Romanos

8 Jin chaʼan, jiñi temeloʼ bʌ yicʼot Cristo Jesús maʼañobic i mul. 2 Come jiñi mandar muʼ bʌ i yʌcʼ jiñi espíritu tiʼ tojlel Cristo Jesús tsiʼ locʼsayetla tiʼ mandar jiñi mulil yicʼot chʌmel. 3 Dios tsiʼ mele mach bʌ añic miʼ mejlel i mel jiñi Mandar come jiñi Mandar maʼañic i pʼʌtʌlel tiʼ caj jiñi mulil am bʌ tiʼ tojlel lac piʼʌlob, maʼañic miʼ mejlel i jisan mulil. Jin chaʼan Dios tsiʼ choco tilel i Yalobil bajcheʼ wiñic* chaʼan miʼ jisan mulil. Cheʼ bajcheʼ jiñi, tsiʼ jisʌbe i pʼʌtʌlel jiñi mulil ti lac bʌcʼtal, 4 chaʼan miʼ tsʼʌctiyel ti lac tojlel muʼ bʌ i cʼajtin jiñi toj bʌ i Mandar Dios, joñonla mach bʌ añic mi lac mel cheʼ bajcheʼ yom lac bʌcʼtal, jin bajcheʼ yom jiñi espíritu. 5 Come jiñi chumuloʼ bʌ cheʼ bajcheʼ yomob i bʌcʼtal miʼ yʌcʼob i ñaʼtʌbal ti chuqui yomob i bʌcʼtal, pero jiñi chumuloʼ bʌ cheʼ bajcheʼ yom jiñi espíritu miʼ yʌcʼob i ñaʼtʌbal ti chuqui tac yom jiñi espíritu. 6 Cheʼ mi la cʌcʼ lac ñaʼtʌbal ti lac bʌcʼtal miʼ yʌcʼonla ti chʌmel, pero cheʼ mi la cʌcʼ lac ñaʼtʌbal ti jiñi espíritu miʼ yʌqʼueñonla cuxtʌlel yicʼot ñʌchʼtʌlel, 7 cheʼ mi la cʌcʼ lac ñaʼtʌbal ti lac bʌcʼtal mi lac sujtel tiʼ contra Dios come jiñi lac bʌcʼtal mach chuculic tiʼ mandar Dios i maʼañic miʼ mejlel i chuc i bʌ tiʼ tojlel. 8 Jin chaʼan, jiñi chumuloʼ bʌ cheʼ bajcheʼ yomob i bʌcʼtal maʼañic miʼ mejlel i tijicñesañob Dios.

9 Pero miʼ sujmʌch an ti laʼ tojlel jiñi i yespíritu Dios, mach chumuleticla cheʼ bajcheʼ yom laʼ bʌcʼtal, cheʼʌch bajcheʼ yom jiñi espíritu. Pero mi an mach bʌ añic i chaʼan jiñi i yespíritu Cristo, jiñi lac piʼʌl mach i chaʼañic Cristo. 10 Pero mi Cristo temel yicʼotetla, chʌmen jiñi laʼ bʌcʼtal tiʼ caj jiñi mulil, i jiñi espíritu miʼ yʌcʼ cuxtʌlel chaʼan tsaʼ sujbiyetla ti toj. 11 Mi an ti laʼ tojlel jiñi espíritu tsaʼ bʌ i chʼojyesa* Jesús yaʼ baqui an chʌmeñoʼ bʌ, jiñi tsaʼ bʌ i chʼojyesa Cristo Jesús yaʼ baqui an chʌmeñoʼ bʌ mi caj i cʼʌn jiñi i yespíritu chaʼan miʼ yʌqʼueñetla jaʼel jiñi cuxtʌlel yaʼ ti laʼ bʌcʼtal yujil bʌ chʌmel.

