Laʼ lac tsictesan jiñi wen tʼan chaʼan i yutslel i pusicʼal Dios

1, 2. ¿Bajcheʼ tsiʼ pʌsʌ Pablo chaʼan mucʼʌch i yʌqʼuen wocolix i yʌlʌ Dios chaʼan i yutslel?

JIÑI apóstol Pablo tsiʼ wen tsʼaʼle jiñi xñoptʼañob. I wen yujil chaʼan mach i wentʌlelix miʼ taj i pʼuntʌntel ti Dios. Jin chaʼan, ti jumpʼejl i pusicʼal tsiʼ yʌlʌ chaʼan «mach lolomic jach» jiñi i yutslel i pusicʼal Dios (pejcan 1 Corintios 15:9, 10)^[1] (qʼuele jiñi nota am bʌ tiʼ yujtibal ili temaj).

² Cheʼ tsʼitaʼ jax yom chaʼan miʼ chʌmel Pablo, tiʼ tsʼijbube Timoteo: «Mic suben wocolix i yʌlʌ Cristo Jesús lac Yum, come tsiʼ waʼchocoyon tiʼ yeʼtel. Tsiʼ pʼʌtesayon, come tsiʼ wʌn ñaʼta xucʼul mi caj cajñel» (1 Timoteo 1:12-14). ¿Baqui bʌ jiñi eʼtel (troñel)? Pablo tsiʼ sube jiñi ancianojob chaʼan congregación yaʼ ti Éfeso: «Maʼanic mij qʼuel j cuxtʌlel ti ñuc. Anquese mi cʌjqʼuel ti chʌmel, tijicña c pusicʼal mi utsʼat mic tsʼʌctesan queʼtel tsaʼ bʌ aqʼuentiyon ti lac Yum Jesús chaʼan mic sub jini wen tʼan chaʼan i yutslel i pusicʼal Dios» (Hechos 20:24).

 3. ¿Chuqui ti ñuc bʌ eʼtel tsaʼ aqʼuenti Pablo? (Qʼuele jiñi dibujo am bʌ tiʼ tejchibal).

³ ¿Chuqui ti «wen tʼan» tsiʼ subu Pablo? ¿Chucoch jiñʌch bajcheʼ tsiʼ pʌsʌ i yutslel i pusicʼal Jehová ti jiñi wen tʼan? Pablo tsiʼ sube jiñi xñoptʼañob ti Éfeso: «Tsaʼix laʼ wubi bajcheʼ tsaʼ aqʼuentiyon queʼtel chaʼan mi cʌqʼueñetla laʼ cʌn i yutslel i pusicʼal Dios» (Efesios 3:1, 2). Jesús tsiʼ yʌqʼue i yeʼtel Pablo chaʼan miʼ majlel i subeñob wen tʼan jiñi mach bʌ judíojobic. Ili wen tʼan miʼ yʌl chaʼan miʼ mejlelob ti ochel jaʼel tiʼ yumʌntel jiñi Mesías (pejcan Efesios 3:5-8). Pablo tsiʼ chaʼle subtʼan yicʼot i chʼejlel i wen chuqui tsiʼ pʌsbeyonla cʌytʌl jaʼel ili ora. Cheʼʌch tsiʼ pʌsʌ chaʼan «mach lolomic jach» cheʼ Dios tsiʼ pʌsbe i yutslel i pusicʼal.

4, 5. ¿Chucoch miʼ mejlel la cʌl chaʼan «jini wen tʼan chaʼan i yumʌntel Dios» lajalʌch yicʼot «jini wen tʼan chaʼan i yutslel i pusicʼal Dios»?

