Efesios
4 Jin chaʼan joñon, xcʌjchelon bʌ tiʼ caj lac Yum, mij cʼajtibeñetla ti wocol tʼan chaʼan cheʼʌch yom mi laʼ chumtʌl cheʼ bajcheʼ yom chaʼan jiñi tsaʼ bʌ pʌjyiyetla: 2 Yom junyaj an laʼ pecʼlel, laʼ wutslel yicʼot laʼ pijt, chʌn cuchu laʼ bʌ yicʼot cʼuxbiya, 3 chaʼlenla wersa chaʼan chʌn an jiñi muchʼtʌlel muʼ bʌ i yʌcʼ jiñi espíritu tiʼ coltaya jiñi ñʌchʼtʌlel muʼ bʌ i temonla. 4 Jumpʼejl jach bʌcʼtalʌl yicʼot jumpʼejl jach espíritu, cheʼ bajcheʼ jumpʼejl jach jiñi pijtaya baqui tsaʼ pʌjyiyetla. 5 Juntiquil jach lac Yum, junchajp jach jiñi ñopoñel yicʼot jumpʼejl jach chʼʌmjaʼ.* 6 Juntiquil jach lac Dios yicʼot lac Tat bʌ ti lac pejtelel, jiñʌch jiñi ñumen ñuc bʌ bajcheʼ pejtelel yambʌlob, miʼ cʼʌñonla chaʼan miʼ mel i yeʼtel yicʼot an tiʼ pejtelel lac piʼʌlob.
7 Weno, jujuntiquilonla tsaʼ aqʼuentiyonla jiñi ñuc bʌ i yutslel Dios cheʼ bajcheʼ cʼamel tsiʼ tʼoxo Cristo ili majtañʌl. 8 Come jiñi Tsʼijbujel miʼ yʌl: «Cheʼ bʌ tsaʼ letsi majlel, tsiʼ pʌyʌ majlel xcʌjchelob, tsiʼ yʌcʼʌ wiñicob bajcheʼ majtañʌl». 9 Pero ¿chuqui yom i yʌl jiñi tʼan «tsaʼ letsi majlel»? ¿Mach ba yomic i yʌl chaʼan ti ñaxan tsaʼ jubi tilel ti lum? 10 Jiñi tsaʼ bʌ jubi tilel ñumen chanto tsaʼ letsi majlel bajcheʼ jiñi panchan, chaʼan miʼ tsʼʌctiyel tiʼ pejtelel chuqui an.
11 I tsiʼ cʌyʌ chaʼtiqui uxtiquil bajcheʼ apóstolob, chaʼtiqui uxtiquil bajcheʼ xʼaltʼañob, chaʼtiqui uxtiquil bajcheʼ xsubtʼañob, chaʼtiqui uxtiquil bajcheʼ xcʌnta tiñʌmeʼob yicʼot xcʌntesajob. 12 Tsiʼ yʌcʼʌyob chaʼan miʼ tojʼesʌntelob jiñi chʼujuloʼ bʌ, chaʼan miʼ coltʌntel yambʌlob yicʼot chaʼan miʼ pʼʌtʼesʌntel i bʌcʼtal Cristo 13 jinto cheʼ laj temeloñixla ti lac ñopoñel yicʼot ti jiñi toj bʌ lac ñaʼtʌbal tiʼ tojlel jiñi i Yalobil Dios, jinto cheʼ mi lac taj laj colel bajcheʼ juntiquil wiñic añix bʌ i ñaʼtʌbal yicʼot mi lac taj ti tsʼʌcʌl jiñi i chanlel Cristo. 14 Jin chaʼan, laʼ laj cʌy lac mel lac bʌ bajcheʼ alʌlob, mach la cʌcʼ lac bʌ ti ñijcʌntel yicʼot ti pʌjyel majlel tiʼ pejtelel jiñi cʌntesa tac lajal bʌ bajcheʼ icʼ yicʼot wecʼuña bʌ jaʼ, tiʼ caj jiñi wiñicob muʼ bʌ i cʼʌñob yac tac yicʼot wen yujilob jax bajcheʼ miʼ lotiñob yambʌlob. 15 Pero joñonla, cheʼ mi la cʌl chuqui i sujm, laʼ coliconla tiʼ pejtelel chuqui an chaʼan jiñi laj cʼuxbiya, chaʼan lajalonla bajcheʼ Cristo, jiñi lac jol. 16 Tiʼ tojlel Cristo, utsʼat bajcheʼ tac tsuyul jujunchajp am bʌ i chaʼan jiñi bʌcʼtalʌl i wocolix i yʌlʌ jiñi i pʼaquel tac muʼ bʌ i yʌcʼ chuqui tac i cʼʌjñibal miʼ coltañob i bʌ. Cheʼ bʌ jujunchajp am bʌ ti jiñi bʌcʼtalʌl weñʌch miʼ mel i yeʼtel, miʼ coltan chaʼan jiñi bʌcʼtalʌl xucʼul miʼ yajñel ti jiñi cʼuxbiya.
