«Chʌn cʼuxbin laʼ bʌ, come hermanojetla»

1, 2. ¿Chucoch tiʼ tsʼijbu jumpʼejl carta tiʼ tojlel hebreojob jiñi Pablo?

JIÑI xñoptʼañob añoʼ bʌ ti Israel wen ñʌchʼʌl chumulob cheʼ ti jabil 61. Jiñi apóstol Pablo cʌchʌl ti Roma, pero mach jalix yom chaʼan miʼ cojlel. Timoteo, i piʼʌl bʌ ti subtʼan, maxto wen jalic tsaʼ loqʼui yaʼ ti cárcel. Tiʼ chaʼticlelob ñaʼtʌbil i chaʼañob i julaʼtan jiñi hermanojob ti Judea (Hebreos 13:23). Pero jiñi ñʌchʼtʌlel mach tiʼ pejtelelic ora miʼ cajel. An jaxto ñumen joʼpʼejl jab, jiñi soldadojob i chaʼan Roma tsiʼ joyoyob Jerusalén. Jesús tsiʼ wʌn alʌ chaʼan jiñi xñoptʼañob ti Judea yicʼot ti Jerusalén yom miʼ putsʼelob cheʼ ba ora miʼ qʼuelob chaʼan Jerusalén joyol ti soldadojob (Lucas 21:20-24).

² An jaxto 28 jab i ñumel cheʼ bʌ tsiʼ yʌlʌ Jesús ili tʼan. Jiñi xñoptʼañob ti Israel chʌn xucʼul tsaʼ ajñiyob anquese tsaʼ wen contrajintiyob yicʼot tsiʼ ñusayob tsʌts tac bʌ wocol ti jiñi jabil tac (Hebreos 10:32-34). Pero woli (choncol) i lʌcʼtiyel i yorajlel cheʼ mi caj i qʼuejlel mi pʼʌtʌlobʌch i ñopoñel (chʼujbiya) ti Dios (Mateo 24:20, 21; Hebreos 12:4). Cʼʌñʌl wen añob i ñopoñel yicʼot miʼ cuchob jiñi wocol tac mi yomob i jacʼben i tʼan Jesús i chaʼan cuxul miʼ yajñelob (pejcan Hebreos 10:36-39). Jin chaʼan, Jehová tsiʼ yʌcʼʌ chaʼan Pablo miʼ tsʼijbun jumpʼejl carta i miʼ chocben majlel jiñi hermanojob, cʌmbil bʌ ili ora bajcheʼ jun tiʼ tojlel hebreojob. Tsiʼ coltayob chaʼan yujilobix chuqui miʼ melob ti jiñi wocol yicʼot tsiʼ pʼʌtʼesayob.

 3. ¿Chucoch yom mi lac wen chʼʌm ti ñuc jiñi jun chaʼan hebreojob?

³ Ti ili ora, jiñi xñoptʼañonbʌla yom mi lac wen chʼʌm ti ñuc jiñi jun chaʼan hebreojob. ¿Chucoch? Come cheʼ chumulonla bajcheʼ jiñi xñoptʼañob. Cabʌl maʼañic bʌ woli (yʌquel) lac ñusan tsʌts bʌ ticʼlʌntel yicʼot chumulonla ti ñʌchʼtilel. Pero cabʌl hermanojob chʌn xucʼul añob anquese an i ñusayob contrajintel yicʼot miʼ tajob tsʌts tac bʌ wocol ti ili ‹ora bʌbʌqʼuen tac bʌ› (2 Timoteo 3:1, 12). Cojach yom chʌn yʌxʌl laj co cheʼ bajcheʼ jiñi xñoptʼañob tiʼ yorajlel Pablo come woliʼ lʌcʼtiyel jiñi ora baqui mi caj i ñumen qʼuejlel mi añʌch lac ñopoñel ti Dios (pejcan Lucas 21:34-36).

 4. a) ¿Baqui bʌ jiñi texto chaʼan 2016? b) ¿Chucoch jin tsaʼ yajcʌnti jiñi versículo?

