«Añʌch c pijtaya ti Dios»

1-3. a) ¿Baqui bʌ junchajp ñuc bʌ i cʼʌjñibal miʼ cʼotel lac ñop? b) ¿Chucoch ñucʌch i cʼʌjñibal? (Qʼuele jiñi dibujo).

¿CHUQUI mi lac jacʼ cheʼ muqʼuic laj cʼajtibentel baqui bʌ jiñi ñuc tac bʌ i cʼʌjñibal muʼ bʌ lac ñop? Tajol mi la cʌl chaʼan jiñʌch Jehová tsaʼ bʌ i Meleyonla yicʼot tsaʼ bʌ i yʌqʼueyonla laj cuxtʌlel. Miʼ mejlel la cʌl jaʼel chaʼan mi lac ñop Jesucristo, i tsiʼ yʌcʼʌ i cuxtʌlel tiʼ caj lac mul. Tajol mi la cʌl jaʼel chaʼan tiʼ pejtelel ora mi caj lac chumtʌl ti jumpʼejl Paraíso ti talto bʌ qʼuin. Pero ¿muʼ ba la cʌl jaʼel chaʼan jiñi chʌmeñoʼ (sajtemoʼ) bʌ mi caj i chaʼ tejchelob?

² Anquese mi lac ñop chaʼan ti jiñi ñuc bʌ wocol mi caj laj coltʌntel yicʼot tiʼ pejtelel ora mi caj lac chumtʌl wʌʼ ti Pañimil, yomʌch mi lac wen ñaʼtan jaʼel chaʼan jiñi i chaʼ cuxtʌyel jiñi chʌmeñoʼ bʌ jiñʌch junchajp ñuc bʌ i cʼʌjñibal mi lac ñop jaʼel. Jiñi apóstol Pablo tsiʼ pʌsʌ chucoch ñucʌch i cʼʌjñibal ili cʌntesa: «Mi maʼanic miʼ chaʼ chʼojyel jini chʌmeñoʼ bʌ, cheʼ jini, maʼanic tsaʼ chʼojyi Cristo». Cheʼ machic tsaʼ chaʼ tejchi Jesús, maʼañic woliʼ mel i yeʼtel (troñel) ili ora yicʼot maʼañic i cʼʌjñibal yubil cheʼ mi lac lon acʼ ti cʌñol i yumʌntel (pejcan 1 Corintios 15:12-19). Pero ti jumpʼejl lac pusicʼal mi lac ñop chaʼan Jesús tsaʼʌch chaʼ tejchi. Mach lajaloñicla bajcheʼ jiñi saduceojob, tsaʼ bʌ i yʌlʌyob chaʼan maʼañic miʼ mejlelob ti chʌn cuxtʌyel jiñi chʌmeñoʼ bʌ. Anquese jiñi wiñicob xʼixicob (quixtañujob) maʼañic miʼ qʼuelob ti ñuc ili cʌntesa, joñonla mi lac ñop chaʼan Dios mi caj i chaʼ tejchesan jiñi chʌmeñoʼ bʌ (Mr. 12:18; Hch. 4:2, 3; 17:32; 23:6-8).

³ Pablo tiʼ tsʼijbu chaʼan jiñi cʌntesa chaʼan ‹i tejchel chʼojyel chʌmeñoʼ bʌ› yaʼʌch ochem jaʼel ti jiñi «i cajibal i sujmlel Cristo», yom i yʌl chaʼan jiñʌch jiñi ñaxam bʌ cʌntesʌntel jaʼel yom bʌ miʼ ñop juntiquil xñoptʼan (He. 6:1, 2). Tsiquil tsiʼ yʌlʌ chaʼan mucʼʌch i ñop jiñi i chaʼ tejchel chʌmeñoʼ bʌ (Hch. 24:10, 15, 24, 25). Pero cheʼ miʼ yʌjlel chaʼan jiñʌch «i cajibal i sujmlel i tʼan Dios» mach yomic i yʌl chaʼan mach ñuquic i cʼʌjñibal bʌ cʌntesa (He. 5:12). ¿Chucoch mach cheʼiqui?

