Efesios

2 Cheʼ jaʼel, Dios tsiʼ yʌqʼueyetla laʼ cuxtʌlel, anquese lon chʌmeñetixla tiʼ caj laʼ sajtemal yicʼot laʼ mul. 2 Ti yambʌ ora chumuletla cheʼ bajcheʼ an jiñi pañimil, cheʼ bʌ tsaʼ laʼ tsajca jiñi yumʌl am bʌ i pʼʌtʌlel ti jiñi icʼ, ili icʼ jiñʌch jiñi espíritu muʼ bʌ i chaʼlen eʼtel tiʼ tojlel i yalobilob jiñi ñusatʼan. 3 Cheʼʌchi, ti yambʌ ora cheʼʌch tsaʼ lac mele ti lac pejtelel cheʼ bajcheʼ tsiʼ meleyob jaʼel cheʼ bajcheʼ miʼ mulan lac bʌcʼtal, tsaʼ lac mele chuqui yom lac bʌcʼtal yicʼot lac ñaʼtʌbal, i cʼʌlʌl cheʼ bʌ tsaʼ la quila pañimil i yalobiloñixla michʼajel, cheʼ bajcheʼ jiñi yambʌlob. 4 Pero Dios, wen am bʌ i pʼuntaya, tiʼ caj jiñi wen ñuc bʌ i cʼuxbiya tsaʼ bʌ i pʌsbeyonla, 5 tsiʼ yʌqʼueyonla laj cuxtʌlel la quicʼot Cristo, anquese chʌmeñoñixla tiʼ caj lac sajtemal (jatetla tsaʼix coltʌntiyetla chaʼan jiñi ñuc bʌ i yutslel Dios). 6 Cheʼto jaʼel, tsiʼ yʌqʼueyonla laj cuxtʌlel la quicʼot i tsiʼ yʌcʼʌyonla ti buchtʌl la quicʼot yaʼ ti panchan bajcheʼ xcʌntʼañob i chaʼan Cristo Jesús. 7 Dios miʼ mel iliyi chaʼan ti jiñi tsijiʼ bʌ pañimil talto bʌ miʼ pʌsbeñonla jiñi ñuc bʌ i yutslel cheʼ bʌ miʼ mel chuqui tac wen ti lac tojlel bajcheʼ xcʌntʼañonbʌla i chaʼan Cristo Jesús.

8 Tiʼ caj jiñi ñuc bʌ i yutslel Dios, tsaʼix coltʌntiyetla chaʼan jiñi laʼ ñopoñel. Pero mach chaʼañic jiñi melbil bʌ laʼ chaʼan, jumpʼejlʌch laʼ majtan ti Dios. 9 Tiʼ sujm, mach chaʼañic chuqui tac tsaʼ laʼ mele, chaʼan maʼañic majqui miʼ qʼuel i bʌ ti ñuc. 10 Melbilonla tiʼ cʼʌb Dios i tsaʼ mejliyonla bajcheʼ xcʌntʼan i chaʼan Cristo Jesús chaʼan mi lac mel chuqui tac wen, jiñi tsaʼ bʌ i wʌn ñaʼta Dios chaʼan mi caj lac mel.

11 Jin chaʼan, cʼajtesanla chaʼan ti wajali jatetla mach bʌ judíojeticla tsaʼ laʼ wila pañimil, mi laʼ subentel ti «mach bʌ tsepbilobic i pʌchʌlel»* tiʼ tojlel jiñi cʌmbiloʼ bʌ bajcheʼ «tsepbiloʼ bʌ i pʌchʌlel», muʼ bʌ i melob ti lac bʌcʼtal jiñi lac piʼʌlob. 12 Ti jimbʌ ora maʼañic laʼ wicʼot Cristo, tʼoxoletla tiʼ tojlel jiñi tejclum Israel, mach ochemeticla ti jiñi trato tac chaʼan jiñi wʌn albil i chaʼan Dios. Maʼañic laʼ pijtaya i maʼañic laʼ wicʼot Dios ti pañimil. 13 Pero wʌle, come xcʌntʼañetixla i chaʼan Cristo Jesús, jatetla, ñajt bʌ añetla ti ñaxan, lʌcʼʌlix añetla chaʼan i chʼichʼel Cristo. 14 Come jiñʌch lac ñʌchʼtʌlel, tsaʼ bʌ i mele chaʼan jiñi chaʼmojtoʼ bʌ junmojt jax miʼ sujtel yicʼot jiñʌch tsaʼ bʌ i jeme jiñi muro am bʌ ti ojli muʼ bʌ i tʼoxetla. 15 Tiʼ tojlel jiñi i bʌcʼtal tsiʼ jisa jiñi muʼ bʌ i yʌcʼ contrajintel, jiñi i Mandar Moisés baqui miʼ tilel mandar tac, chaʼan miʼ mel tsijiʼ bʌ wiñic ti jiñi chaʼmojt temeloʼ bʌ yicʼot i miʼ yʌcʼ ñʌchʼtʌlel, 16 yicʼot chaʼan ti jumpʼejl bʌcʼtalʌl ti jiñi teʼ chaʼan bʌ wocol* miʼ junyajl utsʼañob yicʼot Dios jiñi chaʼpʼejl tejclum, come tiʼ tojlel i bʌcʼtal tsiʼ jisa jiñi contrajintel. 17 Tsaʼ tili i tiʼ subeyetla jiñi wen tʼan chaʼan bʌ ñʌchʼtʌlel, jatetla ñajt bʌ añetla ti Dios ti ñaxan, yicʼot tiʼ tojlel jiñi lʌcʼʌl bʌ añob, 18 come tiʼ tojlel, tiʼ chaʼpʼejlel tejclum libre miʼ mejlel lac lʌcʼtesan lac bʌ baʼan jiñi Tatʌl tiʼ coltaya jumpʼejl jach bʌ espíritu.

19 Jin chaʼan jatetla mach chʼoyoletixla ti yambʌ país, lajalix laʼ lumal laʼ wicʼot jiñi chʼujuloʼ bʌ i ochemetixla tiʼ familia Dios, 20 i tsaʼ waʼchocontiyetla bajcheʼ jumpʼejl ototʌl yaʼ baqui chucul jiñi apóstolob yicʼot xʼaltʼañob, i Cristo Jesús jiñʌch jiñi xajlel ñumen ñuc bʌ i cʼʌjñibal.* 21 Ili otot melbil bʌ luʼ tsuyul ti wen jiñi jujunchajp an tac bʌ i chaʼan. I come temel yicʼot Cristo, woliʼ colel chaʼan miʼ sujtel ti jumpʼejl templo yajcʌbil bʌ chaʼan Jehová.* 22 Come temeletla laʼ wicʼot Cristo, Dios tsiʼ meleyetla la wicʼot jiñi yambʌlob ti jumpʼejl otot baqui chumul, come yaʼan jiñi i yespíritu.