Hebreos

12 Jin chaʼan, come joyolonla ti yonlel testigojob cheʼ bajcheʼ yonlel tocal, laʼ laj cʌy pejtelel jiñi laj cuch yicʼot jiñi mulil muʼ bʌ i mʌctañonla, i mach lujbʼaconla ti jiñi ajñel baqui tsaʼ ochiyonla 2 i maʼañic mi laj cʌy laj qʼuel jiñi Waʼchocobil bʌ chaʼan miʼ yʌcʼ cuxtʌlel yicʼot Muʼ bʌ i tsʼʌctesan lac ñopoñel, Jesús. Chaʼan jiñi tijicñʌyel tsaʼ bʌ aqʼuenti tiʼ tojel i wut, tsaʼ chʌmi ti jiñi teʼ chaʼan bʌ wocol* i maʼañic tsiʼ chʼʌmʌ ti ñuc mi tsaʼ ajqʼui ti quisin, i tsaʼ buchle yaʼ tiʼ ñoj i trono Dios. 3 Cheʼʌchi, chaʼan maʼañic mi laʼ lujbʼan i mi laʼ cʼuñʼan, wen ñaʼtanla ti jiñi tsaʼ bʌ i wen lʌtʼʌ i pʼajtʌl* tiʼ tojlel jiñi xmulilob tsaʼ bʌ i bajñel ticʼlayob i bʌ cheʼ bʌ tsiʼ meleyob ili.

4 Tiʼ contrajintel jiñi mulil, jatetla maxto laʼ wʌcʼʌ ti bejqʼuel laʼ chʼichʼel chaʼan mi laʼ cuch. 5 I tsaʼ junyajl ñajʌyi laʼ chaʼan jiñi ticʼojel tsaʼ bʌ i yʌqʼueyetla Dios bajcheʼ i yalobil: «Calobil, mach a tsʼaʼlen jiñi a tojʼesʌntel ti Jehová* i mach lujbʼaquet cheʼ bʌ miʼ tojʼesañet, 6 come Jehová* miʼ tojʼesan jiñi muʼ bʌ i cʼuxbin. Tiʼ sujm, miʼ yʌqʼuen i toj i mul jiñi muʼ bʌ i chʼʌm bajcheʼ i yalobil».

7 Jatetla yom mi laʼ cuch wocol come jiñʌch junchajp ochem bʌ ti laʼ tojʼesʌntel. Dios miʼ qʼueletla bajcheʼ i yalobil. I pejtelel tatʌl miʼ tojʼesan i yalobil. 8 Pero mi jatetla maʼañic tsaʼ laʼ chʼʌmʌ jiñi tojʼesʌntel yom bʌ mi lac chʼʌm ti lac pejtelel, mach ñoj i yalobileticla Dios, yambʌ laʼ tat. 9 Cheʼ jaʼel, jiñi lac tatob tsaʼʌch i tojʼesayonla i joñonla tsaʼ laj qʼueleyob ti ñuc. ¿Mach ba yomic mi lac ñumen acʼ lac bʌ tiʼ wenta jiñi lac Tat muʼ bʌ i tojʼesan majlel laj cuxtʌlel ti jiñi chʼujul bʌ i pʼʌtʌlel i cuxul mi la cajñel? 10 Jiñi lac tatob mach ti cabʌlic ora tsiʼ tojʼesayonla i tsiʼ meleyob cheʼ bajcheʼ wen tsiʼ qʼueleyob, pero jiñi lac Tat am bʌ ti panchan miʼ tojʼesañonla chaʼan lac wenlel i chaʼan chʼujul mi lac sujtel jaʼel. 11 I sujmʌch chaʼan cheʼ tiʼ yorajlel mi lac tojʼesʌntel mach tijicñayic mi la cubin, cʼuxʌch mi la cubin.* Pero mucʼʌch i yʌqʼuen i wenlel jiñi yomoʼ bʌ i cʌn, i ti wiʼil miʼ mejlelob ti chumtʌl ti toj yicʼot miʼ tajob i ñʌchʼtʌlel.

12 Jin chaʼan pʼʌtʼesanla jiñi cʼun bʌ laʼ cʼʌb yicʼot jiñi cʼun bʌ laʼ pix, 13 i chʌn ajñenla ti jiñi toj bʌ bij, chaʼan jiñi qʼuichqʼuichña bʌ maʼañic miʼ ñumen ñijlel, i miʼ cʼocʼan. 14 Sʌclanla ñʌchʼtʌlel laʼ wicʼot pejtelel lac piʼʌlob i ajñenla ti chʼujul, mi maʼañiqui, maʼañic majqui mi caj i qʼuel lac Yum. 15 Yom wen yʌxʌl laʼ wo chaʼan ti laʼ pejtelel mi laʼ taj jiñi ñuc bʌ i yutslel Dios, chaʼan maʼañic chuqui miʼ colel am bʌ i venenojlel muʼ bʌ i pʼol wocol i miʼ bibʼesan cabʌlob. 16 I yom mi laʼ wen qʼuel chaʼan maʼañic mi juntiquilic xtsʼiʼlel* ti laʼ tojlel mi juntiquilic maʼañic bʌ miʼ qʼuel ti ñuc chuqui tac chʼujul, cheʼ bajcheʼ Esaú, tsaʼ bʌ i qʼuexe tiʼ caj jumpʼejl bʌlñʌcʼʌl jiñi yom bʌ miʼ yʌqʼuentel bajcheʼ ascuñʌl. 17 Come laʼ wujil chaʼan ti wiʼil, cheʼ tsiʼ mulaj miʼ yʌqʼuentel jiñi bendición, maʼañix tsaʼ aqʼuenti. Anquese yicʼot i yuqʼuel tsiʼ chaʼle wersa chaʼan miʼ qʼuextʌntel jiñi tsaʼ bʌ ñaʼtʌnti,* maʼañic tsaʼ cʼʌjñibʌyi.