⁴ Ti ili cojix bʌ qʼuin, Jehová aqʼuebil i chaʼañonla jiñi eʼtel tiʼ subol «jini wen tʼan chaʼan i yumʌntel Dios». Ili eʼtel yom mi lac mel «tiʼ pejtelel pañimil chaʼan miʼ yubintel tiʼ pejtelel pañimil» (Mateo 24:14). «Jini wen tʼan chaʼan i yumʌntel Dios» lajalʌch yicʼot «jini wen tʼan chaʼan i yutslel i pusicʼal Dios». ¿Chucoch cheʼ mi laj cʌl? Come tiʼ pejtelel wenlel muʼ bʌ caj i yʌqʼueñonla i Yumʌntel Dios jiñʌch chaʼan i yutslel i pusicʼal Jehová (Efesios 1:3). Pablo tsiʼ pʌsʌ chaʼan miʼ qʼuel ti ñuc jiñi i yutslel i pusicʼal Dios cheʼ bʌ tsiʼ chaʼle subtʼan yicʼot i chʼejlel. ¿Woli (choncol) ba lac tsajcan bajcheʼ tsiʼ mele? (Pejcan Romanos 1:14-16).

⁵ Yaʼ ti yambʌ temaj tsaʼ laj qʼuele chaʼan miʼ mejlel lac taj lac wenlel chaʼan i yutslel i pusicʼal Dios anquese xmulilonla. Tsaʼ laj qʼuele jaʼel chaʼan cabʌl bendición miʼ yʌqʼueñonla jiñi i yutslel i pusicʼal Dios. Jin chaʼan, an ti lac wenta mi lac suben yambʌlob chaʼan bʌ i cʼuxbiya Jehová yicʼot chuqui yom miʼ melob chaʼan miʼ tajob i wenlel. Joñonla yom mi laj coltan yambʌlob chaʼan miʼ qʼuelob ti ñuc i yutslel i pusicʼal Dios, pero ¿bajcheʼ?

6, 7. Cheʼ mi lac tsictesʌben yambʌlob chaʼan i tojol jiñi mulil, ¿chucoch mi la cʌl chaʼan woliyʌch lac puc jiñi wen tʼan chaʼan i yutslel i pusicʼal Dios?

⁶ Ili ora, cabʌlob maʼañic bajcheʼ yubil miʼ yubiñob cheʼ miʼ chaʼleñob mulil. Jin chaʼan, maʼañic miʼ chʼʌmbeñob isujm chucoch i cʼʌjñibalʌch i chaʼañob i cuxtʌlel tsaʼ bʌ i yʌcʼʌ Jesús. Pero ñumen cabʌl jaʼel muʼ bʌ i cʼotelob i cʌn chaʼan maʼañic miʼ yʌqʼueñob i tijicñʌyel cheʼ bajcheʼ chumulob. Pero cheʼ miʼ pejcañob jiñi i testigojob Jehová, an muʼ bʌ cʼotel i chʼʌmbeñob isujm chuqui jiñi mulil, bajcheʼ miʼ ticʼlañob yicʼot chuqui yom miʼ melob chaʼan miʼ loqʼuelob tiʼ pʼʌtʌlel. Mi weñob i pusicʼal, miʼ yubiñob i tijicñʌyel cheʼ miʼ cʌñob chaʼan Dios tsiʼ choco tilel i Yalobil chaʼan miʼ locʼsañonla ti mulil yicʼot chʌmel. Cheʼ jeʼel, miʼ cʼotel i cʌñob chaʼan Jehová tsiʼ mele come wen an i cʼuxbiya yicʼot i yutslel i pusicʼal (1 Juan 4:9, 10).

⁷ Laʼ laj qʼuel chuqui tsiʼ yʌlʌ Pablo chaʼan jiñi i Yalobil Jehová: «Cheʼ bʌ tsaʼ chʌmi Cristo, tsiʼ yʌcʼʌyonla ti colel chaʼan tiʼ chʼichʼel. Tsiʼ ñusʌbeyonla lac mul». Pablo tsiʼ yʌlʌ chaʼan ili miʼ mejlel chaʼañʌch i yutslel i pusicʼal Dios (Efesios 1:7). Jiñi wen ñuc bʌ bajcheʼ tsiʼ pʌsʌ i cʼuxbiya Dios yicʼot i yutslel i pusicʼal jiñʌch cheʼ bʌ Cristo tsiʼ yʌcʼʌ i cuxtʌlel. Miʼ tijicñesañonla cheʼ la cujil chaʼan mi caj lac ñusʌbentel lac mul yicʼot chaʼan sʌc miʼ yajñel laj conciencia cheʼ mi lac pʌs chaʼan añʌch lac ñopoñel (chʼujbiya) tiʼ cuxtʌlel tsaʼ bʌ i yʌcʼʌ Jesús (Hebreos 9:14). ¡Ili jiñʌch wem bʌ tʼan! Tiʼ sujm, la com lac suben tiʼ pejtelel wiñicob xʼixicob (quixtañujob).

