Efesios
6 Alobob,* jacʼbenla i tʼan laʼ tat laʼ ñaʼ cheʼʌch bajcheʼ yom Dios, come tojʌch iliyi. 2 «Qʼuele ti ñuc a tat yicʼot a ñaʼ». Ili jiñʌch jiñi ñaxam bʌ mandar muʼ bʌ i chʼʌm tilel ili bendición: 3 «Chaʼan maʼ taj a wenlel yicʼot chaʼan jal maʼ wajñel ti pañimil». 4 Tatʌlob,* mach laʼ techben i michʼajel laʼ walobilob, cosanla majlel cheʼ bajcheʼ an jiñi tojʼesʌntel yicʼot ticʼojel tilem bʌ ti Jehová.*
5 Xyaj eʼtelob, jacʼbenla i tʼan jiñi laʼ yumob, yicʼot bʌqʼuen, tsiltsilñiyel i tiʼ pejtelel laʼ pusicʼal, cheʼ bajcheʼ i tʼan Cristo woli laʼ jacʼben. 6 Mach jiñic jach yom mi laʼ mel cheʼ bʌ woli i qʼueletobla, chaʼan jach utsʼat mi laʼ qʼuejlel ti wiñicob, cheʼʌch yom mi laʼ mel bajcheʼ xyaj eʼtelob i chaʼan Cristo muʼ bʌ i melob chuqui yom Dios tiʼ pejtelelob i cuxtʌlel. 7 Yom xyaj eʼteletla muʼ bʌ laʼ mel laʼ weʼtel tiʼ pejtelel laʼ pusicʼal, cheʼ bajcheʼ i yeʼtel Jehová* woli laʼ mel i mach i chaʼañic wiñicob, 8 come laʼ wujil chaʼan Jehová* mi caj i chaʼ sutqʼuiben jujuntiquil chuqui tac wem bʌ miʼ mel, mach yʌlʌyic mi xyaj eʼtel o libre an. 9 I jatetla, i yumetbʌla xʼeʼtelob, junlajal yom mi laʼ qʼuelob, mach laʼ chʼʌcob, come laʼ wujil chaʼan jiñiyob yicʼot jatetla juntiquil jach laʼ Yum ti panchan, i junlajal miʼ qʼuel lac piʼʌlob.
10 Cheʼ jaʼel, chʌn pʼʌtʼesan laʼ bʌ ti lac Yum yicʼot ti jiñi ñuc bʌ i pʼʌtʌlel. 11 Lʌpʌla pejtelel tsaʼ bʌ i yʌqʼueyetla Dios chaʼan jiñi guerra chaʼan miʼ mejlel laʼ lʌtʼ i yac tac jiñi Diablo, 12 come maʼañic woliyonla ti jatsʼ tiʼ contra jiñi am bʌ i bʌcʼtal yicʼot i bʌquel,* tiʼ contrajʌch jiñi yumʌlob, jiñi añoʼ bʌ i yeʼtel yicʼot tiʼ contra jiñi yumʌlob ti icʼyochʼan bʌ pañimil, ili jiñobʌch jiñi xibajob ti panchan. 13 Jin chaʼan, lʌpʌla pejtelel tsaʼ bʌ i yʌqʼueyetla Dios chaʼan jiñi guerra, chaʼan miʼ mejlel laʼ lʌtʼ cheʼ bʌ miʼ cʼotel jiñi jontol bʌ qʼuin i xucʼul mi laʼ wajñel cheʼ bʌ tsaʼix ujti laʼ mel pejtelel yom bʌ miʼ mejlel.
14 Jin chaʼan, yom lʌpʌl laʼ chaʼan jiñi cinturón chaʼan bʌ jiñi i sujmlel chaʼan xucʼul mi laʼ wajñel, lʌpʌla jiñi muʼ bʌ i mʌc laʼ tajn, iliyi jiñʌch cheʼ bʌ mi laʼ mel chuqui toj, 15 i yom lʌpʌl laʼ chaʼan laʼ warach yicʼot yom chajpʌbiletla chaʼan mi laʼ sub jiñi wen tʼan chaʼan bʌ ñʌchʼtʌlel. 16 I mach cojic jach jiñi, chucula jaʼel jiñi colem bʌ mʌctʌjib chaʼan bʌ laʼ ñopoñel, muʼ bʌ caj laʼ cʼʌn laʼ yʌp jiñi flecha tac am bʌ i cʼʌcʼal tilem bʌ ti Satanás.* 17 Chʼʌmʌla majlel jaʼel jiñi laʼ casco chaʼan bʌ coltʌntel yicʼot jiñi laʼ wespada chaʼan bʌ espíritu, yom i yʌl, jiñi i tʼan Dios. 18 Cheʼ jaʼel, yicʼot jiñi espíritu chʌn chaʼlenla oración tiʼ pejtelel ora, melela baqui jach bʌ oración yicʼot baqui jach bʌ oración ti wocol tʼan. Jin chaʼan, yom chʌn cañal laʼ wut* i chʌn cʼajtinla ti wocol tʼan tiʼ tojlel jiñi chʼujuloʼ bʌ. 19 Chaʼlenla oración tic tojlel jaʼel chaʼan cheʼ bʌ mic chaʼlen tʼan, mic taj c tʼan chaʼan yicʼot c chʼejlel* miʼ mejlel cʌcʼ ti cʌñol jiñi chʼujul bʌ tʼan mucul bʌ chaʼan bʌ jiñi wen tʼan. 20 Dios jiñʌch tsaʼ bʌ i chocoyon tilel chaʼan mic sub jiñi wen tʼan. Jin chaʼan cʌchʌlon ti cadena. Cʼajtibenla Dios tic tojlel chaʼan maʼañic c bʌqʼuen miʼ mejlel c sub, cheʼʌch bajcheʼ yom miʼ mejlel.
21 Chaʼan jatetla mi laʼ wubin tic tojlel yicʼot chaʼan bajcheʼ yilal añon, Tíquico, juntiquil cʼuxbibil bʌ hermano yicʼot xucʼul bʌ xʼeʼtel ti lac Yum, mi caj i laj subeñetla. 22 Mic choc majlel baʼañetla tiʼ caj iliyi: Chaʼan mi laʼ ñaʼtan bajcheʼ yilal añon lon yicʼot chaʼan miʼ ñuqʼuesan laʼ pusicʼal.
23 Laʼ ajñic tiʼ tojlel hermanojob jiñi ñʌchʼtʌlel yicʼot cʼuxbiya am bʌ i chaʼan ñopoñel tilem bʌ ti Dios jiñi Tatʌl yicʼot tilem bʌ ti lac Yum Jesucristo. 24 Laʼ ajñic jiñi ñuc bʌ i yutslel Dios tiʼ tojlel pejtelel muʼ bʌ i cʼuxbiñob lac Yum Jesucristo yicʼot jiñi i sujm bʌ cʼuxbiya.