12 Cheʼʌchi hermanojob, wersa an chuqui yom mi lac mel, pero mach xicʼbiloñicla chaʼan mi lac mel chuqui yom jiñi lac bʌcʼtal. 13 Mi chumuletla cheʼ bajcheʼ yom laʼ bʌcʼtal, mi caj laʼ chʌmel. Pero, mi tiʼ coltaya jiñi espíritu mi laʼ tsʌnsan jiñi mach bʌ wen taquic ti laʼ bʌcʼtal, cuxul mi caj laʼ wajñel. 14 Come pejtelel jiñi chumuloʼ bʌ cheʼ bajcheʼ yom jiñi i yespíritu Dios i yalobilobʌch Dios. 15 Come jatetla mach jiñic tsaʼ aqʼuentiyetla jiñi espíritu muʼ bʌ i sujtesañetla ti xyaj eʼtel muʼ bʌ i chaʼ aqʼuetla ti bʌqʼuen, jatetla tsaʼ aqʼuentiyetla jiñi espíritu muʼ bʌ i chʼʌmetla tiʼ yalobil, jiñi espíritu muʼ bʌ i ñijcañonla la cʌl: «¡Abba,* c Tat!». 16 Jiñi espíritu miʼ jamʌ subeñonla ti lac pusicʼal chaʼan i yalobilonla Dios. 17 Pero miʼ yalobilonla Dios, mi caj lac taj jiñi yom bʌ i yʌqʼueñonla. Mi caj i yʌqʼueñonla jaʼel jiñi muʼ bʌ caj i yʌqʼuen Cristo mi mucʼʌch lac ñusan wocol la quicʼot Cristo chaʼan mi la cʌqʼuentel lac ñuclel la quicʼot.

18 Jin chaʼan, mic ñaʼtan chaʼan jiñi wocol tac am bʌ ili ora maʼañic chuquiyes cheʼ mi lac laj yicʼot jiñi ñuclel muʼ bʌ caj i tsictiyel ti lac tojlel. 19 Come jiñi melbil tac bʌ wen yomix i qʼuel cheʼ bʌ miʼ tsictiyel jiñi i yalobilob Dios. 20 Come jiñi melbil tac bʌ maʼañic i cʼʌjñibal tsaʼ sujtesʌnti, mach chaʼañic cheʼ bajñel yom, chaʼañʌch cheʼ yom jiñi tsaʼ bʌ i jisʌbe i cʼʌjñibal, yaʼ tsiʼ chucu i bʌ ti jiñi pijtaya 21 chaʼan jiñi melbil tac bʌ mi caj i cojlel bajcheʼ xyaj eʼtel i chaʼan jiñi mulil i libre mi caj i sujtelob bajcheʼ jiñi i yalobilob Dios. 22 La cujil chaʼan pejtelel jiñi melbil tac bʌ juntemel woliyob ti ajacñiyel yicʼot i yubiñob wocol cʼʌlʌl ili ora. 23 Mach cojic jach jiñi, yicʼotʌch joñonla, cheʼʌchi, joñonla tsaʼix bʌ tʼox aqʼuentiyonla jiñi lac majtan, ili jiñʌch jiñi chʼujul bʌ espíritu, woliyonla ti ajacñiyel ti lac pusicʼal jaʼel cheʼ bʌ wolito lac pijtan yicʼot lac tijicñʌyel chaʼan mi lac chʼʌjmel bajcheʼ i yalobil Dios, cheʼ bʌ mi lac locʼsʌntel tiʼ pʼʌtʌlel mulil. 24 Come tsaʼ coltʌntiyonla ti jiñi pijtaya. Pero jiñi pijtaya muʼ bʌ lac taj laj qʼuel mach pijtayajix, come ¿bajcheʼ miʼ mejlel i pijtan juntiquil lac piʼʌl jiñi wolix bʌ i qʼuel? 25 Pero mi woli lac pijtan jiñi mach bʌ añic mi lac taj laj qʼuel, mi lac chʌn pijtan cheʼ bʌ wolito laj cuch wocol.

26 Cheʼ jaʼel, jiñi espíritu miʼ tilel i coltañonla cheʼ bʌ cʼuñonla. Come jiñi wocol jin cheʼ an qʼuiñil mach la cujilic chuqui yom mi laj cʼajtin ti oración, pero jiñi chʼujul bʌ espíritu miʼ cʼajtiben Dios chaʼan miʼ coltañonla cheʼ bʌ an bajcheʼ yubil mi la cubin ti lac pusicʼal i maʼañic miʼ mejlel la cʌl. 27 Pero jiñi muʼ bʌ i wen tsajin* lac pusicʼal yujil chuqui yom jiñi espíritu come cheʼʌch bajcheʼ yom Dios miʼ cʼajtin ti wocol tʼan jiñi espíritu tiʼ wenta jiñi chʼujuloʼ bʌ.