⁴ ¿Chuqui mi caj i coltañonla chaʼan chajpʌbilonla ti jiñi qʼuin woli bʌ i lʌcʼtiyel? Muʼ bʌ caj i coltañonla jiñʌch jiñi wen ñuc bʌ ticʼojel am bʌ ti Hebreos 13:1. Miʼ yʌl: «Chʌn cʼuxbin laʼ bʌ, come hermanojetla ti Cristo». Jin tacʌch ili ticʼojel tsaʼ bʌ i cʼʌñʌ Pablo chaʼan miʼ coltan jiñi hebreojob i ñumen pʼʌtʼesañob i ñopoñel ti Dios. Ili versículo jiñʌch tsaʼ bʌ yajcʌnti chaʼan miʼ cʼʌjñel bajcheʼ jiñi texto chaʼan jabil 2016. ¿Chucoch? Come miʼ mejlel i coltañonla jaʼel chaʼan ñumen pʼʌtʌl jiñi lac ñopoñel.

 5. ¿Chuqui yom i yʌl jiñi tʼan cʼuxbin laʼ bʌ?

⁵ Jiñi tʼan «cʼuxbin laʼ bʌ, come hermanojetla» woliʼ taj ti tʼan jiñi cʼuxbiya muʼ bʌ i yubin juntiquil tiʼ tojlel i familia o tiʼ tojlel juntiquil i yamigo wen lʌcʼʌl bʌ yicʼot (Juan 11:36) (qʼuele jiñi recuadro «¿Chuqui yom i yʌl?»). Jin chaʼan, jiñi isujm bʌ xñoptʼañonla mach cheʼ jach mi lac pʌs chaʼan la quermaño lac bʌ. Joñonla yoque la quermaño lac bʌ (Mateo 23:8). Pablo tsiʼ yʌlʌ: «Cʼuxbin laʼ bʌ come laʼ piʼʌl laʼ bʌ, [...]. Yom ñumen ñuc mi laʼ qʼuel laʼ piʼʌlob bajcheʼ mi laʼ bajñel qʼuel laʼ bʌ» (Romanos 12:10). Ili tʼan miʼ pʌs chaʼan yom wen pʼʌtʌl jiñi cʼuxbiya muʼ bʌ la cubin tiʼ tojlel la quermañojob. Mi caj i sujtelob ti wem bʌ la camigo yicʼot temel mi caj la cajñel yicʼotob mi mucʼʌch laj cʼuxbin lac bʌ.

 6. Jiñi xñoptʼañonbʌla, ¿majqui mi laj cʼuxbiñob?

⁶ Juntiquil wen yujil bʌ, miʼ yʌl chaʼan cojach jiñi xñoptʼañob miʼ cʼʌñob tiʼ libro tac jiñi tʼan «cʼuxbin laʼ bʌ, come hermanojetla». Jiñi judíojob ti wajali cojach i familiajob yicʼot wen lʌcʼʌl bʌ i yamigojob miʼ subeñob ti «hermano». Jiñi mach bʌ judíojob maʼañic miʼ subeñob ti «hermano». Pero jiñi isujm bʌ xñoptʼañonla, la quermañojob tiʼ pejtelel jiñi i wiñicob Dios anquese mach junlajalic lac lumal (Romanos 10:12). Jin chaʼan, mi laj cʼuxbin lac bʌ ti lac pejtelel come cheʼʌch miʼ cʌntesañonla Jehová (1 Tesalonicenses 4:9). Pero ¿chucoch ñuc i cʼʌjñibal cheʼ mi lac chʌn cʼuxbin lac bʌ bajcheʼ la quermaño lac bʌ?

 7. ¿Chucoch yom mi lac wen cʼuxbin la quermañojob?

⁷ Come jiñʌch Jehová miʼ subeñonla chaʼan yom mi laj cʼuxbin lac bʌ. Mi maʼañic mi laj cʼuxbin la quermañojob maʼañic miʼ mejlel laj cʼuxbin Jehová (1 Juan 4:7, 20, 21). Mi laj cʼuxbin la quermañojob jaʼel come i cʼʌjñibalʌch lac chaʼan i coltayajob, ñumento cheʼ an wocol. Pablo yujil chaʼan cheʼ bʌ tsiʼ chocbeyob majlel carta jiñi yonlel hebreojob, yom mi caj i putsʼelob yicʼot miʼ cʌyob tiʼ pejtelel i chubʌʼañob. Wʌn albilix i chaʼan Jesús chaʼan wen wocol miʼ cajel jiñi qʼuin (Marcos 13:14-18; Lucas 21:21-23). Jin chaʼan, yom miʼ wen cʼuxbiñob i bʌ jiñi xñoptʼañob cheʼ maxto cʼotemic i yorajlel (Romanos 12:9).

