«Yom chajpʌbiletla tiʼ pejtelel ora» chaʼan i qʼuiñilel Jehová

 1. ¿Chuqui yom mi lac mel chaʼan cuxul mi laj cʌytʌl cheʼ bʌ miʼ tilel i qʼuiñilel Jehová?

JIÑI Biblia miʼ cʼʌn jiñi tʼan «i qʼuiñilel Jehová» chaʼan miʼ tajeʼ ti tʼan cheʼ baʼ ora mi cajel i jisan i contrajob yicʼot chaʼan bajcheʼ mi caj i coltan i tejclum. Jehová añix i mele ti wajali cheʼ bʌ tsiʼ jisa tejclum tac (Is. 13:1, 9; Jl. 2:1; Sof. 1:8). Jiñi «i qʼuiñilel Jehová» wen lʌcʼʌlix an, mi caj i tejchel cheʼ bʌ miʼ contrajintel jiñi Ñuc bʌ Babilonia i mi caj i yujtel ti Armagedón. Chaʼan cuxul mi laj cʌytʌl yomʌch mi lac chajpan lac bʌ ili ora. Jesús tsiʼ pʌsʌ chaʼan yom chajpʌbilonla tiʼ pejtelel ora cheʼ bʌ miʼ tilel «i yorajlel cabʌl wocol» (Luc. 12:40; Mat. 24:21).

 2. ¿Chucoch yomʌch mi lac wen qʼuel jiñi ñaxam bʌ carta chaʼan Tesalonicenses?

² Yaʼ ti ñaxam bʌ carta chaʼan Tesalonicenses, Pablo tsiʼ cʼʌñʌ lajiya tac chaʼan miʼ coltan jiñi xñoptʼañob chaʼan chajpʌbilob cheʼ bʌ miʼ tilel i qʼuiñilel Jehová. Cheʼ bʌ Pablo tiʼ tsʼijbu ili carta yujil chaʼan jalto yom chaʼan miʼ tilel i qʼuiñilel Jehová, pero tiʼ sube jiñi xñoptʼañob chaʼan yom wen chajpʌbilob, lajal bajcheʼ wolix (choncolix) i cʼotel jiñi qʼuin (2 Tes. 2:1-3). Joñonla jaʼel yom mi lac jacʼ ili ticʼojel. Mi caj laj qʼuel chuqui tsiʼ yʌlʌ chaʼan bajcheʼ mi caj i tilel jiñi i qʼuiñilel Jehová, majqui mi caj i jisʌntelob yicʼot bajcheʼ miʼ mejlel lac chajpan lac bʌ.

 3. ¿Chucoch mi la cʌl chaʼan jiñi i qʼuiñilel Jehová mi caj i tilel bajcheʼ juntiquil xujchʼ ti acʼʌlel? (Qʼuele jaʼel jiñi dibujo).

³ «Bajcheʼ juntiquil xujchʼ ti acʼʌlel» (1 Tes. 5:2). Ili jiñʌch jiñi ñaxam bʌ lajiya muʼ bʌ i cʼʌn Pablo chaʼan miʼ yʌl bajcheʼ mi caj i tilel jiñi i qʼuiñilel Jehová. Cheʼ bʌ miʼ yochel juntiquil xujchʼ ti la cotot mach pijtʌbilic lac chaʼan i ti ora jach miʼ yochel. Lʌcʼʌ lajal mi caj i yujtel cheʼ bʌ miʼ tilel i qʼuiñilel Jehová, orajach mi caj i tilel i mach yʌxʌlic i yoj jiñi lac piʼʌlob. Tajol muʼto caj i toj sajtel lac pusicʼal jaʼel, pero maʼañic chuqui mi caj lac chaʼlen, cojach mi caj i jisʌntelob jiñi jontoloʼ bʌ.

 4. ¿Chucoch mi la cʌl chaʼan jiñi i qʼuiñilel Jehová mi caj i tilel cheʼ bajcheʼ i cʼuxel muʼ bʌ i yubin juntiquil xʼixic muʼ bʌ i yʌcʼ ti pañimil i yalobil?

