CɅNTESɅNTEL 23
Jiñi chʼʌmjaʼ miʼ chʼʌm tilel cabʌl bendición
Jesús tsiʼ yʌlʌ chaʼan mi la com sujtel ti xñoptʼan, yom mi lac chʼʌmjaʼ (pejcan Mateo 28:19, 20). ¿Pero chuquiyes jiñi chʼʌmjaʼ? ¿I chuqui yom miʼ mel juntiquil chaʼan miʼ chʼʌmjaʼ?
1. ¿Chuquiyes jiñi chʼʌmjaʼ?
Jiñi tʼan chʼʌmjaʼ tilem ti jumpʼejl tʼan ti griego yom bʌ i yʌl «sujpʼel» tiʼ mal jaʼ. Cheʼ bʌ Jesús tsiʼ chʼʌmʌ jaʼ yaʼ ti Jordán, tsaʼ junyajl sujpʼij ochel yaʼ ti jaʼ, i cheʼ jiñi «tsaʼ loqʼui ti jaʼ» (Marcos 1:9, 10). Cheʼ bʌ jiñi i sujm bʌ xñoptʼañob miʼ chʼʌmob jaʼ, yom miʼ junyajl sujpʼelob ti jaʼ jaʼel.
2. ¿Chuqui miʼ pʌs juntiquil cheʼ bʌ miʼ chʼʌmjaʼ?
Cheʼ bʌ an majqui miʼ chʼʌmjaʼ, miʼ pʌs chaʼan tsaʼix i yʌcʼʌ i bʌ ti Jehová. ¿I chuqui yom mi lac mel chaʼan mi la cʌcʼ lac bʌ ti Jehová? Yom mi lac melben oración Jehová ti lac bajñelil chaʼan mi lac suben chaʼan la com lac melben i yeʼtel (troñel) tiʼ pejtelel ora. Ili mi lac mel cheʼ bʌ muʼto caj lac chʼʌmjaʼ. Ti jiñi oración mi la cʌqʼuen lac tʼan Jehová chaʼan jin jach mi caj lac chʼujutesan yicʼot chaʼan ñumen ñuc bʌ i cʼʌjñibal lac chaʼan miʼ cajel jiñʌch cheʼ mi lac mel chuqui yom. Cheʼ jaʼel, mi lac tsajcan Jesús yicʼot mi lac jacʼ jiñi i cʌntesa tac, come tsiʼ yʌlʌ: «Mi an majqui yom i tsajcañon, laʼ i cʌy i bajñel sʌclan i wenlel [...] i laʼ i chʌn tsajcañon» (Mateo 16:24). Cheʼ bʌ mi la cʌcʼ lac bʌ ti Jehová yicʼot mi lac chʼʌmjaʼ, mi lac mejlel ti sujtel ti wem bʌ i yamigo Jehová yicʼot tiʼ yamigojob jiñi muʼ bʌ i chʼujutesañob jaʼel.
3. ¿Chuqui yom maʼ mel chaʼan maʼ chʼʌmjaʼ?
Mi a wom a chʼʌmjaʼ, ñaxan yom maʼ cʌn Jehová yicʼot yom maʼ wen ñop tiʼ tojlel (pejcan Hebreos 11:6). Cheʼ bʌ maʼ ñumen taj a ñaʼtʌbal yicʼot a ñopoñel mi caj a ñumen cʼuxbin Jehová. I mi caj i coltañet chaʼan maʼ mulan subtʼan yicʼot chaʼan maʼ mel muʼ bʌ i yʌl jiñi Biblia (2 Timoteo 4:2; 1 Juan 5:3). Cheʼ bʌ juntiquil lac piʼʌl cheʼix chumul «cheʼ bajcheʼ yom Jehová» muqʼuix caj i mulan i yʌcʼ i bʌ tiʼ tojlel yicʼot i chʼʌmjaʼ (Colosenses 1:9, 10).a
LAʼ LAC ÑUMEN ÑAʼTAN
Laʼ laj qʼuel chuqui mi laj cʌn cheʼ bʌ tsiʼ chʼʌmʌ jaʼ Jesús yicʼot bajcheʼ miʼ mejlel i chajpan i bʌ juntiquil estudiante chaʼan miʼ chʼʌmeʼ jaʼ.
4. Jiñi muʼ bʌ laj cʌn cheʼ bʌ Jesús tsiʼ chʼʌmʌ jaʼ
Chaʼan mi laʼ ñumen cʌn bajcheʼ tsiʼ chʼʌmʌ jaʼ Jesús, pejcanla Mateo 3:13-17. Cheʼ jiñi tem alʌla iliyi:
Cheʼ bʌ Jesús tsiʼ chʼʌmʌ jaʼ, ¿alʌlto ba?
¿Bajcheʼ tsiʼ chʼʌmʌ jaʼ, tsaʼ jach ba i tsʼitaʼ mulbeyob i jol?
