Juan

16 «Tsaʼ c subeyetla iliyi chaʼan maʼañic mi laʼ sʌt laʼ ñopoñel.* 2 Mi caj laʼ chojquel loqʼuel yaʼ ti sinagoga. Tiʼ sujm, tal i yorajlel cheʼ bʌ pejtelel muʼ bʌ i tsʌnsañetla mi caj i ñaʼtañob chaʼan woliʼ melbeñob chʼujul bʌ i yeʼtel Dios. 3 Pero mi caj i melob pejtelel iliyi come maxto i cʌñʌyobic jiñi Tatʌl yicʼot maxto i cʌñʌyoñobic jaʼel. 4 Tsaʼ c subeyetla iliyi chaʼan cheʼ bʌ miʼ cʼotel i yorajlel chaʼan miʼ tsʼʌctiyel, mi laʼ cʼajtesan chaʼan tsaʼ c subeyetla».

«Maʼañic tsaʼ c subeyetla iliyi ti ñaxan come wʌʼto añon quicʼotetla. 5 Pero wʌleʼli mic majlel yaʼ baqui an jiñi tsaʼ bʌ i chocoyon tilel, i mi juntiquileticla mi laʼ cʼajtibeñon: ‹¿Baqui mi caj a majlel?›. 6 Pero tsaʼ laʼ wen taja laʼ chʼijyemlel tiʼ caj tsaʼ c subeyetla iliyi. 7 Mic subeñetla i sujmlel: Chaʼañʌch laʼ wenlel cheʼ mic majlel. Come mi maʼañic mic majlel, jiñi xcoltaya maʼañic mi caj i tilel ti laʼ tojlel, pero mi mucʼʌch c majlel, joñon mi caj c chocbeñetla tilel. 8 I cheʼ bʌ miʼ tilel, mi caj i jamʌ pʌsben pejtelel quixtañujob chuqui jiñi mulil, jiñi tojel yicʼot jiñi i meloñel Dios. 9 Ñaxan chaʼan jiñi mulil, come maʼañic miʼ pʌsob i ñopoñel tic tojlel, 10 cheʼ jiñi chaʼan jiñi tojel, come mi caj c majlel baʼan jiñi Tatʌl i jatetla maʼañix mi caj laʼ chʌn qʼuelon, 11 ti wiʼil chaʼan jiñi i meloñel Dios, come tsaʼix ujti meloñel tiʼ tojlel i yum ili pañimil».

12 «Cabʌlto chuqui yom mic subeñetla, pero maxto añic miʼ mejlel laʼ luʼ ñaʼtan. 13 Pero cheʼ bʌ miʼ tilel jiñi xcoltaya, jiñi chʼujul bʌ espíritu muʼ bʌ i coltan jiñi i sujmlel, mi caj i pʌsbeñetla pejtelel jiñi i sujmlel, come maʼañic mi caj i yʌl chuqui bajñel yom, mi caj i yʌl muʼ bʌ i yubin ti alol i mi caj i subeñetla chuqui tac mi caj i tilel. 14 Mi caj i ñuqʼuesañon come mi caj i chʼʌm jiñi c chaʼan bʌ i mi caj i subeñetla. 15 Pejtelel am bʌ i chaʼan jiñi Tatʌl c chaʼañʌch jaʼel. Jin chaʼan tsaʼ cʌlʌ chaʼan mi caj i chʼʌm jiñi c chaʼan bʌ i mi caj i tsictesʌbeñetla. 16 Tsʼitaʼ jachix yom chaʼan maʼañix mi laʼ qʼuelon, pero cheʼ jaʼel tsʼitaʼ jax yom chaʼan mi laʼ qʼuelon».