⁴ Cheʼ bajcheʼ «i cʼuxel muʼ bʌ i yubin juntiquil xʼixic muʼ bʌ i yʌcʼ ti pañimil i yalobil» (1 Tes. 5:3). Juntiquil xʼixic embarazada bʌ mach ñoj yujilic jala o bajcheʼ ora mi caj i yʌcʼ ti pañimil jiñi i yalobil, pero yujil chaʼan mucʼʌch caj i tilel. Jiñi bʌ qʼuin mach pijtʌbilic i chaʼan mi caj i cʼotel, wen cʼux miʼ cajel i maʼañic chuqui mi caj i mʌctan chaʼan miʼ yujtel. Lʌcʼʌ lajal mi caj i yujtel ti jiñi i qʼuiñilel Jehová, mach la cujilic jala mi caj i tilel, pero la cujil chaʼan talʌch. I la cujil chaʼan Jehová mi caj i laj jisan jiñi jontoloʼ bʌ, maʼañic majqui mi caj i putsʼel.

 5. ¿Chucoch mi la cʌl chaʼan jiñi ñuc bʌ wocol lajal bajcheʼ miʼ sʌcʼan pañimil?

⁵ Cheʼ bajcheʼ miʼ sʌcʼan pañimil. Pablo miʼ chaʼ taj ti tʼan jiñi xujchʼob ti acʼʌlel, pero wʌleʼli miʼ yʌl chaʼan i qʼuiñilel Jehová lajalʌch bajcheʼ miʼ sʌcʼan pañimil (1 Tes. 5:4). Jiñi xujchʼob maʼañic miʼ taj i qʼuelob chaʼan wolix (yʌquelix) ti sʌcʼan pañimil i chaʼan mi caj i tajtʌlob. Cheʼʌch mi caj i yujtel jaʼel cheʼ miʼ tilel jiñi ñuc bʌ wocol. Jiñi lac piʼʌlob woli bʌ i melob mach tac bʌ weñic, mi caj i tajtʌlob. Pero joñonla mach cheʼoñicla bajcheʼob, chajpʌbilonla chaʼan jiñi i qʼuiñilel Jehová. ¿Bajcheʼ? Maʼañic mi lac mel chuqui tac muʼ bʌ i tsʼaʼlen Jehová, i mi lac chaʼlen wersa chaʼan utsonla, tojonla yicʼot chaʼan mi la cajñel tiʼ sujmlel (Efes. 5:8-12). Wʌle mi caj laj qʼuel chaʼpʼejl lajiya muʼ bʌ i cʼʌn Pablo chaʼan miʼ taj ti tʼan jiñi muʼ bʌ caj i jisʌntelob cheʼ tiʼ qʼuiñilel Jehová.

 6. ¿Chucoch mi la cʌl chaʼan lʌcʼʌ tiʼ pejtelel lac piʼʌlob wʌyʌlob? (1 Tesalonicenses 5:6, 7).

⁶ «Jiñi muʼ bʌ i wʌyelob» (pejcan 1 Tesalonicenses 5:6, 7). Pablo tsiʼ yʌlʌ chaʼan jiñi muʼ bʌ caj i jisʌntelob tiʼ qʼuiñilel Jehová, lajal bajcheʼ wʌyʌlob come cheʼ bʌ wʌyʌlonla maʼañic mi la cubin miʼ ñumel jiñi hora miʼ muqʼuicto la cubin chuqui miʼ yujtel ti lac joytʌlel, i jin chaʼan maʼañic chuqui mi lac mel. I cheʼʌch miʼ yujtel jaʼel tiʼ tojlel jiñi la c piʼʌlob ili ora, lajal bajcheʼ wʌyʌlob come maʼañic miʼ ñaʼtañob chaʼan chumuloñixla ti cojix bʌ qʼuin i chaʼan wen lʌcʼʌlix jiñi ñuc bʌ wocol (Rom. 11:8). An lac piʼʌlob mucʼʌch bʌ i poj jamob i wut cheʼ miʼ qʼuelob chaʼan an chuqui woliʼ yujtel ti pañimil, i yaʼi miʼ poj mulañob i ñʌchʼtan jiñi wen tʼan, pero jumucʼ jach i miʼ chaʼ cʌyob, lajal bajcheʼ miʼ chaʼ ochelob i wʌyel. I anto yujiloʼ bʌ chaʼan tal i qʼuiñilel meloñel, pero miʼ ñaʼtañob chaʼan jalto yom (2 Ped. 3:3, 4). Joñonla la cujil chaʼan wen ñuc i cʼʌjñibal cheʼ chʌn cañal lac wut (pʼixilonla).

