Jiñi i tojol mulil: Utsʼat bʌ majtañʌl tilem bʌ ti lac Tat

 1. ¿Chuqui ti wenlel tac miʼ yʌcʼ jiñi i tojol mulil?

JIÑI i tojol mulil miʼ mejlel i yʌqʼueñonla cabʌl bendición. Jumpʼejl ejemplo, jiñi i pʼolbalob Adán muʼ bʌ i sajcañob chuqui toj, miʼ mejlelob ti chaʼ ochel tiʼ familia Dios ti jumpʼejl bʌ qʼuin (qʼuele jiñi recuadro «¿Chuqui yom i yʌl?»). Jiñi i tojol mulil miʼ mejlel i yʌcʼonla ti chumtʌl yicʼot lac tijicñʌyel tiʼ pejtelel ora. Pero jiñi i tojol mulil mach cojach miʼ mejlel i mel jiñi. An chuqui wen ñuc bʌ i cʼʌjñibal miʼ yʌcʼ ti tsictiyel chaʼan yaʼ bʌ chumulob ti panchan yicʼot ti Pañimil (Hebreos 1:8, 9).

 2. a) ¿Chuqui ñuc tac bʌ i cʼʌjñibal tsiʼ taja ti tʼan Jesús chaʼan jiñi panchan yicʼot Pañimil ti jiñi oración chaʼan padrenuestro? (Qʼuele jiñi dibujo am bʌ tiʼ tejchibal). b) ¿Chuqui mi caj laj qʼuel ti ili temaj?

² Cheʼ chaʼpʼejl jachix jab yom chaʼan miʼ chʌmel (sajtel) Jesús, tsiʼ cʌntesa bajcheʼ yom miʼ chaʼleñob oración jiñi xcʌntʼañob i chaʼan: «C Tat lojon añet bʌ ti panchan, laʼ chʼujutesʌntic a cʼabaʼ. Laʼ tilic a yumʌntel. Laʼ mejlic chuqui a wom ti pañimil cheʼ bajcheʼ ti panchan» (Mateo 6:9, 10). Ti ili temaj mi caj laj qʼuel bajcheʼ miʼ taj i bʌ jiñi i tojol mulil yicʼot cheʼ miʼ yʌjqʼuel ti chʼujul i cʼabaʼ Jehová, jiñi i Yumʌntel Dios yicʼot cheʼ miʼ mejlel chuqui yom.

 3. a) ¿Chuqui miʼ yʌcʼ ti cʌjñel jiñi i cʼabaʼ Dios? b) ¿Bajcheʼ tsiʼ bibʼesʌbe i cʼabaʼ Jehová jiñi Satanás?

³ Tsaʼ bʌ i ñaxan cʼajti Jesús ti jiñi oración jiñʌch chaʼan miʼ chʼujutesʌntel i cʼabaʼ Dios. Yom i yʌl chaʼan miʼ qʼuejlel ti ñuc i cʼabaʼ come chʼujulʌch. Jiñi i cʼabaʼ Jehová miʼ yʌcʼ ti cʌjñel majqui yicʼot bajcheʼ yilal. Juntiquilʌch Dios toj bʌ yicʼot jiñʌch ñumen am bʌ i pʼʌtʌlel ti panchan yicʼot ti pañimil. Jesús tsiʼ sube tiʼ «Chʼujutat» (Juan 17:11). Tiʼ pejtelel chuqui miʼ mel Jehová, bajcheʼ jiñi i mandar tac, chʼujulʌch jaʼel. Pero Satanás tsiʼ wen chajpa chaʼan miʼ yʌcʼ ti ñaʼtʌntel chaʼan maʼañic chucoch yom miʼ yʌcʼ i mandar Dios tiʼ tojlel quixtañujob. Tsiʼ chaʼle lot tiʼ contra Jehová yicʼot tsiʼ bibʼesʌbe i cʼabaʼ (Génesis 3:1-5).

 4. ¿Bajcheʼ tsiʼ yʌcʼʌ ti chʼujul i cʼabaʼ Dios jiñi Jesús?