 8. ¿Chuqui yom mi lac mel ili ora cheʼ bʌ maxto tejchi jiñi ñuc bʌ wocol?

⁸ Mach jalix mi caj i tejchel jiñi ñuc bʌ wocol (Marcos 13:19; Apocalipsis 7:1-3). Ti jiñi bʌ ora, yom mi lac chʼujbin ili mandar: «Sujtenla, c piʼʌlob. Ñupʼbenla i tiʼ tac laʼ wotot. Yom mi laʼ poj mujcun laʼ bʌ jinto miʼ lajmel i michʼajel lac Yum» (Isaías 26:20). Tajol jiñi otot muʼ bʌ i taj ti tʼan ili versículo tajol jiñʌch jiñi congregación tac. Yaʼʌch baqui mi lac chʼujutesan Jehová la quicʼot la quermañojob. Pero mach cojach yom mi lac tempan lac bʌ ti jujumpʼejl semana. Pablo tsiʼ sube jiñi xñoptʼañob hebreojoʼ bʌ chaʼan yom miʼ pʌsbeñob i bʌ cʼuxbiya yicʼot miʼ melob chuqui wem bʌ tiʼ tojlel yañoʼ bʌ (Hebreos 10:24, 25). Wʌle yom mi lac wen pʼʌtʼesan laj cʼuxbiya come jiñʌch mi caj i coltañonla lac lʌtʼ jiñi wocol tac muʼ bʌ caj i tilel.

 9. a) ¿Bajcheʼ tac miʼ mejlel lac pʌsben la quermañojob chaʼan mucʼʌch laj cʼuxbiñob ili ora? b) Alʌ junchajp bajcheʼ an i pʌsʌ cʼuxbiya jiñi hermanojob baqui chumulet o ti yan tac bʌ lum (qʼuele jiñi nota).

⁹ Ili ora, cheʼ maxto tejchi jiñi ñuc bʌ wocol, an cabʌl bajcheʼ miʼ mejlel lac pʌs chaʼan mi laj cʼuxbin la quermañojob. Cabʌl miʼ ñusañob wocol tiʼ caj yujquel lum, butʼ jaʼ, icʼ jaʼal, tsunami yicʼot yan tac bʌ. Yañoʼ bʌ miʼ tajob ticʼlʌntel (Mateo 24:6-9). An cabʌl maʼañobic bʌ cabʌl i taqʼuin miʼ ñusan tiʼ caj mach weñic miʼ mel i yeʼtel (troñel) jiñi wiñicob (Apocalipsis 6:5, 6). Pero ñumen cabʌl bajcheʼ miʼ mejlel lac pʌsben cʼuxbiya la quermañojob cheʼ bʌ cabʌl wocol miʼ ñusañob. Anquese maʼañic miʼ wen pʌsob cʼuxbiya jiñi wiñicob xʼixicob (quixtañujob), joñonla yom mi lac chʌn cʼuxbin lac bʌ bajcheʼ la quermaño lac bʌ (Mateo 24:12)^[1] (qʼuele jiñi nota am bʌ tiʼ yujtibal ili temaj).

10. ¿Chuqui mi caj laj qʼuel?

¹⁰ Ti ili pañimil (mulawil) butʼul jax bʌ ti wocol, ¿chuqui miʼ mejlel lac mel chaʼan mi lac chʌn cʼuxbin lac bʌ bajcheʼ la quermaño lac bʌ? ¿Bajcheʼ miʼ mejlel lac pʌs chaʼan mucʼʌch la cubin ti lac pusicʼal jiñi cʼuxbiya? Yaʼ ti capítulo 13 chaʼan Hebreos, jiñi apóstol Pablo tsiʼ yʌlʌ bajcheʼ tac miʼ mejlel lac mel, cheʼ bʌ ujtel jaxto i yʌl «chʌn cʼuxbin laʼ bʌ». Laʼ laj qʼuel wʌcchajp.