 4. ¿Baqui bʌ cʼajtiya tajol miʼ mejlel chaʼan jiñi chaʼ cuxtʌyel?

⁴ Cheʼ bʌ mi lac tech lac pejcan jiñi Biblia mi laj cʌn chaʼan wajali añʌch majqui tsaʼ chaʼ tejchiyob, cheʼ bajcheʼ tiʼ tojlel Lázaro. Mi laj cʌn jaʼel chaʼan wiñicob bajcheʼ Abrahán, Job yicʼot Daniel, tsiʼ ñopoyob chaʼan ti talto bʌ qʼuin mi caj i chaʼ tejchelob jiñi chʌmeñoʼ bʌ. Pero tajol an majqui miʼ cʼajtin: ¿Bej anto ba i cʼʌjñibal jiñi tʼan tsaʼ bʌ ajli chaʼan chaʼ tejchel cheʼ añix cabʌl siglo tsaʼ ujti? Cheʼ jaʼel, ¿muʼ baʼ i ñoj tsictesan jiñi Biblia jala miʼ cajel jiñi? Jiñi i jacʼbal tac mi caj i ñumen pʼʌtʼesan lac ñopoñel (chʼujbiya) ti Dios. Jin chaʼan, mi caj laj qʼuel muʼ bʌ i yʌl jiñi Chʼujul bʌ Tsʼijbujel.

 5. ¿Chuqui mi caj lac ñaxan al?

⁵ Tajol mach wocolic miʼ mejlel lac ñop chaʼan juntiquil tsaʼ jaxto bʌ chʌmi miʼ mejlel ti chaʼ tejchel (Jn. 11:11; Hch. 20:9, 10). Pero ¿muʼ ba i mejlel lac ñop chaʼan jiñi chʌmeñoʼ bʌ mi caj i chaʼ tejchelob anquese cabʌlto jab yom chaʼan miʼ tsʼʌctiyel? ¿Mucʼʌch ba i mejlel lac ñop anquese jiñi quixtañu maxto jalic i chʌmel (sajtel) o wajalix tsaʼ chʌmi? Tiʼ sujm, añʌch jumpʼejl muʼ bʌ lac ñop anquese añix jab tsaʼ wʌn ajli, i tsaʼʌch tsʼʌctiyi. ¿Baqui bʌ? ¿Bajcheʼ miʼ taj i bʌ yicʼot jiñi lac pijtaya am bʌ lac chaʼan ti talto bʌ qʼuin?

 6. ¿Bajcheʼ tsaʼ tsʼʌctiyi Salmo 118 tiʼ tojlel Jesús?

⁶ Yaʼ ti Salmo 118, miʼ taj ti tʼan chaʼan jiñi chaʼ tejchel woli bʌ la cʌl, tajol jiñʌch David tsaʼ bʌ i tsʼijbu. Ili salmo miʼ yʌl: «C Yum, awocolic, coltañon lojon. [...] Tijicña jini muʼ bʌ i tilel tiʼ cʼabaʼ lac Yum». Cheʼ tsʼitaʼ jachix yom chaʼan miʼ chʌmel Jesús, tajol cʼajal lac chaʼan cheʼ bʌ jiñi judíojob tsaʼ bʌ i qʼueleyob cheʼ woliʼ yochel majlel Jesús ti Jerusalén cheʼ ti 9 i chaʼan nisán, tsiʼ yʌlʌyob ili profecía chaʼan jiñi Mesías (Sal. 118:25, 26; Mt. 21:7-9). Pero ¿chucoch mi la cʌl chaʼan jiñi chaʼ tejchel muʼ bʌ i taj ti tʼan ili salmo ti wiʼil to tsaʼ tsʼʌctiyi? Mi laj qʼuel jaʼel chaʼan miʼ yʌl: «Jini xajlel tsʼaʼlebil bʌ i chaʼan xmel ototob, tsaʼix otsʌnti ti [ñaxam bʌ i] xujc otot», yom i yʌl, jiñi ñumen colem bʌ xajlel (Sal. 118:22).