⁴ Jesús tsiʼ qʼuele ti ñuc i cʼabaʼ Jehová, mach lajalic bajcheʼ Satanás. Jin chaʼan tsiʼ chaʼle wersa chaʼan miʼ yʌcʼ ti chʼujul (Juan 17:25, 26). ¿Bajcheʼ? Jiñʌch ti chuqui tsiʼ mele yicʼot tsaʼ bʌ i pʌsʌ. Cheʼ bajcheʼ jiñi, Jesús tsiʼ colta i ñaʼtan yambʌlob chaʼan jiñi i mandar tac Jehová tojʌch yicʼot chaʼañʌch lac wenlel chuqui tac miʼ cʼajtibeñonla (pejcan Salmo 40:8-10). Xucʼul tsaʼ ajñi Jesús anquese Satanás pʼumpʼun jax bajcheʼ tsiʼ yʌcʼʌ ti tsʌnsʌntel. Tsiʼ pʌsʌ chaʼan juntiquil toj bʌ wiñic mucʼʌch i mejlel i jacʼben i tʼan Jehová ti tsʼʌcʌl.

 5. ¿Bajcheʼ mi lac pʌs chaʼan mi laj qʼuel ti chʼujul i cʼabaʼ Jehová?

⁵ Ixcu joñonla, ¿bajcheʼ mi lac pʌs chaʼan mucʼʌch laj cʼuxbiben i cʼabaʼ Jehová? Jiñʌch ti lac chaʼleya. Jehová yom chaʼan chʼujulonla (pejcan 1 Pedro 1:15, 16). Jin chaʼan, tiʼ pejtelel lac pusicʼal mi lac jacʼben i tʼan yicʼot cojach mi lac chʼujutesan. Anquese mi lac ticʼlʌntel, mi la cʌcʼ wersa chaʼan mi lac chumtʌl cheʼ bajcheʼ miʼ cʌntesañonla Jehová. Cheʼ mi lac jacʼben i tʼan, mi lac ñuqʼuesʌben i cʼabaʼ (Mateo 5:14-16). Cheʼ jaʼel, mi lac pʌs chaʼan utsʼat jiñi i mandar tac Jehová, i Satanás juntiquil xlot. Maʼan mi la cʌl chaʼan mach xmuliloñicla yicʼot maʼañic mi lac taj lac sajtemal. Pero mi lac chaʼlen wersa chaʼan mi laj cʌy lac mul yicʼot maʼañix mi lac chʌn mel muʼ bʌ i yʌqʼueñonla lac bibʼesʌben i cʼabaʼ Jehová (Salmo 79:9).

 6. ¿Chucoch miʼ mejlel i qʼuelonla ti toj jiñi Jehová anquese xmulilonla?

⁶ Jehová miʼ ñusʌbeñonla lac mul mi añʌch lac ñopoñel (chʼujbiya) tiʼ tojol jiñi mulil, mach cʼʌñʌlic mi ochemonla ti jiñi bombiloʼ bʌ o ti yambʌ tiñʌmeʼob. Utsʼat miʼ qʼuel muʼ bʌ i yʌcʼob i bʌ tiʼ tojlel chaʼan miʼ mejlel i chʼujutesañob. Jehová miʼ qʼuel ti toj jiñi yajcʌbiloʼ bʌ, i miʼ chʼʌm bajcheʼ i yalobilob. Cheʼ jaʼel, mi caj i qʼuel ti toj yicʼot mi caj i qʼuel tiʼ yamigo jiñi yambʌ tiñʌmeʼob (Juan 10:16; Romanos 5:1, 2; Santiago 2:21-25). Ili ora, utsʼat mi lac mejlel ti ajñel tiʼ tojlel lac Tat yicʼot mi lac sʌqʼuesʌben i cʼabaʼ come tsaʼ ajqʼui jiñi i tojol mulil.

 7. ¿Chuqui tac ti wenlel miʼ yʌcʼ jiñi i Yumʌntel Dios chaʼan i tojol jiñi mulil?