11, 12. ¿Chuqui yom i yʌl cheʼ mi lac pʌs pʼuntaya? (Qʼuele jiñi foto am bʌ tiʼ tejchibal).

¹¹ «Mach ñajʌyic ti laʼ pusicʼal laʼ pʼuntan jini xñumelob» (pejcan Hebreos 13:2). Ili tʼan miʼ cʼajtesʌbeñonla tsaʼ bʌ i mele Abraham yicʼot Lot. Tsiʼ wen pʌsʌyob i yutslel cheʼ tsiʼ yotsayob tiʼ yotot mach bʌ i cʌñʌyobic, ti wiʼil tsiʼ ñaʼtayob chaʼan jiñobʌch jiñi ángelob (Génesis 18:2-5; 19:1-3). Pablo tsiʼ tajbe ti tʼan ili ejemplo jiñi xñoptʼañob hebreojoʼ bʌ chaʼan miʼ ñijcʌbeñob i pusicʼal chaʼan miʼ pʌsob pʼuntaya.

¹² ¿Bajcheʼ miʼ mejlel lac pʌs pʼuntaya tiʼ tojlel yañoʼ bʌ? Miʼ mejlel lac pʌy ti la cotot jiñi la quermañojob chaʼan mi lac tem chaʼlen uchʼel o chaʼan mi lac tem ajñel la quicʼotob. Cheʼ bʌ jiñi superintendente i chaʼan circuito yicʼot i yijñam miʼ julaʼtañob laj congregación, miʼ mejlel lac pʌyob ti la cotot anquese mach lac wen cʌñʌyobic (3 Juan 5-8). Mach cʼʌñʌlic mi lac mel wen lecojax bʌ bʌlñʌcʼʌl yicʼot mi laj cʼʌn cabʌl taqʼuin. La com bʌ jiñʌch chaʼan mi lac ñuqʼuesʌbeñob i pusicʼal i mach chaʼañic jach miʼ qʼuelob chaʼan wen ñuc chuqui mi lac mel. Cheʼ jaʼel, mach cojach mi caj lac pʌyob ti la cotot jiñi muʼ bʌ mejlel i chaʼ sutqʼuibeñonla muʼ bʌ lac mel tiʼ tojlelob (Lucas 10:42; 14:12-14). Mach yomic miʼ ñajʌyel lac chaʼan, anquese an cabʌl lac troñel, yom mi lac pʌs ili pʼuntaya.

13, 14. ¿Bajcheʼ miʼ mejlel laj coltan jiñi hermanojob añoʼ bʌ ti cárcel?

¹³ «Coltanla jini xmʌjquelob» (pejcan Hebreos 13:3). Cheʼ bʌ tiʼ tsʼijbu Pablo ili tʼan, woli bʌ i ñaʼtan jiñʌch i wiñicob Jehová añoʼ bʌ ti mʌjquibʌl chaʼañob i xucʼtʌlel. Pablo tsiʼ sube jiñi xñoptʼañob hebreojoʼ bʌ chaʼan utsʼat tsiʼ meleyob cheʼ bʌ tsiʼ coltayob «jini tsaʼ bʌ mʌjquiyob» (Hebreos 10:34). Jiñi chʌmpʼejl jab tsaʼ bʌ ajñi Pablo ti cárcel, jiñi hermanojob chumuloʼ bʌ tiʼ tʼejl tsiʼ coltayob. Pero ¿bajcheʼ tsiʼ chaʼleyob coltaya jiñi ñajt bʌ chumulob? Tsiʼ chaʼleyob oración tiʼ tojlel (Filipenses 1:12-14; Hebreos 13:18, 19).