 8. ¿Chucoch yomʌch miʼ chaʼ utsʼesañob i bʌ ti Dios jiñi quixtañujob?

⁸ Jiñi maʼañic bʌ miʼ yʌcʼob ti ñuc i cuxtʌlel tsaʼ bʌ i yʌcʼʌ Jesús, Dios miʼ qʼuelob tiʼ contra. Jin chaʼan yom mi lac subeñob chaʼan miʼ mejlelob ti sujtel tiʼ yamigo Dios. Jiñi apóstol Juan tiʼ tsʼijbu: «Jini muʼ bʌ i ñop i Yalobil Dios, an i chaʼan i cuxtʌlel mach bʌ anic miʼ jilel. Jini mach bʌ anic miʼ ñop i Yalobil Dios mach mejlic i yʌqʼuentel i cuxtʌlel. Miʼ yajñel tiʼ michʼlel Dios» (Juan 3:36). Miʼ yʌqʼueñonla lac tijicñʌyel cheʼ la cujil chaʼan mi lac mejlel ti chaʼ utsʼan la quicʼot Dios tiʼ coltaya i cuxtʌlel Cristo (qʼuele jiñi recuadro «¿Chuqui yom i yʌl?»). Pablo tiʼ tsictesa: «Ti yambʌ ora ñajt añetla ti Dios. Tsaʼ laʼ contraji Dios ti laʼ pusicʼal yicʼot ti jontol bʌ laʼ melbal. Pero Dios tsiʼ yʌcʼʌ ti chʌmel i Yalobil. Cheʼ jini tsiʼ chaʼ utsʼesayetla» (Colosenses 1:21, 22).

9, 10. a) ¿Chuqui ti eʼtel tsiʼ yʌqʼue Jesús jiñi bombiloʼ bʌ? b) ¿Bajcheʼ miʼ chaʼleñob coltaya jiñi ‹yambʌ tiñʌmeʼob›?

⁹ Cristo tsiʼ yʌqʼue jiñi bombiloʼ bʌ o yajcʌbiloʼ bʌ ti espíritu jiñi eʼtel ‹muʼ bʌ i yutsʼesañonla› ti Dios (qʼuele jiñi recuadro «¿Chuqui yom i yʌl?»). Pablo tsiʼ subeyob: «Chʼoyol ti Dios jini tsijib tac bʌ. Dios tsaʼix i yutsʼesa lac pusicʼal la quicʼot chaʼan tsiʼ mʌñʌyonla Jesucristo. Tsaʼix i yʌqʼueyon lojon queʼtel ti jini tʼan muʼ bʌ i yutsʼesʌbeñonla lac pusicʼal yicʼot Dios. Mic sub lojon ili tʼan. Dios tsiʼ pʌsʌ i bʌ ti Cristo cheʼ bʌ tsiʼ yutsʼesʌbeyob i pusicʼal jini añoʼ bʌ ti pañimil. Tsiʼ cuchbeyob i mul. Tsiʼ yʌqʼueyon lojon tic wenta jini tʼan muʼ bʌ i yutsʼesʌbeñonla lac pusicʼal yicʼot Dios. Jini chaʼan chocbilon lojon majlel tiʼ qʼuexol Cristo, come Dios woliʼ pejcañetla tic tojlel lojon. Mic subeñet lojon ti wocol tʼan cheʼ bajcheʼ Cristo: Laʼ utsʼesʌntic laʼ pusicʼal yicʼot Dios» (2 Corintios 5:18-20).