 7. ¿Chuqui tsiʼ melbeyob Jesús jiñi judíojob?

⁷ «Jiñi xmel ototob» tsaʼ bʌ i tsʼaʼleyob Jesús, jiñi Mesías, jiñʌch jiñi judíojob yumʌloʼ bʌ. Mach cojach tiʼ tsʼaʼleyob, maʼañic tsiʼ ñopoyob jaʼel chaʼan jiñʌch Cristo. Cabʌl judíojob tsiʼ cʼajtiyob chaʼan miʼ tsʌnsʌntel (Lc. 23:18-23). Tiʼ mulobʌch tsaʼ tsʌnsʌnti.

 8. ¿Bajcheʼ tsaʼ cʼoti ti sujtel Jesús ti jiñi colem bʌ xajlel?

⁸ Mi Jesús ti tsʼaʼlenti yicʼot ti tsʌnsʌnti, ¿bajcheʼ miʼ mejlel ti sujtel ti ñaxam bʌ i xujc otot, o ñumen colem bʌ xajlel (tun)a? Cojach cheʼ miʼ chaʼ tejchesʌntel. Cheʼʌch tsiʼ yʌcʼʌ ti ñaʼtʌntel cheʼ bʌ tsiʼ yʌlʌ chaʼan juntiquil wiñic tsaʼ bʌ i choco majlel xʼacʼ tʼañob baqui an jiñi xʼeʼtelob i chaʼan. Pero jiñi xʼeʼtelob tsiʼ ticʼlayob jiñi chocbiloʼ bʌ cʼotel. Lajal tsiʼ mele (chaʼle) jiñi israelob, tsiʼ pʼumpʼun ticʼlayob jiñi xʼaltʼañob i chaʼan Dios. Jin chaʼan, jiñi wiñic tsiʼ choco majlel cʼuxbibil bʌ i yalobil, jiñi yajcʌbil bʌ i chaʼan, come tsiʼ lon ñaʼta chaʼan mi caj i ñʌchʼtʌntel. Pero jiñi xʼeʼtelob tiʼ tsʌnsayob. Cheʼ bʌ Jesús tsaʼ ujti i yʌl iliyi, tsiʼ taja ti tʼan tsaʼ bʌ wʌn ajli ti Salmo 118:22 (Lc. 20:9-17). Cheʼ bʌ jiñi apóstol Pedro woliʼ pejcan jiñi yumʌlob, ancianojob yicʼot xtsʼijbaya judíojoʼ bʌ cheʼ tempʌbilob yaʼ ti Jerusalén, tsiʼ yʌlʌ jaʼel jiñi tsʼijbubil bʌ ti ili salmo. Tsiʼ taja ti tʼan chaʼan «Jesucristo, jini chʼoyol bʌ ti Nazaret», tsaʼ bʌ i chʼijiyob «ti cruz [«teʼ», TNM], pero Dios tsiʼ teche chʼojyel baʼan chʌmeñoʼ bʌ». Cheʼ jiñi tsiʼ jamʌ subeyob: «Jesús jiñʌch jini Xajlel tsaʼ bʌ laʼ choco, xmel ototet bʌ la. Tsaʼ otsʌnti ti ñaxan bʌ i xujc otot» (Hch. 3:15; 4:5-11; 1 P. 2:5-7).

 9. ¿Chuqui ñuc bʌ miʼ caj ti ujtel tsaʼ ajli ti salmo 118:22?