 7. ¿Chucoch lajal bajcheʼ yʌcob jiñi muʼ bʌ caj i jisʌntelob?

⁷ «Jiñi muʼ bʌ yʌqʼuesañob i bʌ». Jiñi apóstol Pablo tsiʼ yʌlʌ chaʼan jiñi muʼ bʌ caj i jisʌntelob lajal bajcheʼ yʌcob (qʼuixiñob). Jiñi yʌcoʼ bʌ maʼañic miʼ ñaʼtañob pañimil i miʼ melob chuqui mach bʌ weñic. Jiñi muʼ bʌ caj i jisʌntelob lajal bajcheʼ yʌcob come miʼ ñusʌbeñob i tʼan Dios i miʼ melob chuqui mach bʌ weñic. Jin chaʼan, Pablo tiʼ sube jiñi xñoptʼañob chaʼan yom miʼ cʼʌñob ti wen i ñaʼtʌbal yom cʼajalob i yo, mach cheʼic yomob bajcheʼ xyʌcʼʌjel (1 Tes. 5:6). Miʼ yʌjlel chaʼan cheʼ cʼajal la co yom i yʌl chaʼan wen añonla yicʼot mi laj cʼʌn ti wen jiñi lac ñaʼtʌbal. Ili miʼ coltañonla chaʼan wen chuqui mi lac yajcan lac mel. ¿Chucoch ñuc i cʼʌjñibal chaʼañonla iliyi? Come mach wocolic chaʼan mi lac tech la cotsan lac bʌ ti política o ti chuqui tac woliʼ yujtel wʌʼ ti pañimil (mulawil). I muʼto caj i ñumen tsʌtsʼan iliyi come woliʼ ñumen lʌcʼtiyel majlel jiñi i qʼuiñilel Jehová. Pero mach yomic mi lac wen pensarin come Jehová mi caj i coltañonla yicʼot jiñi chʼujul bʌ i yespíritu chaʼan wen muʼ bʌ lac yajcan lac mel (Luc. 12:11, 12).

 8. Cheʼ bajcheʼ miʼ yʌl 1 Tesalonicenses 5:8, ¿chuqui yom an lac chaʼan chaʼan cañal lac wut yicʼot mi lac chʌn cʼʌn lac ñaʼtʌbal? (Qʼuele jaʼel jiñi dibujo).

⁸ «Laʼ lac lʌp jiñi i mʌctʌjib lac tajn […] yicʼot jiñi casco». Pablo tsiʼ yʌlʌ chaʼan lajalonla bajcheʼ juntiquil soldado wen chajpʌbil bʌ chaʼan jiñi guerra yicʼot wen yʌxʌl bʌ i yo (pejcan 1 Tesalonicenses 5:8). Joñonla jaʼel yomʌch chajpʌbilonla chaʼan jiñi i qʼuiñilel Jehová, ¿bajcheʼ? Jiñʌch cheʼ mi lac lʌp jiñi i mʌctʌjib lac tajn chaʼan bʌ jiñi ñopoñel yicʼot cʼuxbiya yicʼot jiñi casco chaʼan bʌ lac pijtaya. Ili melbal tac wen ñucʌch i cʼʌjñibal.

 9. ¿Bajcheʼ miʼ cʌntañonla jiñi lac ñopoñel?