¹⁰ Jiñʌch ñuc bʌ majtañʌl chaʼan jiñi ‹yambʌ tiñʌmeʼob› cheʼ miʼ coltañob ti subtʼan jiñi bombiloʼ bʌ (Juan 10:16). Jiñi ‹yambʌ tiñʌmeʼob› miʼ chaʼleñob coltaya bajcheʼ xsubtʼañob i chaʼan Cristo. Jiñʌch muʼ bʌ i ñumen chaʼleñob eʼtel tiʼ cʌntesʌntel yambʌlob chaʼan bʌ jiñi Biblia. Miʼ coltañob jaʼel chaʼan wem bʌ i yamigojob Dios miʼ sujtelob. Ili jiñʌch junchajp wen ñuc bʌ i cʼʌjñibal chaʼan i subol «jini wen tʼan chaʼan i yutslel i pusicʼal Dios».

11, 12. Cheʼ bʌ jiñi quixtañujob miʼ cʼotel i cʌñob chaʼan miʼ mejlel i pejcañob Jehová ti oración, ¿chucoch jiñʌch wem bʌ tʼan?

¹¹ Cabʌl quixtañu miʼ chaʼlen oración come wen miʼ yubiñob i bʌ. Pero maʼañic miʼ ñopob chaʼan mucʼʌch i ñʌchʼtʌntelob. Yom miʼ cʼotel i ñaʼtañob chaʼan Jehová mucʼʌch i ñʌchʼtañonla. David tsiʼ sube Jehová ti jumpʼejl cʼay: «Mi caj i tilelob baʼ añet pejtel winicob xʼixicob, come jatet maʼ ñichʼtʌbeñob i yoración. Mach mejlix j cuch c mul, pero jatet maʼ ñusʌbeñon lojon» (Salmo 65:2, 3).

¹² Jesús tsiʼ sube xcʌntʼañob i chaʼan: «Pejtelel chuqui mi laʼ cʼajtiben c Tat tij cʼabaʼ, mi caj i yʌqʼueñetla» (Juan 16:23). Yom bʌ i yʌl Jesús jiñʌch chaʼan chuqui jach miʼ mejlel laj cʼajtiben Jehová cheʼʌch bajcheʼ yom. Juan tsiʼ taja tiʼ tʼan Jehová cheʼ tiʼ tsʼijbu: «Chʼejl lac pusicʼal tiʼ tojlel Dios, come la cujil miʼ yubibeñonla chuqui jach mi laj cʼatiben cheʼ bajcheʼ yom i pusicʼal» (1 Juan 5:14). Tijicñayonla cheʼ mi laj coltan i chʼʌmben i sujm yambʌlob chaʼan jiñi oración wen ñuc i cʼʌjñibal. Jiñʌch bajcheʼ mi lac mejlel ti lʌcʼtiyel ti «i buchlib Dios baʼ miʼ pʌsbeñonla i yutslel i pusicʼal» (Hebreos 4:16). Cheʼ mi laj cʌntesañob bajcheʼ yom miʼ chaʼleñob oración, majqui yom miʼ pejcañob yicʼot chuqui yom miʼ cʼajtiñob, mi laj coltañob ti sujtel tiʼ yamigo Jehová yicʼot miʼ tajob i coltʌntel cheʼ miʼ ñusañob wocol (Salmo 4:1; 145:18).

13, 14. a) ¿Chuqui ti ñuc bʌ majtañʌl mi caj i yʌqʼuentelob ti talto bʌ qʼuin jiñi bombiloʼ bʌ? b) ¿Chuqui mi caj i melob tiʼ tojlel jiñi quixtañujob?

¹³ Jehová muʼto caj i ñumen pʌs i yutslel i pusicʼal cheʼ ti talto bʌ qʼuin. ¿Bajcheʼ mi caj i pʌs? Mi caj i yʌqʼuen ñuc bʌ i majtan jiñi 144 mil muʼ bʌ i cajelob ti yumʌntel yicʼot Cristo. ¿Baqui bʌ jiñi? Pablo tsiʼ yʌlʌ: «Cabʌl tsiʼ pʼuntayonla Dios, cabʌl tsiʼ cʼuxbiyonla. Tsiʼ tem aqʼueyonla laj cuxtʌlel la quicʼot Cristo cheʼ chʌmeñonla ti mulil. Coltʌbiletla tiʼ yutslel i pusicʼal Dios. Tsiʼ techeyonla chʼojyel temel la quicʼot Cristo. Tsiʼ buchchocoyonla ti panchan la quicʼot Cristo Jesús chaʼan miʼ pʌs tiʼ pejtelel ora bajcheʼ tsiʼ pʼuntayonla ti on bʌ i yutslel i pusicʼal, cheʼ bʌ tsiʼ pʌsbeyonla i cʼuxbiya ti Cristo Jesús» (Efesios 2:4-7).

