1 Juan

2 Cʼuxbibil bʌ calobilob, mic tsʼijbubeñetla iliyi chaʼan maʼañic mi laʼ chaʼlen mulil. Pero mi an muʼ bʌ i chaʼlen mulil, an juntiquil la caj coltaya yaʼ bʌ an yicʼot jiñi Tatʌl: Jesucristo, juntiquil toj bʌ. 2 Jumpʼejlʌch majtañʌl tiʼ caj lac mul chaʼan mi lac chaʼ utsʼan la quicʼot Dios, pero mach chaʼañic jach bajñel lac mul, chaʼañʌch miʼ ñusʌbentel i mul pejtelel pañimil jaʼel. 3 I la cujil chaʼan tsaʼix laj cʌñʌ tiʼ caj iliyi: Mi mucʼʌch lac chʌn jacʼben i mandar tac. 4 Jiñi muʼ bʌ i yʌl «Joñon tsaʼix j cʌñʌ», pero maʼañic miʼ jacʼben i mandar tac juntiquilʌch xlot i maʼañic tiʼ tojlel jiñi i sujmlel. 5 Pero mi an mucʼʌch bʌ i jacʼben i tʼan, tiʼ sujm tsʼʌcʌlix jiñi i cʼuxbiya ti Dios. Jin chaʼan la cujil chaʼan temelonla la quicʼot Dios. 6 Jiñi muʼ bʌ i yʌl chaʼan temel yicʼot wersa cheʼ yom miʼ bej chumtʌl cheʼ bajcheʼ tsiʼ mele Jesús.

7 Cʼuxbibiletbʌla, maʼañic woli c tsʼijbubeñetla jumpʼejl tsijiʼ bʌ mandar, jumpʼejlʌch ñoxix bʌ añix bʌ laʼ chaʼan cʼʌlʌl tiʼ cajibal. Ili ñoxix bʌ mandar jiñʌch jiñi tʼan tsaʼ bʌ laʼ wubi. 8 Pero mic tsʼijbubeñetla jumpʼejl tsijiʼ bʌ mandar, i sujmʌch bʌ tiʼ tojlel Cristo yicʼot ti laʼ tojlel, come jiñi icʼyochʼañiyel wolix i majlel i jiñi i sujm bʌ sʌcjamañiyel wolix i tsʼʌjyel.

9 Jiñi muʼ bʌ i yʌl chaʼan an ti sʌcjamañiyel pero miʼ tsʼaʼlen i yermañu bej anto baqui icʼyochʼan. 10 Jiñi muʼ bʌ i cʼuxbin i yermañu bej an yaʼ ti sʌcjamañiyel, i tiʼ tojlel maʼañic chuqui miʼ mejlel i yʌcʼ ti yajlel. 11 Pero jiñi muʼ bʌ i tsʼaʼlen i yermañu an ti icʼyochʼañiyel i woli ti xʌmbal baqui icʼyochʼan, i mach yujilic baqui woliʼ majlel come jiñi icʼyochʼañiyel tsiʼ mʌcbe i wut.

12 Cʼuxbibil bʌ calobilob, mic tsʼijbubeñetla come tsaʼix ñusʌbentiyetla laʼ mul tiʼ cʼabaʼ.* 13 Tatʌlob, mic tsʼijbubeñetla come tsaʼix laʼ cʌñʌ jiñi am bʌ cʼʌlʌl tiʼ cajibal. Xcolelob, mic tsʼijbubeñetla come tsaʼix laʼ mʌlbe* jiñi Satanás.* Alʌlob, mic tsʼijbubeñetla come tsaʼix laʼ cʌñʌ jiñi Tatʌl. 14 Tatʌlob, mic tsʼijbubeñetla come tsaʼix laʼ cʌñʌ jiñi am bʌ cʼʌlʌl tiʼ cajibal. Xcolelob, mic tsʼijbubeñetla come pʼʌtʌletla i an ti laʼ tojlel jiñi i tʼan Dios, i tsaʼix laʼ mʌlbe jiñi Satanás.*

15 Mach laʼ cʼuxbin jiñi pañimil mi jiñicto chuqui tac an ti pañimil. Mi an muʼ bʌ i cʼuxbin jiñi pañimil, maʼañic miʼ cʼuxbin jiñi Tatʌl. 16 Come pejtelel chuqui an ti pañimil, bajcheʼ chuqui tac yom lac bʌcʼtal, chuqui tac miʼ mulan lac wut yicʼot i cʌlʌx pʌsol chuqui tac an lac chaʼan, mach tilemic ti jiñi Tatʌl, tilem ti pañimil. 17 Cheʼ jaʼel, jiñi pañimil mi caj i jilel, i pejtelel chuqui an ti pañimil muʼ bʌ i mulan jiñi lac piʼʌlob mi caj i jilel jaʼel, pero jiñi muʼ bʌ i mel chuqui yom Dios cuxul miʼ yajñel tiʼ pejtelel ora.