17 Jin chaʼan mic subeñetla i mij cʼajtibeñetla ti wocol tʼan tiʼ cʼabaʼ lac Yum chaʼan maʼañix mi laʼ bej chumtʌl cheʼ bajcheʼ jiñi mach bʌ judíojobic, chumuloʼ bʌ bajcheʼ an jiñi i ñaʼtʌbalob mach bʌ añic i cʼʌjñibal. 18 Icʼyochʼan baqui an jiñi i ñaʼtʌbalob i ñajt añob ti jiñi cuxtʌlel i chaʼan bʌ Dios tiʼ caj mach yomobic i cʌn yicʼot tsʌtsob i pusicʼal. 19 Come maʼañobix i quisin, miʼ yʌcʼob i bʌ tiʼ melol chuqui tac quisintic jax bʌ* yicʼot miʼ melob pejtelel chuqui tac bibiʼ bʌ, i yomobto i ñumen melob.
20 Pero jatetla maʼañic tsaʼ laʼ cʌñʌ chaʼan cheʼ yilal Cristo bajcheʼ jiñi, 21 mi i sujmʌch tsaʼ laʼ wubi i jiñʌch tsiʼ cʌntesayetla cheʼ bajcheʼ an jiñi i sujmlel am bʌ ti Jesús. 22 Jatetla tsaʼ pʌsbentiyetla chaʼan yom mi laʼ cʌy jiñi ñoxix bʌ laʼ melbal, ili jiñʌch bajcheʼ chumuletla ti wajali, come jiñi ñoxix bʌ laʼ melbal woliʼ ñumen asiñetla tiʼ caj chuqui bajñel laʼ wom muʼ bʌ i lotiñetla. 23 Yom mi laʼ bej tsijibtesan jiñi laʼ ñaʼtʌbal 24 i yom mi laʼ pʌs jiñi tsijiʼ bʌ laʼ melbal tsaʼ bʌ mejli cheʼ bajcheʼ yom Dios, cheʼ bajcheʼ an jiñi i sujm bʌ tojel yicʼot xucʼtʌlel.
25 Jin chaʼan, wʌle cheʼ tsaʼix laʼ cʌyʌ baqui jach bʌ lot, suben laʼ bʌ chuqui i sujm ti jujuntiquiletla, come tem chuculonla ti jumpʼejl bʌcʼtalʌl. 26 Cheʼ bʌ mi laʼ michʼan, mach laʼ chaʼlen mulil, mach yomic bej michʼettola cheʼ bʌ miʼ bʌjlel qʼuin. 27 Mach laʼ wis acʼ chaʼan jiñi Diablo miʼ ñijcañetla laʼ mel mach bʌ weñic. 28 Jiñi muʼ bʌ i chaʼlen xujchʼ, mach i chʌn chaʼlen xujchʼ, laʼ i chaʼlen tsʌts bʌ yicʼot wem bʌ eʼtel tiʼ cʼʌb i cheʼ bajcheʼ jiñi añʌch chuqui miʼ mejlel i yʌqʼuen jiñi i cʼʌjñibal bʌ i chaʼan. 29 Mach yomic miʼ loqʼuel ti laʼ wej tʼan tac muʼ bʌ i low yambʌlob. Pejtelel muʼ bʌ laʼ wʌl laʼ cʼʌjñibʌyic chaʼan miʼ pʼʌtʼan yambʌlob cheʼ bajcheʼ cʼamel yom yicʼot chaʼan miʼ tajob i wenlel jiñi muʼ bʌ i ñʌchʼtañetobla. 30 Cheʼ jaʼel, mach laʼ wʌqʼuen i chʼijyemlel jiñi chʼujul bʌ i yespíritu Dios, tsaʼ bʌ cʼʌjñi chaʼan mi laʼ wʌqʼuentel jiñi sello chaʼan jiñi qʼuin cheʼ bʌ miʼ tojtʌl laʼ coltʌntel.
31 Chocola loqʼuel pejtelel cʌlʌx michʼ pusicʼal, michʼajel, tsʌts bʌ tʼan, tʼan tac muʼ bʌ i low yambʌlob yicʼot pejtelel jontolil. 32 Yom utsetla laʼ wicʼot yambʌlob, pʌsben laʼ bʌ pʼuntaya, i yom mi laʼ ñusʌben laʼ bʌ laʼ mul tiʼ pejtelel laʼ pusicʼal, cheʼ bajcheʼ Dios tsiʼ ñusʌbeyetla laʼ mul tiʼ coltaya Cristo.