʌ eʼtel yicʼot chaʼan miʼ yʌcʼob jin jach bʌ majtañʌl bajcheʼ jaysujtel yom, pero jiñi maʼañic miʼ mejlel i junyajl jisan jiñi mulil. 12 Pero ili wiñic jumpʼejl jach majtañʌl tsiʼ yʌcʼʌ chaʼan miʼ ñusʌntel jiñi mulil i chaʼañʌch tiʼ pejtelel ora i tsaʼ buchle tiʼ ñoj Dios, 13 i cʼʌlʌl ti jiñi bʌ ora woliʼ pijtan chaʼan miʼ yʌjqʼuel jiñi i contrajob tiʼ yebal i yoc. 14 Come ti jumpʼejl jach tsʌnsʌbil bʌ majtañʌl tsiʼ sujtesa ti toj tiʼ pejtelel ora jiñi woli bʌ i sʌqʼuesʌntelob. 15 Cheʼ jaʼel, jiñi chʼujul bʌ espíritu miʼ yʌqʼueñonla laj cʌn jiñi, come tsiʼ ñaxan alʌ: 16 «Jehová* miʼ yʌl: Ili jiñʌch jiñi trato muʼ bʌ caj c mel quicʼot jiñi tejclum Israel cheʼ bʌ ñumeñix jiñi qʼuin tac. Mi caj cʌqʼueñob tiʼ pusicʼal jiñi c mandar tac i mi caj c tsʼijbubeñob tiʼ ñaʼtʌbalob». 17 Cheʼ jiñi miʼ yʌl: «I maʼañix mi caj c chʌn cʼajtesan jiñi mulil tac i mi jiñicto jiñi mach bʌ wentaquic tsiʼ meleyob». 18 Weno, cheʼ muqʼuix i ñusʌbentelob i mul, mach cʼʌñʌlix jumpʼejl majtañʌl chaʼan jiñi mulil.

19 Jin chaʼan, hermanojob, come an lac chʼejlel* chaʼan mi laj cʼʌn jiñi bij muʼ bʌ i pʌyonla majlel ti jiñi chʼujul bʌ ajñibʌl tiʼ coltaya i chʼichʼel Jesús, 20 jumpʼejl tsijiʼ bʌ bij yicʼot cuxul bʌ tsaʼ bʌ i jambeyonla tiʼ tojlel jiñi cortina, ili jiñʌch i bʌcʼtal, 21 i come an lac chaʼan juntiquil ñuc bʌ sacerdote am bʌ tiʼ wenta i yotot Dios, 22 laʼ lac lʌcʼtesan lac bʌ ti jumpʼejl lac pusicʼal yicʼot ti tsʼʌcʌl bʌ lac ñopoñel, come sʌquix jiñi lac pusicʼal yicʼot weñix jiñi laj conciencia i jiñi lac bʌcʼtal tsaʼix pojqui ti sʌc bʌ jaʼ. 23 Yom tsʌts mi lac chuc lac bʌ tiʼ jamʌ subol chaʼan bʌ lac pijtaya, come xucʼulʌch jiñi tsaʼ bʌ i yʌcʼʌ i tʼan. 24 I laʼ laj comol ñaʼtan lac bʌ chaʼan mi lac ñijcʌben lac bʌ lac pusicʼal lac pʌs cʼuxbiya yicʼot chaʼan mi lac mel chuqui tac wen, 25 pero mach laj cʌy lac tempan lac bʌ, cheʼ bajcheʼ ñʌmʌl i melob chaʼtiqui uxtiquil. Laʼ lac tijicñesʌben lac bʌ lac pusicʼal, ñumento cheʼ woli laj qʼuel chaʼan woliʼ lʌcʼtiyel jiñi qʼuin.

26 Come mi tsaʼix lac taja tsʼʌcʌl bʌ lac ñaʼtʌbal chaʼan bʌ jiñi i sujmlel i mi lac yilol chaʼlen mulil, maʼañix yambʌ majtañʌl chaʼan jiñi mulil. 27 Yom jax miʼ pijtʌntel jumpʼejl meloñel wen bʌbʌqʼuen bʌ yicʼot wen tsʌts bʌ i michʼajel Dios muʼ bʌ caj i jisan jiñi i contrajob. 28 Majqui jach miʼ ñusan ti pʼis jiñi i Mandar Moisés maʼañic mi caj i pʼuntʌntel i mi caj i tsʌnsʌntel chaʼan i tʼan chaʼtiquil o uxtiquil testigo. 29 ¿Mach ba ñumen tsʌtsic yom miʼ yʌqʼuentel i toj i mul mi laʼ wʌl jiñi junyajl maʼañic bʌ tsiʼ qʼuele ti ñuc jiñi i Yalobil Dios, mach bʌ añic tsiʼ qʼuele ti ñuc jiñi chʼichʼ chaʼan bʌ trato tsaʼ bʌ cʼʌjñi chaʼan miʼ sʌqʼuesʌntel i maʼañic tsiʼ qʼuele ti ñuc jiñi i yespíritu Dios muʼ bʌ i yʌcʼ jiñi ñuc bʌ i yutslel? 30 Come laj cʌñʌ jiñi tsaʼ bʌ i yʌlʌ: «Joñon mi caj j qʼuextʌbeñob, joñon mi caj cʌqʼueñob i tojob i mul». I miʼ yʌl jaʼel: «Jehová* mi caj i chaʼlen meloñel tiʼ tojlel i tejclum». 31 Bʌbʌqʼuen jax cheʼ mi lac yajlel tiʼ cʼʌb jiñi cuxul bʌ Dios.

32 Pero mach ñajʌyic laʼ chaʼan chaʼan cheʼ bʌ tsaʼix laʼ qʼuele jiñi sʌcjamañiyel cabʌl chuqui tsaʼ laʼ lʌtʼʌ anquese wen an laʼ wocol. 33 An i tajol tsaʼ wen pʼajleyetla* yicʼot tsaʼ ticʼlʌntiyetla tiʼ wut lac piʼʌlob, i an i tajol tʌpʼʌl laʼ wicʼotob jiñi tsaʼ bʌ i ñusayob iliyi. 34 Jatetla tsaʼ laʼ pʌsbeyob laʼ pʼuntaya jiñi añoʼ bʌ ti cárcel i maʼañic tsaʼ laʼ sʌtʌ laʼ tijicñʌyel cheʼ bʌ tsaʼ chilbentiyetla laʼ chubʌʼan, come laʼ wujil chaʼan an laʼ chaʼan chuqui ñumen wem bʌ muʼ bʌ i jalijel.

35 Jin chaʼan, mach laʼ sʌt laʼ chʼejlel,* come mi caj laʼ tajben i chobejtʌbal. 36 Jatetla yomʌch mi laʼ cuch wocol chaʼan cheʼ bʌ tsaʼix laʼ mele chuqui yom Dios mi laʼ wʌqʼuentel jiñi tsaʼ bʌ i wʌn alʌ. 37 Come «tsʼitaʼ jax yom», «jiñi tal bʌ mi caj i julel, i mach jalix yom». 38 «Pero jiñi toj bʌ c wiñic cuxul mi caj i yajñel chaʼan i ñopoñel», i «mi tsiʼ chaʼ choco i bʌ tiʼ pat, mach utsʼatic mi caj j qʼuel». 39 Pero joñonla mach lajaloñicla bajcheʼ jiñi muʼ bʌ i chaʼ chocob i bʌ tiʼ pat i miʼ jisʌntelob, lajalonla bajcheʼ jiñi añoʼ bʌ i ñopoñel i cuxul miʼ yajñelob.