1 Pedro

2 Jin chaʼan cʌyʌla baqui jach bʌ jontolil, lot, i tsʌytsʌyñiyel laʼ pusicʼal yicʼot baqui jach bʌ jopʼtʼan. 2 Cheʼ bajcheʼ jiñi alʌlob tsaʼ jaxto bʌ i yilayob pañimil jilsajt miʼ sʌclʌbeñob i chuʼ i mamá, jatetla jaʼel chaʼlenla wersa laʼ sʌclan jiñi i sujm bʌ i tʼan Dios chaʼan mi laʼ colel majlel yicʼot iliyi i mi laʼ taj laʼ coltʌntel, jiñi i tʼan Dios lajal bajcheʼ jiñi ñoj leche bʌ, 3 i miʼ mejlel laʼ mel iliyi cojach mi wen laʼ cʌñʌyix jiñi i yutslel lac Yum.

4 Jiñi wiñicob maʼañic tsiʼ chʼʌmʌyob ti ñuc jiñi cuxul bʌ xajlel,* pero Dios tsiʼ yajca i utsʼatax miʼ qʼuel. Cheʼ bʌ mi laʼ lʌcʼtesan laʼ bʌ tiʼ tojlel, 5 jatetla, cheʼetbʌla bajcheʼ cuxul bʌ xajlel, jumpʼejl ototʌletla woli bʌ i mejlel tiʼ coltaya jiñi i yespíritu Dios chaʼan mi laʼ sujtel ti chʼujul bʌ sacerdotejob, i cheʼ bajcheʼ jiñi miʼ mejlel laʼ wʌcʼ tsʌnsʌbil bʌ majtañʌl cheʼ bajcheʼ miʼ mulan jiñi i yespíritu Dios yicʼot mucʼʌch bʌ i chʼʌjmel tiʼ coltaya Jesucristo. 6 Come yaʼ ti Tsʼijbujel an baqui miʼ yʌl: «¡Qʼuelela! Ti Sion mi cʌcʼ jumpʼejl yajcʌbil bʌ xajlel, jumpʼejl utsʼatax bʌ xajlel ñumen ñuc bʌ i cʼʌjñibal, jiñi muʼ bʌ i yʌcʼ i ñopoñel tiʼ tojlel maʼañic baʼ ora mi caj i chaʼ ñaʼtan i bʌ».*

7 Jin chaʼan, jatetla ñucʌch i cʼʌjñibal mi laʼ qʼuel come xñoptʼañetla. Pero tiʼ tojlel jiñi mach bʌ añic miʼ ñopob, «jiñi xajlel maʼañic bʌ tsiʼ chʼʌmʌyob jiñi xmel ototob, tsaʼix sujti ti jiñi xajlel ñumen ñuc bʌ i cʼʌjñibal»,* 8 yicʼot ti «jumpʼejl xajlel muʼ bʌ i yʌqʼuen i jatsʼ i yoc yambʌlob yicʼot jumpʼejl colem xajlel muʼ bʌ i yʌcʼ ti yajlel yambʌlob». Miʼ jatsʼob i yoc come maʼañic miʼ jacʼob jiñi tʼan. Jiñʌch chaʼan tsaʼ yajcʌntiyob. 9 Pero «jatetla añetla ti jumpʼejl pʼolbalʌl yajcʌbil bʌ, junmojt reyob sacerdotejoʼ bʌ, añetla ti jumpʼejl chʼujul bʌ tejclum, jatetla jiñi tejclum tsaʼ bʌ i yajca Dios, chaʼan mi laʼ sub jiñi i yutslel ti baqui jach bʌ tejclum», tsiʼ pʌyʌyetla loqʼuel baqui icʼyochʼan chaʼan mi laʼ wajñel baqui an jiñi utsʼatax bʌ sʌcjamañiyel. 10 Come ti wajali jatetla mach jumpʼejleticla tejclum, pero wʌle i tejclumetixla Dios, ti wajali maʼañic tsaʼ pʼuntʌntiyetla, pero wʌle tsaʼix pʼuntʌntiyetla.

11 Cʼuxbibiletbʌla, mij cʼajtibeñetla ti wocol tʼan bajcheʼ chʼoyoletbʌla ti yambʌ tejclum yicʼot ñumel jach bʌ woliyetla chaʼan mi laʼ ticʼ laʼ bʌ ti chuqui yom laʼ bʌcʼtal, jiñi woli bʌ i contrajiñetla. 12 Chʌn pʌsʌla wem bʌ laʼ melbal yaʼ ti tejclum tac chaʼan cheʼ bʌ miʼ yʌjlel chaʼan mach weñic chuqui woli laʼ mel, miʼ taj i qʼuelob jiñi wem bʌ laʼ melbal, i cheʼ bajcheʼ jiñi, miʼ yʌqʼueñob i ñuclel Dios cheʼ tiʼ qʼuiñilel meloñel.