⁷ Ti jiñi oración, Jesús tsiʼ yʌlʌ: «Laʼ tilic a yumʌntel». ¿Bajcheʼ miʼ laj i bʌ jiñi i tojol mulil yicʼot jiñi Yumʌntel? La cujil chaʼan ti jiñi i Yumʌntel Dios yaʼ ochem Jesús yicʼot jiñi 144 mil yajcʌbiloʼ bʌ loqʼuel wʌʼ ti pañimil (mulawil). Miʼ mejlelob ti chaʼ chʼojyel chaʼan miʼ chumtʌlob ti panchan come an jiñi i tojol mulil (Apocalipsis 5:9, 10; 14:1). 1000 jab mi caj i yumañob ili Pañimil yicʼot Jesús, i mi caj i chaʼleñob eʼtel bajcheʼ rey yicʼot motomaj. Ti jiñi bʌ ora, Dios mi caj i sujtesan ti jumpʼejl paraíso ili Pañimil yicʼot mi caj i coltan jiñi quixtañujob chaʼan miʼ sujtelob ti toj. Cheʼ jiñi, jumpʼejl jach familia mi caj i sujtel jiñi i wiñicob Dios añoʼ bʌ ti panchan yicʼot ti Pañimil (Apocalipsis 5:13; 20:6). Jesús mi caj i jisan Satanás yicʼot pejtelel jiñi wocol pʼolbil bʌ i chaʼan (Génesis 3:15).

 8. a) ¿Bajcheʼ tsiʼ colta Jesús chaʼan jiñi xcʌntʼañob i chaʼan miʼ chʼʌmbeñob isujm chaʼan ñucʌch i cʼʌjñibal jiñi i Yumʌntel Dios? b) ¿Bajcheʼ mi lac pʌs chaʼan woliyʌch laj qʼuel ti ñuc jiñi i Yumʌntel Dios?

⁸ Jesús tsiʼ colta i chʼʌmbeñob isujm jiñi xcʌntʼañob chaʼan wen ñuc i cʼʌjñibal jiñi i Yumʌntel Dios. ¿Bajcheʼ? Cheʼ bʌ tsiʼ chʼʌmʌ jaʼ, ti orajach tsiʼ teche i sub «jini wen tʼan chaʼan i yumʌntel Dios» ti cabʌl tejclum (Lucas 4:43). Cheʼ jaʼel, tsiʼ subeyob majlel «cʼʌlʌl ti ñajt bʌ pañimil» chaʼan miʼ yʌcʼob ti cʌjñel (Hechos 1:6-8). Ili ora, jiñi subtʼan miʼ coltan cabʌl quixtañu chaʼan miʼ cʌñob chuqui jiñi i tojol mulil yicʼot miʼ mejlelob ti chumtʌl tiʼ Yumʌntel Dios. Cheʼ mi laj coltañob ti subtʼan jiñi bombiloʼ bʌ, mi lac pʌs chaʼan xucʼuloñʌchla tiʼ Yumʌntel Dios (Mateo 24:14; 25:40).

 9. ¿Chucoch miʼ mejlel lac ñop chaʼan miʼ caj ti tsʼʌctiyel jiñi ñaʼtʌbil bʌ i chaʼan Dios tiʼ tojlel quixtañujob?

⁹ Ti jiñi oración, Jesús tsiʼ yʌlʌ jaʼel: «Laʼ mejlic chuqui a wom». ¿Chuqui yom i yʌl iliyi? Chaʼan mucʼʌch i tsʼʌctiyel cheʼ bʌ an chuqui miʼ yʌl Jehová (Isaías 55:11). Jehová maʼañic tsiʼ qʼuexta chuqui ñaʼtʌbil i chaʼan, anquese Satanás tsaʼ sujti tiʼ contra. ¿Chuqui tsiʼ ñaʼta Dios chaʼan ili Pañimil? Chaʼan jiñi toj bʌ i yalobilob Adán yicʼot Eva miʼ bujtʼesañob ili Pañimil (Génesis 1:28). Cheʼ tsaʼic chʌmi Adán yicʼot Eva cheʼ bʌ maxto i yʌcʼʌyob i yalobil, maʼañic tsaʼ tsʼʌctiyi chuqui yom bʌ Dios chaʼan ili Pañimil. Jin chaʼan Jehová tsiʼ cʌyʌ chaʼan miʼ tajob i yalobil. Jiñi i tojol mulil miʼ yʌcʼ chaʼan miʼ chumtʌlob tiʼ pejtelel ora yicʼot miʼ sujtelob ti toj jiñi añoʼ bʌ i ñopoñel. Jehová miʼ cʼuxbiñonla ti lac pejtelel, i yom chaʼan utsʼat mi lac chumtʌl cheʼ bajcheʼ tsiʼ mulaj ti ñaxan.

