1 Pedro
1 I chaʼan Pedro, apóstol i chaʼan Jesucristo, ti laʼ tojlel jatetla ñumel jach bʌ woliyetla ti pañimil pam pujquemetbʌla ti Ponto, Galacia, Capadocia, Asia yicʼot Bitinia. 2 Tsaʼ yajcʌntiyetla cheʼ bajcheʼ tsiʼ wʌn ñaʼta Dios jiñi lac Tat, jatetla tsaʼix bʌ sʌqʼuesʌntiyetla tiʼ coltaya jiñi espíritu chaʼan mi laʼ sujtel ti xjacʼtʼañob i mi laʼ tsijcʌntel tiʼ chʼichʼel Jesucristo:
Laʼ ñumen aqʼuentiquetla jiñi ñuc bʌ i yutslel Dios yicʼot i ñʌchʼtʌlel.
3 Laʼ aqʼuentic i ñuclel jiñi Dios yicʼot i Tat lac Yum Jesucristo, come chaʼan jiñi ñuc bʌ i pʼuntaya tsiʼ yʌqʼueyonla lac chaʼ ilan pañimil i tsiʼ yʌqʼueyonla jumpʼejl cuxul bʌ pijtaya chaʼan tsaʼ chʼojyesʌnti* Jesucristo yaʼ baqui an chʌmeñoʼ bʌ, 4 chaʼan mi lac taj laj cuxtʌlel mach bʌ yujilic ocʼmʌn,* mach bʌ bibʼesʌbilic yicʼot mach bʌ añic miʼ jilel. Ili yaʼʌch an ti panchan chaʼan mi laʼ wʌqʼuentel, 5 jatetla cʌntʌbiletbʌla tiʼ pʼʌtʌlel Dios come an laʼ ñopoñel, chaʼan mi laʼ taj jiñi coltʌntel chajpʌbil bʌ chaʼan miʼ tsictiyel cheʼ tiʼ yorajlel i jilibal. 6 Jin chaʼan jatetla wen tijicñayetla, anquese ili ora yom mi laʼ tsʼitaʼ ubin laʼ chʼijyemlel tiʼ caj wocol tac, 7 chaʼan jiñi laʼ ñopoñel tsaʼ bʌ qʼuejli miʼ sujmʌch miʼ mejlel i yʌqʼueñetla laʼ taj laʼ ñuclel yicʼot chaʼan mi laʼ qʼuejlel ti ñuc cheʼ bʌ miʼ pʌs i bʌ Jesucristo. Ili laʼ ñopoñel ñumen wen bajcheʼ jiñi oro muʼ bʌ i mejlel ti jilel anquese tsaʼix ñusʌnti ti cʼajc. 8 Anquese maʼañic baʼ ora tsaʼ laʼ qʼuele Cristo, mi laʼ cʼuxbin. Anquese wʌleʼli maʼañic mi laʼ qʼuel, mi laʼ pʌs laʼ ñopoñel tiʼ tojlel, wen tijicñayetla i tsʼʌcʌl jiñi laʼ tijicñʌyel 9 i yicʼot laʼ tijicñʌyel mi caj laʼ taj laʼ coltʌntel come an laʼ ñopoñel.
10 Jiñi xʼaltʼañob tsaʼ bʌ i wʌn alʌyob chaʼan bʌ jiñi ñuc bʌ i yutslel Dios tsaʼ bʌ pʌsbentiyetla, tsiʼ cʼajtiyob i tsiʼ wen sʌclayob chaʼan bʌ ili coltʌntel. 11 Dios tsiʼ wʌn cʼʌñʌ i pʼʌtʌlel* chaʼan miʼ wʌn subeñob chaʼan Cristo mi caj i ñusan wocol i cheʼ jiñi mi caj i ñuqʼuesʌntel. Jin chaʼan tsiʼ bej sʌclayob chaʼan miʼ ñaʼtañob chuqui mi caj i yujtel tiʼ tojlel i jala mi caj i yujtel. 12 Dios tiʼ sube jiñi xʼaltʼañob chaʼan maʼañic woliʼ bajñel melbeñob i bʌ i yeʼtel, woliʼ melob laʼ chaʼan. Jiñi xʼaltʼañob tiʼ tsʼijbuyob jiñi tsaʼ bʌ subentiyetla, i jatetla tsaʼ laʼ wubi iliyi tiʼ tojlel jiñi tsaʼ bʌ i subeyetla jiñi wen tʼan tiʼ coltaya jiñi chʼujul bʌ espíritu tsaʼ bʌ chojqui tilel ti panchan. Jiñi ángelob yom i wen sʌclañob chaʼan tac bʌ iliyi.
