Mateo

24 Cheʼ bʌ Jesús woliʼ loqʼuel ti templo, tsiʼ lʌcʼtesayob i bʌ jiñi xcʌntʼañob i chaʼan i tsiʼ tuchʼbeyob jiñi templo. 2 Cheʼ jiñi, Jesús tiʼ subeyob: «¿Woli ba laʼ qʼuel pejtelel iliyi? Tiʼ sujm mic subeñetla chaʼan maʼañic mi caj i cʌytʌl mi jumpʼejlic xajlel* tiʼ pam yambʌ. Tiʼ pejtelel mi caj i jisʌntel».

3 Cheʼ bʌ buchul yaʼ ti Olivo wits, jiñi xcʌntʼañob tsiʼ lʌcʼtesayob i bʌ i tsiʼ cʼajtibeyob: «Subeñon lojon, ¿jala mi caj i yujtel pejtelel iliyi yicʼot chuqui tac mi caj i yʌcʼ ti cʌñol chaʼan wʌʼix añet* yicʼot chaʼan lʌcʼʌlix i yorajlel i jilibal pañimil?».*

4 Jesús tsiʼ jacʼbeyob: «Yom tsajaletla.* Maʼañic majch yom miʼ lotiñetla 5 come cabʌlob muʼ bʌ caj i tilelob tij cʼabaʼ i mi caj i yʌlob: ‹Joñon jiñi Cristo›, i yonlel lac piʼʌlob mi caj i lotintelob. 6 Jatetla mi caj laʼ wubin ti alol guerra tac ti cabʌl tejclum. Pero tsajaletla, mach laʼ bʌcʼñan, come yomʌch miʼ yujtel pejtelel iliyi, pero maxto jiñic i jilibal».

7 «Come mi caj i contrajin i bʌ jumpʼejl tejclum yicʼot yambʌ, jumpʼejl yumʌntel yicʼot yambʌ, miʼ cajel wiʼñal yicʼot yujquel lum ti cabʌl tejclum. 8 Pejtelel iliyi i tejchibalʌch ñuc tac bʌ wocol».

9 «Cheʼ jiñi, mi caj laʼ contrajintel yicʼot laʼ tsʌnsʌntel, i pejtelel jiñi tejclum tac mi caj i tsʼaʼleñetla tiʼ caj j cʼabaʼ. 10 Tiʼ caj jiñi, cabʌlob muʼ bʌ caj i cʌy i ñopob, mi caj i yʌcʼob i piʼʌl tiʼ cʼʌb i contra i mi caj i tsʼaʼleñob i bʌ. 11 Mi caj i pʌsob i bʌ cabʌl xlot bʌ xʼaltʼañob muʼ bʌ caj i lotiñob cabʌl quixtañujob, 12 i cheʼ bʌ miʼ pʼojlel majlel jontolil,* mi caj i tsʌñan i cʼuxbiya lʌcʼʌ tiʼ pejtelel quixtañujob. 13 Pero jiñi muʼ bʌ i lʌtʼ cʼʌlʌl tiʼ yujtibal mi caj i coltʌntel. 14 I jiñi wen tʼan chaʼan bʌ Yumʌntel mi caj i sujbel tiʼ pejtelel pañimil chaʼan miʼ yubiñob jiñi tejclum tac, cheʼ jiñi mi caj i tilel jiñi i jilibal».

15 «Jin chaʼan, cheʼ bʌ mi laʼ qʼuel jiñi wen bibiʼ jax bʌ yicʼot yujil bʌ jisaya, tsaʼ bʌ i taja ti tʼan jiñi xʼaltʼan Daniel, yaʼ waʼal ti chʼujul bʌ ajñibʌl (laʼ i cʼʌn i ñaʼtʌbal jiñi woli bʌ ti pejcaya jun),* 16 ti jimbʌ ora, jiñi yaʼ bʌ añob ti Judea, laʼ putsʼicob majlel ti wits. 17 Jiñi am bʌ tiʼ pam otot, mach jubic i locʼ i chubʌʼan, 18 i jiñi am bʌ tiʼ lum, mach sujtic majlel i sʌclan i pislel. 19 ¡Bʌbʌqʼuen jax mi caj i yujtelob jiñi xʼixicob cʌntʌbiloʼ bʌ i chaʼan i yalobil yicʼot jiñi woliyoʼ bʌ ti tsuʼsa ti jimbʌ ora! 20 Chaʼlenla oración* chaʼan mach jiñic cheʼ ti sábado o tiʼ yorajlel tsʌñal yom mi laʼ putsʼel. 21 Come cheʼ jiñi mi caj i tilel i yorajlel cabʌl wocol.* Tiʼ tejchibal pañimil cʼʌlʌl ili ora, maʼañic ujtem wocol tac bajcheʼ iliyi, i maʼañic baʼ ora miʼ chaʼ cajel. 22 Tiʼ sujm, cheʼ machic miʼ comʼesʌntel jiñi i yorajlel, maʼañic majqui miʼ coltʌntel, pero tiʼ caj jiñi yajcʌbiloʼ bʌ mi caj i comʼesʌntel jiñi i yorajlel».