⁹ Cheʼ bajcheʼ tsaʼix laj qʼuele, cabʌl jab tsaʼ wʌn ajli yaʼ ti Salmo 118:22 chaʼan miʼ cajel jumpʼejl chaʼ tejchel. Tsaʼ ajli chaʼan jiñi Mesías mi caj i tsʼaʼlentel yicʼot i tsʌnsʌntel, pero chaʼan mi caj i chaʼ cuxtʌyel yicʼot mi caj i sujtel ti colem bʌ xajlel. Cheʼ bʌ jiñi i Yalobil Dios tsaʼ chaʼ cuxtʌyi, tsaʼ sujti ti xcoltaya lac chaʼan, «maʼanic laj coltʌntel ti yambʌ, cojach tiʼ cʼabaʼ Jesús. Maʼanic yambʌ tiʼ yebal panchan aqʼuebiloʼ bʌ winicob muʼ bʌ mejlel i coltañonla» (Hch. 4:12; Ef. 1:20).

10. a) ¿Chuqui tsaʼ wʌn ajli ti Salmo 16:10? b) ¿Chucoch mi lac ñop chaʼan mach tiʼ tojlelic David tsaʼ tsʼʌctiyi jiñi salmo?

¹⁰ Wʌle laʼ laj qʼuel yambʌ versículo baqui tsaʼ wʌn ajli jaʼel chaʼan jiñi chaʼ tejchel. Añix mil jab tsaʼ tsʼijbunti. Iliyi mi caj i ñumen aqʼueñonla lac ñop chaʼan mucʼʌch i mejlel ti chaʼ tejchel jiñi chʌmeñoʼ bʌ anquese añix ora albil. Yaʼ ti Salmo 16, baʼ miʼ taj ti tʼan David, miʼ yʌl: «Maʼanic mi caj a cʌyon tiʼ yajñib chʌmeñoʼ bʌ. Maʼanic mi caj a wʌcʼ jini Chʼujul Bʌ a chaʼan ti ocʼmʌl» (Salmo 16:10). Ili tʼan mach yomic i yʌl chaʼan maʼañic baqui ora mi caj i chʌmel David o chaʼan maʼañic mi caj i majlel yaʼ tiʼ yajñib chʌmeñoʼ bʌ. Wen tsiquil miʼ yʌl yaʼ tiʼ Tʼan Dios chaʼan David tsaʼ ñoxʼa, tsaʼ chʌmi yicʼot «tsaʼ mujqui yaʼ ti Jerusalén» baʼan i ñojteʼelob (1 R. 2:1, 10). Ixcu cheʼ jiñi, ¿majqui woliʼ taj ti tʼan jiñi Salmo 16:10?

11. ¿Baqui ora tiʼ tsictesa Pedro muʼ bʌ i yʌl Salmo 16:10?

¹¹ Cheʼ ñumeñix ti mil jab tiʼ tsʼijbu David ili tʼan, jiñi apóstol Pedro tiʼ tsictesa majqui woliʼ taj ti tʼan. Jesús ñumeñix ti jumpʼejl semana i chʌmel yicʼot chaʼ tejchemix, Pedro tiʼ tsictesʌbe cabʌl judíojob yicʼot mach bʌ judíojobic muʼ bʌ i yʌl yaʼ ti Salmo 16:10 (pejcan Hechos 2:29-32). Tiʼ subeyob chuqui wen yujiloʼ bʌ: Chaʼan David chʌmeñix yicʼot mucbilix. Cheʼ jiñi tsiʼ yʌlʌ chaʼan «David tsiʼ wʌn ñaʼta mi caj i chaʼ chʼojyel» jiñi Mesías albil bʌ. Jiñi relato miʼ pʌs chaʼan maʼañic majqui tsiʼ jatsʼʌ ti tʼan tsaʼ bʌ i yʌlʌ Pedro.

12. a) ¿Bajcheʼ tsaʼ tsʼʌctiyi Salmo 16:10? b) ¿Chuqui miʼ pʌsbeñonla chaʼan jiñi chaʼ tejchel albil bʌ chaʼan miʼ cajel?