10. ¿Bajcheʼ mi caj i tajob i wenlel tiʼ tojol mulil jiñi chʌmeñobix bʌ?

¹⁰ Yonlel chʌmeñoʼ bʌ maʼañic tsiʼ cʌñʌyob Jehová. ¿Chuqui mi caj i yujtel tiʼ tojlelob? Dios mi caj i chaʼ tejchesañob come yom chaʼan cuxul miʼ yajñelob. Jiñi i tojol mulil mi caj i yʌcʼ ti ujtel iliyi. Cheʼ bʌ miʼ chaʼ tejchelob, mi caj i mejlelob i cʌn chaʼan Jehová yicʼot miʼ mejlelob ti chumtʌlob tiʼ pejtelel ora (Hechos 24:15). Jehová mi caj i sujtesañob tiʼ yalobil jiñi muʼ bʌ caj i chaʼ tejchelob come jiñʌch muʼ bʌ i yʌqʼueñonla laj cuxtʌlel (Salmo 36:9). Jin chaʼan, Jesús tsiʼ yʌlʌ chaʼan Jehová jiñʌch lac Tat am bʌ «ti panchan» (Mateo 6:9). Jehová tsiʼ yʌqʼue tiʼ wenta Jesús chaʼan miʼ chaʼ tejchesan jiñi chʌmeñoʼ bʌ. Jin chaʼan Jesús tsiʼ yʌlʌ: «Joñon xTech Chʼujlelʌlon, i cuxtʌlelon jini añoʼ bʌ ti pañimil» (Juan 6:40, 44; 11:25).

11. ¿Chuqui yom Dios chaʼan yonlel wiñicob xʼixicob?

¹¹ Jesús tsiʼ yʌlʌ jaʼel: «Come majqui jach miʼ chaʼlen chuqui yom Dios, jiñʌch quijtsʼin, quijtiʼan, yicʼot c ñaʼ» (Marcos 3:35). Dios miʼ mulan chaʼan tiʼ pejtelel quixtañu miʼ chʼujutesan anquese mach junlajalic baqui chʼoyolob, i colorlel i pʌchʌlelob yicʼot i tʼañob. Jiñi Biblia miʼ yʌl chaʼan jiñobʌch «winicob xʼixicob» maʼañic bʌ majqui miʼ mejlelob i tsic. Miʼ ñopob ti jiñi i tojol mulil yicʼot miʼ jacʼbeñob i tʼan Dios. Cheʼ jaʼel miʼ yʌlob: «Yujil coltaya lac Dios buchul bʌ tiʼ yeʼtel yicʼot jini Tiñʌmeʼ» (Apocalipsis 7:9, 10).

12. ¿Chuqui mi laj cʌn ti jiñi oración chaʼan padrenuestro chaʼan jiñi ñaʼtʌbil bʌ i chaʼan Jehová tiʼ tojlel quixtañujob?