Cheʼ bʌ Jesús tsiʼ chʼʌmʌ jaʼ tsiʼ teche i mel jiñi eʼtel tsaʼ bʌ aqʼuenti tiʼ wenta ti Dios. Pejcanla Lucas 3:21-23 yicʼot Juan 6:38, i tem alʌla iliyi:
Cheʼ bʌ Jesús tsaʼix i chʼʌmʌ jaʼ, ¿chuqui ti eʼtel tsiʼ chaʼle wersa i mel?
5. Mejlʌch a chaʼlen chʼʌmjaʼ
Ti ñaxan mucʼʌch lac bʌcʼñan cheʼ bʌ la cujil chaʼan yom mi la cʌcʼ lac bʌ ti Dios yicʼot yom mi lac chʼʌmjaʼ. Pero mi mucʼʌch a bej cʌn Jehová i miʼ cʼotel a ñumen cʌn mi caj a mulan a chʼʌmjaʼ. Chaʼan mi laʼ cʌñob jiñi tsaʼix bʌ i chʼʌmʌyob jaʼ qʼuelela jiñi VIDEO.
Pejcanla Juan 17:3 yicʼot Santiago 1:5, i tem alʌla iliyi:
¿Chuqui miʼ mejlel i coltan juntiquil lac piʼʌl chaʼan chajpʌbilix miʼ yubin i bʌ chaʼan miʼ chaʼlen chʼʌmjaʼ?
Mi la cʌcʼ lac bʌ ti Jehová cheʼ bʌ mi lac suben chaʼan la com lac melben i yeʼtel tiʼ pejtelel ora.
Cheʼ bʌ mi lac chʼʌmjaʼ mi lac pʌsben yambʌlob chaʼan tsaʼix la cʌcʼʌ lac bʌ ti Dios.
6. Cheʼ bʌ mi lac chʼʌmjaʼ mi la cochel tiʼ familia Jehová
Cheʼ bʌ mi lac chʼʌmjaʼ mi la cochel ti jumpʼejl familia temel bʌ an tiʼ pejtelel pañimil (mulawil). Mach yʌlʌlic baqui chʼoyolon lojon o chuqui ñusʌbil lon c chaʼan, lajal chuqui mi lon c ñop yicʼot mi lon c jacʼ muʼ bʌ i yʌl jiñi Biblia. Pejcanla Santiago 2:23 yicʼot 1 Pedro 2:17, i tem alʌla iliyi:
Cheʼ bajcheʼ miʼ yʌl ili versículo tac, ¿chuqui mi lac taj cheʼ mi lac chʼʌmjaʼ?
AN MUʼ BɅ I YɅLOB: «Maxto chajpʌbiloñic mi cubin c bʌ chaʼan mic chʼʌmjaʼ».
Anquese cheʼʌch maʼ wubin a bʌ, ¿yomʌch ba maʼ chaʼlen wersa maʼ wʌl chaʼan maʼ chʼʌmjaʼ?
TSAʼ BɅ LAJ CɅÑɅ
Jesús tsiʼ yʌlʌ chaʼan mi la com sujtel ti xñoptʼan yom mi lac chʼʌmjaʼ. I chaʼan mi lac mel jiñi, yom pʼʌtʌl lac ñopoñel, yom mi lac mel chuqui miʼ subeñonla Jehová yicʼot yom mi la cʌqʼuen laj cuxtʌlel.
¿Chuqui tsaʼ cʌñʌ?
¿Chuquiyes jiñi chʼʌmjaʼ, i chucoch wen ñuc i cʼʌjñibal?
¿Chuqui mi lac pʌs cheʼ mi lac chʼʌmjaʼ?
¿Chuqui tac ñaxan yom miʼ mel juntiquil lac piʼʌl chaʼan miʼ yʌcʼ i bʌ ti Dios yicʼot miʼ chʼʌmjaʼ?
CɅÑɅ YAN TAC BɅ
Cʌñʌ chuqui tac miʼ ñaʼtʌntel chaʼan jiñi chʼʌmjaʼ yicʼot chuqui mero i sujmlel.
Qʼuele chuqui tac miʼ mejlel a mel chaʼan miʼ coltañet chaʼan maʼ chʼʌmjaʼ.
Pejcan chucoch juntiquil wiñic tsiʼ chʼʌmʌ jaʼ.
Qʼuele chucoch ñucʌch i cʼʌjñibal cheʼ maʼ chaʼlen chʼʌmjaʼ yicʼot bajcheʼ miʼ mejlel a chajpan a bʌ.
a Mi an majqui tsiʼ chʼʌmʌ jaʼ ti yambʌ ñopbalʌl, yom miʼ chaʼ chaʼlen chʼʌmjaʼ. ¿Chucoch? Come jiñi ñopbalʌl maʼañic tiʼ pʌsbe jiñi i sujmlel am bʌ ti Biblia (qʼuele Hechos 19:1-5 yicʼot jiñi cʌntesʌntel 13).