13 Jin chaʼan, chajpanla laʼ ñaʼtʌbal chaʼan mi laʼ chaʼlen tsʌts bʌ eʼtel, yom tsʼʌcʌl jiñi wem bʌ laʼ ñaʼtʌbal i acʼʌla laʼ pijtaya ti jiñi ñuc bʌ i yutslel Dios muʼ bʌ caj laʼ pʌsbentel cheʼ bʌ miʼ tsictiyel Jesucristo. 14 Wʌle i yalobiletla Dios muʼ bʌ laʼ jacʼben i tʼan. Jin chaʼan cʌyʌx laʼ mel jiñi yom bʌ laʼ bʌcʼtal ti ñaxan cheʼ bʌ maxto laʼ cʌñʌyic, 15 cheʼ bajcheʼ Chʼujul jiñi tsaʼ bʌ i pʌyʌyetla, yom chʼujuletla tiʼ pejtelel laʼ melbal, 16 come tsʼijbubil: «Yom chʼujuletla come joñon chʼujulon».
17 I mi jatetla an chuqui mi laʼ cʼajtiben jiñi Tatʌl muʼ bʌ i chaʼlen meloñel ti toj cheʼ bajcheʼ an i melbal jujuntiquil, acʼʌla chaʼan jiñi laʼ melbal miʼ pʌs chaʼan mucʼʌch laʼ bʌcʼñan Dios cheʼ bʌ wʌʼto añetla ti ili pañimil baqui ñumel jach muqʼuetla. 18 Come jatetla laʼ wujil chaʼan maʼañic tsaʼ cʼʌjñi chuqui tac miʼ yocʼmʌn, cheʼ bajcheʼ plata yicʼot oro, chaʼan mi laʼ cojlel ti jiñi cuxtʌlel mach bʌ añic i cʼʌjñibal tsaʼ bʌ i cʌybeyetla jiñi laʼ ñojteʼelob. 19 Pero jatetla tsaʼ cojliyetla tiʼ coltaya jiñi utsʼatax bʌ i chʼichʼel Cristo, cheʼ bʌ bajcheʼ i chʼichʼel cʼocʼ bʌ tiñʌmeʼ yicʼot maʼañic bʌ i bibiʼlel. 20 I sujmʌch chaʼan tsaʼ cʌjñi cheʼ bʌ maxto melbilic ili pañimil, pero tsiʼ pʌsʌ i bʌ ti laʼ caj tiʼ yujtibal jiñi cojix bʌ qʼuin tac. 21 Tiʼ tojlel, jatetla mi laʼ ñop Dios, jiñi tsaʼ bʌ i chʼojyesa yaʼ baqui an chʌmeñoʼ bʌ i tsiʼ yʌqʼue i ñuclel chaʼan jatetla mi laʼ mejlel laʼ ñop yicʼot miʼ mejlel laʼ wʌcʼ laʼ pijtaya ti Dios.
22 Wʌle cheʼ tsaʼix sʌqʼuesʌntiyetla chaʼan tsaʼ laʼ jacʼʌ jiñi i sujmlel i jiñi an i yʌcʼʌ chaʼan mi laʼ pʌsben laʼ bʌ i sujm bʌ cʼuxbiya cheʼ bʌ bajcheʼ muʼ bʌ i pʌstʌl ti jumpʼejl familia, ti jujuntiquil pʌsben laʼ bʌ cʼuxbiya loqʼuem bʌ ti laʼ pusicʼal. 23 Come maʼañic tsaʼ aqʼuentiyetla laʼ chaʼ ilan pañimil tiʼ coltaya jumpʼejl pacʼ* muʼ bʌ i yocʼmʌn, tiʼ coltayajʌch jumpʼejl pacʼ mach bʌ yujilic ocʼmʌn, tiʼ tojlelʌch jiñi cuxul bʌ i tʼan Dios yicʼot maʼañic bʌ miʼ jilel. 24 Come «pejtelel jiñi lac piʼʌlob lajalob bajcheʼ jiñi jamil, i jiñi i ñuclel bajcheʼ jiñi ñichteʼ, jiñi jamil miʼ tiquin i jiñi ñichteʼ miʼ yajlel, 25 pero jiñi i tʼan Jehová* miʼ yajñel tiʼ pejtelel ora». Weno, ili «tʼan» jiñʌch jiñi wen tʼan tsaʼix bʌ subentiyetla.