⁹ Jiñi i mʌctʌjib lac tajn jiñʌch jiñi lac ñopoñel yicʼot jiñi cʼuxbiya, i miʼ cʌntan lac pusicʼal. Ili melbal tac miʼ coltañonla chaʼan mi lac bej melben i yeʼtel Jehová yicʼot Jesús, yicʼot miʼ coltañonla lac ñop chaʼan Jehová mucʼʌch caj i yʌqʼueñonla lac majtan cheʼ mi lac bej melben i yeʼtel (Heb. 11:6). Cheʼ jaʼel, miʼ coltañonla chaʼan xucʼulonla tiʼ tojlel Jesús anquese an wocol tac. Chaʼan mi lac pʼʌtʼesan lac ñopoñel i mi laj cuch jiñi wocol tac, laʼ laj cʌn tiʼ tojlel jiñi hermanojob am bʌ i lʌtʼʌyob tsʼaʼlentel o wocol tiʼ caj taqʼuin. I chaʼan maʼañic mi lac tech lac mulan chuqui tac an, laʼ lac lajin jiñi hermanojob ñaxam bʌ miʼ yʌcʼob i Yumʌntel Dios yicʼot mach bʌ cabʌlic chuqui añob i chaʼan.b

10. ¿Bajcheʼ miʼ coltañonla jiñi laj cʼuxbiya ti Dios yicʼot tiʼ tojlel lac piʼʌlob?

¹⁰ Chaʼan cañal lac wut yicʼot mi lac chʌn cʼʌn lac ñaʼtʌbal yomʌch an laj cʼuxbiya (Mat. 22:37-39). Jiñi laj cʼuxbiya ti Dios miʼ ñijcañonla chaʼan mi lac bej chaʼlen subtʼan anquese wocolʌch (2 Tim. 1:7, 8). Cheʼ jaʼel, jiñi laj cʼuxbiya tiʼ tojlel lac piʼʌlob miʼ ñijcañonla chaʼan mi lac bej subeñob jiñi wen tʼan i mi lac sʌclan bajcheʼ mi lac mel, ti teléfono o ti carta. Maʼañic mi lac ñaʼtan chaʼan maʼañix baʼ ora mi caj i qʼuextañob i melbal (chaʼlibal). Mi lac pijtan chaʼan ti jumpʼejl bʌ qʼuin miʼ tech i melob chuqui wen (Ez. 18:27, 28).

11. ¿Bajcheʼ miʼ coltañonla cheʼ mi laj cʼuxbin la quermañujob? (1 Tesalonicenses 5:11).

¹¹ Mi laj cʼuxbiñob jaʼel jiñi la quermañujob, jin chaʼan mi laj coltañob yicʼot mi lac ñuqʼuesʌbeñob i pusicʼal (pejcan 1 Tesalonicenses 5:11). Lajal bajcheʼ ti jumpʼejl guerra, jiñi soldadojob miʼ lajal coltañob i bʌ, pero tajol mucʼʌch i taj i jatsʼob i bʌ anquese mach yalo yomobic i mel. Joñonla jaʼel, maʼañic baʼ ora la com lac low la quermañujob mi muqʼuic caj lac chaʼ sutqʼuin mi an chuqui mi lac melbentel (1 Tes. 5:13, 15). Yambʌ bajcheʼ mi lac pʌs chaʼan mi laj cʼuxbin la quermañujob jiñʌch cheʼ mi laj qʼuelob ti ñuc jiñi waʼchocobiloʼ bʌ ti congregación (1 Tes. 5:12). Laʼcu lac ñaʼtan jiñi congregación ti Tesalónica. Cheʼ bʌ Pablo tsiʼ chocbe majlel jiñi ñaxam bʌ i carta an jaxto cheʼ bʌ jumpʼejl jab i waʼchocontel jiñi congregación, i tajol jiñi ancianojob maxto wen añobic i experiencia yicʼot tsiʼ tajayob i sajtemal, pero yomʌch miʼ qʼuejlelob ti ñuc. Jiñi ñuc bʌ wocol woliʼ ñumen lʌcʼtiyel majlel, tajol jiñi central mundial yicʼot jiñi sucursal tac maʼañix mi caj i mejlel i pejcañob jiñi congregación, i jiñi ancianojob tajol jiñobʌch muʼ bʌ caj i coltañoñobla. Jin chaʼan, yom mi laj cʼuxbiñob yicʼot mi laj qʼuelob ti ñuc ili ora. Mach yʌlʌyic chuqui miʼ yujtel, laʼ lac bej cʼʌn lac ñaʼtʌbal i mach jin jach mi laj qʼuel chuqui mach bʌ weñic miʼ mel jiñi ancianojob, laʼ laj cʼajtesan chaʼan Jehová, tiʼ tojlel Jesucristo, jin woliʼ tojʼesañob majlel ili xucʼul bʌ wiñicob.