¹² Pedro tsiʼ pejca tsaʼ bʌ i yʌlʌ David ti Salmo 110:1 chaʼan miʼ qʼuelob jiñi yambʌlob chaʼan isujmʌch woli bʌ i yʌl (pejcan Hechos 2:33-36). Come chuculʌch ti Tsʼijbujel tsaʼ bʌ i yʌlʌ, jiñi quixtañujob tsiʼ ñopoyob chaʼan Jesús jiñʌch «lac Yum» yicʼot «Cristo». Tsaʼ cʼoti i ñaʼtañob chaʼan jiñi Salmo 16:10 tsaʼ tsʼʌctiyi cheʼ bʌ Jesús tsaʼ chaʼ cuxtʌyi. Ti wiʼil, jiñi apóstol Pablo tsiʼ cʼʌñʌ jaʼel ili texto tac cheʼ woliʼ pejcan jiñi judíojob yaʼ ti tejclum Antioquía am bʌ ti Pisidia. Come tsiʼ wen mulayob bajcheʼ tsaʼ tsictesʌbentiyob, tsaʼto i cʼajtiyob chaʼan miʼ bej tsictesʌbentelob (pejcan Hechos 13:32-37, 42). Ili texto tsaʼ bʌ i cʼʌñʌ Pedro yicʼot Pablo, yom miʼ yʌqʼueñonla lac ñop ti jumpʼejl lac pusicʼal chaʼan jiñi tsaʼ bʌ wʌn ajli tac chaʼan jiñi chaʼ tejchel, tsaʼʌch tsʼʌctiyi anquese añix ora tsaʼ wʌn ajli.

13. ¿Chuqui ti cʼajtiya tac tajol miʼ cʼajtiben i bʌ juntiquil chaʼan jiñi chaʼ tejchel?

¹³ Miʼ wen pʼʌtʼesan lac pusicʼal cheʼ la cujil chaʼan mucʼʌch i mejlelob ti chaʼ tejchel jiñi chʌmeñoʼ bʌ anquese añix ora tsaʼ wʌn ajli. Tajol an majqui miʼ cʼajtiben i bʌ: «¿Yom ba mic pijtan cabʌl ora cheʼ jiñi chaʼan mic chaʼ mejlel j qʼuel jiñi chʌmeñoʼ bʌ c chaʼan? ¿Baqui ora mi caj i chaʼ tejchelob cheʼ bajcheʼ albil?». Yom mi laj cʼajtesan chaʼan Jesús tiʼ sube jiñi apóstolob i chaʼan chaʼan an chuqui tac mach bʌ yujilobic i maʼañic bʌ miʼ mejlel i ñaʼtañob, tsiʼ yʌlʌ: «Mach laʼ wentajic baqui bʌ ora mi baqui bʌ qʼuin mi caj i yujtel jini, come lac Tat tsiʼ yotsa tiʼ bajñel wenta» (Hch. 1:6, 7; Jn. 16:12). Pero ili mach yomic i yʌl chaʼan maʼañic chuqui wis la cujil chaʼan jala miʼ cajel jiñi chaʼ tejchel.

14. ¿Chucoch mach lajalic bajcheʼ tsaʼ chaʼ tejchi Jesús yicʼot jiñi ñaxañoʼ bʌ tsaʼ chaʼ tejchiyob?

