Romanos
12 Jin chaʼan, hermanojob, chaʼan jiñi i pʼuntaya Dios mij cʼajtibeñetla ti wocol tʼan chaʼan mi laʼ wʌcʼ jiñi laʼ bʌcʼtal bajcheʼ cuxul bʌ majtañʌl, chʼujul bʌ yicʼot muʼ bʌ i mulan Dios, cheʼ bajcheʼ jiñi mi caj laʼ cʼʌn pejtelel laʼ ñaʼtʌbal chaʼan mi laʼ melben jiñi chʼujul bʌ i yeʼtel. 2 I cʌyʌ laʼ tsajcʌben i melbal jiñi quixtañujob ti ili pañimil, tsijibtesan laʼ ñaʼtʌbal chaʼan mi laʼ qʼuextan laʼ bʌ, chaʼan jatetla mi laʼ qʼuel chuqui jiñi wem bʌ, utsʼat bʌ yicʼot jiñi toj bʌ muʼ bʌ i mulan Dios.
3 Chaʼan jiñi ñuc bʌ i yutslel Dios tsaʼ bʌ i pʌsbeyon, mic subeñetla ti jujuntiquiletla chaʼan mach yomic ñumen ti pʼis chuqui mi laʼ ñaʼtan ti laʼ tojlel, yom pʼisbil jach chuqui mi laʼ ñaʼtan, cheʼ bajcheʼ cʼamel laʼ ñopoñel tsiʼ yʌqʼueyetla Dios. 4 Come cheʼ bajcheʼ jiñi lac bʌcʼtal cabʌl bajcheʼ tʼoxbil, pero mach junlajalic i cʼʌjñibal, 5 cheʼʌch joñonla jaʼel, anquese cabʌlonla, jumpʼejl jach lac bʌcʼtal la quicʼot Cristo, pero temelonla ti jujuntiquilonla. 6 Jin chaʼan mach junlajalic jiñi lac majtan, cheʼʌch bajcheʼ tsiʼ pʌsbeyonla jiñi ñuc bʌ i yutslel Dios. Mi jin chaʼan mi lac sub chuqui tac miʼ yʌl Dios, laʼ lac bej sub cheʼʌch bajcheʼ tsaʼ aqʼuentiyonla lac ñopoñel, 7 mi chaʼan mi laj coltan yambʌlob, laʼ lac chʌn coltañob. Mi chaʼan mi lac chaʼlen cʌntesa, laʼ lac chʌn chaʼlen cʌntesa, 8 jiñi muʼ bʌ ñijcʌben i pusicʼal yambʌlob, laʼ i ñijcʌben i pusicʼal, jiñi am bʌ chuqui yujil acʼol, laʼ i yʌcʼ tiʼ pejtelel i pusicʼal, jiñi aqʼuebil bʌ i yeʼtel, laʼ i mel yicʼot i bʌxlel, jiñi muʼ bʌ i pʌs pʼuntaya, laʼ i pʌs yicʼot i tijicñʌyel.
9 Yom i sujm jiñi laʼ cʼuxbiya. Tsʼaʼlenla chuqui mach bʌ weñic, chaʼlenla wersa chaʼan mi laʼ mel chuqui wen. 10 Yom mi laʼ cʼuxbin laʼ bʌ cheʼ bajcheʼ jiñi añoʼ bʌ ti jumpʼejl familia. Jatetla yom mi laʼ ñaxan qʼuel ti ñuc yambʌlob. 11 Yom laʼ wujil eʼtel,* mach yomic tsʼubetla. Acʼʌla chaʼan jiñi chʼujul bʌ espíritu miʼ yʌqʼueñetla laʼ chʼejlel.* Yom xyaj eʼteletla i chaʼan Jehová.* 12 Ubinla laʼ tijicñʌyel chaʼan jiñi pijtaya. Cuchula cheʼ bʌ an laʼ wocol. Mach laʼ cʌy oración. 13 Tʼoxbenla chuqui tac an laʼ chaʼan jiñi chʼujuloʼ bʌ cheʼʌch bajcheʼ i cʼʌjñibal i chaʼañob. Ñʌmtesan laʼ bʌ tiʼ cʌntʌntel yambʌlob. 14 Cʼajtinla bendición tiʼ tojlel jiñi muʼ bʌ i contrajiñetla i mach laʼ chʼʌcob. 15 Ubinla laʼ tijicñʌyel laʼ wicʼotob jiñi tijicñayoʼ bʌ, chaʼlenla uqʼuel laʼ wicʼot jiñi woliyoʼ bʌ ti uqʼuel. 16 Cheʼ bajcheʼ yilal mi laʼ qʼuel laʼ bʌ cheʼʌch yom mi laʼ qʼuel yambʌlob, mach laʼ wʌcʼ laʼ ñaʼtʌbal ti chuqui tac wen ñuc bʌ, yom an laʼ pecʼlel.* Mach yomic cʌlʌx an laʼ ñaʼtʌbal mi laʼ qʼuel laʼ bʌ.
17 Mach yomic mi laʼ qʼuextan chuqui mach bʌ weñic mi laʼ melbentel. Cʼajtesanla chuqui jiñi utsʼat bʌ tiʼ wut pejtelel lac piʼʌlob. 18 Mi mucʼʌch i mejlel, yaʼ baqui chilil ti laʼ tojlel, ajñenla ti ñʌchʼtʌlel laʼ wicʼot yambʌlob. 19 Cʼuxbibiletbʌla, mach laʼ chaʼ qʼuextan chuqui mi laʼ tumbentel, cʌybenla tiʼ wenta Dios chaʼan miʼ pʌs i michʼajel tiʼ contra mach bʌ weñic. Come tsʼijbubil: «‹Joñon mi caj j qʼuextʌbeñob, joñon mi caj cʌqʼueñob i tojob i mul›, cheʼʌch miʼ yʌl Jehová».* 20 Pero «mi wiʼñal jiñi a contra, weʼsan, mi tiquin i tiʼ, aqʼuen chuqui miʼ jap, come cheʼ bajcheʼ iliyi lajal bajcheʼ woli a tempan i ñich cʼajc tiʼ jol».* 21 Mach a wʌqʼuen i mʌlbeñet* jiñi mach bʌ weñic, bej mele chuqui wen chaʼan maʼ mʌlben jiñi mach bʌ weñic.