18 Alʌlob, jiñix jiñi cojix bʌ hora. Jatetla tsaʼ laʼ wubi chaʼan mi caj i tilel jiñi muʼ bʌ i contrajin Cristo.* Cheʼto jaʼel, wʌleʼli tsaʼix i pʌsʌyob i bʌ cabʌlob muʼ bʌ i contrajiñob Cristo, i jin chaʼan la cujil chaʼan jiñix jiñi cojix bʌ hora. 19 Jiñiyobi tsaʼ loqʼuiyob ti lac tojlel, pero mach lac chaʼañobic, come cheʼ lac chaʼañobiqui, tsaʼ cʌyleyob yicʼotonla. Pero tsaʼ loqʼuiyob chaʼan tsiquil miʼ cʌytʌl chaʼan mach luʼ lac chaʼañobic. 20 Jatetla tsiʼ yajcayetla jiñi chʼujul bʌ, i laʼ cʌñʌyix jiñi i sujmlel ti laʼ pejtelel. 21 Mic tsʼijbubeñetla mach chaʼañic mach laʼ cʌñʌyic jiñi i sujmlel, mic tsʼijbubeñetla come laʼ cʌñʌyʌch i come mi jumpʼejlic lot tilem ti jiñi i sujmlel.

22 ¿Majqui jiñi xlot? ¿Mach ba jiñic muʼ bʌ i yʌl chaʼan Jesús mach jiñic jiñi Cristo? Ili jiñʌch muʼ bʌ i contrajin Cristo: Jiñi maʼañic bʌ miʼ ñop ti jiñi Tatʌl yicʼot i Yalobil. 23 Majqui jach maʼañic bʌ miʼ ñop jiñi i Yalobil Dios mach utsʼatic miʼ qʼuejlel ti jiñi Tatʌl jaʼel. Pero jiñi muʼ bʌ i sub chaʼan miʼ ñop jiñi i Yalobil Dios utsʼatʌch miʼ qʼuejlel ti jiñi Tatʌl jaʼel. 24 I jatetla, laʼ chʌn ajñic ti laʼ tojlel jiñi tsaʼ bʌ laʼ wubi cʼʌlʌl tiʼ cajibal. Mi mucʼʌch i chʌn ajñel ti laʼ tojlel jiñi tsaʼ bʌ laʼ wubi cʼʌlʌl tiʼ cajibal, chʌn temel mi caj laʼ wajñel laʼ wicʼot jiñi i Yalobil Dios yic’ot jiñi Tatʌl. 25 Cheʼ jaʼel, ili jiñʌch tsaʼ bʌ i yʌlʌ Dios chaʼan mi caj i yʌqʼueñonla: Jiñi cuxtʌlel mach bʌ añic miʼ jilel.

26 Mic tsʼijbubeñetla iliyi tiʼ tojlel jiñi muʼ bʌ i ñopob i lotiñetla. 27 Pero jatetla, Dios tsiʼ yajcayetla ti jiñi i pʼʌtʌlel, ili pʼʌtʌlel miʼ chʌn ajñel ti laʼ tojlel, i mach cʼʌñʌlic laʼ chaʼan an majqui yambʌ miʼ cʌntesañetla. Pero ili i pʼʌtʌlel i sujmʌch, mach lotic i jiñʌch woliʼ pʌsbeñetla pejtelel chuqui an. Yom chʌn temel laʼ wicʼot, cheʼ bajcheʼ an i pʌsbeyetla. 28 Jin chaʼan wʌle, cʼuxbibil bʌ calobilob, yom chʌn temel laʼ wicʼot, chaʼan cheʼ bʌ miʼ tsictiyel, librejonla chaʼan mi lac chaʼlen tʼan i mach yicʼotic laj quisin mi lac tʌtsʼ lac bʌ* tiʼ tojlel cheʼ bʌ wʌʼix an.* 29 Mi laʼ wujil chaʼan Jesús tojʌch, laʼ wujil jaʼel chaʼan pejtelel muʼ bʌ i mel chuqui toj i yalobilʌch Dios.