¹² Jiñi oración chaʼan padrenuestro cabʌl chuqui miʼ cʌntesañonla chaʼan Jehová yicʼot chaʼan chuqui yom tiʼ tojlel quixtañujob. Ñaxan, mi laj cʌn chaʼan yom mi lac chaʼlen wersa tiʼ sʌqʼuesʌntel i cʼabaʼ Dios yicʼot mi laj cʌcʼ ti ñuc (Isaías 8:13). Chaʼan i tojol mulil, miʼ mejlel lac taj laj coltʌntel yicʼot mi la cʌcʼ ti ñuc i cʼabaʼ Dios. Jin chaʼan, jiñi i cʼabaʼ Jesús yom i yʌl «Jehová miʼ coltañonla». I chaʼpʼejlel, mi laj cʌn chaʼan Jehová mi caj i cʼʌn i Yumʌntel chaʼan miʼ yʌqʼuen jiñi xjacʼtʼañoʼ bʌ jiñi wenlel tac muʼ bʌ i yʌcʼ jiñi i tojol mulil. I yuxpʼejlel, maʼañic chuqui miʼ mejlel i mʌctan Jehová tiʼ melol chuqui yom (Salmo 135:6; Isaías 46:9, 10).

13. ¿Chucoch mi lac chaʼlen chʼʌmjaʼ?

¹³ Junchajp bajcheʼ mi lac pʌs chaʼan mi laj qʼuel ti ñuc jiñi i tojol mulil jiñʌch cheʼ mi la cʌcʼ lac bʌ ti Jehová cheʼ mi lac chaʼlen chʼʌmjaʼ. Cheʼʌch mi lac pʌs chaʼan mi lac ñop jiñi i tojol mulil yicʼot chaʼan «i chaʼañonla lac Yum» (Romanos 14:8). Cheʼ jaʼel, ti jiñi chʼʌmjaʼ woli (choncol) laj cʼajtiben Jehová chaʼan la com «ñʌchʼʌl lac pusicʼal» (1 Pedro 3:21). Dios mucʼʌch i jacʼbeñonla cheʼ miʼ yʌqʼueñonla jiñi bendición tac muʼ bʌ i mejlel lac taj chaʼan i tojol jiñi mulil. Jin chaʼan, mi lac ñop chaʼan mucʼʌch caj i yʌqʼueñonla chuqui tac albil i chaʼan (Romanos 8:32).

14. ¿Chucoch miʼ subeñonla Dios chaʼan yom mi laj cʼuxbin yambʌlob?

¹⁴ Tiʼ pejtelel chuqui miʼ mel Jehová chaʼañʌch i cʼuxbiya. I yom chaʼan mi lac lajin yicʼot mi laj cʼuxbin lac bʌ (1 Juan 4:8-11). Cheʼ mi laj cʼuxbin quixtañujob, mi lac pʌs chaʼan la comʌch sujtel tiʼ yalobil jiñi ‹lac Tat am bʌ ti panchan› (Mateo 5:43-48). Jiñi ñumen ñuc bʌ mandar miʼ yʌl yaʼ ti Biblia jiñʌch chaʼan yom mi laj cʼuxbin Jehová. Jiñi i chaʼpʼejlel jiñʌch chaʼan mi laj cʼuxbin yambʌlob (Mateo 22:37-40). Cheʼ mi lac tsictesʌben yambʌlob jiñi wen tʼan chaʼan bʌ Yumʌntel jiñʌch junchajp bajcheʼ mi lac pʌs cʼuxbiya. Cheʼ mucʼʌch lac jacʼ jiñi mandar chaʼan yom mi laj cʼuxbin yambʌlob, ñumento la quermañojoʼ bʌ, jiñi laj cʼuxbiya tiʼ tojlel Dios miʼ «tsʼʌctʌyel» o miʼ tojʼan (1 Juan 4:12, 20).

15. a) ¿Baqui tac bʌ bendición miʼ yʌqʼueñonla Jehová ili ora? b) ¿Baqui tac bʌ bendición mi caj lac taj tiʼ talto bʌ qʼuin?