23 «Cheʼ jiñi, mi an majqui miʼ subeñetla: ‹¡Qʼuelela, wʌʼan jiñi Cristo!› o ‹¡Ix an ixi!›, mach laʼ ñop. 24 Come mi caj i pʌsob i bʌ muʼ bʌ i cuyob i bʌ ti cristo yicʼot xlot bʌ xʼaltʼañob i mi caj i melob ñuc tac bʌ milagro chaʼan miʼ chaʼleñob lot, i mi mucʼʌch i mejlel, muʼto i lotiñob jaʼel jiñi yajcʌbiloʼ bʌ. 25 Qʼuelela, tsaʼix c wʌn subeyetla. 26 Jin chaʼan, mi tsaʼ subentiyetla: ‹¡Qʼuelela, yaʼan tiʼ tiquiñal lum!›, mach majliquetla. Mi tsaʼ subentiyetla: ‹¡Qʼuelela, yaʼan tiʼ mal otot!›, mach laʼ ñop. 27 Come cheʼ bajcheʼ jiñi i cʼʌcʼal chajc miʼ loqʼuel tiʼ pasibal qʼuin i miʼ pʌs i cʼʌcʼal cʼʌlʌl tiʼ bʌjlibal qʼuin, cheʼʌch jaʼel cheʼ bʌ wʌʼix an* jiñi i Yalobil wiñic. 28 Yaʼ baqui an jiñi chʌmen bʌ, yaʼ mi caj i tempan i bʌ jiñi xiyeʼ».*

29 «Ti jin jach bʌ ora cheʼ miʼ yujtel jiñi wocol tac, jiñi qʼuin mi caj i yicʼan, jiñi uw maʼañic mi caj i tsʼʌjyel, jiñi ecʼ tac am bʌ ti panchan mi caj i yajlel i jiñi i pʼʌtʌlel tac panchan mi caj i ñijcʌyel. 30 Cheʼ jiñi, mi caj i pʌs i bʌ i yejtal* i pʼʌtʌlel jiñi i Yalobil wiñic yaʼ ti panchan, i pejtelel jiñi tejclum tac ti pañimil mi caj i jatsʼob i tajn tiʼ caj i cʼuxelob i pusicʼal i mi caj laʼ qʼuel jiñi i Yalobil wiñic woliʼ tilel yaʼ ti tocal am bʌ ti panchan, wen an i pʼʌtʌlel yicʼot i ñuclel. 31 Cʼam mi caj i sub i bʌ jiñi trompeta i mi caj i choc majlel i yángelob tiʼ chʌnwejlel pañimil chaʼan miʼ tempan jiñi yajcʌbiloʼ bʌ yaʼ tiʼ junwejlel panchan cʼʌlʌl ti yambʌ i junwejlel».

32 «Cʌñʌla ti ili lajiya chaʼan jiñi higuera. Cheʼ bʌ miʼ chʼocʼan i cʼʌb tac i miʼ loqʼuel i yopol, laʼ wujil chaʼan lʌcʼʌlix i yorajlel miʼ colel jiñi pʌcʼʌbʌl tac. 33 Cheʼʌch jatetla jaʼel, cheʼ bʌ mi laʼ qʼuel pejtelel iliyi, ñaʼtanla chaʼan lʌcʼʌlix an jiñi i Yalobil wiñic, añix tiʼ tiʼ otot. 34 Tiʼ sujm mic subeñetla chaʼan jiñi quixtañujob ti ili ora maʼañic mi caj i chʌmelob jinto miʼ tsʼʌctiyel pejtelel iliyi. 35 Jiñi panchan yicʼot pañimil mi caj i jilel, pero jiñi c tʼan maʼañic baʼ ora mi caj i jilel».

