1 Juan

3 ¡Qʼuelela bajcheʼ cʼamel miʼ cʼuxbiñonla jiñi Tatʌl, jin chaʼan muʼto lac subentel tiʼ yalobilob Dios! I tiʼ sujm i yalobiloñʌchla. Jin chaʼan jiñi pañimil mach i cʌñʌyoñicla, come mach i cʌñʌyobic Dios. 2 Cʼuxbibiletbʌla, wʌle i yalobiloñixla Dios, pero maxto laj tsictiyemic chaʼan bʌ jiñi laj cuxtʌlel ti talto bʌ qʼuin. La cujil chaʼan cheʼ bʌ Dios miʼ tsictiyel cheʼ mi caj lac sujtel bajcheʼ yilal jaʼel, come mi caj laj qʼuel bajcheʼ ñoj yilal. 3 I pejtelel am bʌ i chaʼan ili pijtaya tiʼ tojlel miʼ bajñel sʌqʼuesan i bʌ, come Dios sʌcʌch.

4 Pejtelel muʼ bʌ i chaʼlen mulil woliʼ ñusan ti pʼis jiñi mandar, jiñi mulil jiñʌch cheʼ miʼ ñusʌntel ti pʼis jiñi mandar. 5 Jatetla laʼ wujil chaʼan Jesús tsajñi chaʼan miʼ jisan lac mul, i maʼañic mulil tiʼ tojlel. 6 Mi juntiquilic temel bʌ yicʼot miʼ chʌn chaʼlen mulil, mi juntiquilic muʼ bʌ i chaʼlen mulil qʼuelbil i chaʼan i mi cʌmbilicto i chaʼan. 7 Cʼuxbibil bʌ calobilob, maʼañic majqui yom miʼ lotiñetla. Jiñi muʼ bʌ i mel chuqui toj, tojʌch, cheʼ bajcheʼ Jesús toj jaʼel. 8 Jiñi muʼ bʌ i chaʼlen mulil tilem ti Diablo, come jiñi Diablo woliʼ chaʼlen mulil cʼʌlʌl tiʼ cajibal. Jin chaʼan tsajñi jiñi i Yalobil Dios, chaʼan miʼ jisʌben i yeʼtel jiñi Diablo.

9 Mi juntiquilic i yalobil bʌ Dios miʼ chaʼlen mulil, come jiñi i yespíritu Dios an tiʼ tojlel, i maʼañic miʼ mejlel i chaʼlen mulil come i yalobil Dios. 10 Jiñi i yalobilob Dios yic’ot jiñi i yalobilob Diablo miʼ cʌjñelob tiʼ caj iliyi: Jiñi maʼañic bʌ miʼ mel chuqui toj mach tilemic ti Dios, mi jiñicto jiñi maʼañic bʌ miʼ cʼuxbin i yermañu. 11 Come ili jiñʌch jiñi tʼan tsaʼ bʌ laʼ wubi cʼʌlʌl tiʼ cajibal: Chaʼan yom mi laj comol cʼuxbin lac bʌ, 12 mach cheʼic bajcheʼ Caín, tsaʼ bʌ tili ti Satanás* i tiʼ tsʌnsa i yijtsʼin. ¿I chucoch tiʼ tsʌnsa? Come jontol jiñi i melbal pero toj i melbal jiñi i yijtsʼin.

13 Hermanojob, mach yomic miʼ toj sajtel laʼ pusicʼal cheʼ bʌ jiñi pañimil woliʼ tsʼaʼleñetla. 14 Joñonla la cujil chaʼan ti ñaxan lajal bajcheʼ chʌmeñonla, pero wʌle cuxulonla come mi laj cʼuxbin la quermañujob. Jiñi mach bʌ yujilic cʼuxbiya lajal bajcheʼ chʌmento. 15 Pejtelel muʼ bʌ i tsʼaʼlen i yermañu juntiquilʌch xtsʌnsa, i jatetla laʼ wujil chaʼan mi juntiquilic xtsʌnsa mi caj i taj jiñi cuxtʌlel mach bʌ añic miʼ jilel. 16 Tsaʼ laj cʌñʌ chuquiyes jiñi cʼuxbiya tiʼ caj iliyi: Come Jesucristo tsiʼ yʌcʼʌ i cuxtʌlel ti lac tojlel, i joñonla yom mi lac wersa acʼ laj cuxtʌlel tiʼ tojlel la quermañujob. 17 Pero mi an juntiquil am bʌ i chubʌʼan ti pañimil i miʼ qʼuel chaʼan jiñi i yermañu anto chuqui yom i chaʼan pero maʼañic miʼ pʌsben i pʼuntaya, ¿bajcheʼ miʼ mejlel i yʌl chaʼan miʼ cʼuxbin Dios? 18 Cʼuxbibil bʌ calobilob, jiñi laj cʼuxbiya mach yomic jach miʼ tsictiyel ti chuqui mi la cʌl, yom tsiquil ti chuqui mi lac mel yicʼot yom i sujmʌch.

19 Cheʼ bajcheʼ jiñi, la cujil chaʼan tilemonla ti jiñi i sujmlel i mi caj lac wen ñop chaʼan Dios mucʼʌch i cʼuxbiñonla, 20 anquese jiñi lac pusicʼal miʼ subeñonla chaʼan an lac mul, come Dios ñumen ñuc bajcheʼ jiñi lac pusicʼal i laj i cʌñʌ chuqui an. 21 Cʼuxbibiletbʌla, mi jiñi lac pusicʼal maʼañic miʼ subeñonla chaʼan an lac mul, miʼ mejlel lac pejcan Dios i mach yicʼotic lac bʌqʼuen, 22 i pejtelel chuqui mi laj cʼajtiben mucʼʌch i yʌqʼueñonla, come woli lac jacʼben i mandar tac yicʼot woli lac mel chuqui miʼ mulan. 23 Tiʼ sujm, ili jiñʌch jiñi i mandar: Chaʼan yom an lac ñopoñel tiʼ cʼabaʼ Jesucristo, jiñi i Yalobil, yicʼot chaʼan yom mi lac tem cʼuxbin lac bʌ, cheʼ bajcheʼ tiʼ subeyonla. 24 Cheʼ jaʼel, jiñi muʼ bʌ i jacʼben i mandar tac Dios temel miʼ yajñel yicʼot, i Dios temel miʼ yajñel yicʼot jiñi lac piʼʌl. I come miʼ yʌqʼueñonla jiñi i yespíritu, la cujil chaʼan temel miʼ yajñel yicʼotonla.