¹⁴ Ili ora, yonlel hermanojob añoʼ bʌ ti cárcel chaʼan xucʼul añob tiʼ tojlel Jehová. Jiñi hermanojob lʌcʼʌl bʌ chumulob yaʼi, cabʌl bajcheʼ miʼ yʌcʼob i coltaya. Pero mi joñonla ñajt chumulonla, ¿bajcheʼ miʼ mejlel laj coltañob yicʼot mi lac pʌs chaʼan maʼañic ñajʌyem lac chaʼañob? Mi woliyʌch laj qʼuelob bajcheʼ la quermañojob, maʼañic mi caj laj cʌy lac tajob ti oración. Jumpʼejl ejemplo, miʼ mejlel lac taj ti oración jiñi hermanojob, hermanajob yicʼot jiñi xbiʼtalob añoʼ bʌ ti cárcel yaʼ ti Eritrea. Jiñi yaʼ bʌ ñupʼulob yaʼan Paulos Eyassu, Isaac Mogos yicʼot Negede Teklemariam. Ñumeñix 20 jab añob ti cárcel ili hermanojob.

15. ¿Bajcheʼ miʼ mejlel lac pʌs chaʼan mi laj qʼuel ti ñuc jiñi ñujpuñel?

¹⁵ «Yom mi laʼ qʼuel ti ñuc jiñi ñujpuñijel» (pejcan Hebreos 13:4a). Yambʌ junchajp bajcheʼ mi lac pʌs chaʼan mi laj qʼuel ti ñuc la quermañojob jiñʌch cheʼ mi laj qʼuel ti ñuc jiñi ñujpuñel yicʼot cheʼ maʼañic mi lac mel tsʼiʼlel (1 Timoteo 5:1, 2). Jumpʼejl ejemplo, cheʼ muqʼuic lac mel tsʼiʼlel yicʼot juntiquil hermano o juntiquil hermana, woli la cʌqʼuen wocol yicʼot i familia. Cheʼ jeʼel, mach utsʼatix mi caj la cajñel la quicʼot la quermañojob (1 Tesalonicenses 4:3-8). Laʼ lac ñaʼtan bajcheʼ yubil mi caj i yubin juntiquil hermana cheʼ bʌ miʼ cʼotel i ñaʼtan chaʼan miʼ qʼuel pornografía i ñoxiʼal. ¿Muʼ ba caj i ñaʼtan chaʼan mucʼʌch i cʼuxbintel tiʼ ñoxiʼal yicʼot chaʼan miʼ qʼuel ti ñuc i ñujpuñel? Maʼañic (Mateo 5:28).

16. ¿Bajcheʼ lajal miʼ taj i bʌ jiñi tijicñʌyel yicʼot cheʼ mi laj cʼuxbin la quermañojob?

¹⁶ «Yom tijicña mi laʼ wajñel yicʼot chuqui tac an laʼ chaʼan» (pejcan Hebreos 13:5). Tijicñayonla chaʼan chuqui am bʌ lac chaʼan cheʼ mucʼʌch lac ñop ti Jehová. Pero ¿bajcheʼ lajal miʼ taj i bʌ jiñi tijicñʌyel yicʼot cheʼ mi laj cʼuxbin la quermañojob? Mi tijicñayonla chaʼan chuqui am bʌ lac chaʼan, mi caj lac ñaʼtan chaʼan jiñi ñumen ñuc bʌ jiñʌch la quermañojob i mach jiñic chubʌʼañʌl tac o taqʼuin (1 Timoteo 6:6-8). Maʼañic mi caj la cʌl la quermañojob yicʼot maʼañic mi caj lac ñaʼtan chaʼan tsʼitaʼ jach chuqui an lac chaʼan. Cheʼ jaʼel maʼañic mi caj lac tsʼaʼlen yañoʼ bʌ chaʼan tiʼ chubʌʼañob yicʼot maʼañic mi caj lac ñaʼtan lac ñumen taj lac chubʌʼan. Muʼ bʌ caj lac mel jiñʌch mi lac tʼoxben yañoʼ bʌ chuqui an lac chaʼan (1 Timoteo 6:17-19).

