Mateo
16 Tsaʼ tili jiñi fariseojob yicʼot saduceojob, i chaʼan miʼ qʼuelbeñob i pusicʼal tiʼ subeyob chaʼan miʼ mel jumpʼejl milagro tiʼ cʼabaʼ Dios. 2 Jesús tsiʼ jacʼbeyob: «Cheʼ ti ochʼajel qʼuin mi laʼ wʌl: ‹Maʼañic miʼ cajel jaʼal come wen chʌchʌc jiñi panchan›. 3 I cheʼ ti sʌcʼan mi laʼ wʌl: ‹Wʌle miʼ cajel tsʌñal yicʼot jaʼal come wen chʌchʌc jiñi panchan pero mʌcʌl jaʼel›. Mi laʼ ñaʼtan i sujmlel bajcheʼ yilal jiñi panchan, pero maʼañic mi laʼ ñaʼtan i sujmlel muʼ tac bʌ i yujtel ti ili ora. 4 Ili lac piʼʌlob mach bʌ xucʼulobic* yicʼot jontoloʼ bʌ woliʼ chʌn cʼajtiñob i qʼuel i yejtal* c pʼʌtʌlel. Pero maʼañic mi caj i pʌsbentelob, cojach jiñi milagro tsaʼ bʌ ujti tiʼ tojlel jiñi xʼaltʼan Jonás». Cheʼ jiñi tsiʼ cʌyʌyob i tsaʼ majli.
5 Cheʼ jiñi, tsaʼ cʼaxiyob tiʼ junwejlel mar, pero jiñi xcʌntʼañob i chaʼan tsaʼ ñajʌyi i chaʼañob i chʼʌmob majlel pan. 6 Jesús tiʼ subeyob: «Yom wen jamʌl laʼ wut yicʼot cʌntan laʼ bʌ tiʼ levadura jiñi fariseojob yicʼot saduceojob». 7 Jin chaʼan tsaʼ caji i subeñob i bʌ: «Maʼañic tsaʼ lac chʼʌmʌ tilel pan». 8 Pero cheʼ bʌ Jesús tsiʼ qʼuele, tiʼ subeyob: «Wiñicob maʼañic bʌ mi laʼ wen ñop, ¿chucoch woli laʼ comol al chaʼan maʼañic tsaʼ laʼ chʼʌmʌ tilel pan? 9 ¿Maxto ba añic mi laʼ ñaʼtan chuqui woli cʌl? ¿Mach ba cʼajalix laʼ chaʼan jiñi joʼpʼejl pan tsaʼ bʌ jastiyi chaʼan mi lac weʼsan 5 mil wiñicob yicʼot jaypʼejl chiquib tsaʼ colobʌyi? 10 ¿Tsaʼix ba ñajʌyi laʼ chaʼan jiñi 7 pan tsaʼ bʌ jastiyi chaʼan mi lac weʼsan 4 mil wiñicob yicʼot jaypʼejl colem chiquib tsaʼ colobʌyi? 11 ¿Bajcheʼqui maʼañic tsaʼ laʼ cʌñʌ chaʼan mach jiñic woli c taj ti tʼan jiñi pan? Tsaʼ bʌ c subeyetla jiñʌch chaʼan yom mi laʼ cʌntan laʼ bʌ tiʼ levadura jiñi fariseojob yicʼot saduceojob». 12 Cheʼʌch tsaʼ cʼoti i chʼʌmbeñob i sujm chaʼan mach jiñic tiʼ levadurajlel jiñi pan yom miʼ cʌntañob i bʌ, jiñʌch tiʼ cʌntesa tac jiñi fariseojob yicʼot saduceojob.