¹⁵ Jehová miʼ yʌl chaʼan mi mucʼʌch lac ñop jiñi i tojol mulil miʼ mejlel i yʌcʼ ti ‹yajpel lac mul›. Ili yom i yʌl chaʼan miʼ junyajlel ñusʌbeñonla (pejcan Hechos 3:19-21). Bajcheʼ tsaʼix laj qʼuele, chaʼan i tojol mulil Jehová miʼ mejlel i pʌy lamital quixtañujob tiʼ yalobil chaʼan miʼ chumtʌlob ti panchan. Ili jiñobʌch jiñi xñoptʼañob bombiloʼ bʌ (Romanos 8:15-17). Pero Jehová miʼ pʌyob ochel tiʼ familia am bʌ wʌʼ ti Pañimil jiñi yambʌ xñoptʼañob cʌmbiloʼ bʌ bajcheʼ ‹yambʌ tiñʌmeʼ›. Ili yambʌ xñoptʼañob muʼto caj i ñusañob jiñi cojix bʌ i yilʌbentelob i pusicʼal cheʼ bʌ tojobix. Mi xucʼul miʼ yajñelob, Jehová mi caj i pʌyob tiʼ yalobil jaʼel (Romanos 8:20, 21; Apocalipsis 20:7-9). Jehová mi caj i cʼuxbin i yalobilob tiʼ pejtelel ora. Joñonla mi caj lac taj cabʌl bendición tiʼ pejtelel ora tiʼ coltaya jiñi i tojol mulil (Hebreos 9:12). Maʼañic majqui miʼ mejlel i chilbeñonla ili ñuc bʌ lac majtan chʼoyol bʌ ti Jehová.

16. ¿Bajcheʼ miʼ coltañonla jiñi i tojol mulil?

¹⁶ Mi mucʼʌch laj cʌy lac mul, jiñi Diablo mach mejlic i mʌctañonla ti ochel tiʼ familia Jehová. «Jasʌl junyajl» tsiʼ yʌcʼʌ i cuxtʌlel Jesús. Ili yom i yʌl chaʼan mach cʼʌñʌlic miʼ yʌjqʼuel yambʌ i tojol mulil (Hebreos 9:24-26). Adán tsiʼ cʌybeyonla jiñi chʌmel, pero tiʼ tojlel Jesús mi caj lac taj jiñi cuxtʌlel maʼañic bʌ miʼ jilel. Jiñi i tojol mulil miʼ locʼsañonla ti ili pañimil yicʼot tiʼ bʌcʼñʌntel chʌmel (Hebreos 2:14, 15).

17. ¿Bajcheʼ yubil mi la cubin cheʼ mi lac ñaʼtan bajcheʼ cʼamel miʼ cʼuxbiñonla Jehová?

¹⁷ Miʼ mejlel lac ñop chaʼan mucʼʌch caj i tsʼʌctiyel jiñi albil tac bʌ i chaʼan Jehová. Jehová maʼañic ba ora miʼ qʼuextʌyel lajal bajcheʼ maʼañic miʼ qʼuextʌyel bajcheʼ tsiʼ yʌcʼʌ tsaʼ bʌ i mele tac. Maʼañic mi caj i wis lotiñonla (Malaquías 3:6). Jehová mach cojach miʼ yʌqʼueñonla laj cuxtʌlel, miʼ yʌqʼueñonla i cʼuxbiya jeʼel. «Tsaʼix laj cʌmbe i cʼuxbiya Dios. Tsaʼix lac ñopo jaʼel xcʼuxbiyajʌch Dios» (1 Juan 4:16). Ili Pañimil mi caj i sujtel ti cʼoʼtajax bʌ paraíso come tiʼ pejtelel ora miʼ tsʼʌctesan i tʼan Jehová. Tiʼ pejtelel quixtañu mi caj i lajibeñob i melbal Jehová yicʼot mi caj i cʼuxbiñob i bʌ. Cheʼ jiñi, tiʼ pejtelel añoʼ bʌ ti panchan yicʼot wʌʼ ti Pañimil mi caj i yʌqʼueñob i ñuclel Jehová, mi caj i yʌlob: «Laʼ lac suben i cʼuxbintel yicʼot i ñuclel yicʼot i ñaʼtʌbal lac Dios. Laʼ lac suben wocolix i yʌlʌ chaʼan i ñuclel yicʼot i pʼʌtʌlel yicʼot i wersa tiʼ pejtelel ora. Amén» (Apocalipsis 7:12).