1 Pedro
5 Jin chaʼan, come ancianojon jaʼel, tsaʼ j qʼuele bajcheʼ tsiʼ ñusa wocol Cristo i mi caj c taj jaʼel jiñi ñuclel muʼ bʌ caj i tsictiyel, mic subeñob ti wocol tʼan jiñi ancianojob yaʼ baqui añetla: 2 Cʌntʌbenla jiñi i tiñʌmeʼ tac Dios am bʌ ti laʼ wenta, melela laʼ weʼtel bajcheʼ xcʌntayajob ti congregación, mach chaʼañic xicʼbiletla, yom mi laʼ mel ti laʼ tijicñʌyel tiʼ wut Dios, mach chaʼañic an chuqui laʼ wom laʼ taj, tiʼ pejtelel laʼ pusicʼal yom mi laʼ mel, 3 mi yomicto mi laʼ pʌs laʼ bʌ bajcheʼ i yumetla jiñi i chaʼañoʼ bʌ Dios, pʌsʌ laʼ bʌ bajcheʼ wem bʌ ejemplo chaʼan jiñi tiñʌmeʼ tac. 4 I cheʼ bʌ tsaʼix i pʌsʌ i bʌ jiñi ñumen ñuc bʌ xcʌnta tiñʌmeʼ, jatetla mi caj laʼ taj jiñi corona chaʼan bʌ ñuclel mach bʌ yujilic jilel.
5 Cheʼ jaʼel, jatetla chʼiton wiñiquettobʌla, chucu laʼ bʌ tiʼ tojlel jiñi wiñicob añobix bʌ i jabilel.* Pero ti laʼ pejtelel yom an laʼ pecʼlel ti bajcheʼ yilaletla laʼ wicʼot yambʌlob, come Dios miʼ contrajin jiñi chanchan jax bʌ miʼ yubiñob i bʌ pero miʼ pʌsben ñuc bʌ i yutslel jiñi añoʼ bʌ i pecʼlel.
6 Jin chaʼan, peqʼuesan laʼ bʌ tiʼ tojlel jiñi pʼʌtʌl bʌ i cʼʌb Dios, chaʼan miʼ yʌqʼueñetla laʼ ñuclel cheʼ tiʼ yorajlel, 7 i mi laʼ wʌcʼ pejtelel chuqui mi laʼ cʼojoʼtan* tiʼ tojlel, come Dios mucʼʌch i ñaʼtañetla. 8 ¡Yom mi laʼ chʌn pʌs wem bʌ laʼ ñaʼtʌbal i yom yʌxʌl laʼ wo! Jiñi laʼ contra, jiñi Diablo, yaʼan ti laʼ joytʌlel bajcheʼ juʼucña bʌ león woli bʌ i sʌclan majqui miʼ cʼux. 9 Pero acʼʌ laʼ bʌ tiʼ contra, yom xucʼul mi laʼ wajñel ti laʼ ñopoñel, come laʼ wujil chaʼan pejtelel jiñi la quermañujob ti pañimil woliʼ ñusañob jaʼel jiñi wocol tac. 10 Weno, cheʼ bʌ tsaʼix laʼ jumucʼ ñusa wocol tac, jiñi Dios muʼ bʌ i pʌs ñuc bʌ i yutslel, tsaʼ bʌ i pʌyʌyetla come temeletla laʼ wicʼot Cristo chaʼan mi laʼ taj laʼ ñuclel tiʼ pejtelel ora, mi caj i yujtesan i chajpañetla. Jin mi caj i xucʼchocoñetla, jin mi caj i pʼʌtʼesañetla, jin mi caj i yʌqʼuetla ti tsʌts bʌ laʼ cʼʌclib. 11 Laʼ aqʼuentic jiñi pʼʌtʌlel tiʼ pejtelel ora. Amén.
12 Tiʼ tojlel Silvano,* muʼ bʌ j qʼuel bajcheʼ juntiquil xucʼul bʌ hermano, tsaʼ c tsʼijbubeyetla majlel chaʼpʼej uxpʼejl tʼan chaʼan mic tijicñesʌbeñetla laʼ pusicʼal yicʼot chaʼan tiʼ pejtelel c pusicʼal mic subeñetla chaʼan iliyi jiñʌch jiñi i sujm bʌ i yutslel Dios. I yom chʌn xucʼuletla ti jiñi ñuc bʌ i yutslel. 13 Jiñi hermana* am bʌ ti Babilonia miʼ chocbeñetla majlel saludo, yajcʌbil jaʼel cheʼ bajcheʼ jatetla, miʼ chocbeñetla majlel saludo Marcos, jiñi cheʼ bʌ bajcheʼ calobil. 14 Tsʼujtsʼun laʼ bʌ cheʼ mi laʼ chaʼlen laʼ bʌ ti saludar chaʼan mi laʼ pʌs laʼ cʼuxbiya.
Taja laʼ ñʌchʼtʌlel pejtelel jatetla xcʌntʼañetbʌla i chaʼan Cristo.