Mateo

7 «Cʌyʌla meloñel chaʼan maʼañic miʼ yujtel meloñel ti laʼ tojlel. 2 Come cheʼ bajcheʼ mi laʼ chaʼlen meloñel tiʼ tojlel yambʌlob cheʼ mi caj i yujtel meloñel ti laʼ tojlel, i cheʼ bajcheʼ yilal laʼ wicʼot yambʌlob cheʼʌch mi caj laʼ mejlel. 3 ¿Chucoch maʼ qʼuel jiñi i sajl teʼ am bʌ tiʼ wut a wermañu, pero maʼañic maʼ qʼuel jiñi cucujl am bʌ ti a chaʼan? 4 ¿Bajcheʼ miʼ mejlel a suben a wermañu: ‹Laʼ c locʼsʌbeñet jiñi i sajl teʼ am bʌ ti a wut› cheʼ bʌ yaʼan jumpʼejl cucujl ti a chaʼan? 5 ¡Xlotet! Ñaxan locʼsan jiñi cucujl am bʌ ti a wut, cheʼ jiñi jamʌ tsiquil mi caj a qʼuel bajcheʼ yom maʼ locʼsan jiñi i sajl teʼ am bʌ tiʼ wut a wermañu».

6 «Mach laʼ wʌqʼuen chuqui tac chʼujul jiñi tsʼiʼ. Cheʼ jaʼel, mach laʼ choc laʼ perla tac* yaʼ baqui an jiñi chitam, ame i tʼuchtañob, miʼ chaʼ sutqʼuiñob i bʌ ti laʼ tojlel i miʼ ticʼlañetla».

7 «Chʌn cʼajtinla i mi caj laʼ wʌqʼuentel, chʌn sʌclanla i mi caj laʼ taj, chʌn jatsʼʌla i tiʼ otot i mi caj laʼ jambentel. 8 Come majqui jach miʼ cʼajtin miʼ yʌqʼuentel, majqui jach miʼ sʌclan miʼ taj, i majqui jach miʼ jatsʼ i tiʼ otot mi caj i jambentel. 9 Mi jiñi laʼ walobil miʼ cʼajtibeñetla pan, ¿muʼ ba caj laʼ wʌqʼuen xajlel?* 10 I cheʼ bʌ miʼ cʼajtibeñetla chʌy, maʼañic mi laʼ wʌqʼuen lucum, ¿o mucʼʌch? 11 Jin chaʼan, mi jatetla, anquese jontoletla, laʼ wujil aqʼuentel wem bʌ i majtan laʼ walobilob, ¡jiñi laʼ Tat am bʌ ti panchan ñumento mi caj i yʌqʼuen chuqui tac wen jiñi muʼ bʌ i cʼajtibeñob!».

12 «Jin chaʼan, melbenla yambʌlob pejtelel chuqui laʼ wom bʌ mi laʼ melbentel jaʼel. Tiʼ sujm, jiñʌch muʼ bʌ i yʌl jiñi Mandar yicʼot jiñi Xʼaltʼañob».

13 «Ochenla yaʼ ti chʼoʼchʼoc bʌ puerta. Come colem jiñi puerta yicʼot jiñi bij muʼ bʌ i pʌyonla majlel ti jisʌntel, i cabʌl muʼ bʌ i yochelob yaʼi, 14 pero chʼoʼchʼoc jiñi puerta yicʼot jiñi bij muʼ bʌ i pʌyonla majlel ti laj cuxtʌlel, i mach cabʌlobic muʼ bʌ i tajob».

15 «Cʌntan laʼ bʌ tiʼ tojlel jiñi xlot bʌ xʼaltʼañob, muʼ bʌ i cuyob i bʌ ti tiñʌmeʼ pero tiʼ sujm jiñobʌch jontol bʌ mateʼtsʼiʼ. 16 Tiʼ melbal mi caj laʼ cʌñob. Maʼañic miʼ tujqʼuel uva yicʼot higo ti chʼix tac, ¿o mucʼʌch? 17 Cheʼ jaʼel, jiñi wem bʌ teʼ miʼ yʌcʼ wem bʌ i wut, pero jiñi ocʼben bʌ* teʼ mach weñic miʼ yʌcʼ i wut. 18 Jiñi wem bʌ teʼ mach mejlic i yʌcʼ mach bʌ weñic i wut i jiñi ocʼben bʌ mach mejlic i yʌcʼ wem bʌ i wut. 19 Pejtelel jiñi teʼ maʼañic bʌ miʼ yʌcʼ wem bʌ i wut miʼ sejqʼuel i miʼ chojquel ochel ti cʼajc. 20 Jin chaʼan, tiʼ wut mi caj laʼ cʌn jiñi wiñicob».

21 «Mach tiʼ pejtelelic muʼ bʌ i subeñoñob: ‹C Yum, c Yum› mi caj i yochelob tiʼ Yumʌntel panchan. Cojach jiñi muʼ bʌ i melob chuqui yom jiñi c Tat am bʌ ti panchan. 22 Ti jimbʌ qʼuin, cabʌl mi caj i yʌlob: ‹C Yum, c Yum, ¿mach ba añic tsaʼ lon c chaʼle tʼan ti a cʼabaʼ i ti a cʼabaʼ tsaʼ lon c choco loqʼuel xibajob yicʼot ti a cʼabaʼ tsaʼ lon c mele milagro tac?›.* 23 Pero cheʼ jiñi mi caj c subeñob: ‹¡Maʼañic baʼ ora tsaʼ j cʌñʌyetla! ¡Ñajtʼesanla laʼ bʌ tic tojlel, jatetla muʼ bʌ laʼ mel jontolil!›».

24 «Jin chaʼan, pejtelel muʼ bʌ i ñʌchʼtan yicʼot miʼ mel tsaʼ bʌ cʌlʌ cheʼʌch bajcheʼ jiñi wiñic tsaʼ bʌ i mele i yotot tiʼ pam xajlel. 25 Tsaʼ tili jaʼal, tsaʼ tili butʼjaʼ, tsaʼ tili tsʌts bʌ icʼ..., pero jiñi otot maʼañic tsaʼ yajli come melbil i yebal yaʼ tiʼ pam xajlel. 26 Pero majqui jach miʼ ñʌchʼtan tsaʼ bʌ cʌlʌ i maʼañic miʼ mel, cheʼʌch bajcheʼ jiñi tonto bʌ wiñic tsaʼ bʌ i waʼchoco i yotot ti jiʼ. 27 Tsaʼ tili jaʼal, tsaʼ tili butʼjaʼ, tsaʼ tili tsʌts bʌ icʼ, tsiʼ ñijca jiñi otot..., tsaʼ yajli i tsaʼ junyajl jejmi».

28 Cheʼ bʌ Jesús tsaʼ ujti i yʌl iliyi, jiñi lac piʼʌlob toj sajtelob i pusicʼal chaʼan i cʌntesa 29 come miʼ chaʼlen cʌntesa bajcheʼ juntiquil ñuc bʌ i yeʼtel i mach cheʼic bajcheʼ jiñi xtsʼijbayajob.