36 «Pero maʼañic majqui yujil chuqui ti qʼuin yicʼot bajcheʼ hora, mi jiñicto jiñi ángelob yaʼ ti panchan, mi jiñicto i Yalobil Dios, cojach jiñi Tatʌl. 37 Come cheʼ bajcheʼ tiʼ qʼuiñilel Noé, cheʼʌch miʼ cajel cheʼ bʌ wʌʼix an* jiñi i Yalobil wiñic. 38 Come ti jimbʌ ora cheʼ bʌ muʼto i cajel jiñi butʼjaʼ, jiñi lac piʼʌlob woliyob ti uchʼel yicʼot i japob chuqui miʼ japob, jiñi wiñicob woliyob ti ñujpuñel i jiñi xʼixicob woliʼ yʌjqʼuelob ti ñujpuñel... jinto ti jiñi qʼuin cheʼ bʌ Noé tsaʼ ochi ti arca, 39 i maʼañic tsiʼ jacʼʌyob jinto tsaʼ tili jiñi butʼjaʼ i tsaʼ laj misuntiyob. Cheʼʌch miʼ cajel cheʼ bʌ wʌʼix an* jiñi i Yalobil wiñic. 40 Ti jimbʌ ora chaʼtiquil wiñicob añob tiʼ lum: Juntiquil mi caj i pʌjyel majlel, i jiñi yambʌ mi caj i cʌjyel. 41 Chaʼtiquil xʼixicob woliyob ti juchʼbal ti molino: Juntiquil mi caj i pʌjyel majlel, i jiñi yambʌ mi caj i cʌjyel. 42 Jin chaʼan, yom chʌn yʌxʌl laʼ wo come mach laʼ wujilic chuqui ti qʼuin mi caj i tilel laʼ Yum».

43 «An junchajp yom bʌ mi laʼ ñaʼtan: Cheʼ jiñi i yum otot yujilic bajcheʼ ora ti acʼʌlel mi caj i yochel jiñi xujchʼ, cañal i wut* mi caj i yajñel i maʼañic mi caj i yʌcʼ ti ochel yaʼ tiʼ yotot. 44 Jin chaʼan, yom chajpʌbiletla jaʼel come jiñi i Yalobil wiñic mi caj i tilel cheʼ bʌ mach pijtʌbilic laʼ chaʼan».

45 «¿Majqui tiʼ sujm jiñi xucʼul bʌ xyaj eʼtel wen am bʌ i ñaʼtʌbal tsaʼ bʌ waʼchoconti tiʼ yum chaʼan miʼ chʼʌm tiʼ wenta jiñi xʼeʼtelob chaʼan miʼ yʌqʼueñob i bʌl i ñʌcʼ tiʼ yorajlel? 46 ¡Tijicña jiñi xyaj eʼtel mi wolʌch i mel iliyi cheʼ bʌ miʼ tilel jiñi i yum! 47 Mic subeñetla chaʼan mi caj i yʌqʼuen tiʼ wenta pejtelel chuqui an i chaʼan».

48 «Pero mi jiñi xyaj eʼtel jontol miʼ sujtel i ti jumpʼejl bʌ qʼuin miʼ yʌl tiʼ pusicʼal: ‹Woliʼ jalʼan jiñi c yum› 49 i miʼ tech i jatsʼ i piʼʌlob, miʼ chaʼlen uchʼel yicʼot miʼ jap yicʼotob jiñi junyajl xlembaloʼ bʌ, 50 i yum jiñi xyaj eʼtel mi caj i tilel ti jumpʼejl qʼuin mach bʌ pijtʌbilic i chaʼan yicʼot ti jumpʼejl ora mach bʌ ñaʼtʌbilic i chaʼan 51 i ñumen tsʌts mi caj i yʌqʼuen i toj i mul yicʼot mi caj i yʌcʼ baʼan jiñi xlotob.* Yaʼʌch baqui miʼ cajel ti uqʼuel yicʼot mi caj i cʼux i yej».*