Efesios

5 Jin chaʼan, lajinla Dios cheʼ bajcheʼ cʼuxbibil bʌ i yalobilob 2 i tsajcanla jiñi bij chaʼan bʌ cʼuxbiya, cheʼ bajcheʼ Cristo tsiʼ cʼuxbiyonla* jaʼel i tsiʼ yʌcʼʌ i cuxtʌlel ti lac tojlel* bajcheʼ tsʌnsʌbil bʌ majtañʌl, wen xojocña bʌ i yujtsʼil tiʼ tojlel Dios.

3 Jiñi tsʼiʼlel,* baqui jach bʌ bibiʼlel yicʼot i wen mulʌntel chubʌʼan mach yomic mi laʼ wis al, cheʼ bajcheʼ yom miʼ melob jiñi chʼujuloʼ bʌ. 4 Cheʼ jaʼel, mach laʼ pʌs quisintic jax bʌ laʼ melbal, mach laʼ wʌl tʼan tac mach bʌ añic i sujmlel, mach laʼ chaʼlen alas tʼan yicʼot bʌ tsucu tʼan, pejtelel iliyi mach utsʼatic. Yom bʌ mi laʼ mel jiñʌch cheʼ mi laʼ wʌqʼuen wocolix i yʌlʌ Dios. 5 Come laʼ wujil yicʼot mi laʼ wen chʼʌmben i sujm chaʼan maʼañic mi caj i yʌqʼuentel i Yumʌntel Cristo yicʼot Dios mi juntiquilic xtsʼiʼlel bʌ,* mi juntiquilic bibiʼ bʌ yicʼot mi juntiquilic muʼ bʌ i wen mulan chubʌʼañʌl, lajal bʌ bajcheʼ i chʼujutesʌntel melbil jach bʌ dios.

6 Maʼañic majqui yom miʼ lotiñetla yicʼot tʼan tac mach bʌ añic i sujmlel, come tiʼ caj tac jiñi mi caj i tilel i michʼajel Dios tiʼ tojlel jiñi i yalobilob ñusatʼan. 7 Jin chaʼan, mach laʼ mel cheʼ bajcheʼ miʼ melob, 8 come ti wajali añetla baqui icʼyochʼan, pero wʌleʼli añetixla baqui sʌc jaman yicʼot i chaʼañetixla lac Yum. Chʌn ajñenla bajcheʼ i yalobilob sʌcjamañiyel, 9 come cheʼ chumulonla ti jiñi sʌcjamañiyel yom i yʌl chaʼan utsonla tiʼ pejtelel chuqui an, chaʼan tojonla yicʼot chumulonla cheʼ bajcheʼ an jiñi i sujmlel. 10 Chʌn qʼuelela chuqui miʼ mulan lac Yum, 11 i cʌyʌ laʼ mel jiñi mach bʌ añic i cʼʌjñibal tac tilem bʌ baqui icʼyochʼan. Acʼʌla ti cʌñol. 12 Come quisinticto mi la cʌl chuqui tac miʼ mucu melob. 13 Weno, pejtelel chuqui miʼ yʌjqʼuel ti cʌñol jiñʌch miʼ yʌcʼ ti cʌñol jiñi sʌcjamañiyel, come pejtelel muʼ bʌ i yʌjqʼuel ti cʌñol lajal bajcheʼ chuqui sʌc jaman. 14 Jin chaʼan miʼ yʌjlel: «Cañax a wut,* jatet wʌyʌlet bʌ, chʼojyen* yaʼ baqui an chʌmeñoʼ bʌ, i Cristo mi caj i yʌqʼueñet jiñi sʌclel».