¹⁴ Wocol chaʼan mi lac ñaʼtan tiʼ pejtelel chuqui chajpʌbil i chaʼan Jehová tiʼ tojlel jiñi bombiloʼ bʌ cheʼ miʼ cajelob ti yumʌntel yicʼot Cristo ti panchan (Lucas 22:28-30; Filipenses 3:20, 21; 1 Juan 3:2). Jehová wen qʼuexel mi caj i pʌsben jiñi bombiloʼ bajcheʼ miʼ pʌs i pʼuntaya ti «on bʌ i yutslel i pusicʼal». Jiñobʌch «jini tsijiʼ bʌ Jerusalén» yicʼot «jini xchʼoc muʼ bʌ cajel ti ñujpuñel» yicʼot Cristo (Apocalipsis 3:12; 17:14; 21:2, 9, 10). Temel miʼ cajelob ti eʼtel «chaʼan miʼ lajmesan [o cʼoqʼuesan] jini añoʼ bʌ ti pañimil». Yom i yʌl chaʼan mi caj i coltan loqʼuel jiñi quixtañujob ti mulil yicʼot ti chʌmel, i chaʼan mach xmulilobix (pejcan Apocalipsis 22:1, 2, 17).

15, 16. ¿Bajcheʼ mi caj i pʌs i yutslel i pusicʼal Jehová tiʼ tojlel jiñi yambʌ tiñʌmeʼob yaʼ ti tsijiʼ bʌ pañimil?

¹⁵ Ti Efesios 2:7 miʼ yʌl chaʼan Dios mi caj i pʌs i yutslel i pusicʼal «tiʼ pejtelel ora, yom i yʌl, ti talto bʌ qʼuin». Ti jiñi bʌ ora, tiʼ pejtelel muʼ bʌ caj i chumtʌlob ila ti Pañimil mi caj i tajob i wenlel chaʼan Dios «tsiʼ pʼuntayonla ti on bʌ i yutslel i pusicʼal» (Lucas 18:29, 30). Cheʼ miʼ chaʼ chʼojyel jiñi chʌmeñoʼ bʌ jiñʌch junchajp bajcheʼ mi caj i pʌs i yutslel i pusicʼal Jehová wʌʼ ti Pañimil (Job 14:13-15; Juan 5:28, 29). ¿Majqui mi caj i chaʼ tejchelob? Jiñʌch xucʼuloʼ bʌ ti Dios tsaʼ chʌmiyob cheʼ bʌ maxto i yʌcʼʌ i cuxtʌlel Cristo. Mi caj i chʼojyelob jaʼel jiñi yambʌ tiñʌmeʼob chʌmeñoʼ bʌ ti ili cojix bʌ qʼuin. Mi caj i chaʼ tajob i cuxtʌlel tiʼ pejtelelob yicʼot mi caj i chʌn melbeñob i yeʼtel Jehová.