12. ¿Bajcheʼ miʼ coltañonla jiñi lac pijtaya?

¹² Jiñi casco miʼ cʌntʌben i jol jiñi soldado, cheʼʌch jaʼel jiñi lac pijtaya, miʼ cʌntan lac ñaʼtʌbal, ¿bajcheʼ? Miʼ coltañonla laj qʼuel chaʼan pejtelel am bʌ ila ti pañimil maʼañic i cʼʌjñibal (Filip. 3:8). Cheʼ jaʼel, jiñi lac pijtaya miʼ coltañonla chaʼan maʼañic mi laj cʌlʌx mel lac pusicʼal. Jiñʌch muʼ bʌ laj cʌn tiʼ tojlel Wallace yicʼot Laurinda woliyoʼ bʌ ti coltaya ti África. Juntiquil tsaʼ chʌmi i papá, i jiñi yambʌ i mamá. I ti uxpʼejl jach semana tsaʼ ujti iliyi. Pero tiʼ caj jiñi COVID-19 maʼañic tsaʼ mejliyob ti majlel chaʼan miʼ yajñelob yicʼot i familia. Wallace miʼ yʌl: «Jiñi pijtaya chaʼan chaʼ chʼojyel miʼ wen coltañon. Muʼ bʌ c ñaʼtan mach jiñic bajcheʼ yilal tsiʼ ñusayob cheʼ bʌ muqʼuix caj i chʌmelob, jiñʌch bajcheʼ yilalob cheʼ bʌ mi caj i chaʼ chʼojyelob yaʼ ti tsijiʼ bʌ pañimil. Ili miʼ yʌqʼueñon i ñʌchʼtʌlel c pusicʼal i chaʼan maʼañic mij cʌlʌx ubin c chʼijyemlel».

13. ¿Chuqui yom mi lac mel chaʼan mi lac taj jiñi chʼujul bʌ espíritu?

¹³ «Mach laʼ yʌpben i cʼʌcʼal jiñi espíritu» (1 Tes. 5:19). Yicʼot ili tʼan, Pablo tsiʼ laji jiñi chʼujul bʌ espíritu bajcheʼ jumpʼejl cʼajc am bʌ ti lac malil. Ili miʼ ñijcañonla yicʼot miʼ yʌqʼueñonla lac chʼejlel chaʼan mi lac mel chuqui wem bʌ i chaʼan mi lac chaʼlen wersa lac melben i yeʼtel Jehová (Rom. 12:11). Pero ¿bajcheʼ mi lac taj? Yom mi laj cʼajtiben Jehová ti oración, mi lac pejcan jiñi Biblia yicʼot lʌcʼʌl mi la cajñel tiʼ yorganización. Cheʼ bajcheʼ jiñi, mi caj lac taj jiñi melbalʌl tac muʼ bʌ i yʌcʼ jiñi espíritu (Gál. 5:22, 23).

14. ¿Chuqui mach yomic mi lac mel mi la com chaʼan Jehová miʼ bej aqʼueñonla i yespíritu? (Qʼuele jaʼel jiñi foto tac).