¹⁴ Cheʼ mi laj cʼajtesan tsaʼ bʌ i wʌn alʌ jiñi Biblia chaʼan jiñi chaʼ tejchel tsaʼ bʌ ujti tac miʼ coltañonla lac chʼʌmben isujm. Jiñi ñumen ñuc bʌ chaʼ tejchel tsaʼ ujti jiñʌch i chaʼan Jesús. Machic tsaʼ chaʼ tejchi Jesús, maʼañic majqui an i pijtaya ili ora chaʼan miʼ mejlel i chaʼ qʼuel jiñi chʌmeñoʼ bʌ i chaʼan. Jiñi ñaxañoʼ bʌ tsaʼ tejchiyob bajcheʼ tiʼ yorajlel Elías yicʼot Eliseo, mach tiʼ pejtelic ora tsaʼ chumleyob. Tsaʼ chaʼ chʌmiyob, tsaʼ mujquiyob yicʼot tsaʼ sujtiyob ti tsʼubejn. Pero «tejchemix chʼojyel Cristo baʼan chʌmeñoʼ bʌ» i «mach mejlix ti chaʼ chʌmel», «come maʼañix i pʼʌtʌlel chʌmel tiʼ tojlel». Yaʼ chumul ti panchan «tiʼ pejtelel ora» (Ro. 6:9, Jiñi tsijiʼ bʌ wen tʼañ; Ap. 1:5, 18; Col. 1:18; 1 P. 3:18).

15. ¿Chucoch miʼ subentel Jesús bajcheʼ jiñi ñaxam bʌ tsaʼ chaʼ chʼojyi?

¹⁵ Jesús tsaʼ chaʼ tejchi bajcheʼ espíritu yaʼ ti panchan. Iliyi jiñʌch jiñi ñaxam bʌ chaʼ tejchel tsaʼ ujti tiʼ tojlel ñumen ñuc bʌ i cʼʌjñibal, pero mach cojach tsaʼ ujti tiʼ tojlel (Hch. 26:23). Tsiʼ yʌqʼue i tʼan jiñi xucʼul bʌ apóstolob i chaʼan chaʼan mi caj i majlelob ti yumʌntel yicʼot yaʼ ti panchan (Lc. 22:28-30). Pero cheʼ bajcheʼ Jesús, yomʌch miʼ ñaxan chʌmelob i ti wiʼil miʼ chaʼ tejchelob bajcheʼ espíritu. Lʌcʼʌl lajalʌch bajcheʼ tiʼ tsictesa jiñi Pablo. Tiʼ tsʼijbu: «Tsaʼix tejchi chʼojyel Cristo baʼan chʌmeñoʼ bʌ. Jiñʌch ñaxan bʌ tsaʼ bʌ chʼojyi». Ti wiʼil tsiʼ yʌlʌ chaʼan cheʼ bajcheʼ Jesús, añʌch yambʌ muʼ bʌ caj i chaʼ tejchelob chaʼan miʼ majlelob ti panchan. Tsiʼ yʌlʌ: «Ti jujuntiquil miʼ chaʼ tejchelob cheʼ bajcheʼ yom. Ñaxan tsaʼ chʼojyi Cristo, ti wiʼil miʼ chaʼ chʼojyel i chaʼañoʼ bʌ Cristo cheʼ miʼ chaʼ tilel [«miʼ pʌs i bʌ», TNM]» (1 Co. 15:20, 23).

16. ¿Chuqui miʼ pʌsbeñonla jiñi Biblia chaʼan baqui ora miʼ chaʼ tejchelob jiñi muʼ bʌ i majlelob ti panchan?

¹⁶ Ili tsaʼ bʌ i yʌlʌ Pablo miʼ tsʼitaʼ aqʼueñonla lac ñaʼtan jalaqui miʼ chaʼ tejchelob jiñi muʼ bʌ i majlelob ti panchan: Jiñʌch cheʼ baʼ ora miʼ pʌs i bʌ Cristo. Cʼʌlʌl ti wajali, jiñi i testigojob Jehová an i pʌsʌyob ti Biblia chaʼan Jesús tsiʼ teche i pʌs i bʌ cheʼ ti 1914. Cʼʌlʌ ili ora Cristo wolito i pʌs i bʌ, i lʌcʼʌlix mi caj i jilel ili jontol bʌ pañimil (mulawil).