¹⁶ Pero Dios mi caj i chaʼ tejchesan yonlelob maʼañic bʌ tsaʼ mejli i cʌñob. Juan tiʼ tsʼijbu: «Tsaj qʼuele jini chʌmeñoʼ bʌ, jini ñucoʼ bʌ yicʼot chʼoʼchʼocoʼ bʌ waʼaloʼ bʌ tiʼ tojel Dios. Tsaʼ jajmi jini jun tac. Tsaʼ jajmi yambʌ jun baʼ tsʼijbubil i cʼabaʼob añoʼ bʌ i cuxtʌlel. Lac Yum tsiʼ cʼʌñʌ jini jun chaʼan miʼ mel jini chʌmeñoʼ bʌ cheʼ bajcheʼ an i melbalob, come yaʼ tsʼijbubil i melbalob ti jini jun tac. Jini colem ñajb tsiʼ chaʼ colo jini chʌmeñoʼ bʌ añoʼ bʌ ti jaʼ. Jini i yajñib chʌmeñoʼ bʌ tsiʼ colo jini yaʼ bʌ añob. Lac Yum tsiʼ meleyob ti jujuntiquil cheʼ bajcheʼ an i melbalob» (Apocalipsis 20:12, 13). Jiñi muʼ bʌ caj i chaʼ tejchelob mi caj i mejlel i cʌñob Jehová yicʼot i qʼuelob bajcheʼ yumʌl. Cheʼ yom mi caj i chumtʌlob bajcheʼ miʼ yʌl jiñi principio tac am bʌ ti Biblia yicʼot tsijib mandar tac muʼ bʌ caj i yʌjqʼuel yaʼ ti bʌlbil bʌ jun. Ili tsijib mandar tac jiñʌch yambʌ bajcheʼ mi caj i pʌs i yutslel i pusicʼal Jehová.

17. ¿Chuqui yom mi laj cʼajtesan cheʼ mi lac chaʼlen subtʼan?

¹⁷ Lʌcʼʌlix i jilibal ili pañimil (mulawil). Wen ñuc i cʼʌjñibal cheʼ mi lac sub ili ora «jini wen tʼan» chaʼan Yumʌntel (Marcos 13:10). Yom mi lac chʌn cʼajtesan chaʼan cheʼ mi lac chaʼlen subtʼan chaʼañʌch mi la cʌqʼuen i ñuclel Jehová. ¿Bajcheʼ? Jiñʌch cheʼ mi lac tsictesan chaʼan tiʼ pejtelel chuqui wem bʌ mi caj lac ñusan yaʼ ti Paraíso cojach mi lac taj tiʼ yutslel i pusicʼal Jehová.

18, 19. ¿Bajcheʼ miʼ mejlel la cʌcʼ ti ñuc i yutslel i pusicʼal Jehová?

¹⁸ Cheʼ mi lac chaʼlen subtʼan, miʼ mejlel lac tsictesan chuqui mi caj i yujtel cheʼ bʌ miʼ chaʼlen yumʌntel Cristo wʌʼ ti Pañimil. Ti jiñi bʌ ora, jiñi quixtañujob ti tsʼʌcʌl mi caj i tajob i wenlel tiʼ cuxtʌlel Cristo i xucʼu xucʼul mi caj i sujtelob ti mach bʌ xmulilix. Jiñi Biblia miʼ yʌl: «Pejtel jini melbil tac bʌ mi caj i yʌjqʼuel ti colel tiʼ pʼʌtʌlel chʌmel. Mi caj i yochel ti libre chaʼan tijicña miʼ yajñel yicʼot i ñuclel i yalobilob Dios» (Romanos 8:21). Cojach tiʼ yutslel i pusicʼal Jehová mi caj i mejlel iliyi.

¹⁹ Jiñʌch jumpʼejl majtañʌl cheʼ mi lac sub jiñi utsʼatax bʌ tʼan muʼ bʌ i yʌl Apocalipsis 21:4, 5. Ila miʼ yʌl muʼ bʌ caj i mel Dios ti mach jalix qʼuin: «Mi caj i sujcubeñob i yaʼlel i wut. Maʼanix majch miʼ caj ti chʌmel. Maʼanix ucʼtaya mi uqʼuel mi wocol tiʼ pejtelel ora. Come tsaʼix ñumi jini ñaxan tac bʌ, cheʼen. Jini buchul bʌ tiʼ yumʌntel tsiʼ yʌlʌ: Awilan, mic mel ti tsijib pejtelel chuqui tac an, cheʼen. Tsiʼ subeyon jaʼel: Tsʼijban, come xucʼul jini tʼan, isujm jaʼel». Laʼ lac sub yicʼot lac chʼejlel ili wen tʼan, cheʼʌch mi caj la cʌcʼ ti ñuc i yutslel i pusicʼal Jehová.