¹⁴ Jehová miʼ yʌqʼueñonla i yespíritu, pero chaʼan maʼañic mi lac sʌt, yom mi laj cʌntan lac bʌ chaʼan maʼañic miʼ yochel mach bʌ weñic lac ñaʼtʌbal. Jin chaʼan, yom sʌc lac melbal yicʼot chuqui mi lac ñaʼtan chaʼan maʼañic miʼ yʌjpel i cʼʌcʼal jiñi espíritu (1 Tes. 4:7, 8). Cheʼ jaʼel, Pablo tsiʼ yʌlʌ: «Mach laʼ tsʼaʼlen jiñi profecía tac» (1 Tes. 5:20). Jiñi «profecía tac» muʼ bʌ i yʌl ili versículo jiñʌch jiñi tʼan tac albil bʌ i chaʼan Dios, bajcheʼ chaʼan lʌcʼʌlix jiñi i qʼuiñilel Jehová yicʼot chuqui tac mi caj i yujtel ti jiñi bʌ qʼuin. Maʼañic mi lac ñaʼtan chaʼan jalto yom chaʼan miʼ tilel jiñi i qʼuiñilel Jehová o chaʼan mach laj qʼueleyic Armagedón. Chʌn cʼajal lac chaʼan ili qʼuin, jin chaʼan mi lac chaʼlen wersa chaʼan wen lac melbal yicʼot chaʼan mi lac pʌs lac «xucʼtʌlel ti Dios» ti jujumpʼejl qʼuin (2 Ped. 3:11, 12).

15. ¿Chuqui yom mi lac mel chaʼan maʼañic majqui miʼ lotiñonla? (1 Tesalonicenses 5:21).

¹⁵ Tsʼitaʼ jax yom chaʼan jiñi i contrajob Dios mi caj i yʌlob: «Wʌle chumulonla ti ñʌchʼtʌlel yicʼot maʼañix chuqui bʌbʌqʼuen bʌ» (1 Tes. 5:3). Jiñi xibajob mi caj i pucob tʼan tac mach bʌ i sujmic muʼ bʌ caj i lotin lʌcʼʌ tiʼ pejtelel lac piʼʌlob (Apoc. 16:13, 14). ¿Muʼ ba caj la cʌcʼ lac bʌ ti lotintel jaʼel? Maʼañic. Pero yom mi lac jacʼ ili ticʼojel: «Wen qʼuelela mi i sujmʌch» (pejcan 1 Tesalonicenses 5:21). Ti griego, jiñi tʼan muʼ bʌ i chaʼlentel ti traducir «wen qʼuelela» miʼ cʼʌjñel cheʼ bʌ juntiquil lac piʼʌl yom miʼ wen qʼuel o miʼ tsajin chaʼan jiñi muʼ bʌ caj i mʌn, bajcheʼ oro o plata mero jiñʌchi, i mach woli jach i lotintel. Cheʼʌch yom mi lac mel jaʼel. Yom mi lac wen qʼuel miʼ sujmʌch jiñi woli bʌ lac subentel o jiñi woli bʌ lac pejcan. Jiñi hermanojob ti Tesalónica jiñʌch yom bʌ miʼ melob. Pero ñumento yom mi lac mel ili ora, come woliʼ lʌcʼtiyel tilel jiñi ñuc bʌ wocol. Yom mi laj cʼʌn lac ñaʼtʌbal i maʼañic mi lac waʼ ñop pejtelel chuqui mi lac subentel. Yom mi lac wen qʼuel mi jiñi woli bʌ i yʌjlel cheʼʌch an bajcheʼ miʼ yʌl jiñi Biblia yicʼot i yorganización Jehová, cheʼ bajcheʼ jiñi maʼañic mi caj lac lotintel ti xibajob (Pr. 14:15; 1 Tim. 4:1).

16. ¿Baqui bʌ jiñi pijtaya am bʌ lac chaʼan, i chuqui yom mi lac mel ili ora?

¹⁶ La cujil chaʼan jiñi i tejclum Jehová maʼañic mi caj i jilel ti jiñi ñuc bʌ wocol, pero mach la cujilic chuqui mi caj i yujtel ti lac tojlel ijcʼʌ chaʼbi majlel (Sant. 4:14). Pero Jehová mi caj i yʌqʼueñonla laj cuxtʌlel miʼ xucʼulonla tiʼ tojlel. Jiñi junmojt yajcʌbiloʼ bʌ mi caj i majlelob ti panchan, i jiñi yambʌ tʌñʌmeʼob mi caj i chumtʌlob ti jumpʼejl paraíso wʌʼ ti Pañimil. Jin chaʼan, laʼ la cʌcʼ lac ñaʼtʌbal ti jiñi lac pijtaya i laʼ lac chajpan lac bʌ chaʼan jiñi i qʼuiñilel Jehová.