28 La cujil chaʼan Dios miʼ mel chaʼan pejtelel melbil tac bʌ i chaʼan miʼ tem chaʼleñob eʼtel chaʼan i wenlel jiñi muʼ bʌ i cʼuxbiñob Dios, jiñi tsaʼ bʌ yajcʌntiyob chaʼan miʼ melob chuqui yom. 29 Come jiñi tsaʼ bʌ i ñaxan qʼueleyob tsiʼ wʌn yajcayob jaʼel chaʼan cheʼ yilal miʼ sujtelob bajcheʼ jiñi i Yalobil, chaʼan miʼ sujtel ti ñaxan tiʼ tojlel cabʌl hermanojob. 30 Cheʼ jaʼel, jiñi tsaʼ bʌ i wʌn yajcayob, tsiʼ pʌyʌyob jaʼel, i jiñi tsaʼ bʌ i pʌyʌyob, tiʼ subeyob chaʼan tojob. Ti wiʼil, jiñi tsaʼ bʌ i subeyob chaʼan tojob, tsiʼ yʌqʼueyob i ñuclel.

31 Cheʼ jiñi, ¿chuqui mi caj la cʌl chaʼan tac iliyi? Mi Dios an yicʼotonla, ¿majqui mi caj i mejlel i contrajiñonla? 32 Maʼañic tsiʼ ñaʼta chaʼan maʼañic miʼ yʌcʼ i Yalobil, tsiʼ yʌcʼʌ chaʼañonla ti lac pejtelel, ¿maʼañic ba mi caj i yʌqʼueñonla yicʼot i yutslel pejtelel jiñi yan tac bʌ anquese tsaʼix i yʌqʼueyonla i Yalobil? 33 ¿Majqui mi caj i chaʼlen tʼan tiʼ contra jiñi yajcʌbiloʼ bʌ i chaʼan Dios? Dios jiñʌch muʼ bʌ i yʌl chaʼan tojob. 34 ¿Majqui mi caj i chaʼlen meloñel ti lac tojlel? Maʼañic majqui come Cristo Jesús jiñʌch tsaʼ bʌ chʌmi, i mach cojic jach jiñi, jiñʌch tsaʼ bʌ chʼojyesʌnti, jiñi am bʌ tiʼ ñoj Dios i miʼ cʼajtin ti wocol tʼan chaʼañonla jaʼel.

35 ¿Chuqui mi caj i tʌtsʼonla* tiʼ cʼuxbiya Cristo? ¿Jimba jiñi wocol tac? ¿Jimba jiñi cʼojol tac?* ¿Jimba jiñi contrajintel? ¿Tiʼ caj ba mach wen añic lac pislel? ¿Tiʼ caj ba bʌbʌqʼuen mi lac chʌmel? ¿Jimba jiñi espada? 36 Cheʼʌch tsʼijbubil: «Ti a caj woli lon c tsʌnsʌntel tiʼ pejtelel ora. Mi lon j qʼuejlel bajcheʼ tiñʌmeʼ tac chaʼan bʌ miʼ tsʌnsʌntel». 37 Pero wocolix i yʌlʌ jiñi tsaʼ bʌ i cʼuxbiyonla, tsaʼ lac mʌlbe* pejtelel iliyi. 38 Come mic wen ñop chaʼan mi jiñicto jiñi chʌmel o jiñi cuxtʌlel, mi jiñicto jiñi ángelob o yumʌlob, mi jiñicto jiñi an tac bʌ ili ora o muʼto bʌ caj i tilel, mi jiñicto jiñi pʼʌtʌlel tac, 39 mi jiñicto am bʌ ti chan o am bʌ tiʼ yebal, mi jiñicto yan tac bʌ melbil bʌ mi caj i mejlel i tʌtsʼonla tiʼ cʼuxbiya Dios am bʌ ti lac Yum Cristo Jesús.