17, 18. ¿Chuqui mi caj i chaʼleñob jiñi bombiloʼ bʌ wʌʼto bʌ añob ti Lum cheʼ bʌ Cristo wolito i pʌs i bʌ?

¹⁷ Jiñi Biblia muʼto i bej al chaʼan jiñi muʼ bʌ i chaʼ tejchelob chaʼan miʼ majlelob ti panchan. Miʼ yʌl: «Com lojon mi laʼ ñaʼtan i sujmlel [chaʼan] jini chʌmeñoʼ bʌ [...]. Come mi tsaʼix lac ñopo Jesús tsaʼ bʌ chʌmi, tsaʼ bʌ chaʼ chʼojyi, ñaʼtanla jaʼel Dios mi caj i chaʼ pʌy tilel yicʼot Jesús jini tsaʼ bʌ chʌmiyob ti Jesús». I miʼ chaʼ al: «Joñonla cuxulon to bʌ la, mi wʌʼto añonla cheʼ miʼ chaʼ tilel [«miʼ pʌs i bʌ», TNM] lac Yum, mach ñaxañonicla mi caj lac letsel majlel tiʼ tojel i wut jini chʌmeñoʼ bʌ. Come jini lac Yum mi caj i jubel tilel ti panchan. Mi caj i chaʼlen mandar». Ti wiʼil miʼ tsictesan: «Ñaxan miʼ cajelob ti chʼojyel jini chʌmeñoʼ bʌ i chaʼañoʼ bʌ Cristo. Ti wiʼil joñonla cuxulon to bʌ la wʌʼ ti pañimil mi caj lac tem letsel majlel la quicʼot jini tsaʼ bʌ chʌmiyob. Yaʼ ti tocal ti panchan mi caj lac taj lac Yum. Cheʼ jini mi caj la cajñel yicʼot lac Yum tiʼ pejtelel ora» (1 Ts. 4:13-17).

¹⁸ Jiñi chʌmeñoʼ bʌ muʼ bʌ caj i majlelob ti panchan, tsaʼ cajiyob ti chaʼ tejchel cheʼ bʌ maxto wen jalic tsiʼ teche i «pʌs i bʌ» Cristo. Jiñi bombiloʼ bʌ wʌʼto bʌ añob ti Lum cheʼ bʌ wolix (choncolix) jiñi ñuc bʌ wocol, mi caj i ‹letselob majlel› ti tocal. Jiñi Biblia miʼ yʌl chaʼan jiñi muʼ bʌ caj i ‹letselob majlel› maʼañic mi caj i chʌmelob, ili yom i yʌl chaʼan mach wen jalic chʌmen mi caj i cʌytʌlob. Tiʼ pejtelelob ‹mi caj i yʌjñelob. Cheʼ miʼ wustʌl jiñi cojix bʌ trompeta, ti ora jach mi caj i yʌjñelob cheʼ bajcheʼ ora jach miʼ mujtsʼel miʼ cajñel lac wut› (1 Co. 15:51, 52; Mt. 24:31).

19. ¿Bajcheʼ yilal jiñi «ñumen utsʼat bʌ» chaʼ tejchel miʼ cajel ti talto bʌ qʼuin?

¹⁹ Yonlel xucʼul bʌ xñoptʼañob ili ora, mach bombilobic mi pʌybilobic chaʼan miʼ chaʼleñob yumʌntel yicʼot Cristo yaʼ ti panchan. Woli (yʌquel) i pijtañob baqui ora miʼ jilel ili jontol bʌ pañimil ti jiñi «i qʼuiñilel lac Yum» Jehová. Maʼañic majqui yujil baqui ora mi caj i julel i jilibal, pero wen tsiquil chaʼan lʌcʼʌlix (1 Ts. 5:1-3). Cheʼ jiñi, mi caj i tejchel jiñi chʌmeñoʼ bʌ, pero mach lajalic bajcheʼ tsaʼix bʌ la cʌlʌ. Yonlel mi caj i chaʼ chʼojyelob yicʼot mi caj i chumtʌlob tiʼ pejtelel ora wʌʼ ti Pañimil. Añob i pijtaya chaʼan miʼ junyajlel sujtelob ti toj yicʼot maʼañix baqui ora miʼ chaʼ chʌmelob. Jiñʌch jiñi «ñumen utsʼat bʌ» chaʼ tejchel miʼ cajel, mach lajalic bajcheʼ tsaʼ bʌ ujti wajali come jiñi tsaʼ bʌ tejchiyob tsaʼ chaʼ chʌmiyob (He. 11:35).