13 Cheʼ bʌ tsaʼ cʼotiyob yaʼ ti Cesarea chaʼan Filipo, Jesús tsiʼ cʼajtibe jiñi xcʌntʼañob i chaʼan: «¿Majqui jiñi i Yalobil wiñic miʼ yʌlob jiñi lac piʼʌlob?». 14 Tsiʼ jacʼʌyob: «An muʼ bʌ i yʌlob chaʼan jiñʌch Juan jiñi Xʼacʼ chʼʌmjaʼ. Yambʌlob miʼ yʌlob chaʼan Elías. I an yambʌlob muʼ bʌ i yʌlob chaʼan jiñʌch Jeremías o yambʌ xʼaltʼan». 15 Tiʼ subeyob: «Ixcu jatetla, ¿majquiyon mi laʼ wʌl?». 16 Simón Pedro tsiʼ jacʼbe: «Jatetʌch jiñi Cristo, i Yalobil jiñi cuxul bʌ Dios». 17 Jesús tiʼ sube: «Taja a tijicñʌyel Simón, i yalobil Jonás, come mach juntiquilic quixtañu tiʼ subeyet, jiñʌch jiñi c Tat am bʌ ti panchan. 18 Mic subeñet jaʼel: Jatetʌch Pedro, i tiʼ pam ili xajlel* mi caj c waʼchocon jiñi j congregación, i jiñi i pʼʌtʌlel chʌmel* maʼañic mi caj i mʌlben.* 19 Joñon mi caj cʌqʼueñet i llavejlel jiñi i Yumʌntel panchan. Chuqui jach maʼ cʌch wʌʼ ti lum cʌchbilix jaʼel yaʼ ti panchan, i chuqui jach maʼ tic wʌʼ ti lum ticbilix jaʼel yaʼ ti panchan». 20 Cheʼ jiñi, tsiʼ tiqʼui jiñi xcʌntʼañob chaʼan maʼañic majqui miʼ subeñob chaʼan jiñʌch jiñi Cristo.
21 Ti jimbʌ ora, Jesús tsaʼ caji i suben jiñi xcʌntʼañob chaʼan yom miʼ majlel ti Jerusalén i mi caj i ñusan cabʌl wocol tiʼ tojlel jiñi ancianojob, jiñi ñuc bʌ sacerdotejob yicʼot xtsʼijbayajob. Cheʼ jaʼel, mi caj i tsʌnsʌntel i tiʼ yuxpʼejlel qʼuin mi caj i chaʼ chʼojyesʌntel.* 22 Pedro tsiʼ bajñel pʌyʌ majlel i tsaʼ caji i ticʼ: «¡C Yum, mach a wʌl jiñi! Maʼañic baʼ ora mi caj a wujtel bajcheʼ jiñi». 23 Pero Jesús tiʼ sutqʼui i bʌ i tiʼ sube: «¡Acʼʌ a bʌ tic pat Satanás! Maʼ mʌctan c bijlel come mach cheʼic woli a ñaʼtan bajcheʼ miʼ ñaʼtan Dios, woli a ñaʼtan bajcheʼ wiñicob».
24 Cheʼ jiñi, Jesús tiʼ sube jiñi xcʌntʼañob i chaʼan: «Mi an majqui yom i tsajcañon, laʼ i cʌy i bajñel sʌclan i wenlel, laʼ i chʼʌm i teʼ chaʼan bʌ wocol* i laʼ i chʌn tsajcañon. 25 Jiñi yom bʌ i coltan i cuxtʌlel mi caj i sʌt, pero jiñi muʼ bʌ i sʌt i cuxtʌlel tij caj mi caj i taj.* 26 Tiʼ sujm, ¿baqui bʌ wenlel miʼ taj juntiquil wiñic cheʼ miʼ taj pejtelel muʼ bʌ i yʌcʼ ili pañimil pero miʼ sʌt i cuxtʌlel? ¿O chuqui miʼ mejlel i yʌcʼ juntiquil wiñic chaʼan miʼ mʌn i cuxtʌlel? 27 Come jiñi i Yalobil wiñic mi caj i tilel tiʼ ñuclel i Tat yicʼot i yángelob, mi caj i yʌqʼuen i toj i mul jiñi muʼ bʌ i melob mach bʌ weñic i mi caj i yʌqʼueñob i chobejtʌbal jiñi muʼ bʌ i melob chuqui wen. 28 Tiʼ sujm mic subeñetla chaʼan an wʌʼ bʌ añetla maʼañic bʌ mi caj laʼ chʌmel cheʼ bʌ maxto laʼ qʼuele woliʼ tilel i Yalobil wiñic tiʼ Yumʌntel».