13 Jacʼbenla i tʼan lac Yum cheʼ mi laʼ wʌcʼ laʼ bʌ tiʼ wenta pejtelel jiñi añoʼ bʌ i yeʼtel waʼchocobil bʌ i chaʼan wiñicob. Mach yʌlʌyic mi juntiquil rey, ñumen ñuc bʌ bajcheʼetla, 14 o jiñi gobernadorob, come jiñi rey jiñʌch tsaʼ bʌ i waʼchocoyob chaʼan miʼ yʌqʼueñob i toj i mul jiñi mach bʌ weñobic i melbal i miʼ yʌqʼueñob i ñuclel jiñi muʼ bʌ i melob chuqui wen. 15 Come jiñi yom bʌ Dios jiñʌch chaʼan cheʼ bʌ mi laʼ mel chuqui wen, mi laʼ wʌcʼob ti ñʌjchʼel jiñi maʼañobic bʌ i ñaʼtʌbal muʼ bʌ i toʼol chaʼleñob tʼan. 16 Yom mi laʼ chumtʌl bajcheʼ librejoʼ bʌ lac piʼʌlob, pero mach laʼ cʼʌn jiñi laʼ librejlel chaʼan mi laʼ mel chuqui mach weñic, chaʼañʌch mi laʼ sujtel ti xyaj eʼtel i chaʼan Dios. 17 Aqʼuenla i ñuclel pejtelel lac piʼʌlob, cʼuxbinla pejtelel hermanojob, bʌcʼñanla Dios, aqʼuenla i ñuclel jiñi rey.

18 Jiñi xʼeʼtelob yom miʼ yʌcʼob i bʌ tiʼ wenta jiñi i yumob i yom miʼ qʼuelob ti ñuc cheʼ bajcheʼ yom, pero mach jiñic jach jiñi utsoʼ bʌ yicʼot jiñi mach bʌ tsʌtsic miʼ melob i bʌ, yicʼotʌch jiñi wocol bʌ miʼ tijicñesʌntelob. 19 Dios miʼ qʼuel ti utsʼat jiñi muʼ bʌ i chaʼlen wersa chaʼan sʌc miʼ yajñel i conciencia tiʼ tojlel, mach yʌlʌyic mi miʼ ñusan wocol i miʼ ticʼlʌntel anquese maʼañic i mul. 20 Come mi tiʼ caj laʼ mul mi laʼ jajtsʼel, ¿chuqui mi laʼ taj cheʼ mi laʼ cuch? Pero mi tsaʼ laʼ lʌtʼʌ wocol tac tiʼ caj mi laʼ mel chuqui wen, jiñi miʼ wen aqʼuen i tijicñʌyel Dios.

21 Tiʼ sujm, chaʼañʌch mi laʼ ñusan wocol tsaʼ pʌjyiyetla, come jinto Cristo tsiʼ ñusa wocol chaʼañetla, i cheʼ bajcheʼ jiñi tsiʼ pʌsbeyetla chuqui yom mi laʼ mel chaʼan yicʼot laʼ xucʼtʌlel mi laʼ tsajcʌben i melbal. 22 Maʼañic tsiʼ wis chaʼle mulil i mi tsaʼic i chaʼle lot. 23 Cheʼ bʌ woliʼ pʼajob,* maʼañic tsaʼ caji ti pʼajoñel jaʼel. Cheʼ bʌ woliʼ ñusan wocol, maʼañic tsaʼ caji ti chʼʌcoñel. Tsiʼ yʌcʼʌ i bʌ tiʼ wenta jiñi toj bʌ miʼ chaʼlen meloñel. 24 Jiñʌch tsiʼ cuchu lac mul tiʼ bʌcʼtal cheʼ bʌ tsiʼ chʼijiyob* ti teʼ, chaʼan mi laj cojlel ti jiñi mulil i mi lac chumtʌl chaʼan mi lac mel chuqui toj. I «tiʼ caj jiñi i lojweñal jatetla tsaʼ cʼoqʼuesʌntiyetla». 25 Come ti ñaxan lajaletla bajcheʼ sajtem bʌ tiñʌmeʼ, pero wʌleʼli tsaʼix chaʼ sujtiyetla baqui an jiñi xcʌnta tiñʌmeʼ muʼ bʌ i cʌntan laʼ cuxtʌlel.