15 Jin chaʼan, yom wen tsajaletla* chaʼan mach cheʼeticla bajcheʼ jiñi tontojoʼ bʌ, cheʼ yometla bajcheʼ jiñi añoʼ bʌ i ñaʼtʌbal, 16 cheʼ mi laʼ cʼʌn ti wen jiñi i yorajlel am bʌ laʼ chaʼan, come wocol bajcheʼ chumulonla ili qʼuin. 17 Jin chaʼan, cʼʌñʌxla laʼ ñaʼtʌbal i chʼʌmbenla i sujm chuqui jiñi yom bʌ Jehová.* 18 Cheʼ jaʼel, mach laʼ yʌqʼuesan laʼ bʌ* ti vino come mi caj i yʌqʼueñetla laʼ mel mach bʌ weñic, pero yom bej butʼuletla ti espíritu. 19 Comol pejcan laʼ bʌ* yicʼot salmo tac, cʼay tac muʼ bʌ i yʌqʼuen i ñuclel Dios yicʼot cʼay tac chaʼan bʌ chʼujutesaya, cʼʌyinla i aqʼuenla i ñuclel Jehová* ti laʼ pusicʼal, 20 tiʼ cʼabaʼ jiñi lac Yum Jesucristo, chʌn aqʼuenla wocolix i yʌlʌ jiñi lac Dios yicʼot lac Tat chaʼan pejtelel chuqui miʼ yʌqʼueñonla.

21 Jacʼben laʼ bʌ laʼ tʼan come mi laʼ wen qʼuel ti ñuc Cristo. 22 Jiñi ijñamʌlob yom miʼ chucob i bʌ tiʼ tojlelob i ñoxiʼal cheʼ bajcheʼ jiñi ñoxiʼalob miʼ chucob i bʌ ti lac Yum, 23 come jiñi wiñic i jolʌch i yijñam, cheʼ bajcheʼ Cristo i jolʌch jiñi congregación, xyaj coltaya i chaʼan ili bʌcʼtalʌl. 24 Tiʼ sujm, cheʼ bajcheʼ jiñi congregación chucul tiʼ tojlel Cristo, jiñi ijñamʌlob yom miʼ chucob i bʌ tiʼ tojlel i ñoxiʼal tiʼ pejtelel ora. 25 Ñoxiʼaletʌlbʌla, chʌn cʼuxbinla laʼ wijñam, cheʼ bajcheʼ Cristo tsiʼ cʼuxbi jaʼel jiñi congregación i tsiʼ yʌcʼʌ i bʌ tiʼ tojlel 26 chaʼan miʼ sujtesan ti chʼujul cheʼ miʼ sʌqʼuesan ti jaʼ, ili jiñʌch jiñi i tʼan Dios, 27 tsiʼ mele iliyi chaʼan jiñi congregación utsʼatax miʼ sujtel tiʼ wut. Yom chaʼan jiñi congregación chʼujul miʼ sujtel yicʼot chaʼan maʼañic chuqui mach bʌ weñic tiʼ tojlel.

28 Cheʼ jaʼel, jiñi wiñicob yom miʼ cʼuxbiñob i yijñam cheʼ bajcheʼ miʼ bajñel cʼuxbiñob i bʌcʼtal. Jiñi wiñic muʼ bʌ i cʼuxbin i yijñam woliʼ cʼuxbin i bʌ, 29 come maʼañic majqui tsʼaʼlebil i chaʼan i bʌcʼtal, miʼ weʼsan i miʼ cʌntan yicʼot cʼuxbiya, cheʼ bajcheʼ Cristo miʼ mel tiʼ tojlel jiñi congregación, 30 come junchajpoñʌchla am bʌ tiʼ bʌcʼtal. 31 «Jin chaʼan, jiñi wiñic mi caj i cʌy i tat i ñaʼ, mi caj i yajñel yicʼot i yijñam, i jiñi chaʼtiquilob mi caj i sujtelob ti juntiquil». 32 Ili chʼujul bʌ tʼan mucul bʌ ñucʌch. Wʌleʼli jiñix woli c taj ti tʼan Cristo yicʼot jiñi congregación. 33 Pero, jujuntiquiletla yom mi laʼ cʼuxbin laʼ wijñam cheʼ bajcheʼ mi laʼ bajñel cʼuxbin laʼ bʌ. I jiñi ijñamʌl yom miʼ wen qʼuel ti ñuc i ñoxiʼal.