1 Juan

5 Pejtelel muʼ bʌ i ñop chaʼan Jesús jiñʌch jiñi Cristo, i yalobilʌch Dios. I pejtelel muʼ bʌ i cʼuxbin Dios miʼ cʼuxbin jiñi i Yalobil Dios. 2 La cujil chaʼan mi laj cʼuxbin i yalobilob Dios chaʼan iliyi: Mi mucʼʌch laj cʼuxbin Dios i mi lac tsʼʌctesʌben jiñi i mandar tac. 3 Come jiñi i cʼuxbintel Dios jiñʌch iliyi: Yom mi lac jacʼben jiñi i mandar tac, i jiñi i mandar tac mach wocolic ti jacʼol, 4 come pejtelel i yalobil bʌ Dios miʼ mʌlben* ili pañimil. Ili jiñʌch tsaʼ bʌ i mʌlbe ili pañimil: Jiñi lac ñopoñel.

5 ¿Majqui miʼ mejlel i mʌlben ili pañimil? ¿Mach ba jiñic muʼ bʌ i ñop chaʼan Jesús i Yalobilʌch Dios? 6 Ili jiñʌch tsaʼ bʌ tili yicʼot jaʼ i yicʼot chʼichʼ, Jesucristo, mach yicʼotic jach jaʼ, yicʼotʌch jaʼ i yicʼot chʼichʼ. I jiñi chʼujul bʌ espíritu miʼ yʌcʼ ti tsictiyel, come jiñi espíritu i sujmʌch. 7 Come ili uxchajp jiñʌch muʼ bʌ i jamʌ tsictesan: 8 Jiñi espíritu, jiñi jaʼ yicʼot jiñi chʼichʼ, i lajal jach chuqui miʼ yʌcʼ ti cʌñol ili uxchajp.

9 Mi joñonla mi lac ñop muʼ bʌ i yʌl jiñi wiñicob, jiñi muʼ bʌ i yʌl Dios ñumen ñuc, come Dios miʼ yʌl majqui jiñi i Yalobil. 10 Jiñi muʼ bʌ i yʌcʼ i ñopoñel tiʼ tojlel i Yalobil Dios miʼ pʌs chaʼan jiñi tʼan tsaʼ bʌ i pʌsbe Dios an tiʼ pusicʼal. Jiñi maʼañic bʌ i ñopoñel ti Dios woliʼ cuy ti xlot, come maʼañic tsiʼ yʌcʼʌ i ñopoñel ti jiñi tsaʼ bʌ i yʌlʌ Dios tiʼ tojlel i Yalobil. 11 Ili jiñʌch muʼ bʌ i yʌl: Dios tsiʼ yʌqʼueyonla laj cuxtʌlel mach bʌ añic miʼ jilel, i jiñi cuxtʌlel an tiʼ Yalobil. 12 Jiñi xcʌntʼan bʌ i chaʼan jiñi i Yalobil Dios an i chaʼan jiñi cuxtʌlel, jiñi mach bʌ xcʌntʼañic i chaʼan jiñi i Yalobil Dios maʼañic i chaʼan jiñi cuxtʌlel.

13 Mic tsʼijbubeñetla iliyi chaʼan jatetla, muʼ bʌ laʼ wʌcʼ laʼ ñopoñel tiʼ cʼabaʼ i Yalobil Dios, mi laʼ ñaʼtan chaʼan an laʼ chaʼan jiñi cuxtʌlel mach bʌ añic miʼ jilel. 14 Ili jiñʌch muʼ bʌ lac ñop tiʼ tojlel: Miʼ mejlel laj cʼajtiben chuqui jach la com mi lajalʌch yicʼot jiñi muʼ bʌ i mulan i mucʼʌch i ñʌchʼtañonla. 15 I mi la cujil chaʼan mucʼʌch i ñʌchʼtañonla cheʼ bʌ mi laj cʼajtiben chuqui jach la com, la cujil chaʼan mucʼʌch caj lac taj jiñi tsaʼ bʌ laj cʼajti come jiñʌch tsaʼ laj cʼajtibe.

16 Mi an muʼ bʌ i taj i qʼuel chaʼan jiñi i yermañu woliʼ mel jumpʼejl mulil maʼañic bʌ miʼ yʌcʼ chʌmel, yom miʼ chaʼlen oración tiʼ tojlel, i Dios mi caj i yʌqʼuen i cuxtʌlel. Ili jiñʌch tiʼ tojlel jiñi muʼ bʌ i melob mulil maʼañic bʌ miʼ yʌcʼ chʌmel. An jumpʼejl mulil mucʼʌch bʌ i yʌcʼ chʌmel. Joñon maʼañic mi cʌl chaʼan an majqui yom miʼ chaʼlen oración chaʼan jiñi mulil. 17 Pejtelel mach bʌ tojic jumpʼejlʌch mulil, pero an jumpʼejl mulil maʼañic bʌ miʼ yʌcʼ chʌmel.

18 La cujil chaʼan mi juntiquilic i yalobil bʌ Dios miʼ chaʼlen mulil, jiñi i Yalobil* Dios miʼ cʌntan, i Satanás* maʼañic miʼ mejlel i ticʼlan. 19 La cujil chaʼan joñonla tilemonla ti Dios, pero jiñi pañimil an tiʼ pʼʌtʌlel Satanás.* 20 I la cujil chaʼan tsajñi jiñi i Yalobil Dios, i tsiʼ yʌqʼueyonla lac ñaʼtʌbal chaʼan mi laj cʌn jiñi i sujm bʌ. I tiʼ tojlel Jesucristo, jiñi i Yalobil, temelonla la quicʼot jiñi i sujm bʌ. Jiñi jiñʌch i sujm bʌ Dios yicʼot jiñi cuxtʌlel mach bʌ añic miʼ jilel. 21 Cʼuxbibil bʌ calobilob, cʌntan laʼ bʌ ti jiñi melbil tac jach bʌ dios.