17 Cheʼ bʌ tsiʼ yubiyob, an xcʌntʼañob i chaʼan tsaʼ bʌ caji i subeñob i bʌ: «¿Chuqui yom i subeñonla cheʼ miʼ yʌl: ‹Tsʼitaʼ jax yom chaʼan maʼañix mi laʼ qʼuelon, pero cheʼ jaʼel tsʼitaʼ jax yom chaʼan mi laʼ qʼuelon›? ¿I cheʼ miʼ yʌl: ‹Come mi caj c majlel baʼan jiñi Tatʌl›?». 18 Tsiʼ yʌlʌyob: «¿Chuqui woliʼ taj ti tʼan cheʼ bʌ miʼ yʌl: ‹Tsʼitaʼ jax yom›? Mach lon cujilic chuqui woliʼ yʌl». 19 Come Jesús yujil chaʼan yom i melbeñob cʼajtiya tac, tiʼ subeyob: «¿Woli laʼ cʼajtiben laʼ bʌ chucoch tsaʼ cʌlʌ: ‹Tsʼitaʼ jax yom chaʼan maʼañix mi laʼ qʼuelon, pero cheʼ jaʼel tsʼitaʼ jax yom chaʼan mi laʼ qʼuelon›? 20 Tiʼ sujm mic subeñetla chaʼan jatetla mi laʼ cajel ti uqʼuel i mi caj laʼ wubin laʼ chʼijyemlel, pero jiñi pañimil tijicña mi caj i yubin, jatetla mi caj laʼ wubin i cʼuxel laʼ pusicʼal, pero jiñi i cʼuxel laʼ pusicʼal mi caj i sujtel ti tijicñʌyel. 21 Cheʼ bʌ woliʼ yilan pañimil i yalobil juntiquil xʼixic, cʼux miʼ yubin come tsaʼix cʼoti i yorajlel. Pero, cheʼ bʌ tsaʼix i yila pañimil i yalobil, jiñi tijicñʌyel muʼ bʌ i yubin cheʼ tsaʼ tili ti pañimil juntiquil lac piʼʌl miʼ yʌqʼuen i ñajʌtesan pejtelel wocol. 22 Cheʼʌch jatetla jaʼel. Wʌleʼli wen chʼijyemetla, pero mi caj c chaʼ qʼueletla, i jiñi laʼ pusicʼal mi caj i bujtʼel ti tijicñʌyel i maʼañic majch mi caj i mejlel i chilbeñetla jiñi laʼ tijicñʌyel. 23 I ti jiñi bʌ ora maʼañic mi caj laʼ melbeñon mi jumpʼejlic cʼajtiya. Tiʼ sujm mic subeñetla chaʼan jin jach chuqui mi laʼ cʼajtiben jiñi Tatʌl tij cʼabaʼ, mi caj i yʌqʼueñetla. 24 Cʼʌlʌl wʌleʼli maʼañic chuqui cʼajtibil laʼ chaʼan tij cʼabaʼ. Cʼajtinla i mi caj laʼ wʌqʼuentel, chaʼan tsʼʌcʌl jiñi laʼ tijicñʌyel».

25 «Tsaʼ j cʼʌñʌ lajiya tac chaʼan mic subeñetla iliyi. Tal jiñi i yorajlel cheʼ bʌ maʼañix mi caj j cʼʌn lajiya tac chaʼan mic pejcañetla, mi caj c jamʌ subeñetla chaʼan bʌ jiñi Tatʌl. 26 Ti jiñi bʌ ora mi caj laʼ cʼajtiben chuqui laʼ wom tij cʼabaʼ jiñi Tatʌl. Mach comic cʌl chaʼan joñon mi caj j cʼajtin ti laʼ tojlel. 27 Jatetla miʼ cʼuxbiñetla jiñi Tatʌl, come tsaʼ laʼ cʼuxbiyon i tsaʼ laʼ ñopo chaʼan tsaʼ tiliyon tiʼ wenta Dios. 28 Tsaʼ tiliyon ti pañimil tiʼ wenta jiñi Tatʌl. Wʌleʼli mij cʌy jiñi pañimil i mic majlel baʼan jiñi Tatʌl».

29 Jiñi xcʌntʼañob i chaʼan tiʼ subeyob: «Wʌleʼli jamʌ tsiquilix chuqui maʼ wʌl, maʼañix maʼ cʼʌn lajiya tac. 30 Wʌleʼli cujil lojon chaʼan laj a wujil i mach cʼʌñʌlic chaʼan an majqui miʼ cʼajtibeñet. Jin chaʼan mic ñop lojon chaʼan tsaʼ tiliyet ti Dios». 31 Jesús tsiʼ jacʼbeyob: «¿Muʼ ba laʼ ñop wʌleʼli? 32 Ubinla iliyi. Tal jiñi i yorajlel, tiʼ sujm tsaʼix juli, cheʼ bʌ mi caj laʼ pam pujquel. Jujuntiquil mi caj laʼ majlel ti laʼ wotot i mi caj laʼ bajñel cʌyon. Anquese mach c bajñelic, come an quicʼot jiñi Tatʌl. 33 Tsaʼ c subeyetla iliyi chaʼan mi laʼ taj laʼ ñʌchʼtʌlel tic tojlel. Mi caj laʼ ñusan wocol tac ti ili pañimil. Pero ¡yom chʼejletla!,* come joñon tsaʼix c mʌlbe* jiñi pañimil».