20. ¿Bajcheʼ miʼ mejlel lac ñaʼtan chaʼan jiñi chaʼ tejchel muʼ bʌ i cajel ti talto bʌ qʼuin wen chajpʌbil mi cajel?

²⁰ Jiñi Biblia miʼ yʌl chaʼan yaʼ ti panchan «ti jujuntiquil miʼ chaʼ tejchelob cheʼ bajcheʼ yom», yom i yʌl chaʼan wen chajpʌbil bajcheʼ miʼ cajel (1 Co. 15:23). Cheʼ bajcheʼ ili, miʼ mejlel lac ñaʼtan chaʼan wen chajpʌbil bajcheʼ miʼ cajel jaʼel jiñi chaʼ tejchel wʌʼ ti Pañimil. Jin mecu chaʼan miʼ mejlel laj cʼajtiben lac bʌ: «¿Jala mi caj i tejchelob jiñi tsaʼ bʌ chʌmiyob ili ora? ¿Jim ba tiʼ tejchibal jiñi Mil Jab i Yumʌntel Cristo chaʼan jiñi i familia yicʼot i yamigojob miʼ yʌqʼueñob i tijicñʌyel? ¿Ixcu jiñi xucʼuloʼ bʌ ti wajali tsaʼ bʌ i meleyob ti wen i yeʼtel ti Dios? ¿Jiñoʼ ba muʼ bʌ caj i ñaxan tejchesʌntelob chaʼan miʼ coltañob jiñi yambʌ i wiñicob Dios tiʼ chajpʌntel jiñi eʼtel (troñel) tac? ¿Ixcu jiñi yambʌlob maʼañic bʌ tsiʼ melbeyob i yeʼtel Jehová? ¿Jala yicʼot baqui mi caj i cuxtesʌntelob?». Cabʌl chuqui la com bʌ lac ñaʼtan, pero maxto añic chucoch yom mi lac wen cʼojoʼtan ili tac. Yom jach mi lac pijtan yicʼot mi laj qʼuel bajcheʼ mi caj i yujtel majlel. Tiʼ sujm, wen utsʼatax cheʼ mi caj laj qʼuel chuqui mi caj i mel Jehová.

21. ¿Baqui bʌ jiñi lac pijtaya?

²¹ Pero ili ora, yom mi lac pʼʌtʼesan majlel lac ñopoñel ti Jehová. Tiʼ tojlel Jesús, tsiʼ yʌcʼʌ i tʼan chaʼan mi caj i chaʼ tejchesan jiñi lotoloʼ bʌ i chaʼan tiʼ ñaʼtʌbal (Jn. 5:28, 29; 11:23). Jesús tsiʼ pʌsʌ chaʼan Dios mucʼʌch i mejlel i tejchesan jiñi chʌmeñoʼ bʌ, come tsiʼ yʌlʌ chaʼan cheʼʌch bajcheʼ cuxulix miʼ chaʼ qʼuelob jiñi Abrahán, Isaac yicʼot Jacob (Lc. 20:37, 38). Jin chaʼan, cabʌl chucoch miʼ mejlel la cʌl bajcheʼ tsiʼ yʌlʌ Pablo: «Añʌch c pijtaya ti Dios, [...] tal i yorajlel cheʼ mi caj i chʼojyelob jini chʌmeñoʼ bʌ» (Hch. 24:15).