Hebreos

13 Chʌn pʌsben laʼ bʌ cʼuxbiya cheʼ bʌ bajcheʼ muʼ bʌ i pʌstʌl ti jumpʼejl familia. 2 Mach ñajʌyic laʼ chaʼan laʼ pʌsben laʼ wutslel jiñi mach bʌ laʼ cʌñʌyobic, come chaʼan jiñi an tsaʼ bʌ i yotsayob ángelob tiʼ yotot anquese mach yujilobic. 3 Cʼajtesanla jiñi añoʼ bʌ ti cárcel,* lajal bajcheʼ añetla ti cárcel laʼ wicʼotob, yicʼot cʼajtesanla jiñi ticʼlʌbiloʼ bʌ come wiñiquetla jaʼel.* 4 Ti laʼ pejtelel yom mi laʼ qʼuel ti ñuc jiñi ñujpuñel i mach yomic miʼ bibʼesʌntel jiñi ñujpuñel, come Dios mi caj i chaʼlen meloñel tiʼ tojlel jiñi xtsʼiʼleloʼ bʌ* yicʼot jiñi muʼ bʌ i piʼleñob mach bʌ i piʼʌlic. 5 Mach laʼ cʼuxbin taqʼuin, i yom tijicñayetla yicʼot jiñi am bʌ laʼ chaʼan. Come Dios tsiʼ yʌlʌ: «Maʼañic baʼ ora mi caj j cʌyet i maʼañic baʼ ora mi caj j cʌy j coltañet». 6 Jin chaʼan ti jumpʼejl lac pusicʼal miʼ mejlel la cʌl: «Jehová* jiñʌch caj coltaya. Maʼañic mi caj c chaʼlen bʌqʼuen. ¿Chuqui miʼ mejlel i tumbeñon jiñi wiñic?».

7 Cʼajtesanla jiñi muʼ bʌ i tojʼesañetla majlel, tsaʼ bʌ i subeyetla jiñi i tʼan Dios, i cheʼ bʌ mi laʼ qʼuel jiñi wem bʌ i melbalob, lajinla jiñi i ñopoñelob.

8 Acʼbi, wʌle yicʼot tiʼ pejtelel ora, Jesucristo maʼañic baʼ ora miʼ qʼuextʌyel.

9 Mach laʼ wʌcʼ laʼ bʌ ti lotintel ti baqui jach bʌ cʌntesa tac yicʼot mach bʌ cʌmbilic, come ñumen wen cheʼ mi lac pʼʌtʼesan lac pusicʼal ti jiñi ñuc bʌ i yutslel Dios i mach yicʼotic bʌlñʌcʼʌl,* maʼañic bʌ miʼ yʌqʼuen i wenlel jiñi yaʼ jach bʌ añob i ñaʼtʌbal yaʼi.

10 An lac chaʼan jumpʼejl pulʌntib baqui maʼañic miʼ mejlelob ti uchʼel jiñi muʼ bʌ i melob chʼujul bʌ eʼtel yaʼ ti pisil bʌ otot, 11 come jiñi i bʌcʼtal jiñi añimal tac tsaʼ bʌ i yʌcʼʌyob bajcheʼ majtañʌl jiñi wiñicob ñajt tsaʼ majli i pulob yaʼ tiʼ junwejlel baqui añob, pero jiñi i chʼichʼel tsiʼ chʼʌmʌyob majlel yaʼ ti chʼujul bʌ ajñibʌl chaʼan miʼ ñusʌntel jiñi mulil. 12 Jin chaʼan, chaʼan Jesús miʼ sʌqʼuesan jiñi tejclum tiʼ chʼichʼel mach tiʼ malic jiñi tejclum tsiʼ ñusa wocol.* 13 Jin chaʼan conla yaʼ baqui an yaʼ tiʼ junwejlel jiñi tejclum i laʼ laj cuch jiñi ticʼlʌntel tsaʼ bʌ i cuchu, 14 come wʌʼi maʼañic lac chaʼan jumpʼejl tejclum chaʼan bʌ tiʼ pejtelel ora, woli lac chaʼlen wersa lac sʌclan jiñi muʼ bʌ caj i tilel. 15 Laʼ lac chʌn aqʼuen i ñuclel Dios tiʼ tojlel Jesús, ili lajalʌch bajcheʼ jumpʼejl majtañʌl muʼ bʌ la cʌqʼuen Dios. Mi laj cʼʌn la quej chaʼan mi lac jamʌ sub i cʼabaʼ. 16 Cheʼ jaʼel, mach ñajʌyic laʼ chaʼan laʼ mel chuqui wen yicʼot laʼ tʼoxben yambʌlob chuqui an laʼ chaʼan, come ili majtañʌl tac miʼ wen mulan Dios.

17 Yom mi laʼ jacʼben i tʼan yicʼot mi laʼ chuc laʼ bʌ tiʼ tojlelob jiñi muʼ bʌ i tojʼesañetla majlel, come woli i cʌntañetobla i mi caj i yujtel meloñel tiʼ tojlelob chaʼan jiñi. Mi cheʼʌch mi laʼ mel, tijicña mi caj i melob i yeʼtel i mach yicʼotobic i chʼijyemlel, come iliyi mi caj i ticʼlañetla.

18 Chʌn chaʼlenla oración ti lon c tojlel, come mi lon c wen ñop chaʼan añʌch wem bʌ lon j conciencia, come comʌch lon c mel chuqui utsʼat tiʼ pejtelel chuqui mi lon c mel. 19 Pero muʼ bʌ c ñumen cʼajtibeñetla jiñʌch chaʼan mi laʼ mel oración chaʼan maʼañix mic jalijel chaʼan mic majlel baqui añetla.

20 Jiñi Dios chaʼan bʌ ñʌchʼtʌlel, tsaʼ bʌ i chʼojyesa* baqui an chʌmeñoʼ bʌ jiñi lac Yum Jesús, jiñi ñuc bʌ xcʌnta tiñʌmeʼ tsaʼ bʌ i yʌqʼue Dios jiñi chʼichʼ chaʼan bʌ trato maʼañic bʌ miʼ jilel, 21 laʼ i yʌqʼueñetla pejtelel chuqui i cʼʌjñibal chaʼan mi laʼ mel chuqui yom, i tiʼ coltaya Jesucristo laʼ i mel ti lac tojlel chuqui wen tiʼ wut. Laʼ aqʼuentic i ñuclel tiʼ pejtelel ora. Amén.

22 Wʌle, hermanojob, mij cʼajtibeñetla ti wocol tʼan chaʼan yicʼot laʼ pijt mi laʼ chʼʌm ti ñuc ili tʼan muʼ bʌ i tijicñesʌbeñetla laʼ pusicʼal, come tsaʼ c tsʼijbubeyetla majlel jumpʼejl carta mach bʌ wen tamic. 23 Com mi laʼ ñaʼtan chaʼan jiñi la quermañu Timoteo librejix. Mi tsaʼ bʌcʼ tili, mi caj lon j comol majlel j qʼueletla.

24 Aqʼuenla c saludo pejtelel jiñi muʼ bʌ i tojʼesañetla majlel yicʼot pejtelel jiñi chʼujuloʼ bʌ. Jiñi hermanojob añoʼ bʌ ti Italia miʼ chocbeñetla majlel saludo.

25 Laʼ ajñic ti laʼ tojlel jiñi ñuc bʌ i yutslel Dios.