17. Mi pʼʌtʌloñʌchla, ¿bajcheʼ miʼ coltañonla lac pʌs chaʼan mucʼʌch laj cʼuxbin la quermañojob?

¹⁷ «Yom chʼejl lac pusicʼal» (pejcan Hebreos 13:6). Mi mucʼʌch lac ñop ti Jehová mi caj lac taj lac pʼʌtʌlel chaʼan mi laj cuch tsʌts tac bʌ wocol i maʼañic mi caj lac chaʼlen lecoj bʌ pensar. Ili mi caj i coltañonla chaʼan mi lac pʼʌtʼesan la quermañojob yicʼot mi lac subeñob muʼ bʌ i yʌqʼueñob i tijicñʌyel. Cheʼʌch mi lac pʌs chaʼan mi laj cʼuxbiñob (1 Tesalonicenses 5:14, 15). Mi mucʼʌch lac ñop ti Jehová, mi caj la cajñel ti tijicña yicʼot maʼañic mi caj lac bʌcʼñan cheʼ baʼ ora miʼ cajel jiñi ñuc bʌ wocol come la cujil chaʼan lʌcʼʌlix mi caj i coltañonla (Lucas 21:25-28).

18. ¿Chuqui mi caj i coltañonla lac ñumen cʼuxbin jiñi ancianojob?

¹⁸ «Ñaʼtanla jini xcʌntayajob» (pejcan Hebreos 13:7, 17). Jiñi ancianojob miʼ wen chaʼleñob eʼtel yaʼ ti congregación yicʼot miʼ yʌqʼueñob i yorajlel tiʼ qʼuelol chuqui yom. Jin chaʼan yom ‹ñuc mi lac chʌn qʼuelob yicʼot cʼuxbiya, come woliʼ chaʼlibeñob i yeʼtel lac Yum› (1 Tesalonicenses 5:13). Yom mi lac ñaʼtan chuqui miʼ melob ti lac tojlel. Cheʼʌch mi la cʌqʼueñob wocolix i yʌlʌ yicʼot mi caj lac ñumen cʼuxbiñob mi cheʼʌch mi lac mel. La com chaʼan chʌn tijicñayob i maʼañic miʼ wen ñaʼtañob i bʌ tiʼ caj chuqui mi lac mel. Temel la com eʼtel la quicʼotob yicʼot mi lac jacʼbeñob i tʼan.

19, 20. ¿Chuqui mi caj i coltañonla chaʼan mi lac ñumen cʼuxbin la quermañojob?

¹⁹ Jiñi i wiñiconbʌla Jehová wen cʌmbilonla chaʼan jiñi cʼuxbiya am bʌ lac chaʼan ti jujuntiquil. Cheʼʌch tsaʼ ujti tiʼ yorajlel Pablo. Pero Pablo tsiʼ sube jiñi xñoptʼañob chaʼan yom to miʼ ñumen cʼuxbiñob i bʌ. Tsiʼ yʌlʌ: «Laʼ chʌn pʼojlic laʼ cʼuxbiya» (1 Tesalonicenses 4:9, 10). ¿Chuqui miʼ cʌntesañonla? Chaʼan ti lac pejtelel miʼ mejlel lac ñumen pʼʌtʼesan ti jujumpʼejl qʼuin laj cʼuxbiya ti la quermañojob.

²⁰ Jin chaʼan, ti jajayajl mi laj qʼuel jiñi texto chaʼan jabil 2016 tiʼ yotlel lac tempa bʌ, laʼ laj cʼajtiben lac bʌ: «¿Bajcheʼ miʼ mejlel c ñumen pʌs c pʼuntaya ti yañoʼ bʌ? ¿Bajcheʼ miʼ mejlel j coltan jiñi hermanojob añoʼ bʌ ti cárcel? ¿Muʼ ba j qʼuel ti ñuc jiñi c ñujpuñel? ¿Muʼ ba j cʼojoʼtan chuqui maʼañic bʌ c chaʼan? ¿Chuqui mi caj i coltañon c ñumen ñop Jehová? ¿Bajcheʼ miʼ mejlel c ñumen jacʼbeñob i tʼan jiñi ancianojob ti congregación?». Laʼ lac chaʼlen wersa tiʼ melol ili wʌcchajp. Cheʼ jiñi, mach lolom jach mi caj i yajñel tiʼ Yotlel Tempa bʌ jiñi texto chaʼan bʌ ili jabil. Mi caj i coltañonla lac jacʼ ili i ticʼojel Pablo: «Chʌn cʼuxbin laʼ bʌ» (Hebreos 13:1).