1 Tesalonicenses
5 Wʌle, hermanojob, mach i cʼʌjñibalic laʼ chaʼan mi laʼ tsʼijbubentel chaʼan bʌ jiñi i yorajlel wʌn waʼchocobilix bʌ, 2 come jatetla wen laʼ wujil chaʼan jiñi i qʼuiñilel Jehová* cheʼʌch mi caj i tilel bajcheʼ juntiquil xujchʼ ti acʼʌlel. 3 Cheʼ bʌ woliʼ yʌlob «Wʌle chumulonla ti ñʌchʼtʌlel yicʼot maʼañix chuqui bʌbʌqʼuen bʌ», cheʼ jiñi ti ora mi caj i jisʌntelob, cheʼ bajcheʼ miʼ waʼ tilel i cʼuxel muʼ bʌ i yubin juntiquil xʼixic muʼ bʌ i yʌcʼ ti pañimil i yalobil, i maʼañic bajcheʼ mi caj i putsʼelob. 4 Pero jatetla hermanojob maʼañeticla ti icʼyochʼañiyel chaʼan mach yʌxʌlic laʼ wo miʼ tajetla jiñi qʼuin, cheʼ bajcheʼ jiñi xujchʼob mach yʌxʌlobic i yoj miʼ sʌcʼan pañimil, 5 come pejtelel jatetla i yalobiletla sʌcjamañiyel yicʼot i yalobiletla qʼuiñil. Joñonla mach i chaʼañoñicla acʼʌlel mi jiñicto icʼyochʼañiyel.
6 Jin chaʼan mach wʌyiconla cheʼ bajcheʼ miʼ melob yambʌlob. Yom cañal lac wut* yicʼot laʼ laj cʼʌn ti wen lac ñaʼtʌbal. 7 Jiñi muʼ bʌ i wʌyelob, ti acʼʌlel miʼ wʌyelob, i jiñi muʼ bʌ yʌqʼuesañob i bʌ,* ti acʼʌlel yʌcob. 8 Pero joñonla, i chaʼañonbʌla qʼuiñil, laʼ laj cʼʌn ti wen lac ñaʼtʌbal i laʼ lac lʌp jiñi i mʌctʌjib lac tajn chaʼan bʌ jiñi ñopoñel yicʼot cʼuxbiya, yicʼot jiñi casco chaʼan bʌ lac pijtaya chaʼan laj coltʌntel, 9 come Dios maʼañic tsiʼ yajcayonla chaʼan mi lac tajtʌl ti jiñi michʼajel, chaʼañʌch mi lac taj laj coltʌntel tiʼ tojlel lac Yum Jesucristo. 10 Tsaʼ chʌmi chaʼañonla chaʼan mi lac chumtʌl la quicʼot, mach yʌlʌyic mi cañal lac wut o wʌyʌlonla.* 11 Jin chaʼan chʌn tijicñesan laʼ bʌ* yicʼot comol pʼʌtʼesan laʼ bʌ, cheʼ bajcheʼ wolix laʼ mel tilel.
12 Wʌle, hermanojob, mi lon j cʼajtibeñetla chaʼan mi laʼ qʼuel ti ñuc jiñi muʼ bʌ i chaʼleñob tsʌts bʌ eʼtel ti laʼ tojlel, miʼ tojʼesañetla majlel tiʼ chaʼan bʌ lac Yum i miʼ tiqʼuetobla. 13 Ñumen pʌsbenla i yutslel laʼ pusicʼal yicʼot laʼ cʼuxbiya chaʼan jiñi eʼtel muʼ bʌ i melob. Yom mi laʼ wajñel ti laʼ ñʌchʼtʌlel laʼ wicʼot yambʌlob. 14 Cheʼ jaʼel, hermanojob, mij cʼajtibeñet lojon ti wocol tʼan chaʼan mi laʼ ticʼ jiñi xñusatʼañoʼ bʌ, ñuqʼuesʌbenla i pusicʼal jiñi wen chʼijyemoʼ bʌ, coltanla jiñi cʼuñoʼ bʌ yicʼot yom mi laʼ pʌs laʼ pijt tiʼ tojlel pejtelel lac piʼʌlob. 15 Wen qʼuelela chaʼan maʼañic majqui miʼ chaʼ sutqʼuin chuqui miʼ tumbentel. Chaʼlenla wersa laʼ melben laʼ bʌ chuqui wen yicʼot melela tiʼ tojlel yambʌlob.
16 Yom tijicñayetla tiʼ pejtelel ora. 17 Chʌn chaʼlenla oración. 18 Aqʼuenla wocolix i yʌlʌ Dios chaʼan pejtelel chuqui an. Ili jiñʌch jiñi yom bʌ Dios ti laʼ tojlel ti Cristo Jesús. 19 Mach laʼ yʌpben i cʼʌcʼal jiñi espíritu. 20 Mach laʼ tsʼaʼlen jiñi profecía tac. 21 Wen qʼuelela mi i sujmʌch pejtelel chuqui an i tsʌts chucu laʼ bʌ ti chuqui wen. 22 Mach laʼ mel mi junchajpic jontolil.
23 Laʼ i junyajl sʌqʼuesañetla jiñi Dios chaʼan bʌ ñʌchʼtʌlel. Hermanojob, jiñi laʼ melbal tac muʼ bʌ laʼ pʌs, laʼ cuxtʌlel yicʼot laʼ bʌcʼtal yom sʌc miʼ yajñel cʼʌlʌl cheʼ bʌ wʌʼix an* jiñi lac Yum Jesucristo. 24 Xucʼulʌch jiñi muʼ bʌ i pʌyetla i mucʼʌch caj i mel.
25 Hermanojob, chʌn chaʼlenla oración ti lon c tojlel.
26 Tsʼujtsʼunla pejtelel jiñi hermanojob cheʼ bʌ mi laʼ chaʼleñob ti saludar.*
27 Tiʼ cʼabaʼ lac Yum mic subeñetla chaʼan ili carta yom miʼ pejcʌbentel pejtelel hermanojob.
28 Laʼ ajñic ti laʼ tojlel jiñi ñuc bʌ i yutslel lac Yum Jesucristo.