18 Come jatetla maʼañic tsaʼ laʼ lʌcʼtesa laʼ bʌ ti chuqui tac miʼ mejlel ti tʌjlel yicʼot am bʌ i cʼʌcʼal, mi jiñicto yaʼ ti icʼcupam bʌ tocal, yaʼ baqui wen icʼyochʼan, ti tsʌts bʌ icʼ jaʼal, 19 mi jiñicto baqui miʼ sub i bʌ jumpʼejl trompeta o jiñi tʼan tsaʼ bʌ loqʼui ti panchan. Cheʼ bʌ jiñi tejclum tsiʼ yubi jiñi, tsiʼ cʼajti ti wocol tʼan chaʼan maʼañix chuqui miʼ bej subentelob. 20 Come mach cujchic i chaʼañob ili mandar: «Cheʼto jaʼel, mi tsaʼ cʼoti ti cottʌl juncojt añimal yaʼ ti wits, yom miʼ jujlel ti xajlel* jinto miʼ chʌmel». 21 I wen bʌbʌqʼuen jax jiñi tsaʼ bʌ ujti i Moisés tsaʼto i yʌlʌ: «Tsiltsilñayon ti bʌqʼuen». 22 Pero jatetla tsaʼ laʼ lʌcʼtesa laʼ bʌ ti jiñi wits Sion yicʼot tiʼ tejclum jiñi cuxul bʌ Dios, jiñi Jerusalén am bʌ ti panchan, tiʼ tojlel yonlel ángelob 23 tempʌbiloʼ bʌ, tiʼ tojlel jiñi congregación ñaxañoʼ bʌ tsaʼ tsʼijbubentiyob i cʼabaʼ ti panchan, tiʼ tojlel Dios jiñi i Juez pejtelel lac piʼʌlob, yicʼot tiʼ tojlel jiñi tojoʼ bʌ chumuloʼ bʌ cheʼ bajcheʼ yom jiñi chʼujul bʌ espíritu yicʼot tsaʼ bʌ sujtesʌntiyob ti toj, 24 tiʼ tojlel Jesús jiñi xcoltaya chaʼan jiñi tsijiʼ bʌ trato yicʼot tiʼ tojlel jiñi chʼichʼ tsaʼ bʌ tsijcʌnti, ñumen wem bʌ miʼ chaʼlen tʼan bajcheʼ i chʼichʼel Abel.

25 Yom tsajaletla* ame maʼañic woli laʼ ñʌchʼtan jiñi woli bʌ ti tʼan cʼʌlʌl ti panchan. Jiñi lac piʼʌlob ti wajali maʼañic tsiʼ ñʌchʼtayob tsaʼ bʌ i yʌlʌ Dios, i tsaʼ aqʼuentiyob i toj i mul. Jin chaʼan, joñonla ñumento mi caj la cʌqʼuentel lac toj lac mul mi maʼañic mi lac ñʌchʼtan jiñi woli bʌ ti tʼan cʼʌlʌl ti panchan. 26 Ti jimbʌ ora, jiñi i tʼan tsiʼ ñijca jiñi lum, pero wʌle tsaʼix i yʌcʼʌ i tʼan: «Mi caj c chaʼ ñijcan jiñi lum, pero mach cojic jach jiñi, yicʼotʌch jiñi panchan». 27 Weno, jiñi tʼan «mi caj c chaʼ ñijcan» miʼ yʌcʼ ti ñaʼtʌntel chaʼan mi caj i jisʌntel pejtelel chuqui miʼ ñijcʌntel, jiñi melbil tac bʌ, chaʼan miʼ cʌytʌl jiñi mach bʌ añic miʼ ñijcʌntel. 28 Jin chaʼan, come mi caj lac chʼʌm jumpʼejl Yumʌntel mach bʌ añic miʼ mejlel ti ñijcʌntel, laʼ lac bej taj lac wenlel ti jiñi ñuc bʌ i yutslel Dios, chaʼan miʼ mejlel lac melben chʼujul bʌ i yeʼtel cheʼ bajcheʼ miʼ mulan, yicʼot i bʌcʼñʌntel Dios i mi laj qʼuel ti ñuc. 29 Come jiñi lac Dios lajal bajcheʼ cʼajc muʼ bʌ i jisañonla.